মৌসলপর্ব – অধ্যায় ০৮

মৌসলপর্ব – অধ্যায় 008
॥ শ্রীঃ ॥
15.8. অধ্যায়ঃ 008
Mahabharata – Mausala Parva – Chapter Topics
অর্জুনেন বসুদেবসমাশ্বাসনপূর্বকং সকলপৌরান্প্রতি নাতিচিরাদেব দ্বারকায়াঃ সমুদ্রেণ সমাপ্লাবননিবেদনপূর্বকং সর্বেষামিন্দ্রপ্রস্থংপ্রতি প্রয়াণসংনাহসংচোদনা॥ 1 ॥ তথা পরেদ্যুর্যোগেন শরীরংত্যক্তবতো বসুদেবস্য পত্নীভিঃ সহ সংস্করণপূর্বকং রামকৃষ্ণশরীরয়োর্দাহনম্॥ 2 ॥ ততো বজ্রার্জুনপুরস্কারেণ সকলপৌরজনে পুরঃপুনঃ প্রয়াতে সমুদ্রেণ পশ্চাদ্ভাগে পৌরজনমুক্ততত্তদ্ভাগস্য স্বজলেন সমাক্রমণম্॥ 3 ॥ অর্জুনেন মধ্যেমার্গং চোরাপহৃতাবশিষ্টয়াদবকলত্রাদিভিঃ সহ স্বদেশমেত্য যুধিষ্ঠিরাজ্ঞয়া বজ্রস্যেন্দ্রপ্রস্থরাজ্যেঽভিষেচনম্। তথা সাত্যকিসুতাদীনাং তত্রতত্র রাজ্যেঽভিষেচনম্॥ 3 ॥ রুক্মিণ্যাদিভিঃ কাভিশ্চিদগ্নিপ্রবেশনম্। সত্যভামাদিভিঃ কাভিশ্চন তপসে বনগমনম্॥ 4 ॥
Mahabharata – Mausala Parva – Chapter Text


বৈশম্পায়ন উবাচ।

এবমুক্তঃ স বীভৎসুর্মাতুলেনি পরংতপ।
দুর্মনা দীনবদনো বসুদেবমুবাচ হ॥ 15-8-1(97095)
নাহং বৃষ্ণিপ্রবীরেণ বন্ধুভিশ্চৈব মাতুল।
বিহীনাং পৃথিবীং দ্রষ্টুং শক্তশ্চিরমিহ প্রভো॥ 15-8-2(97096)
রাজা চ ভীমসেনশ্চ সহদেবশ্চ পাণ্ডবঃ।
নকুলো যাজ্ঞসেনী চ ষডেকমনসো বয়ম্॥ 15-8-3(97097)
রাজ্ঞঃ সংক্রমণে চাপি কামোঽয়ং নিত্যমেব হি।
তমিমং বিদ্ধি সম্প্রাপ্তং কালং কালবিদাংবর॥ 15-8-4(97098)
সর্বথা বৃষ্ণিদারাংস্তু বালং বৃদ্ধং তথৈব চ।
নয়িষ্যে পরিগৃহ্যাহমিন্দ্রপ্রস্থমরিংদম॥ 15-8-5(97099)
ইত্যুক্ৎবা দারুকমিদং বাক্যমাহ ধনংজয়ঃ।
অমাত্যান্বৃষ্ণিবীরাণাং দ্রষ্টুমিচ্ছামি মাচিরম্॥ 15-8-6(97100)
ইত্যেবমুক্ৎবা বচনং সুধর্মাং যাদবীং সভাম্।
প্রবিবেশার্জুনঃ শূরঃ শোচমানো মহাভুজঃ॥ 15-8-7(97101)
তমাসনগতং তত্র সর্বাঃ প্রকৃতয়স্তথা।
ব্রাহ্মণা নাগরাস্তত্র পরিবার্যোপতস্থিরে॥ 15-8-8(97102)
তান্দীনমনসঃ সর্বান্বিমূঢান্গতচেতসঃ।
উবাচেদং বচঃ কালে পার্থো দীনতরস্তথা॥ 15-8-9(97103)
শক্রপ্রস্থমহং নেষ্যে পৃষ্ণন্ধকজনং স্বয়ম্।
