সভাপর্ব – অধ্যায় 034

সভাপর্ব – অধ্যায় 034
॥ শ্রীঃ ॥
2.34. অধ্যায়ঃ 034
Mahabharata – Sabha Parva – Chapter Topics
স্মৃতিমাত্রাগতঘটোৎকচলঙ্কাপ্রেষণবৃত্তান্তস্য বিস্তরেণ কথনম্॥1॥ কৃষ্ণগৌরবেণ বিভীষণেন করদানম্॥ 2॥ বিভীষণাৎকরণাহৃতবতা ঘটোৎকচেন সহ সহদেবস্য প্রতিনিবর্তনম্॥ 3॥
Mahabharata – Sabha Parva – Chapter Text


বৈশম্পায়ন উবাচ॥

সহদেবস্ততো রাজা মন্ত্রিভিঃ সহ ভারত।
সম্প্রধার্য মহাবাহুঃ সচিবৈর্বুদ্ধিমত্তরৈঃ॥ 2-34-1(12720)
স বিচার্য তদা রাজন্সহদেবস্ৎবরান্বিতঃ।
চিন্তয়ামাস রাজেন্দ্র ভ্রাতুঃ পুত্রং ঘটোৎকচম্॥ 2-34-2(12721)
ততশ্চিন্তিতমাত্রে তু রাক্ষসঃ প্রত্যদৃশ্যত।
অতিদীর্ঘো মহাবাহু সর্বাভরণভূষিতঃ॥ 2-34-3(12722)
নীলজীমূতসঙ্কাশস্তপ্তকাঞ্চনকুণ্ডলঃ।
বিচিত্রহারকেয়ূরঃ কিঙ্কিণীমণিভূষিতঃ॥ 2-34-4(12723)
হেমমালী মহাদংষ্ট্রঃ কিরীটী কুক্ষিবন্ধনঃ।
তাম্রকেশো হরিশ্মশ্রুর্ভীমাঙ্গঃ কটকাঙ্গদঃ॥ 2-34-5(12724)
রক্তচন্দনদিগ্ধাঙ্গঃ সূক্ষ্মাম্বরধরো বলী।
বলেন স যয়ৌ তত্র চালয়ন্নিব মেদিনীম্॥ 2-34-6(12725)
ততো দৃষ্ট্বা জনা রাজন্নায়ান্তং পর্বতোপমম্।
ভয়াদ্ধি দুদ্রুবুঃ সর্বে সিংহাৎক্ষুদ্রমৃগা যথা॥ 2-34-7(12726)
আসসাদ চ মাদ্রেয়ং পুলস্ত্যং রাবণো যথা।
অভিবাদ্য ততো রাজন্সহদেবং ঘটোৎকচঃ॥ 2-34-8(12727)
প্রহ্বঃ কৃতাঞ্জলিস্তস্থৌ কিং কার্যমিতি চাব্রবীৎ।
তং পরিষ্বজ্য বাহুভ্যাং মূর্ধ্ন্যুপাঘ্রায় পাণ্ডবঃ॥ 2-34-9(12728)
তং মেরুশিখরাকারমাগতং পাণ্ডুনন্দনঃ।
পূজয়িৎবা সহামাত্যঃ প্রীতো বাক্যমুবাচ হ॥ 2-34-10(12729)
গচ্ছ লঙ্কাং পুরীং বৎস করার্থং মম শাসনাৎ। ॥
তত্র দৃষ্ট্বা মহাত্মানং রাক্ষসেন্দ্রং বিভীষণম্॥ 2-34-11(12730)
রত্নানি রাজসূয়ার্থং বিবিধানি বহূনি চ।
উপাদায় চ সর্বাণি প্রত্যাগচ্ছ মহাবল॥ 2-34-12(12731)
বৈশম্পায়ন উবাচ। 2-34-13x(1446)
পাণ্ডবেনৈবমুক্তস্তু মুদা যুক্তো ঘটোৎকচঃ।
তথেত্যুক্ৎবা মহারাজ প্রতস্যে দক্ষিণাং দিশম্॥ 2-34-13(12732)
প্রয়যৌ দক্ষিণং কৃৎবা সহদেবং ঘটোৎকচঃ।
