সভাপর্ব – অধ্যায় 010

সভাপর্ব – অধ্যায় 010
॥ শ্রীঃ ॥
2.10. অধ্যায়ঃ 010
Mahabharata – Sabha Parva – Chapter Topics
কুবেরসভাবর্ণনম্॥ 1॥
Mahabharata – Sabha Parva – Chapter Text


নারদ উবাচ।

সভা বৈশ্রবণী রাজঞ্শতয়োজনমায়তা।
বিস্তীর্ণা সপ্ততিশ্চৈব যোজনানি সিতপ্রভা॥ 2-10-1(11672)
তপসা নির্জিতা রাজন্স্বয়ং বৈশ্রবণেন সা।
শশিপ্রভা প্রাবরণা কৈলাসশিখরোপমা॥ 2-10-2(11673)
গুহ্যকৈরুহ্যমানা সা খে বিষক্তেব শোভতে।
দিব্যা হেমময়ৈরুচ্চৈঃ প্রাসাদৈরুপশোভিতা॥ 2-10-3(11674)
মহারত্নবতী চিত্রা দিব্যগন্ধা মনোরমা।
সিতাভ্রশিখরাকারা প্লবমানেব দৃশ্যতে। 2-10-4(11675)
দিব্যা হেমময়ৈ রঙ্গৈর্বিদ্যুদ্ভিরিব চিত্রিতা।
তস্যাং বৈশ্রবণো রাজা বিচিত্রাভরণাম্বরঃ॥ 2-10-5(11676)
স্ত্রীসহস্রৈর্বৃতঃ শ্রীমানাস্তে জ্বলিতকুণ্ডলঃ।
`সহ পত্ন্যা মহারাজ ঋদ্ধ্যা সহ বিরাজতে। 2-10-6(11677)
সর্বাভরণভূষিণ্যা বপুষ্মত্যা ধনেশ্বরঃ’।
দিবাকরনিভে পুণ্যে দিব্যাস্তরণসংবৃতে।
দিব্যপাদোপধানে চ নিষণ্ণঃ পরমাসনে॥ 2-10-7(11678)
মন্দারাণামুদারাণাং বনানি পরিলোডয়ন্।
সৌগন্ধীকবনানাং চ গন্ধং গন্ধবহো বহন্॥ 2-10-8(11679)
নলিন্যাশ্চালকাখ্যায়া নন্দনস্য বনস্য চ।
শীতো হৃদয়সংহ্লাদী বায়ুস্তমুপসেবতে॥ 2-10-9(11680)
তত্র দেবাঃ সগন্ধর্বা গণৈরপ্সরসাং বৃতাঃ।
দিব্যতানৈর্মহারাজ গায়ন্তিস্ম সভাগতাঃ॥ 2-10-10(11681)
মিশ্রকেশী চ রম্ভা চ চিত্রসেনা শুচিস্মিতা।
চারুনেত্রা ঘৃতাচী চ মেনকা পুঞ্জিকস্থলা॥ 2-10-11(11682)
বিশ্বাচী সহজন্যা চ প্রম্লোচা উর্বশী ॥ 2-10-12(11683)
বর্গা চ সৌরভেয়ী চ সমীচী বুদ্বুদা লতা।
এতাঃ সহস্রশশ্চান্যা নৃত্তগীতবিশারদাঃ॥ 2-10-13(11684)
উপতিষ্ঠন্তি ধনদং গন্ধর্বাপ্সরসাং গণাঃ।
অনিশং দিব্যবাদিত্রৈর্নৃত্তগীতৈশ্চ স সভা॥ 2-10-14(11685)
অশূন্যা রুচিরা ভাতি গন্ধর্বাপ্সরসাং গণৈঃ।
কিন্নরা নাম গন্ধর্বা নরা নাম তথাঽপরে॥ 2-10-15(11686)
মাণিভদ্রোঽথ ধনদঃ শ্বেতভদ্রশ্চ গুহ্যকঃ।
কশেরকো গণ্ডকণ্ডূঃ প্রদ্যোতশ্চ মহাবলঃ॥ 2-10-16(11687)
কুস্তম্বরুঃ পিশাচশ্চ গজকর্ণো বিশালকঃ।
বরাহকর্ণস্তাম্রৌষ্ঠঃ ফলকক্ষঃ ফলোদকঃ॥ 2-10-17(11688)
হংসচূডঃ শইখাবর্তো হেমনেত্রো বিভীষণঃ।
পুষ্পাননঃ পিঙ্গলকঃ শোণিতোদঃ প্রবালকঃ॥ 2-10-18(11689)
বৃক্ষবাস্যনিকেতশ্চ চীরবাসাশ্চ ভারত।
এতে চান্যে চ বহবো যক্ষাঃ শতসহস্রশঃ॥ 2-10-19(11690)
সদা ভগবতী লক্ষ্মীস্তত্রৈব নলকূবরঃ।
অহং চ বহুশস্তস্যাং ভবন্ত্যন্যে চ মদ্বিধাঃ॥ 2-10-20(11691)
ব্রহ্মর্ষয়ো ভবন্ত্যত্র তথা দেবর্ষয়োঽপরে।
ক্রব্যাদাশ্চ তথৈবান্যে গন্ধর্বাশ্চ মহাবলাঃ॥ 2-10-21(11692)
