সভাপর্ব – অধ্যায় 008

সভাপর্ব – অধ্যায় 008
॥ শ্রীঃ ॥
2.8. অধ্যায়ঃ 008
Mahabharata – Sabha Parva – Chapter Topics
যমসভাবর্ণমম্॥ 1॥
Mahabharata – Sabha Parva – Chapter Text


নারদ উবাচ।

কথয়িষ্যে সভাং যাম্যাং যুধিষ্ঠির নিবোধ তাম্।
বৈবস্বতস্য যাং পার্থ বিশ্বকর্মা চকার হ॥ 2-8-1(11597)
তৈজসী সা সভা রাজন্বভূব শতয়োজনা।
বিস্তারায়ামসম্পন্না ভূয়সী চাপি পাণ্ডব॥ 2-8-2(11598)
অর্কপ্রকাশা ভ্রাজিষ্ণুঃ সর্বতঃ কামরূপিণী।
নাতিশীতা চ চাত্যুষ্ণা মনসশ্চ প্রহর্ষিণী॥ 2-8-3(11599)
ন শোকো ন জরা তস্যাং ক্ষুৎপিপাসে ন চাপ্রিয়ম্।
ন চ দৈন্যং ক্লমো বাঽপি প্রতিকূলং ন চাপ্যুত॥ 2-8-4(11600)
সর্বে কামাঃ স্থিতাস্তস্যাং যে দিব্যা যে চ মানুষাঃ।
রসবচ্চ প্রভূতং চ ভক্ষ্যং ভোজ্যমরিন্দম॥ 2-8-5(11601)
লেহ্যং চোপ্যং চ পেয়ং চ হৃদ্যং স্বাদু মনোহরম্।
পুণ্যগন্ধাঃ স্রজস্তস্য নিত্যং কামফলা দ্রুমাঃ॥ 2-8-6(11602)
রসবন্তি চ তোয়ানি শীতান্যুষ্ণানি চৈব হি।
তস্যাং রাজর্ষয়ঃ পুণ্যাস্তথা ব্রহ্মর্ষয়োঽমলাঃ॥ 2-8-7(11603)
যমং বৈবস্বতং তাত প্রহৃষ্টাঃ পর্যুপাসতে।
যয়াতির্নহুষঃ পুরুর্মান্ধাতা সোমকো নুগঃ॥ 2-8-8(11604)
ত্রসদস্যুশ্চ রাজর্ষিঃ কৃতবীর্যঃ শ্রুতশ্রবাঃ।
অরিষ্টনেমিঃ সিদ্ধশ্চ কৃতবেগঃ কৃতির্নিমিঃ॥ 2-8-9(11605)
প্রতর্দনঃ শিবির্মৎস্যঃ পৃথুলাক্ষো বৃহদ্রথঃ।
বার্তো মরুত্তঃ কুষিকঃ সাঙ্কাশ্যঃ সাঙ্কৃতির্ধ্রুবঃ॥ 2-8-10(11606)
চতুরশ্চঃ সদস্যোর্মিঃ কার্তবীর্যশ্চ পার্থিবঃ।
ভরতঃ সুরথশ্চৈব সুনীথো নিশঠোঽনলঃ॥ 2-8-11(11607)
দিবোদাসশ্চ সুমনা অম্বরীষো ভগীরথঃ।
ব্যশ্বঃ সদশ্বো বাঘ্র্যশ্বঃ পৃথুবেগঃ পৃথুশ্রবাঃ॥ 2-8-12(11608)
পৃপদশ্বো বসুমনাঃ ক্ষুপশ্চ সুমহাবলঃ।
রুষদ্রুর্বৃষসেনশ্চ পুরুকুৎসো ধ্বজী রথী॥ 2-8-13(11609)
আর্ষ্টিষেণো দিলীপশ্চ মহাত্মা চাপ্যুশীনরঃ।
ঔশীনরিঃ পুণ্ডরীকঃ শর্যাতিঃ শরভঃ শুচিঃ॥ 2-8-14(11610)