ইদং তু নগরং সর্বং সমুদ্রঃ প্লাবয়িষ্যতি॥ 15-8-10(97104)
সজ্জীকুরুত যানানি রত্নানি বিবিধানি চ।
বজ্রোঽয়ং ভবতাং রাজা শক্রপ্রস্থে ভবিষ্যতি॥ 15-8-11(97105)
সপ্তমে দিবসে চৈব রবৌ বিমল উদ্গতে।
বহির্বৎস্যামহে সর্বে সজ্জীভাবত মাচিরম্॥ 15-8-12(97106)
ইত্যুক্তাস্তেন তে সর্বে পার্থেনাক্লিষ্টকর্মণা।
সজ্জমাশু ততশ্চক্রুঃ স্বসিদ্ধ্যর্থং সমুৎসুকাঃ॥ 15-8-13(97107)
তাং রাত্রিমবসৎপার্থঃ কেশবস্য নিবেশনে।
মহতা শোকমোহেন সহসাঽভিপরিপ্লুতঃ॥ 15-8-14(97108)
শ্বোভূতেঽথ ততঃ শৌরির্বসুদেবঃ প্রতাপবান্।
যুক্ৎবাঽঽত্মানং মহাতেজা জগাম গতিমুত্তমাং॥ 15-8-15(97109)
ততঃ শব্দো মহানাসীদ্বসুদেবনিবেশনে।
দারুণঃ ক্রোশতীনাং চ রুদতীনাং চ যোষিতাম্॥ 15-8-16(97110)
প্রকীর্ণমূর্ধজাঃ সর্বা বিমুক্তাভরণস্রজঃ।
উরাংসি পাণিভির্ঘ্নন্ত্যো ব্যলপন্তকরুণং স্ত্রিয়ঃ। 15-8-17(97111)
তং দেবকী চ ভদ্রা চ রোহিণী মদিরা তথা।
অন্বারোঢুং ব্যবসিতা ভর্তারং যোষিতাং বরাঃ॥ 15-8-18(97112)
ততঃ শৌরিং নৃয়ুক্তেন বহুমূল্যেন ভারত।
যানেন মহতা পার্থো বহির্নিষ্ক্রাময়ত্তদা॥ 15-8-19(97113)
তমন্বয়ুস্তত্রতত্রং দুঃখসোকসমন্বিতাঃ।
দ্বারকাবাসিনঃ সর্বে পৌরজানপদা হিতাঃ॥ 15-8-20(97114)
তস্যাশ্বমেধিকং ছত্রং দীপ্যমানাশ্চ পাবকাঃ।
পুরস্তাত্তস্য যানস্য যাজকাশ্চ ততো যয়ুঃ॥ 15-8-21(97115)
অনুজগ্মুশ্চ তং বীরং দেব্যস্তা বৈ স্বলঙ্কৃতাঃ॥
স্ত্রীসহস্রৈঃ পরিবৃতা বধূভিশ্চ সহস্রশঃ॥ 15-8-22(97116)
যস্তু দেশঃ প্রিয়স্তস্য জীবতোঽভূন্মহাত্মনঃ।
তত্রৈনমুপসংকল্প্য বিতৃমেধং প্রচক্রিরে॥ 15-8-23(97117)
তং চিতাগ্নিগতং বীরং শূরপুত্রং বরাঙ্গনাঃ।
ততোন্বারুরুহুঃ পত্ন্যশ্চতস্রঃ পতিলোকগাঃ॥ 15-8-24(97118)
তং বৈ চতসৃভিঃ স্ত্রীভিরন্বিতং পাণ্ডুনন্দনঃ।
অদাহয়চ্চন্দনৈশ্চ গন্ধৈরুচ্চাবচৈরপি॥ 15-8-25(97119)
ততঃ প্রাদুরভূচ্ছব্দঃ সমিদ্ধস্য বিভাবসোঃ।
সামগানাং চ নির্ঘোষো নরাণাং রুদতামপি॥ 15-8-26(97120)
ততো বজ্রপ্রধানাস্তে বৃষ্ণ্যন্ধককুমারকাঃ।
সর্বে চৈবোদকং চক্রুঃ স্ত্রিয়শ্চৈব মহাত্মনঃ। 15-8-27(97121)
