মৌসলপর্ব – অধ্যায় ০৪

মৌসলপর্ব – অধ্যায় 004
॥ শ্রীঃ ॥
15.4. অধ্যায়ঃ 004
Mahabharata – Mausala Parva – Chapter Topics
দ্বারকায়াং বৃষ্ণ্যন্তকাদিভিরনর্থসূচকদুস্স্বপ্নানুভবঃ॥ 1 ॥ ততঃ কৃষ্ণাজ্ঞায়া সস্ত্রীবালবৃদ্ধৈঃ প্রভাসক্ষেত্রগমনম্॥ 2 ॥ তত্র নৃত্তগানাদিমহোৎসবানুভবপূর্বকং মদ্যাদিপানম্॥ 3 ॥ তত্র সভায়াং সাত্যকিনা স্যমন্তকমণিহরণাদিমর্মোদ্ধাটনপূর্বকং কৃতবর্মগর্হণম্॥ 4 ॥ মণিবৃত্তান্তশ্রবণখি***সত্যভামামনঃপ্রসাদনায় সাত্যকিনা খড্গেন কৃতবর্মণঃ সিরশ্ছেদনম্॥ 5 ॥ ততঃ কৃতবর্মসাত্যকিপক্ষীয়ৈর্মৌসকতৃচৈঃ পরস্পরপ্রহারেণ পরস্পরমারণম্॥ 6 ॥
Mahabharata – Mausala Parva – Chapter Text