লঙ্কামভিমুকো রাজন্সমুদ্রং স ব্যলোকয়ৎ॥ 2-34-14(12733)
কূর্মগ্রাহঝষাকীর্ণং মীননক্রৈস্তথাঽঽকুলম্।
শুক্তিব্রাতসমাকীর্ণং শঙ্কানাং নিচয়াকুলম্॥ 2-34-15(12734)
স দৃষ্ট্বা রামসেতুং চ চিন্তয়ন্রামবিক্রমম্॥
গৎবা পারং সমুদ্রস্য দক্ষিণং স ঘটোৎকচঃ॥ 2-34-16(12735)
দদর্শ লঙ্কাং রাজেন্দ্র নাকপৃষ্ঠোপমাং শুভাম্।
প্রাকারেণাবৃতাং রম্যাং শুভদ্বারৈশ্চ শোভিতাম্॥ 2-34-17(12736)
প্রাসাদৈর্বহুসাহস্রৈঃ শ্বেতরক্তৈশ্চ সঙ্কুলাম্।
দিব্যদুন্দুভিনির্হ্রাদামুদ্যানবনশোভিতাম্॥ 2-34-18(12737)
সর্বকালফলৈর্বৃক্ষৈঃ পুষ্পিতৈরুপশোভিতাম্।
পুষ্পগন্ধৈশ্চ সঙ্কীর্ণাং রমণীয়মহারথাম্॥ 2-34-19(12738)
নানারত্নৈশ্চ সম্পূর্ণামিন্দ্রস্যেবামরাবতীম্।
বিবেশ স পুরীং লঙ্কাং রাক্ষসৈশ্চ নিষেবিতাম্॥ 2-34-20(12739)
দদর্শ স পুরীং লঙ্কাং রাক্ষসৈশ্চ নিষেবিতাম্॥
নানাবেষধরান্দক্ষান্নারীশ্চ প্রিয়দর্শনাঃ॥ 2-34-21(12740)
দিব্যমাল্যাম্বরধরা দিব্যভূষণভূষিতাঃ।
মদরক্তান্তনয়নাঃ পীনশ্রোণিপয়োধরাঃ॥ 2-34-22(12741)
ভৈমসেনিং ততো দৃষ্ট্বা হৃষ্টাস্তে বিস্ময়ং গতাঃ।
আসসাদ গৃহং রাজ্ঞ ইন্দ্রস্য সদনোপমম্॥ 2-34-23(12742)
স দ্বারপালমাসাদ্য বাক্যমেতদুবাচ হ। 2-34-24(12743)
ঘটোৎকচ উবাচ॥
কুরূণামৃষ্টবো রাজা পাণ্ডুর্নাম মহাবলঃ॥ 2-34-24x(1447)
কনীয়াংস্তস্য দায়াদঃ সহদেব ইতি শ্রুতঃ।
তেনাহং প্রেষিতো দূতঃ করার্থং কৌরবস্য চ॥ 2-34-25(12744)
দ্রষ্টুমিচ্ছামি রাজেনদ্রং ৎবং ক্ষিপ্রং মাং নিবেদয়। 2-34-26(12745)
বৈশম্পায়ন উবাচ॥
তস্য তদ্বচনং শ্রুৎবা দ্বারপালো মহীপতে॥ 2-34-26x(1448)
তথেত্যুক্ৎবা বিবেশাথ ভবনং স নিবেদকঃ।
প্রাঞ্জলিঃ স্রবমাচষ্ট স্রবাং দূতগিরং তদা॥ 2-34-27(12746)
দ্বারপালবচঃ শ্রুৎবা রাক্ষসেন্দ্রো বিভীষণঃ।
উবাচ বাক্যং ধর্মাত্মা সমীপং মে প্রবেশ্যতাম্॥ 2-34-28(12747)
এবমুক্তস্তু রাজ্ঞা স ধর্মজ্ঞেন মহাত্মনা।
অথনিষ্কম্য সম্ভ্রান্তো দ্বার্স্থোহৈডিম্বমব্রবীৎ॥ 2-34-29(12748)
এহি দূত নৃপং দ্রষ্টুং ক্ষিপ্রং প্রবিশ চ স্বয়ম্।
