অনুশাসনপর্ব – অধ্যায় 076
॥ শ্রীঃ ॥
13.76. অধ্যায়ঃ 076
অথ দানধর্মপর্ব ॥ 1 ॥
Mahabharata – Anushaasana Parva – Chapter Topics
ইন্দ্রেণ দেবশর্মমুন্যসন্নিধানে তদ্ভার্যাবিলোভনায় তদাশ্রমাভিগমনম্॥ 1 ॥ তথা বিপুলতপোঽভিভূতেন ভয়াত্ততো নির্গমনম্॥ 2 ॥ বিপুলেন শক্রবৃত্তান্তনিবেদনতুষ্টাদ্গুরোর্বরগ্রহণপূর্বকং তপশ্চরণম্॥ 3 ॥
Mahabharata – Anushaasana Parva – Chapter Text
ভীষ্ম উবাচ।
ততঃ কদাচিদ্দেবেন্দ্রো দিব্যরূপবপুর্ধরঃ।
ইদমন্তরমিত্যেবমভ্যগাত্তমথাশ্রমম্॥ 13-76-1(84465)
রূপমপ্রতিমং কৃৎবা লোভনীয়ং জনাধিপঃ।
দর্শনীয়তমো ভূৎবা প্রবিবেশ তমাশ্রমম্॥ 13-76-2(84466)
স দদর্শ তমাসীনং বিপুলস্য কলেবরম্।
নিশ্চেষ্টং স্তব্ধনয়নং যতাঽঽলেখ্যগতং তথা॥ 13-76-3(84467)
রুচিং চ রুচিরাপাঙ্গীং পীনশ্রোণিপয়োধরাম্।
পদ্মপত্রবিশালাক্ষীং সম্পূর্ণেন্দুনিভাননাম্॥ 13-76-4(84468)
সা তমালোক্য সহসা প্রত্যুত্তাতুমিয়েষ হ।
রূপেণ বিস্মিতা কোঽসীত্যথ বক্তুমিবেচ্ছতী॥ 13-76-5(84469)
উত্থাতুকামা তু সতী বিষ্টব্ধা বিপুলেন সা।
নিগৃহীতা মনুষ্যেন্দ্র ন শশাক বিচেষ্টিতুম্॥ 13-76-6(84470)
তামাবভাষে দেবেন্দ্রঃ সাম্না পরমবল্*।
ৎবদর্থমাগতং বিদ্ধি দেবেন্দ্র মাং শুচিস্মিতে॥ 13-76-7(84471)
ক্লিশ্যমানমনঙ্গেন ৎবৎসঙ্কল্পভবেন হ।
তৎপর্যাপ্নুহি মাং সুভ্রু পুরা কালোঽতিবর্ততে॥ 13-76-8(84472)
তমেবংবাদিনং শক্রং শুশ্রাব বিপুলো মুনিঃ।
গুরুপত্নয়াঃ শরীরস্থো দদর্শ ত্রিদসাধিপম্॥ 13-76-9(84473)
ন শশাক চ সা রাজন্প্রত্যুত্থাতুমনিন্দিতা।
বক্তুং চ নাশকদ্রাজন্বিষ্টব্দা বিপুলেন সা॥ 13-76-10(84474)
আকারং গুরুপত্ন্যাস্তু স বিজ্ঞায় ভৃগূদ্বহঃ।
নিজয়্নাহ মহাতেজা যোগেন বলবৎপ্রভো।
ববন্ধ যোগবন্ধৈশ্চ তস্যাঃ সর্বেন্দ্রিয়াণি সঃ॥ 13-76-11(84475)
তাং নির্বিকারাং দৃষ্ট্বা তু পুনরেব শচীপতিঃ।
উবাচ ব্রীহিতো রাজংস্তাং যোগবলমোহিতাম্॥ 13-76-12(84476)
এহ্যেহীতি ততঃ সা তু প্রতিবক্তুমিয়েষ তম্।
স তাং বাচ্যং গুরোঃ পত্ন্যা বিপুলঃ পর্যবর্তয়ৎ॥ 13-76-13(84477)
ভোঃ কিমাগমনে কৃত্যমিতি তস্যাস্তু নিঃসৃতা।
বক্ত্রাচ্ছশাঙ্কসদৃশাদ্বাণী সংস্কারভূষণা॥ 13-76-14(84478)
বীডিতা সা তু তদ্বাক্যমুক্ৎবা পরবশা তদা।
পুরন্দরশ্চ সংত্রস্তো বভূব বিমনা ভৃশম্॥ 13-76-15(84479)
স তদ্বৈকৃতমালক্ষ্য দেবরাজো বিশাংপতে।
অবৈক্ষত সহস্রাক্ষস্তদা দিব্যেন চক্ষুষা॥ 13-76-16(84480)
স দদর্শ মুনিং তস্যাঃ শরীরান্তরগোচরম্।
প্রতিবিম্বমিবাদর্শে গুরুপত্ন্যাঃ শরীরগম্॥ 13-76-17(84481)