অলুপ্তধর্মস্তং ধর্মং কারয়িৎবা স ফল্গুনঃ।
জগাম বৃষ্ণয়ো যত্র বিনষ্টা ভরতর্ষভ॥ 15-8-28(97122)
স তান্দৃষ্ট্বা নিপতিতান্কদনে ভৃশদুঃখিতঃ।
বভূবাতীব কৌরব্যঃ প্রাপ্তকালং চকার হ॥ 15-8-29(97123)
যথাপ্রধানতশ্চৈব চক্রে সর্বাস্তথা ক্রিয়াঃ।
যে হতা ব্রহ্মশাপেন মুসলৈরেরকোদ্ভবৈঃ॥ 15-8-30(97124)
`ততো ভগবতো দেহং দৃষ্ট্বা শিষ্যঃ প্রলপ্য চ।
স্মৃৎবা তদ্বচনং সর্বং মোহশোকোপবৃংহিতঃ॥’ 15-8-31(97125)
ততঃ শরীরে রামস্য বাসুদেবস্য চোভয়োঃ।
অন্বীক্ষ্য দাহয়ামাস পুরুষৈরাপ্তকারিভিঃ॥ 15-8-32(97126)
স তেষাং বিধিবৎকৃৎবা প্রেতকার্যাণি পাণ্ডবঃ।
সপ্তমে দিবসে প্রায়াদ্রথমারুহ্য সৎবরঃ॥ 15-8-33(97127)
অশ্বয়ুক্তৈ রথৈশ্চাপি গোখরোষ্ট্রয়ুতৈরপি।
স্ত্রিয়স্তা বৃষ্ণিবীরাণাং রুদন্ত্যঃ শোককর্শিতাঃ॥ 15-8-34(97128)
অনুজগ্মুর্মহাত্মানং পাণ্ডুপুত্রং ধনংজয়ম্।
ভৃত্যাশ্চান্ধকবৃষ্ণীনাং সাদিনো রথিনশ্চ যে॥ 15-8-35(97129)
বীরহীনা বৃদ্ধবালাঃ পৌরজানপদাস্তথা।
যয়ুস্তে পরিবার্যাথ কলত্রং পার্থশাসনাৎ॥ 15-8-36(97130)
কুঞ্জরৈশ্চ গজারোহা যয়ুঃ শৈলনির্ভস্তথা।
সপাদরক্ষৈঃ সংয়ুক্তাঃ সোত্তরায়ুধিকা যয়ুঃ॥ 15-8-37(97131)
পুত্রাশ্চান্ধকবৃষ্ণীনাং সর্বে পার্থমনুব্রতাঃ।
ব্রাহ্মণাঃ ক্ষত্রিয়া বৈশ্যাঃ শূদ্রাশ্চৈব মহাধনাঃ॥ 15-8-38(97132)
দশ ষট্ চ সহস্রাণি বাসুদেবাবরোধনম্।
পুরস্কৃত্য যয়ুর্বজ্রং পৌত্রং কৃষ্ণস্য ধীমতঃ॥ 15-8-39(97133)
বহূনি চ সহস্রাণি প্রয়ুতান্যর্বুদানি চ।
ভোজবৃষ্ণ্যন্ধকস্ত্রীণাং হতনাথানি নির্যযুঃ॥ 15-8-40(97134)
তৎসাগরসমপ্রখ্যং বৃষ্ণিচক্রং মহর্দ্ধিমৎ।
উবাহ রথিনাংশ্রেষ্ঠঃ পার্থঃ পরপুরংজয়ঃ॥ 15-8-41(97135)
নির্যাতে তু জনে তস্মিন্সাগরো মকরালয়ঃ।
দ্বারকাং রত্নসংপূর্ণাং জলেনাপ্লাবয়ত্তদা॥ 15-8-42(97136)
যদ্যদ্ধি পুরুষব্যাঘ্রো ভূমেস্তস্যা ব্যমুঞ্চত।
তত্তৎসংপ্লাবয়ামাস সলিলেন স সাগরঃ॥ 15-8-43(97137)
তদদ্ভুতমভিপ্রেক্ষ্য দ্বারকাবাসিনো জনাঃ।
তূর্ণাত্তূর্ণতরং জগ্মুরহো দৈবমিতি ব্রুবন্॥ 15-8-44(97138)