অঙ্গো রিষ্টশ্চ বেনশ্চ দুষ্যন্তঃ সৃঞ্জয়ো জয়ঃ।
ভাঙ্গাসুরিঃ সুনীথশ্চ নিষধোঽথ বহীনরঃ॥ 2-8-15(11611)
করন্ধমো বাহ্লিকশ্চ সুদ্যুম্নো বলবান্মধুঃ।
ঐলো মরুত্তশ্চ তথা বলবান্পৃথিবীপতিঃ॥ 2-8-16(11612)
কপোতরোমা তৃণকঃ সহদেবার্জুনৌ তথা।
ব্যশ্বঃ সাশ্বঃ কৃশাশ্বশ্চ শশবিন্দুশ্চ পার্থিবঃ॥ 2-8-17(11613)
রামো দাশরথিশ্চৈব লক্ষ্মণোঽথ প্রতর্দনঃ।
অলর্কঃ কক্ষসেনশ্চ গয়ো গৌরাওশ্ব এব চ॥ 2-8-18(11614)
জামদগ্ন্যশ্চ রামশ্চ নাভাগসগরৌ তথা।
ভূরিদ্যুম্নো মহাশ্বশ্চ পৃথাশঅবো জনকস্তথা॥ 2-8-19(11615)
রাজা বৈন্যো বারিসেনঃ পুরিজিজ্জনমেজয়ঃ।
ব্রহ্মদত্তস্ত্রিগর্তিশ্চ রাজোপরিচরস্তথা॥ 2-8-20(11616)
ইন্দ্রদ্যুম্নো ভীমজানুর্গৌরপৃষ্ঠোঽনঘো লয়ঃ।
পদ্মোঽথ মুচুকুন্দশ্চ ভূরিদ্যুম্নঃ প্রসেনজিৎ॥ 2-8-21(11617)
অরিষ্টনেমিঃ সুদ্যুম্নঃ পৃথুলাশ্বোঽষ্টকস্তথা।
শতং মৎস্যা নৃপতয়ঃ শতং নীপাঃ শতং হয়াঃ॥ 2-8-22(11618)
ধৃতরাষ্ট্রাশ্চৈকশতমশীতির্জনমেজয়াঃ।
শতং চ ব্রহ্মদত্তানাং বীরিণামীরিণাং শতম্॥ 2-8-23(11619)
ভীষ্ণাণাং দ্বে শতেঽপ্যত্র ভীমানাং তু তথা শতম্।
শতং চ প্রতিবিন্ধ্যানাং শতং নাগাঃ শতং হয়াঃ॥ 2-8-24(11620)
পলাশানাং শতং জ্ঞেয়ং শতং কাশকুশাদয়ঃ।
শান্তনুশ্চৈব রাজেন্দ্র পাণ্ডুশ্চৈব পিতা তব॥ 2-8-25(11621)
উশঙ্গবঃ শতরথো দেবরাজো জয়দ্রথঃ।
বৃষদর্ভশ্চ রাজর্ষির্বুদ্ধিমান্সহমন্ত্রিভিঃ॥ 2-8-26(11622)
অথাপরে সহস্রাণি যে গতাঃ শসবিন্দবঃ।
ইষ্ট্বাঽশ্বমেধৈর্বহুভির্মহদ্ভির্ভূরিদক্ষিণৈঃ॥ 2-8-27(11623)
এতে রাজর্ষয়ঃ পুণ্যাঃ কীর্তিমন্তো বহুশ্রুতাঃ।
তস্যাং সভায়াং রাজেন্দ্র বৈবস্বতমুপাসতে॥ 2-8-28(11624)
অগস্ত্যোঽথ মতঙ্গশ্চ কালো মৃত্যুস্তথৈব চ।
যজ্বানশ্চৈব সিদ্ধাশ্চ যে ন যোগশরীরিণঃ॥ 2-8-29(11625)
অগ্নিষ্বাত্তাশ্চ পিতরঃ ফেনপাশ্বোষ্মপাশ্চ যে।
সুধাবন্তো বর্হিষদো মূর্তিমন্তস্তথাঽপরে॥ 2-8-30(11626)