স তং ঘোরেণ তপসা যুক্তং দৃষ্ট্বা পুরংদরঃ।
প্রাবেপত সুসংত্রস্তো ব্রীডিতশ্চ তদা বিভো॥ 13-76-18(84482)
বিমুচ্য গুরুপত্নীং তু বিপুলঃ সুমহাতপাঃ।
স্বকলেবরমাবিশ্য শক্রং ভীতমথাব্রবীৎ॥ 13-76-19(84483)
অজিতেন্দ্রিয় দুর্বুদ্ধে পাপাত্মক পুরংদর।
ন চিরং পূজয়িষ্যন্তি দেবাস্ৎবাং মানুষাস্তথা॥ 13-76-20(84484)
কিন্নু তদ্বিস্মৃতং শক্র ন তন্মনসি তে স্থিতম্।
গৌতমেনাসি যন্মুক্তো ভগাঙ্কপরিচিহ্নিতঃ॥ 13-76-21(84485)
জানে ৎবাং বালিশমতিমকৃতাত্মানমস্থিরম্।
ময়েয়ং রক্ষ্যতে মূঢ গচ্ছ পাপ যথাগতম্॥ 13-76-22(84486)
নাহং ৎবামদ্য মূঢাত্মন্দহেয়ং হি স্বতেজসা।
কৃপায়মানস্তু ন তে দগ্ধুমিচ্ছামি বাসব॥ 13-76-23(84487)
স চ ঘোরতমো ধীমান্গুরুর্মে পাপচেতসম্।
দৃষ্ট্বা ৎবাং নির্দহেদদ্য ক্রোধদীপ্তেন চক্ষুষা॥ 13-76-24(84488)
নৈবং তু শক্র কর্তব্যং পুনর্মান্যাশ্চ তে দ্বিজাঃ।
মা গমঃ সসুতামাত্যঃ ক্ষয়ং ব্রহ্মবলার্দিতঃ॥ 13-76-25(84489)
অমরোস্মীতি যদ্বুদ্ধিং সমাস্থায় প্রবর্ততে।
মাবমংস্থা ন তপসা ন সাধ্যং নাম কিঞ্চন॥ 13-76-26(84490)
ভীষ্ম উবাচ। 13-76-27x(7019)
তচ্ছ্রুৎবা বচনং শক্রো বিপুলস্য মহাত্মনঃ।
ন কিঞ্চিদুক্ৎবা ব্রীডার্তস্তত্রৈবান্তরধীয়ত॥ 13-76-27(84491)
মুহূর্তয়াতে তস্মিংস্তু দেবশর্মা মহাতপাঃ।
কৃৎবা যজ্ঞং যথাকামমাজগাম স্বমাশ্রমম্॥ 13-76-28(84492)
আগতেঽথ গুরৌ রাজন্বিপুলঃ প্রিয়কর্মকৃৎ।
রক্ষিতাং গুরেব ভার্যাং ন্যবেদয়দনিন্দিতাম্॥ 13-76-29(84493)
অভিবাদ্য চ শান্তাত্মা স গুরুং গুরুবৎসলঃ।
বিপুলঃ পর্যুপাতিষ্ঠদ্যথাপূর্বমশঙ্কিতঃ॥ 13-76-30(84494)
বিশ্রান্তায় ততস্তস্মৈ সহাসীনায় ভার্যযা।
নিবেদয়ামাস তদা বিপুলঃ শক্রকর্ম তৎ॥ 13-76-31(84495)
তচ্ছুৎবা স মুনিস্তুষ্টোং বিপুলস্য প্রতাপবান্।
বভূব শীলবৃত্তাভ্যাং তপসা নিয়মেন চ॥ 13-76-32(84496)
বিপুলস্য গুরৌ বৃত্তিং ভক্তিমাত্মনি তৎপ্রভুঃ।
ধর্মে চ স্থিরতাং দৃষ্ট্বা সাধুসাধ্বিত্যভাষত॥ 13-76-33(84497)
প্রতিনন্দ্য চ ধর্মাত্মা শিষ্যং ধর্মপরায়ণম্।
বরেণ চ্ছন্দয়ামাস দেবশর্মা মহামতিঃ॥ 13-76-34(84498)
স্থিতিং চ ধর্মে জগ্রাহ স তস্মাদ্গুরুবৎসলঃ।
অনুজ্ঞাতশ্চ গুরুণা চচারানুত্তমং তপঃ॥ 13-76-35(84499)
তথৈব দেবশর্মাপি সভার্যঃ স মহাতপাঃ।
নির্ভয়ো বলবৃত্রঘ্নাচ্চচার বিজনে বনে॥ ॥ 13-76-36(84500)
ইতি শ্রীমন্মহাভারতে অনুশাসনপর্বণি দানধর্মপর্বণি ষট্সপ্ততিতমোঽধ্যায়ঃ॥ 76 ॥
Mahabharata – Anushaasana Parva – Chapter Footnotes
7-76-20 কামাত্মক পুরন্দরেতি ধ.পাঠঃ॥