উপাসতে মহাত্মানং তস্যাং ধনদমীশ্বরম্।
ভগবান্ভূতসঙ্ঘৈশ্চ বৃতঃ শতসহস্রশঃ॥ 2-10-22(11693)
উমাপতিঃ পশুপতিঃ শূলভৃদ্ভগনেত্রহা।
ত্র্যম্বকো রাজশার্দূল দেবী চ বিগতক্লমা॥ 2-10-23(11694)
বামনৈর্বিকটৈঃ কুব্জৈঃ ক্ষতজাক্ষৈর্মহারবৈঃ।
মেদোমাংসাশনৈরুগ্রৈরুগ্রধন্বা মহাবলঃ॥ 2-10-24(11695)
নানাপ্রহরণৈরুগ্রৈর্বাতৈরিব মহাজবৈঃ।
বৃতঃ সখায়মন্বাস্তে সদৈব ধনদং নৃপ॥ 2-10-25(11696)
প্রহৃষ্টাঃ শতশশ্চান্যে বহুশঃ সপরিচ্ছদাঃ।
গন্ধর্বাণাং চ পতয়ো বিশ্বাবসুর্হহা হুহূঃ॥ 2-10-26(11697)
তুম্বুরুঃ প্রবতশ্চৈব শৈলূষশ্চ তথাঽপরঃ।
চিত্রসেনশ্চ গীতজ্ঞস্তথা চিত্ররথোপি চ॥ 2-10-27(11698)
এতে চান্যে চ গন্ধর্বা ধনেশ্বরমুপাসতে।
বিদ্যাধরাধিপশ্চৈব চক্রধর্মা সহানুজৈঃ॥ 2-10-28(11699)
উপাচরতি তত্র স্ম ধনানামীশ্বরং প্রভুম্।
কিন্নরাঃ শতশস্তত্র ধনানামীশ্বরং প্রভুম্॥ 2-10-29(11700)
আসতে চাপি রাজানো ভগদত্তপুরোগমাঃ।
দ্রুমঃ কিম্পুরুষেশশ্চ উপাস্তে ধনদেশ্বরম্॥ 2-10-30(11701)
রাক্ষসাধিপতিশ্চৈব মহেন্দ্রো গন্ধমাদনঃ।
সহ যক্ষৈঃ সগন্ধর্বৈঃ সহ সর্বৈর্নিশাচরৈঃ॥ 2-10-31(11702)
বিভীষণশ্চ ধর্মিষ্ঠ উপাস্তে ভ্রাতরং প্রভুম্।
হিমবান্পারিয়াত্রশ্চ বিন্ধ্যকৈলাসমন্দরাঃ॥ 2-10-32(11703)
মলয়ো দর্দুরশ্চৈব মহেন্দ্রো গন্ধমাদনঃ।
ইন্দ্রকীলঃ সুনাভশ্চ তথা দিব্যৌ চ পর্বতৌ॥ 2-10-33(11704)
এতে চান্যে চ বহবঃ সর্বে মেরুপুরোগমাঃ।
উপাসতে মহাত্মানং ধনানামীশ্বরং প্রভুম্॥ 2-10-34(11705)
ন্দীশ্বরশ্চ ভগবান্মহাকালস্তথৈব চ।
শঙ্কুকর্ণমুখাঃ সর্বে দিব্যাঃ পারিষদাস্তথা॥ 2-10-35(11706)
কাষ্ঠঃ কুটী মুখো দন্তী বিজয়শ্চ তপোধিকঃ।
শ্বেতশ্চ বৃষভস্তত্র নর্দন্নাস্তে মহাবলঃ॥ 2-10-36(11707)
ধনদং রাক্ষসাশ্চান্যে পিশাচাশ্চ উপাসতে।
পারিষদৈঃ পরিবৃতমুপায়ান্তং মহেশ্বরম্॥ 2-10-37(11708)
সদা হি দেবদেবেশং শিবং ত্রৈলোক্যভাবনম্।
প্রণম্য মূর্ধ্না পৌলস্ত্যো বহুরূপমুমাপতিম্॥ 2-10-38(11709)
ততোঽভ্যনুজ্ঞাং সম্প্রাপ্য মহাদেবাদ্ধনেশ্বরঃ।
আস্তে কদাচিদ্ভগবান্ভবো ধনপতেঃ সখা॥ 2-10-39(11710)
নিধিপ্রবরমুখ্যৌ চ শঙ্খপদ্মৌ ধনেশ্বরৌ।
সর্বান্নিধীন্প্রগৃহ্যাথ উপাস্তাং বৈ ধনেশ্বরম্॥ 2-10-40(11711)
সা সভা তাদৃশী রম্যা ময়া দৃষ্টান্তরিক্ষগা।
পিতামহসভাং রাজন্কীর্তয়িষ্যে নিবোধ তাম্॥ ॥ 2-10-41(11712)

ইতি শ্রীমন্মহাভারতে সভাপর্বণি মন্ত্রপর্বণি দশমোঽধ্যায়ঃ॥ 10॥

Mahabharata – Sabha Parva – Chapter Footnotes
2-10-5 রঙ্গৈরিতিচ্ছেদঃ॥ 2-10-39 আস্তে ইত্যাবৃত্ত্যা যোজনীয়ম্। যদা ভবঃ কদাচিৎকুবেরসভামধ্যাস্তে তদা কুবেরোঽপি ভবাদনুজ্ঞাং প্রাপ্য তন্নিকটে আস্তে উপবিশতি॥