দ্বারপালবচঃ শ্রুৎবা প্রবিবেশ ঘটোৎকচঃ॥ 2-34-30(12749)
স প্রবিশ্য দদর্শাথ রাক্ষসেন্দ্রস্য মন্দিরম্।
ততঃ কৈলাসসঙ্কাশং তৎপকাঞ্চনতোরণম্॥ 2-34-31(12750)
প্রাকারেণ পরিক্ষিপ্তং গোপুরৈশ্চাপি শোভিতম্।
হর্ম্যপ্রাসাদসম্বাধং নানারত্নোপশোভিতম্॥ 2-34-32(12751)
কাঞ্চনৈস্তাপনীয়ৈশ্চ স্ফাটিকৈ রাজতৈরপি।
বজ্রবৈডূর্যজুষ্টৈশ্চ স্তম্ভৈশ্চ সুমনোহরৈঃ॥ 2-34-33(12752)
নানাধ্বজপতাকাভির্যুক্তং মণিবিচিত্রিতম্।
চিত্রমাল্যাবৃতং রম্যং তপ্তকাঞ্চনবেদিকম্॥ 2-34-34(12753)
স দৃষ্ট্বা তত্র সর্বং চ ভৈমসেনির্মনোহরম্।
প্রবিশন্নেব হৈডিম্বঃ শুশ্রাব মধুরস্বরম্॥ 2-34-35(12754)
তন্ত্রীগীতসমাকীর্ণং সমতালমিতাক্ষরম্।
দিব্যদুন্দুভিনির্হ্রাদং বাদিত্রসততং শুভম্॥ 2-34-36(12755)
স শ্রুৎবা মধুরং শব্দং প্রীতিমানভবত্তদা।
ততো বিগাহ্য হৈডিম্বো বহুকক্ষ্যাং মনোরমাম্॥ 2-34-37(12756)
স দদর্শ মহাত্মানং দ্বার্স্থেন সহ ভারত।
তং বিভীষণমাসীনং কাঞ্চনে পরমাসনে॥ 2-34-38(12757)
দিবি ভাস্করসঙ্কাশং মুক্তামণিবিভূষিতম্।
দিব্যাভরণচিত্রাঙ্গং দিব্যরূপধরং বিভুম্॥ 2-34-39(12758)
দিব্যমাল্যাম্বরধরং দিব্যগন্ধোক্ষিতং শুভম্।
বিভ্রাজমানং বপুষা সূর্যবৈশ্বানরপ্রভম্॥ 2-34-40(12759)
উপোপবিষ্টং সচিবৈর্দেবৈরিব শতক্রতুম্।
যক্ষৈর্মহাত্মভির্দিব্যনারীভির্হৃদ্যকান্তিভিঃ॥ 2-34-41(12760)
গীতৈর্মঙ্গলয়ুক্তৈশ্চ পূজ্যমানং যথা দিবি।
চামরে ব্যজনে চাগ্র্যে হেমদণ্ডে মহাধনে॥ 2-34-42(12761)
গৃহীতে বরনারীভ্যাং ধূয়মানে চ মূর্ধনি।
অর্চিষ্মন্তং শ্রিয়া জুষ্টং কুবেরবরুণোপমম্॥ 2-34-43(12762)
ধর্মে চৈব স্থিতং নিত্যমদ্ভুতং রাক্ষসেস্বরম্।
রামমিক্ষ্বাকুনাথং বৈ স্মরন্তং মনসা সদা॥ 2-34-44(12763)
দৃষ্ট্বা ঘটোৎকচো রাজন্ববন্দে তং কৃতাঞ্জলিঃ।
প্রহ্বস্তস্থৌ মহাবীর্যঃ শক্রং চিত্ররথো যথা॥ 2-34-45(12764)
তং দূতমাগতং দৃষ্ট্বা রাক্ষসেন্দ্রো বিভীষণঃ।
পূজয়িৎবা যথান্যায়ং সান্ৎবপূর্বং বচোঽব্রবীৎ॥ 2-34-46(12765)
বিভীষণ উবাচ॥ 2-34-47x(1449)
কস্য বংশে স সঞ্জাতঃ করমিচ্ছন্মহীপতিঃ।