কালচক্রং চ সাক্ষাচ্চ ভগবান্হব্যবাহনঃ।
নরা দুষ্কৃতকর্মাণো দক্ষিণায়নমৃত্যবঃ॥ 2-8-31(11627)
কালস্য নয়নে যুক্তা যমস্য পুরুপাশ্চ যে।
তস্যাং শিংশুপপালাশাস্তথা কাশকুশাদয়ঃ॥ 2-8-32(11628)
উপাসতে ধর্মরাজং মূর্তিমন্তো জনাধিপ।
এতে চান্যে চ বহবঃ পিতৃরাজসভাসদঃ।
ন শক্যাঃ পরিসঙ্খ্যাতুং নামভিঃ কর্মভিস্তথা । 2-8-33(11629)
অসম্বাধা হি সা পার্থ রম্যা কামগমা সভা।
দীর্ঘকালং তপস্তপ্ৎবা নির্মিতা বিশ্বকর্মণা। 2-8-34(11630)
জ্বলন্তী ভাসমানা চ তেজসা স্বেন ভারত।
তামুগ্রতপসো যান্তি সুব্রতাঃ সত্যবাদিনঃ॥ 2-8-35(11631)
শান্তাঃ সন্যাসিনঃ শুদ্ধাঃ পূতাঃ পুণ্যেন কর্মণা।
সর্বে ভাস্বরদেহাশ্চ সর্বে চ বিরজোম্বরাঃ॥ 2-8-36(11632)
চিত্রাঙ্গদাশ্চিত্রমাল্যাঃ সর্বে জ্বলিতকুণ্ডলাঃ।
সুকৃতৈঃ কর্মভিঃ পুণ্যৈঃ পারিবর্হৈশ্চ ভূষিতাঃ॥ 2-8-37(11633)
গন্ধর্বাশ্চ মহাত্মানঃ সঙ্ঘশশ্চাপ্সরোগণাঃ।
বাদিত্রং নৃত্তগীতং চ হাস্যং লাস্যং চ সর্বশঃ॥ 2-8-38(11634)
পুণ্যাশ্চ গন্ধাঃ শব্দাশ্চ তস্যাং পার্থ সমন্ততঃ।
দিব্যানি চৈব মাল্যানি উপতিষ্ঠন্তি নিত্যশঃ॥ 2-8-39(11635)
শতং শতসহস্রাণি ধর্মিণাং তং প্রজেশ্বরম্।
উপাসতে মহাত্মানং রূপয়ুক্তা মনস্বিনঃ॥ 2-8-40(11636)
ঈদৃশী সা সভা রাজন্পিতৃরাজ্ঞো মহাত্মনঃ।
বরুণস্যাপি বক্ষ্যামি সভাং পুষ্করমালিনীম্॥ ॥ 2-8-41(11637)

ইতি শ্রীমন্মহাভারতে সভাপর্বণি মন্ত্রপর্বণি অষ্টমোঽধ্যায়ঃ॥ 8॥

Mahabharata – Sabha Parva – Chapter Footnotes
2-8-18 রামইতি রামলক্ষ্মণয়োর্বিষ্ণুশেষরূপেণ স্বস্থানস্থয়োরপি রূপান্তরেণ উপাসকানু গ্রহার্থমত্রাবস্থানম্॥ 2-8-23 ধৃতরাষ্টাশ্চৈকশতমিতি পুরাণেষু প্রায়েণাধিকারিণামেব কীর্তনাত্তেষাং চ প্রতি কল্পং সমাননামরূপকর্মৎবাদনেককল্পং ধর্মসভাবাসিনাং তেষাং বহুৎবং যুক্তম্। এবমন্যেষামপি॥ 2-8-31 দুষ্কৃতকর্মাণো বিদ্যাবিহীনকর্মমাত্রনিষ্টাঃ॥