সভাপর্ব – অধ্যায় 028

সভাপর্ব – অধ্যায় 028
॥ শ্রীঃ ॥
2.28. অধ্যায়ঃ 028
Mahabharata – Sabha Parva – Chapter Topics
অর্জুনেন উত্তরদিগ্বিজয়ে নানাদেশজয়ঃ॥ 1॥
Mahabharata – Sabha Parva – Chapter Text


বৈশম্পায়ন উবাচ।

এবমুক্তঃ প্রত্যুবাচ ভগদত্তং ধনঞ্জয়ঃ।
অনেনৈব কৃতং সর্বং ভবিষ্যত্যনুজানতা॥ 2-28-1(12451)
তং বিজিত্য মহাবাহুঃ কুন্তীপুত্রো ধনঞ্জয়ঃ।
প্রয়যাবুত্তরাং তস্মাদ্দিশং ধনদপালিতাম্॥ 2-28-2(12452)
অন্তর্গিরিং চ কৌন্তেয়স্তথৈব চ বহির্গিরিম্।
তথৈবোপগিরং চৈব বিজিগ্যে পুরুষর্ষভঃ॥ 2-28-3(12453)
বিজিত্য পর্বতান্সর্বান্যে চ তত্র নরাধিপাঃ।
তান্বশে স্থাপয়িৎবা স ধনান্যাদায় সর্বশঃ॥ 2-28-4(12454)
তৈরেব সহিতঃ সর্বৈরনুরজ্য চ তান্নুপান্।
উলূকবাসিনং রাজন্বৃহন্তমুপজগ্মিবান্॥ 2-28-5(12455)
মৃদঙ্গবরনাদেন রথনেমিস্বনেন চ।
হস্তিনাং চ নিনাদেন কম্পয়ন্বসুধামিমাম্॥ 2-28-6(12456)
ততো বৃহন্তস্ৎবরিতো বলেন চতুরঙ্গিণা।
নিষ্ক্রম্য নগরাত্তস্মাদ্যোধয়ামাস ফাল্গুনম্॥ 2-28-7(12457)
সুমহান্সন্নিপাতোঽভূদ্ধনঞ্জয়বৃহন্তয়োঃ।
ন শশাক বৃহন্তস্তু সোঢুং পাণ্ডববিক্রমম্॥ 2-28-8(12458)
সোঽবিষহ্যতমং মৎবা কৌন্তেয়ং পর্বতেশ্বরঃ।
উপাবর্তত দুর্ধর্ষো রত্নান্যাদায় সর্বশঃ॥ 2-28-9(12459)
স তদ্রাজ্যমবস্থাপ্য উলূকসহিতো যয়ৌ।
সেনাবিন্দুমথো রাজন্রাজ্যাদাশু সমাক্ষিপৎ॥ 2-28-10(12460)
মোদাপুরং বামবেদং সুদামানং সুসঙ্কুলম্।
উলূকানুত্তরাংশ্চৈব তাংশ্চ রাজ্ঞঃ সমানয়ৎ॥ 2-28-11(12461)
তত্রস্থঃ পুরুষৈরেব ধর্মরাজস্য শাসনাৎ।
কিরীটী জিতবান্রাজন্দেশান্পঞ্চগণাংস্ততঃ॥ 2-28-12(12462)
স দেবপ্রস্থমাসাদ্য সেনাবিন্দোঃ পুরং প্রতি।
বলেন চতুরঙ্গেণ নিবেশমকরোৎপ্রভুঃ॥ 2-28-13(12463)
স তৈঃ পরিবৃতঃ সর্বৈর্বিষ্বগশ্বং নরাধিপম্॥
অভ্যগচ্ছন্মহাতেজাঃ পৌরবং পুরুষর্ষভ॥ 2-28-14(12464)
বিজিত্য চাহবে শূরান্পার্বতীয়ান্মহারথান্।
জিগায় সেনয়া রাজন্পুরং পৌরবরক্ষিতম্॥ 2-28-15(12465)
পৌরবং যুধি নির্জিত্য দস্যূন্পর্বতবাসিনঃ।
গণানুৎসবসঙ্কেতানজয়ৎসপ্ত পাণ্ডবঃ॥ 2-28-16(12466)
ততঃ কাশ্মীরকান্বীরান্ক্ষত্রিয়ান্ক্ষত্রিয়র্ষভঃ।
ব্যজয়ল্লোহিতং চৈব মণ্ডলৈর্দশভিঃ সহ॥ 2-28-17(12467)
ততস্ত্রিগর্তাঃ কৌন্তেয়ং দার্বাঃ কোকনদাস্তথা।
ক্ষত্রিয়া বহবো রাজন্নুপাবর্তন্ত সর্বশঃ॥ 2-28-18(12468)
অভিসারীং ততো রম্যাং বিজিগ্যে কুরুনন্দনঃ।
উরগাবাসিনং রম্যং রোচমানং রণেঽজয়ৎ॥ 2-28-19(12469)
ততঃ সিংহপুরং রম্যং চিত্রায়ুধসুরক্ষিতম্।
প্রাধমদ্বলমাস্থায় পাকশাসনিরাহবে॥ 2-28-20(12470)
ততঃ সুহ্যাংশ্চ চোলাংশ্চ কিরীটী পাণ্ডবর্ষভঃ।
সহিতঃ সর্বসৈন্যেন প্রামথৎকুরুনন্দনঃ॥ 2-28-21(12471)
ততঃ পরমবিক্রান্তো বাহ্লীকান্পাকশাসনিঃ।
মহতা পরিমর্দেন বশে চক্রে দুরাসদান্॥ 2-28-22(12472)
গৃহীৎবা তু বলং সারং ফল্গুনঃ পাণ্ডুনন্দনঃ।
দরদান্সহকাম্ভোজৈরজয়ৎপাকশাসনিঃ॥ 2-28-23(12473)
প্রাগুত্তরং দিশং যে চ বসন্ত্যাশ্রিত্য দস্যবঃ।
নিবসন্তি বনে যে চ তান্সর্বানজয়ৎপ্রভুঃ॥ 2-28-24(12474)
লোহান্পরমকাম্ভোজানৃষিকানুত্তরানপি।
সহিতাংস্তান্মহারাজ ব্যজয়ৎপাকশাসনিঃ॥ 2-28-25(12475)
ঋষিকেষ্বপি সঙ্গ্রামে বভূবাতিভয়ঙ্করঃ।
তারকাময়সঙ্কাশঃ পরস্ৎবৃষিকপার্থয়োঃ॥ 2-28-26(12476)
স বিজিত্য ততো রাজন্নৃষিকান্রণমূর্ধনি।
শুকোদরসমাংস্তত্র হয়ানষ্টৌ সমানয়ৎ॥ 2-28-27(12477)
ময়ূরসদৃশানন্যানুত্তরানপরানপি।
জবনানাশুগাংশ্চৈব করার্থং সমুপানয়ৎ॥ 2-28-28(12478)
স বিনির্জিত্য সঙ্গ্রামে হিমবন্তং সনিষ্কৃটম্।
শ্বেতপর্বতমাসাদ্য ন্যবিশৎপুরুষর্ষভঃ॥ ॥ 2-28-29(12479)

ইতি শ্রীমন্মহাভারতে সভাপর্বণি দিগ্বিজয়পর্বণি অষ্টাবিংশোধ্যায়ঃ॥ 28॥