তস্যানুজান্সমস্তাংশ্চ পুরং দেশং চ তস্য বৈ॥ 2-34-47(12766)
ৎবাং চ কার্যং চ তৎসর্বং শ্রোতুমিচ্ছামি তৎবতঃ।
বিস্তরেণ মম ব্রূহি সর্বানেতান্পৃথক্পৃথক্॥ 2-34-48(12767)
বৈশম্পায়ন উবাচ। 2-34-49x(1450)
এবমুক্তস্তু হৈডিম্বঃ পৌলস্ত্যেন মহাত্মনা।
কৃতাঞ্জলিরুবাচাথ সমর্থমিদমুত্তরম্॥ 2-34-49(12768)
ঘটোৎকচ উবাচ। 2-34-50x(1451)
সোমবংশোদ্ভবো রাজা পাণ্ডুর্নাম মহাবলঃ।
পাণ্ডোশ্চ পুত্রাঃ পঞ্চাসঞ্ছক্রতুল্যপরাক্রমাঃ॥ 2-34-50(12769)
তেষাং জ্যেষ্ঠস্তু নাম্না বৈ যুধিষ্ঠির ইতি শ্রুতঃ।
অজাতশত্রুর্ধর্মাত্মা ধর্মো বিগ্রহবানিব॥ 2-34-51(12770)
ততো যুধিষ্ঠিরো রাজা প্রাপ্য রাজ্যমকারয়ৎ।
গঙ্গায়া দক্ষিণে তীরে নগরে নাগসাহ্বয়ে॥ 2-34-52(12771)
তদ্দৎবা ধৃতরাষ্ট্রায় শক্রপ্রস্থং যয়ৌ ততঃ।
ভ্রাতৃভিঃ সহ রাজেন্দ্র শক্রপ্রস্থেঽন্বমোদত॥ 2-34-53(12772)
গঙ্গায়মুনয়োর্মধ্যে তে উভে নগরোত্তমে।
নিত্যং ধর্মে স্থিতো রাজা শক্রপ্রস্থে প্রশাস্তি নঃ॥ 2-34-54(12773)
তস্যানুজো মহাবাহুর্ভীমসেন ইতি শ্রুতঃ।
মহাতেজা মহাকীর্তিঃ শক্রতুল্যপরাক্রমঃ॥ 2-34-55(12774)
দশনাগসহস্রাণাং বলে তুল্যঃ স পাণ্ডবঃ।
তস্যানুজোঽর্জুনো নাম মহাবলপরাক্রমঃ॥ 2-34-56(12775)
সুকুমারো মহাসৎবো লোকে বীর্যেণ বিশ্রুতঃ।
কার্তবীর্যসমো বীর্যে সাগরপ্রতিমো বলে॥ 2-34-57(12776)
জামদগ্ন্যসমশ্চাস্ত্রে সঙ্খ্যে রামসমোঽর্জুনঃ।
রূপে শক্রসমঃ পার্থস্তেজসা ভাস্করোপমঃ॥ 2-34-58(12777)
দেবদানবগন্ধর্বৈঃ পিশাচোরগরাক্ষসৈঃ।
মানুষৈশ্চ সমস্তৈস্তু অজেয়ঃ ফল্গুনো রণে॥ 2-34-59(12778)
তেন তৎখণ্ডবং দাবং তর্পিতং জাতবেদসে।
বিজিত্য তরসা শক্রং যুধি দেবগণৈঃ সহ॥ 2-34-60(12779)
লব্ধান্যস্ত্রাণি দিব্যানি তর্পয়িৎবা হুতাশনম্।
তেন লব্ধা মহারাজ দুর্লভা দৈবতৈরপি॥ 2-34-61(12780)
বাসুদেবস্য ভগিনী সুভদ্রা নাম বিশ্রুতা।
অর্জুনস্যানুজো রাজন্নকুলশ্চেতি বিশ্রুতঃ॥ 2-34-62(12781)
দর্শনীয়তমো লোকে মূর্তিমানিব মন্মথঃ।
তস্যানুজো মহাতেজাঃ সহদেব ইতি শ্রুতঃ॥ 2-34-63(12782)