বৈশম্পায়ন উবাচ।

কালী স্ত্রী পাণ্ডুরৈর্দন্তৈঃ প্রবিশ্য হসতী নিশি।
স্ত্রিয়ঃ স্বপ্নেষু মুষ্ণন্তী দ্বারকাং পরিধাবতি॥ 15-4-1(96970)
অগ্নিহোত্রনিকেতেষু বাস্তুমধ্যেষু বেশ্মসু।
বৃষ্ণ্যন্ধকানখাদন্ত স্বপ্নে গৃধ্রা ভয়ানকাঃ॥ 15-4-2(96971)
অলঙ্কারাশ্চ চ্ছত্রং চ ধ্বজাশ্চ কবচানি চ।
হ্রিয়মাণান্যদৃশ্যন্ত রক্ষোভিঃ সুভয়ানকৈঃ॥ 15-4-3(96972)
তচ্চাগ্নিদত্তং কৃষ্ণস্য বজ্রনাভময়োময়ম্।
দিবমাচক্রমে চক্রং বৃষ্ণীনাং পশ্যতাং তদা॥ 15-4-4(96973)
যুক্তং রথং দিব্যমাদিত্যবর্ণং
হয়াঽহরন্পশ্যতো দারুকস্য।
তে সাগরস্যোপরিষ্টাদগচ্ছ-
ন্মনোজবাশ্চতুরো বাজিমুখ্যাঃ॥ 15-4-5(96974)
তালঃ সুপর্ণশ্চ মহাধ্বজৌ তৌ
সুপূজিতৌ রামজনার্ধনাভ্যাম্।
উচ্চৈর্জহ্রুরপ্সরসশ্চ দিব্যা
দেবা ঊচুর্গম্যতাং তীর্থয়াত্রাঃ॥ 15-4-6(96975)
`ভগবদ্দর্শনস্পর্শস্নেহৈর্বিততভোগিনঃ।
দিবঃ প্রবেশানার্থং তে বিমানৈর্দিবমায়যুঃ॥’ 15-4-7(96976)
ততো জিগমিষন্তস্তে বৃষ্ণ্যন্ধকমহারথাঃ।
সান্তঃপুরাস্তদা তীর্থয়াত্রামৈচ্ছন্নরর্ষভাঃ॥ 15-4-8(96977)
ততো মনোহরা হৃষ্টাঃক পেয়ং মাংসং মধূনি চ।
বহু নানাবিধং চক্রুস্ৎবরিতাঃ কালচোদিতাঃ॥ 15-4-9(96978)
ততঃ সীধুষু সক্তাশ্চ নির্যযুর্নগরাদ্বহিঃ।
যানৈরশ্বৈর্গজৈশ্চৈব শ্রীমন্তস্তিগ্মতেজসঃ॥ 15-4-10(96979)
ততঃ প্রভাসে ন্যবসন্যথোদ্দিষ্টং যথাগৃহম্।
প্রভূতভক্ষ্যপেয়াস্তে সদারা যাদবাস্তদা॥ 15-4-11(96980)
নিবিষ্টাংস্তান্নিশাম্যাথ সমুদ্রান্তে স যোগবিৎ।
জগামামন্ত্র্য তান্বীরানুদ্ধবোঽর্থবিশারদঃ॥ 15-4-12(96981)
তং প্রস্থিতং মহাত্মানমভিবাদ্য কৃতাঞ্জলিম্।
জানন্বিনাশং বৃষ্ণীনাং নৈচ্ছদ্বারয়িতুং হরিঃ॥ 15-4-13(96982)
ততঃ কালপরীতাস্তে বৃষ্ণ্যন্ধকমহারথাঃ।
অপশ্যন্নুদ্ধবং যান্তং তেজসাঽঽবৃত্য রোদসী॥ 15-4-14(96983)
ব্রাহ্মণার্থেষু যৎসিদ্ধমন্নং তেষাং মহাত্মনাম্।
তদ্বানরেভ্যঃ প্রদদুঃ সুরাগন্ধসমন্বিতম্॥ 15-4-15(96984)
ততস্তূর্যশতাকীর্ণং নটনর্তকসংকুলম্।
অবর্তত মহাপানং প্রভাসে তিগ্মতেজসাম্॥ 15-4-16(96985)
কৃষ্ণস্য সন্নিধৌ রামঃ সহিতঃ কৃতবর্মণা।
অপিবদ্যুয়ুধানশ্চ গদো বভ্রুস্তথৈব চ॥ 15-4-17(96986)
ততঃ পরিষদো মধ্যে যুয়ুধানো মদোৎকটঃ।
অব্রবীৎকৃতবর্মাণমবহাস্যাবমত্য চ॥ 15-4-18(96987)
কঃ ক্ষত্রিয়ো হন্যমানঃ সুপ্তান্হন্যান্মৃতানিব।
তন্ন মৃষ্যন্তি হার্দিক্য যাদবা যত্ৎবয়া কৃতম্॥ 15-4-19(96988)
ইত্যুক্তে যুয়ুধানেন পূজয়ামাস তদ্বচঃ।
প্রদ্যুম্নো রথিনাংশ্রেষ্ঠো হার্দিক্যমবমত্য ব॥ 15-4-20(96989)
ততঃ পরমসংক্রুদ্ধঃ কৃতবর্মা তমব্রবীৎ।
নির্দিশন্নিব সাবজ্ঞং তদা সব্যেন পাণিনা॥ 15-4-21(96990)
ভূরিশ্রবাশ্ছিন্নবাহুর্যুর্দ্ধে প্রায়গতস্ৎবয়া।
বধেন সুনৃশংসেন কথং বীরেণ পাতিতঃ॥ 15-4-22(96991)
ইতি তস্য বচঃ শ্রুৎবা কেশবঃ পরবীরহা।
তির্যক্সরোষয়া দৃষ্ট্যা বীক্ষাংচক্রে স মন্যুমান্॥ 15-4-23(96992)
মণিঃ স্যমন্তকশ্চৈব যঃ স সত্রাজিতোঽভবৎ।
তাং কথাং শ্রাবয়ামাস সাত্যকির্মধুসূদনম্॥ 15-4-24(96993)
তচ্ছ্রুৎবা কেশবস্যাঙ্কমগমদ্রুদতী তদা।
সত্যভামা প্রকুপিতা কোপয়ন্তী জনার্দনম্॥ 15-4-25(96994)
তত উত্থায় সক্রোধঃ সাত্যকির্বাক্যমব্রবীৎ। 15-4-26(96995)
