সভাপর্ব – অধ্যায় 035

সভাপর্ব – অধ্যায় 035
॥ শ্রীঃ ॥
2.35. অধ্যায়ঃ 035
Mahabharata – Sabha Parva – Chapter Topics
নকুলস্য পশ্চিমদিগ্বিজয়ঃ॥ 1॥
Mahabharata – Sabha Parva – Chapter Text


বৈশম্পায়ন উবাচ॥

নকুলস্য তু বক্ষ্যামি কর্মাণি বিজয়ং তথা।
বাসুদেবজিতামাশাং যথাঽসাবজয়ৎপ্রভুঃ॥ 2-35-1(12816)
নির্যায় খাণ্ডবপ্রস্থাৎপ্রতীচীমভিতো দিশম্।
উদ্দিশ্য মতিমান্প্রায়ান্মহত্যা সেনয়া সহ॥ 2-35-2(12817)
সিংহনাদেন মহতা যোধানাং গর্জিতেন চ।
রথনেমিনিনাদৈশ্চ কম্পয়ন্বসুধামিমাম্॥ 2-35-3(12818)
ততো বহু ধনং রম্যং গাবাঢ্যং ধনধান্যবৎ।
কার্তিকেয়স্য দয়িতং রোহীতকুপাদ্রবৎ॥ 2-35-4(12819)
তত্র যুদ্ধং মহচ্চাসীচ্ছূরৈর্মত্তময়ূরকৈঃ।
মরুভূমিং স কার্ৎস্ন্যেন তথৈব বহুধান্যকম্॥ 2-35-5(12820)
শৈরীষকং মহেত্থং চ বশে চক্রে মহাদ্যুতিঃ।
আক্রোশং চৈব রাজর্ষি তেন যুদ্ধমভূন্মহৎ॥ 2-35-6(12821)
তান্দশার্ণান্স জিৎবা চ প্রতস্থে পাণ্ডুনন্দনঃ।
শিবীংস্ত্রিগর্তানম্বষ্ঠান্মালবান্পঞ্চ কর্পটান্॥ 2-35-7(12822)
তথা মধ্যমকেয়াংশ্চ বাটধানান্দ্বিজানথ।
পুনশ্চ পরিবৃত্যাথ পুষ্করারণ্যবাসিনঃ॥ 2-35-8(12823)
গণানুৎসবসঙ্কেতান্ব্যজয়ৎপুরুষর্ষভঃ।
সিন্ধুকূলাশ্রিতা যে চ গ্রামণীয়া মহাবলাঃ॥ 2-35-9(12824)
শূদ্রাভীরগণাশ্চৈব যে চাশ্রিত্য সরস্বতীম্।
বর্তয়ন্তি চ যে মৎস্যৈর্যে চ পর্বতবাসিনঃ॥ 2-35-10(12825)
কৎস্নং পঞ্চনন্দং চৈব তথৈবামরপর্বতম্।
উত্তরজ্যোতিষং চৈব তথা দিব্যকটং পুরম্॥ 2-35-11(12826)
দ্বারপালং চ তরসা বশে চক্রে মহাদ্যুতিঃ।
রামঠান্হারহূণাংশ্চ প্রতীচ্যাশ্চৈব যে নৃপাঃ॥ 2-35-12(12827)
তান্সর্বান্স বশে চক্রে শাসনাদেব পাণ্ডবঃ।
তত্রস্থঃ প্রেষয়ামাস বাসুদেবায় ভারত॥ 2-35-13(12828)
স চাস্য গতভী রাজন্প্রতিজগ্রাহ শাসনম্।
ততঃ শাকলমভ্যেত্য মদ্রাণাং পুটভেদনম্॥ 2-35-14(12829)
মাতুলং প্রীতিপূর্বেণ শল্যং চক্রে বশে বলী।
স তেন সৎকৃতো রাজ্ঞা সৎকারার্হো বিশাম্পতে॥ 2-35-15(12830)
রত্নানি ভূরীণ্যাদায় সম্প্রতস্থে যুধাং পতিঃ।
ততঃ সাগরকুক্ষিস্থান্ম্লেচ্ছান্পরমদারুণান্॥ 2-35-16(12831)
পহ্লবান্বর্বরাংশ্চৈব কিরাতান্যবনাঞ্শকান্।
ততো রত্নান্যপাদায় বশে কৃৎবা চ পার্থিবান্।
ন্যবর্তত কুরুশ্রেষ্ঠো নকুলশ্চিত্রমার্গবিৎ॥ 2-35-17(12832)
করমাণাং সহস্রাণি কোশং তস্য মহাত্মনঃ।
ঊহর্দশ মহারাজ কৃচ্ছ্রাদিব মহাধনম্॥ 2-35-18(12833)
ইন্দ্রপ্রস্থগতং বীরমভ্যেত্য স যুধিষ্ঠিরম্।
ততো মাদ্রীসুতঃ শ্রীমান্ধনং তস্মৈ ন্যবেদয়ৎ॥ 2-35-19(12834)
এবং বিজিত্য নকুলো দিশং বরুণপালিতাম্।
প্রতীচীং বাসুদেবেন নির্জিতাং ভরতর্ষভ॥ ॥ 2-35-20(12835)

ইতি শ্রীমন্মহাভারতে সভাপর্বণি দিগ্বিজয়পর্বণি পঞ্চত্রিংশোঽধ্যায়ঃ॥ 35॥