তেনাহং প্রেষিতো রাজন্কুমারেণ সমো রণে।
অহং ঘটোৎকচো নাম ভীমসেনসুতো বলী॥ 2-34-64(12783)
মম মাতা মহাভাগা হিডিম্বা নাম রাক্ষসী।
পার্থানামুপকারার্থং চরামি পৃথিবীমিমাম্॥ 2-34-65(12784)
আসীৎপৃথিব্যাঃ সর্বস্যা মহীপালো যুধিষ্ঠিরঃ।
রাজসূয়ং ক্রতুশ্রেষ্ঠমাহর্তুমুপচক্রমে॥ 2-34-66(12785)
সন্দিদেশ চ স ভ্রাতৃন্করার্থং সর্বতোদিশম্।
বৃষ্ণিবীরেণ সহিতঃ সন্দিদেশানুজান্নৃপঃ॥ 2-34-67(12786)
উদীচীমর্জুনস্তূর্ণং গৎবা মেরোরথোত্তমঃ।
গৎবা শতসহস্রাণি যোজনানি মহাবলঃ॥ 2-34-68(12787)
জিৎবা সর্বান্নৃপান্যুদ্ধে হৎবা চ তরসা বশী।
স্বর্গদ্বারমুপাগম্য রত্নান্যাদায় বৈ ভৃশম্॥ 2-34-69(12788)
অশ্বাংশ্চ বিবিধান্দিব্যান্সর্বানাদায় ফল্গুনঃ।
ধনং বহুবিধং রাজন্ধর্মপুত্রায় বৈ দদৌ॥ 2-34-70(12789)
ভীমসেনো হি রাজেন্দ্র জিৎবা প্রাচীং দিশং বলাৎ।
বশে কৃৎবা মহীপালান্পাণ্ডবায় ধনং দদৌ॥ 2-34-71(12790)
দিশং প্রতীচীং নকুলঃ করার্থং প্রয়যৌ তথা।
সহদেবো দিশং যাম্যাং জিৎবা সর্বান্মহীক্ষিতঃ॥ 2-34-72(12791)
মাং সন্দিদেশ রাজেন্দ্র করার্থমিহ সৎকৃতঃ।
পার্থানাং চরিতং তুভ্যং সঙ্ক্ষেপাৎসমুদাহৃতম্॥ 2-34-73(12792)
তমবেক্ষ্য মহারাজ ধর্মরাজং যুধিষ্ঠিরম্।
পাবনং রাজসূয়ং চ ভগবন্তং হরিং প্রভুম্।
এতানবেক্ষ্য ধর্মজ্ঞ করং দাতুমিহার্হসি॥ 2-34-74(12793)
বৈশম্পায়ন উবাচ॥ 2-34-75x(1452)
তেন তদ্ভাষিতং শ্রুৎবা রাক্ষসেন্দ্রো বিভীষণঃ।
শাসনং প্রতিজগ্রাহ ধর্মাত্মা রাক্ষসৈঃ সহ॥ 2-34-75(12794)
তচ্চ কৃষ্ণকৃতং ধীমানিত্যমন্যত স প্রভুঃ।
ততো দদৌ বিচিত্রাণি কম্বলানি কুথানি চ॥ 2-34-76(12795)
দান্তকাঞ্চনপর্যঙ্কান্মণিহেমবিচিত্রিতান্।
ভূষণানি মহার্হাণি প্রবালানি মণীংশ্চ সঃ॥ 2-34-77(12796)
কাঞ্চনানি চ ভাণ্ডনি কলশানি ঘটানি চ।
কটাহানি বিচিত্রানি দ্রোণ্যশ্চৈব সহস্রশঃ॥ 2-34-78(12797)
রাজতানি চ ভাণ্ডানি রত্নগর্ভাংশ্চ কুণ্ডলান্।
হেমপুষ্পানি চান্যানি রুক্মমুখ্যানি চাপরান্। 2-34-79(12798)
শঙ্খাংশ্চ চন্দ্রসঙ্কাশাংশ্চিত্রাবর্তবিচিত্রিতান্।