কাননেষু চ রম্যেষু পর্বতেষু নদীষু চ।
নিবসন্নানয়ামাস বৃষ্ণিদারান্ধনংজয়ঃ॥ 15-8-45(97139)
স পঞ্চনদমাসাদ্য ধীমানতিসমৃদ্ধিমৎ।
দেশে গোপশুধান্যাঢ্যে নিবাসমকরোৎপ্রভুঃ॥ 15-8-46(97140)
ততো লোভঃ সমভবদ্দস্যূনাং নিহতেশ্বরাঃ।
দৃষ্ট্বা স্ত্রিয়ো নীয়মানাঃ পার্থেনৈকেন ভারত॥ 15-8-47(97141)
ততস্তে পাপকর্মাণো লোভোপহতচেতসঃ।
আভীরা মন্ত্রয়ামাসুঃ সমেত্যাশুভদর্শনাঃ॥ 15-8-48(97142)
অয়মেকোঽর্জুনো ধন্বী বৃদ্ধবালং হতেশ্বরম্।
নয়ত্যস্মানতিক্রম্য্ যোধাশ্চেমে হতৌজসঃ॥ 15-8-49(97143)
ততো যষ্টিপ্রহরণা দস্যবস্তে সহস্রশঃ।
অভ্যধাবন্ত বৃষ্ণীনাং তং জনং লোপ্ত্রহারিণঃ॥ 15-8-50(97144)
মহতা সিংহনাদেন ত্রাসয়ন্তঃ পৃথগ্জনম্।
অভিপেতুর্ধনার্থং তে কালপর্যায়চোদিতাঃ॥ 15-8-51(97145)
ততো নিবৃত্তঃ কৌন্তেয়ঃ সহসা সপদানুগঃ।
উবাচ তান্মহাবাহুরর্জুনঃ প্রহসন্নিব॥ 15-8-52(97146)
নিবর্তধ্বমধর্মজ্ঞা যদি জীবিতুমিচ্ছথ।
ইদানীং শরনির্ভিন্নাঃ শোচধ্বং নিহতা ময়া॥ 15-8-53(97147)
তথোক্তাস্তেন বীরেণি কদর্তীকৃত্য তদ্বচঃ।
অভিপেতুর্জনং মূঢা বার্যমাণাঃ পুনঃপুনঃ॥ 15-8-54(97148)
ততোঽর্জুনো ধনুর্দিব্যং গাণ্ডীবমজরং মহৎ।
কআরোপয়িতুমারেভে যত্নাদিব কথঞ্চন॥ 15-8-55(97149)
চকার সজ্যং কৃচ্ছ্রেণি সম্ভ্রমে তুমুলে সতি।
চিন্তয়ামাস শস্ত্রাণি ন চ সস্মার তান্যপি॥ 15-8-56(97150)
বৈকৃতং তন্মহদ্দৃষ্ট্বা ভুজবীর্য তথা যুধি।
দিব্যানাং চ মহাস্ত্রাণাং বিনাশাদ্ব্রীডিতোঽভবৎ॥ 15-8-57(97151)
বৃষ্ণিয়োধাশ্চ তে সর্বে গজাশ্বরথয়োধিনঃ।
ন শেকুরাবর্তয়িতুং হ্রিয়মাণং স্বকং ধনম্॥ 15-8-58(97152)
কলত্রস্য বহুৎবাদ্ধি সম্পতন্সু ততস্ততঃ।
প্রয়ত্নমকরোৎপার্থো জনস্য পরিরক্ষণে॥ 15-8-59(97153)
মিষতাং সর্বয়োধানাং ততস্তাঃ প্রমদোত্তমাঃ।
সমন্ততোবকৃষ্যন্ত কামাচ্চান্যাঃ প্রবব্রজুঃ॥ 15-8-60(97154)
ততো গাণ্ডীবনির্মুক্তৈঃ শরৈঃ পার্থো ধনংজয়ঃ।
জঘান দস্যূন্সোদ্বেগো বৃষ্ণিভৃত্যৈঃ সহস্রশঃ॥ 15-8-61(97155)
ক্ষণেন তস্য তে রাজন্ক্ষয়ং জগ্মুরজিহ্মগাঃ।
অক্ষয়া হি পুরা ভূৎবা ক্ষীণাঃ ক্ষতজভোজনাঃ॥ 15-8-62(97156)
