মহাপ্রস্থানিকপর্ব – অধ্যায় ৩

মহাপ্রস্থানিকপর্ব – অধ্যায় 003
॥ শ্রীঃ ॥
17.3. অধ্যায়ঃ 003
Mahabharata – Mahaprasthanika Parva – Chapter Topics
শুনা সহ গচ্ছন্তং যুধিষ্ঠিরং প্রতি ইন্দ্রেণ স্বর্গগমনায় নিজরতারোহণচোদনা॥ 1 ॥ যুধিষ্ঠিরে শুনা বিনা রথারোহণমরোচয়মানে যমেন নিজস্বরূপপ্রকাশনেন তৎপ্রশংসনম্॥ 2 ॥ ততো যমেন্দ্রাদিভী রথেন স্বর্গং প্রাপিতেন যুধিষ্ঠিরেণ তত্র ভীমাদ্যদর্শনাদিন্দ্রংপ্রতি ভ্রাত্রাদীন্বিনা স্বস্য স্বর্গেপ্যনভিরুচিকথনপূর্বকং তৎসমীপগমনেচ্ছানিবেদনম্॥ 3 ॥
Mahabharata – Mahaprasthanika Parva – Chapter Text


বৈশম্পায়ন উবাচ।

ততঃ সন্নাদয়ঞ্শক্রো দিবং ভূমিং চ সর্বশঃ।
রথেনোপয়যৌ পার্থমারোহেত্যব্রবীচ্চ তম্॥ 17-3-1(98390)
স্বভ্রাতৄন্পতিতান্দৃষ্ট্বা ধর্মরাজো যুধিষ্ঠিরঃ।
অব্রবীচ্ছোকসংতপ্তঃ সহস্রাক্ষমিদং বচঃ॥ 17-3-2(98391)
ভ্রাতরঃ পতিতা মেঽত্র গচ্ছেয়ুস্তে ময়া সহ।
ন বিনা ভ্রাতৃভিঃ স্বর্গমিচ্ছে গন্তুং সুরেশ্বর॥ 17-3-3(98392)
সুকুমারী সুখার্হা চ রাজপুত্রী পুরংদর।
সাঽস্মাভিঃ সহ গচ্ছেত তদ্ভবাননুমন্যতাম্॥ 17-3-4(98393)
শক্র উবাচ। 17-3-5x(8084)
ভ্রাতৄন্দ্রক্ষ্যসি স্বর্গে ৎবমগ্রতস্ত্রিদিবং গতান্।
কৃষ্ণয়া সহিতান্সর্বান্মা শুচো ভরতর্ষভ॥ 17-3-5(98394)
নিক্ষিপ্য মানুষং দেহং গতাস্তে ভরতর্ষভ।
অনেন ৎবং শরীরেণ স্বর্গং গন্তা ন সংশয়ঃ॥ 17-3-6(98395)
যুধিষ্ঠির উবাচ। 17-3-7x(8085)
অয়ং শ্বা ভূতভব্যেশ ভক্তো মাং নিত্যমেব হ।
স গচ্ছেত ময়া সার্ধমানৃশংস্যা হি মে মতিঃ॥ 17-3-7(98396)
শক্র উবাচ। 17-3-8x(8086)
অমর্ত্যৎবং মৎসমৎবং চ রাজ-
ঞ্শ্রিয়ং কৃৎস্নাং মহতীং চৈব সিদ্ধিম্।
সংপ্রাপ্তোদ্য স্বর্গসুখানি চ ৎবং
ত্যজ শ্বানং নাত্র নৃশংসমস্তি॥ 17-3-8(98397)
যুধিষ্ঠির উবাচ। 17-3-9x(8087)
অনার্যমার্যেণি সহস্রনেত্র
শক্যং কর্তুং দুষ্করমেতদার্য।
মা মে শ্রিয়া সঙ্গমনং তয়াঽস্তু
যস্যাঃ কৃতে ভক্তজনং ত্যজেয়ম্॥ 17-3-9(98398)
ইন্দ্র উবাচ। 17-3-10x(8088)
স্বর্গে লোকে শ্ববতাং নাস্তি ধিষ্ণ্য-
মিষ্টাপূর্তং ক্রোধবশা হরন্তি।
ততো বিচার্যি ক্রিয়তাং ধর্মরাজ
ত্যজ শ্বানং নাত্র নৃশংসমস্তি। 17-3-10(98399)
যুধিষ্ঠির উবাচ। 17-3-11x(8089)
ভক্তত্যাগং প্রাহুরত্যন্তপাপং
তুল্যং লোকে ব্রহ্মবধ্যাকৃতেন।
তস্মান্নাহং জাতু কথঞ্চনাদ্য
ত্যক্ষ্যাম্যেনং স্বসুখার্থী মহেন্দ্রঃ॥ 17-3-11(98400)
ভীতং ভক্তং নান্যদস্তীতি চার্তং
প্রাপ্তং ক্ষীণং রক্ষণে প্রাণলিপ্সুম্।
প্রাণত্যাগাদপ্যহং নৈব মোক্তুং
যতেয়ং বৈ নিত্যমেতদ্ব্রতং মে॥ 17-3-12(98401)
ইন্দ্র উবাচ। 17-3-13x(8090)
শুনা দৃষ্টং ক্রোধবশা হরন্তি
যদ্দত্তমিষ্টং বিবৃতমথো হুতং চ।
তস্মাচ্ছুনস্ত্যাগমিমং কুরুষ্ব
শুনস্ত্যাগাৎপ্রাপ্স্যসে দেবলোকম্॥ 17-3-13(98402)
ত্যক্ৎবা ভ্রাতৄন্দয়িতাং চাপি কৃষ্ণাং
প্রাপ্তো লোকঃ কর্মণা স্বেন বীর।
শ্বানং চৈনং ন ত্যজসে কথং নু
ত্যাগং কৃৎস্নং চাস্থিতো মুহ্যসেঽদ্য॥ 17-3-14(98403)
যুধিষ্ঠির উবাচ। 17-3-15x(8091)
ন বিদ্যতে সংধিরথাপি বিগ্রহো
মৃতৈর্মর্ত্যৈরিতি লোকেষু নিষ্ঠা।