পঞ্চানাং দ্রৌপদেয়ানাং ধৃষ্টদ্যুম্নশিখণ্ডিনোঃ।
এষ গচ্ছামি পদবীং সত্যেন চ তথা শপে॥ 15-4-27(96996)
সৌপ্তিকে যে চ নিহতাঃ সুপ্তা যেন দুরাত্মনা।
দ্রোণপুত্রসহায়েন পাপেন কৃতবর্মণা॥ 15-4-28(96997)
সমাপ্তমায়ুরস্যাদ্য যশশ্চৈব সুমধ্যতে।
ইত্যেবমুক্ৎবা খঙ্গেন কেশবস্য সমীপতঃ।
অভিদ্রুত্য শিরঃ ক্রুদ্ধশ্চিচ্ছেদ কৃতবর্মণঃ॥ 15-4-29(96998)
তথাঽন্যানপি নিঘ্নন্তং যুয়ুধানং সমন্ততঃ।
অভ্যধাবদ্ধৃষীকেশো বিনিবারয়িতুং তদা॥ 15-4-30(96999)
একীভূতাস্ততঃ সর্বে কালপর্যায়চোদিতাঃ।
ভোজান্ধকা মহারাজ শৈনেয়ং পর্যবারয়ন্॥ 15-4-31(97000)
তান্দৃষ্ট্বা পততস্তূর্ণমভিক্রুদ্ধাঞ্জনার্দনঃ।
ন চুক্রোধ মহাতেজা জানন্কালস্য পর্যযম্॥ 15-4-32(97001)
তে তু পানমদাবিষ্টাশ্চোদিতাঃ কালধর্মণা।
যুয়ুধানমথাভ্যঘ্নন্নুচ্ছিষ্টৈর্ভাজনৈস্তদা॥ 15-4-33(97002)
হন্যমানে তু শৈনেয়ে ক্রুদ্ধো রুক্মিণিনন্দনঃ।
তদনন্তরমাগচ্ছন্মোচয়িষ্যঞ্শিনেঃ সুতম্॥ 15-4-34(97003)
স ভোজৈঃ সহ সংয়ুক্তঃ সাত্যকিশ্চান্ধকৈঃ সহ।
ব্যায়চ্ছমানৌ তৌ বীরৌ বাহুদ্রবিণশালিনৌ।
বহুৎবান্নিহতৌ তত্র উভৌ কুষ্ণস্য পশ্যতঃ॥ 15-4-35(97004)
হতং দৃষ্ট্বা চ শৈনেয়ং পুত্রং চ যদুনন্দনঃ।
এরকাণাং ততো মুষ্টিং কোপাজ্জগ্রাহ কেশবঃ॥ 15-4-36(97005)
তদভূন্মুসলং ঘোরং বজ্রকল্পময়োময়ম্।
জঘান কুষ্ণস্তাংস্তেনি যেয়ে প্রমুখতোঽভবন্॥ 15-4-37(97006)
ততোঽন্ধকাশ্চ ভোজাশ্চ শৈনেয়া বৃষ্ণয়স্তথা।
জঘ্নুরন্যোন্যমাক্রন্দে মুসলৈঃ কালচোদিতাঃ॥ 15-4-38(97007)
যস্তেষামেরকাং কশ্চিজ্জগ্রাহ কুপিতো নৃপঃ।
বজ্রভূতেব সা রাজন্নদৃশ্যত তদা বিভো॥ 15-4-39(97008)
তৃণং চ মুসলীভূতমপি তত্র ব্যদৃশ্যত।
ব্রহ্মদণ্ডকৃতং সর্বমিতি তদ্বিদ্বি পার্থিব॥ 15-4-40(97009)
আবিধ্যাবিধ্য তে রাজন্প্রহরন্তি স্ম তৈস্তৃণৈঃ।
তদ্বজ্রভূতং মুসলং ব্যদৃশ্যত তদা দৃঢম্॥ 15-4-41(97010)
অবধীৎপিতরং পুত্রঃ পিতা পুত্রং চ ভারত।
মত্তাঃ পরিপতন্তি স্ম যোধয়ন্তঃ পরস্পরম্॥ 15-4-42(97011)
পতঙ্গা ইব চাগ্নৌ তে নিপেতুঃ কুকুরান্ধকাঃ।
নাসীৎপলায়নে বুদ্ধির্বধঅয়মানস্য কস্যচিৎ॥ 15-4-43(97012)
তত্রাপশ্যন্মহাবাহুর্জানন্কালস্য পর্যযম্।
মুসলং সমবষ্টভ্য তস্থৌ স মধুসূদনঃ॥ 15-4-44(97013)
সাংবং চ নিহতং দৃষ্ট্বা চারুদেষ্ণং চ মাধবঃ।
প্রদ্যুম্নং চানিরুদ্ধং চ ততশ্চুক্রোধ ভারত॥ 15-4-45(97014)
গদং বীক্ষ্য শয়ানং চ ভৃশং কোপসমন্বিতঃ।
স নিঃশেষং তদা চক্রে শার্ঙ্গচক্রগংদাধরঃ॥ 15-4-46(97015)
তং নিঘ্নন্তং মহাতেজা বভ্রুঃ পরপুরংজয়ঃ।
দারুকশ্চৈব দাশার্হমূবতুর্যন্নিবোধ তৎ॥ 15-4-47(97016)
ভগবন্নিহতাঃ সর্বে ৎবয়া ভূয়িষ্ঠশো নরাঃ।
রামস্য পদমন্বিচ্ছ তত্র গচ্ছাম যত্র সঃ॥ ॥ 15-4-48(97017)

ইতি শ্রীমন্মহাভারতে মৌসলপর্বণি চতুর্থোঽধ্যায়ঃ ॥

Mahabharata – Mausala Parva – Chapter Footnotes
7-4-1 মুষ্ণন্তী স্ত্রীণাং মঙ্গলসূত্রাদিকং চোরয়ন্তী॥ 7-4-12 নিশ্মম্য দৃষ্ট্বা। অর্থবিশারদঃ মোক্ষপণ্ডিতঃ॥ 7-4-15 ব্রাহ্মণার্থদ্রব্যস্যান্যত্র বিনিয়োজনমায়ুঃক্ষয়করমিত্যর্থঃ॥ 7-4-41 আবিধ্য বিদ্ধ্বা॥ 7-4-44 তত্র যন্মুসলমপস্যত্তদেবাবষ্টভ্য তস্থাবিত্যন্বয়ঃ॥