স শরক্ষয়মাসাদ্য দুঃখশোকসমাহতঃ।
ধনুষ্কোট্যা তদা দস্যূনবধীৎপাকশাসনিঃ॥ 15-8-63(97157)
[প্রেক্ষতস্ৎবেব পার্থস্য বৃষ্ণ্যন্ধকবরস্ত্রিয়ঃ।
জগ্মুরাদায় তে ম্লেচ্ছাঃ সমন্তাজ্জনমেজয়॥] 15-8-64(97158)
ধনংজয়স্তু দৈবং তন্মনসাঽচিন্তয়ৎপ্রভুঃ।
দুঃখসোকসমাবিষ্টো নিঃশ্বাসপরমোঽভবৎ॥ 15-8-65(97159)
অস্ত্রাণাং চ প্রণাশেন বাহুবীর্যস্য চ ক্ষয়াৎ।
ধনুষশ্চাবিধেয়ৎবাচ্ছরাণাং সংক্ষয়েণ চ॥ 15-8-66(97160)
বভূব বিমনাঃ পার্থো দৈবমিত্যুনুচিন্তয়ন্।
ন্যবর্তত ততো রাজন্নেদমস্তীতি চিন্তয়ন্॥ 15-8-67(97161)
ততঃ শেষং সমাদায় কলত্রস্য মহামতিঃ।
হৃতভূয়িষ্ঠরত্নস্য কুরুক্ষেত্রমবাতরৎ॥ 15-8-68(97162)
যুধিষ্ঠিরস্যানুমতে বংশকর্তৄন্কুমারকান্।
ন্যবেশয়ত কৌরব্যস্তত্রতত্র ধনংজয়ঃ॥ 15-8-69(97163)
হার্দিক্যতনয়ং পার্থো নগরে মৃত্তিকাবতে।
অশ্বপতিং খাণ্ডবারণ্যে রাজ্যে তত্র ন্যেবশয়ৎ।
ভোজরাজকলত্রং চ হৃতশেষং নরোত্তমঃ॥ 15-8-70(97164)
তথা বৃদ্ধাংশ্চ বালাংশ্চ স্ত্রিয়শ্চাদায় পাণ্ডবঃ।
বীরৈর্বিহীনান্সর্বাংস্তাঞ্শক্রপ্রস্থে ন্যবেশয়ৎ॥ 15-8-71(97165)
যৌয়ুধানিং সরস্বত্যাঃ পুত্রং সাত্যকিনঃ প্রিয়ম্।
ন্যবেশয়ত ধর্মাত্মা বৃদ্ধবালপুরস্কৃতম্॥ 15-8-72(97166)
ইন্দ্রপ্রস্থে দদৌ রাজ্যং ব্রজ্রায় পরবীরহা।
বজ্রেণাক্রূরদারাস্তু বার্যমাণাঃ প্রবব্রজুঃ॥ 15-8-73(97167)
রুক্মিণী ৎবথ গান্ধারী শৈব্দা হৈমবতীত্যপি।
দেবী জীংববতী চৈব বিবিশুর্জাতবেদসম্॥ 15-8-74(97168)
সত্যভামা তথৈবান্যা দেব্যঃ কৃষ্ণস্য সম্মতাঃ।
বনং প্রবিবিশূ রাজংস্তাপস্যে কৃতনিশ্চয়াঃ॥ 15-8-75(97169)
দ্বারকাবাসিনো যে পুরুষাঃ পার্থমভ্যযুঃ।
যথার্হং সংবিভজ্যৈনান্বজ্রে পর্যদদজ্জয়ঃ॥ 15-8-76(97170)
স তৎকৃৎবা প্রাপ্তকালং বাষ্ণেণাপিহিতোঽর্জুনঃ।
কৃষ্ণদ্বৈপায়নং ব্যাসং দদর্শাসীনমাশ্রমে॥ ॥ 15-8-77(97171)

ইতি শ্রীমন্মহাভারতে মৌসলপর্বণি অষ্টমোঽধ্যায়ঃ॥ 8 ॥

Mahabharata – Mausala Parva – Chapter Footnotes
7-8-32 অন্বিষ্য দাহয়ামাসেতি ঝ.পাঠঃ॥ 7-8-44 ব্রুবন্ অব্রুবন্॥