ন তে ময়া জীবয়িতুং হি শক্যা-
স্ততস্ত্যাগস্তেষু কৃতো ন জীবতাম্॥ 17-3-15(98404)
প্রতিপ্রদানং শরণাগতস্য
স্ত্রিয়া বধো ব্রাহ্মণস্বাপহারঃ।
মিত্রদ্রোহস্তানি চৎবারি শক্র
ভক্তত্যাগশ্চৈব সমো মতো মে॥ 17-3-16(98405)
বৈশম্পায়ন উবাচ। 17-3-17x(8092)
তদ্ধর্মরাজস্য বচো নিশম্য
ধর্মস্বরূপী ভগবানুবাচ।
যুধিষ্ঠিরং প্রীতিয়ুক্তো নরেন্দ্রং
শ্লক্ষ্ণৈর্বাক্যৈঃ সংস্তবসংপ্রয়ুক্তৈঃ॥ 17-3-17(98406)
অভিজাতোসি রাজেন্দ্র পিতুর্বৃত্তেন মেধয়া।
অনুক্রোশেনি চানেন সর্বভূতেষু ভারত॥ 17-3-18(98407)
পুরা দ্বৈতবনে চাসি ময়া পুত্র পরীক্ষিতঃ।
পানীয়ার্থে পরাক্রান্তা যত্র তে ভ্রাতরো হতাঃ॥ 17-3-19(98408)
ভীমার্জুনৌ পরিত্যজ্য যত্র ৎবং ভ্রাতরাবুভৌ।
মাত্রোঃ সাম্যমভীপ্সন্বৈ নকুলং জীবমিচ্ছসি॥ 17-3-20(98409)
অয়ং শ্বা ভক্ত ইত্যেবং ত্যক্তো দেবরথস্ৎবয়া।
তস্মাৎস্বর্গে ন তে তুল্যঃ কশ্চিদস্তি নরাধিপঃ॥ 17-3-21(98410)
অতস্তবাক্ষয়া লোকাঃ স্বশরীরেণ ভারত।
প্রাপ্তোসি ভরতশ্রেষ্ঠ দিব্যাং গতিমনুত্তমাম্॥ 17-3-22(98411)
বৈশম্পায়ন উবাচ। 17-3-23x(8093)
ততো ধর্মশ্চ শক্রশ্চ মরুতশ্চাশ্বিনাবপি।
দেবা দেবর্ষয়শ্চৈব রথমারোপ্য পাণ্ডবম্॥ 17-3-23(98412)
প্রয়যুঃ স্বৈর্বিমানৈস্তে সিদ্ধাঃ কামবিহারিণঃ।
সর্বে বিরজসঃ পুণ্যাঃ পুণ্যবাগ্বুদ্ধিকর্মিণঃ॥ 17-3-24(98413)
স তং রথং সমাস্থায় রাজা কুরুকুলোদ্বহঃ।
ঊর্ধ্বমাচক্রমে শীঘ্রং তেজসাঽঽবৃত্যরোদসী॥ 17-3-25(98414)
ততো দেবনিকায়্যস্থো নারদঃ সর্বলোকবিৎ।
উবাচোচ্চৈস্তদা বাক্যং বৃহদ্বাদী বৃহত্তপাঃ॥ 17-3-26(98415)
যেঽপি রাজর্ষয়ঃ পূর্বে তে চাপি সমুপস্থিতাঃ।
কীতি প্রচ্ছাদ্য তেষাং বৈ কুরুরাজোঽধিতিষ্ঠতি॥ 17-3-27(98416)
লোকানাবৃত্য যশসা তেজসা বৃত্তসংপদা।
স্বশরীরেণ সম্প্রাপ্তং নান্যং শুশ্রম পাণ্ডবাৎ॥ 17-3-28(98417)
তেজাংসি যানি দৃষ্টানি ভূমিষ্ঠেন ৎবয়া বিভো।
বেশ্মানি ভুবি দেবানাং পশ্যামূনি সহস্রশঃ॥ 17-3-29(98418)
নারদস্য বচঃ শ্রুৎবা রাজা বচনমব্রবীৎ।
ভ্রাতৄনপশ্যন্ধর্মাত্মা স্বপক্ষাংশ্চৈব পার্থিবান্॥ 17-3-30(98419)
শুভং বা যদি বা পাপং ভ্রাতৄণাং স্থানমদ্য মে।
তদেব প্রাপ্তুমিচ্ছামি লোকান্যান্ন কাময়ে॥ 17-3-31(98420)
রাজ্ঞস্তু বচনং শ্রুৎবা দেবরাজঃ পুরংদরঃ।
আনৃশংস্যসমায়ুক্তং প্রত্যুবাচ যুধিষ্ঠিরম্॥ 17-3-32(98421)
স্থানেঽস্মিন্বস রাজেন্দ্র কর্মভির্নির্জিতে শুভৈঃ।
কিং ৎবং মানুষ্যকং স্নেহমদ্যাপি পরিকর্ষসি॥ 17-3-33(98422)
সিদ্ধিং প্রাপ্তোসি পরমাং যতা নান্যঃ পুমান্ক্বচিৎ।
নৈব তে ভ্রাতরঃ স্থানং সম্প্রাপ্তাঃ কুরুনন্দন॥ 17-3-34(98423)
অদ্যাপি মানুষো ভাবঃ স্পৃশতে ৎবাং নরাধিপ।
স্বর্গোঽয়ং পশ্য দেবর্ষীন্সিদ্ধাংশ্চ ত্রিদিবালয়ান্॥ 17-3-35(98424)
যুধিষ্ঠিরস্তু দেবেন্দ্রমেবংবাদিনমীশ্বরম্।
পুনরেবাব্রবীদ্ধীমানিদং বচনমর্থবৎ॥ 17-3-36(98425)
তৈর্বিনা নোৎসহে বস্তুমিহ দৈত্যনিবর্হণ।
গন্তুমিচ্ছামি তত্রাহং যত্র মে ভ্রাতরো গতাঃ॥ 17-3-37(98426)
যত্র সা বৃহতী শ্যামা বুদ্ধিসত্ৎবগুণান্বিতা।
দ্রৌপদী যোষিতাংশ্রেষ্ঠা যত্র চৈব সুতা মম॥ ॥ 17-3-38(98427)