যজ্ঞস্য তোরণে যুক্তান্দদৌ তালাংশ্চতুর্দশ॥ 2-34-80(12799)
রুক্মপঙ্কজপুষ্পাণি শিবিকা মণিভূষিতাঃ।
মুকুটানি মহার্হাণি রত্নগর্ভাংশ্চ কঙ্কণান্॥ 2-34-81(12800)
চন্দনানি চ মুখ্যানি বাসাংসি বিবিধানি চ।
স দদৌ সহদেবায় তদা রাজা বিভীষণাঃ॥ 2-34-82(12801)
তানি সর্বাণি রত্নানি আজহ্রুস্তে নিশাচরাঃ।
অষ্টাশীতিসহস্রাণি সমদা রক্তলোচনাঃ॥ 2-34-83(12802)
রত্নান্যাদায় সর্বাণি প্রতস্থে স ঘটোৎকচঃ।
বিভীষণং চ রাজানমভিবাদ্য কৃতাঞ্জলিঃ॥ 2-34-84(12803)
প্রদক্ষিণং পরীত্যৈব নির্জগাম ঘটোৎকচঃ।
ততো রত্নান্যুপাদায় হৈডিম্বো রাক্ষসৈঃ সহ॥ 2-34-85(12804)
জগাম তূর্ণং লঙ্কায়াঃ সহদেবপদং প্রতি।
আসেদুঃ পাণ্ডবং সর্বে লঙ্ঘয়িৎবা মহোদধিম্॥ 2-34-86(12805)
সহদেবো দদর্শাথ রত্নাহারান্নিশাচরান্।
আগতান্ভীমসঙ্কাশান্হৈডিম্বং চ তথা নৃপ॥ 2-34-87(12806)
দ্রমিলা নৈঋতান্দৃষ্ট্বা দুদ্রুবুস্তে ভয়ার্দিতাঃ।
ভৈমসেনিস্ততো গৎবা মার্দেয়ং প্রাঞ্জলিঃ স্থিতঃ॥ 2-34-88(12807)
প্রীতিমানভবদ্দৃষ্ট্বা রত্নৌধং তং চ পাণ্ডবঃ।
তং পরিষ্বজ্য পাণিভ্যাং দৃষ্ট্বা তান্প্রীতিমানভূৎ॥ 2-34-89(12808)
বিসৃজ্য দ্রবিডান্সর্বান্গমনায়োপচক্রমে।
ন্যবর্তম ততো ধীমান্সহদেবো নরাধিপঃ॥ 2-34-90(12809)
এবং বিজিত্য তরসা সান্ৎবেন বিজয়েন চ।
করদান্পার্থিবান্কৃৎবা প্রত্যাগচ্ছদরিন্দমঃ॥ 2-34-91(12810)
রত্নসালমুপাদায় যয়ৌ সহনিশাচরঃ।
ইন্দ্রপ্রস্থং বিবেশাথ কম্পয়ন্নিব মেদিনীম্॥ 2-34-92(12811)
দৃষ্ট্বা যুধিষ্ঠিরং রাজন্সহদেবঃ কৃতাঞ্জলিঃ।
প্রহ্বোঽভিবাদ্য তস্থৌ স পূজিতশ্চাপি তেন বৈ॥ 2-34-93(12812)
লঙ্কাপ্রাপ্তান্ধনৌঘাংশ্চ দৃষ্ট্বা তান্দুর্লভান্বহূন্।
প্রীতিমানভবদ্রাজা বিস্ময়ং পরমং যয়ৌ॥ 2-34-94(12813)
ধর্মরাজায় তৎসর্বং নিবেদ্য ভরতর্ষভ।
কোটীসহস্রমধিকং হিরণ্যস্য মহাত্মনে॥ 2-34-95(12814)
বিবিধানি চ রত্নানি গোজাবিমহিষাংস্তথা।
কৃতকর্মা সুখং রাজন্নুবাস জনমেজয়॥ ॥ 2-34-96(12815)

ইতি শ্রীমন্মহাভারতে সভাপর্বণি দিগ্বিজয়পর্বণি চতুস্ত্রিংসোঽধ্যায়ঃ॥ 34॥ ॥