ইতি শ্রীমন্মহাভারতে মহাপ্রস্থানিকপর্বণি তৃতীয়োঽধ্যায়ঃ॥ 3 ॥ মহাপ্রস্থানিকং পর্বং সমাপ্তম্॥ 17 ॥
————

অতঃ পরং স্বর্গারোহণপর্বঃ তস্যায়মাদ্যঃ শ্লোকঃ। জনমেজয় উবাচ। স্বর্গং ত্রিবিষ্টপং প্রাপ্য মম পূর্বপিতামহাঃ। পাণ্ডবা ধার্তরাষ্ট্রাশ্চ কানি স্থানানি ভেজিরে॥ 1 ॥ ইদং মহাপ্রস্থানিকং পর্ব কুংভঘোণস্যেন টী.আর্. কৃষ্ণমাচার্যেণ টী.আর্. ব্যাসাচার্যেণ চ মুম্বয়্যাং নির্ণয়সাগরমুদ্রায়ন্ত্রে মুদ্রাপিতম্। শকাব্দাঃ 1832 সন 1910.

Mahabharata – Mahaprasthanika Parva – Chapter Footnotes
17-3-8 অস্পৃশ্যস্য সংত্যাগ নৃশংসং নির্দয়ৎবং নাস্তি॥ 17-3-10 শ্ববতামশুচিৎবাদ্ধিষ্ণ্যং স্থানং স্বর্গে নাস্তি। ক্রোধবশা নাম দেবগণা অশুচেরিষ্টাপূর্তফলং ঘ্নন্তি॥ 17-3-18 অভিজাতোসি কুলীনোসি। পিতুঃ পাণ্ডোঃ॥ 17-3-26 নিকায়্যস্থো নিবাসস্থঃ॥ 17-3-27 সমুপস্থিতাঃ স্মৃতিবিষয়াঃ সন্তি॥ 17-3-31 যদেব ভ্রাতৄণাং স্থানং প্রাপ্তুমিচ্ছামি॥ 31