সভাপর্ব – অধ্যায় 006

সভাপর্ব – অধ্যায় 006
॥ শ্রীঃ ॥
2.6. অধ্যায়ঃ 006
Mahabharata – Sabha Parva – Chapter Topics
উত্তমসভালাভগর্বিতেন যুধিষ্ঠিরেণ সভাবিষয়কপ্রশ্নে নারদস্য ইন্দ্রাদিসভাবর্ণ নপ্রতিজ্ঞানম্॥ 1॥
Mahabharata – Sabha Parva – Chapter Text


বৈশমাপায়ন উবাচ।

সম্পূজ্যাথাভ্যনুজ্ঞাতো মহর্ষের্বচনাৎপরম্।
প্রত্যুবাচানুপূর্ব্যেণ ধর্মরাজো যুধিষ্ঠিরঃ॥ 2-6-1(11547)
ভগবত্যায়্যমাহৈতং যথাবদ্ধর্মনিশ্চয়ম্।
যথাশক্তি যথান্যায়ং ক্রিয়তেঽয়ং বিধির্ময়া॥ 2-6-2(11548)
রাজভির্যদ্যথা কার্যং, পুরা বৈ তন্ন সংশয়ঃ।
যথান্যায়োপনীতার্থং কৃতং হেতুমদর্থবৎ॥ 2-6-3(11549)
বয়ং তু সৎপথং তেষাং যাতুমিচ্ছামহে প্রভো।
ন তু শক্যং তথা গন্তুং যথা তৈর্নিয়তাত্মভিঃ॥ 2-6-4(11550)
বৈশম্পায়ন উবাচ। 2-6-5x(1392)
একমুক্ৎবা স ধর্মাত্মা বাক্যং তদভিপূজ্য চ।
` তং তু বিশ্রান্তমাসীনং দেবর্ষিমমিতদ্যুতিম্’॥
মুহূর্তাৎপ্রাপ্তকালং চ দৃষ্ট্বা লোকচরং মুনিম্॥ 2-6-5(11551)
নাদরদং সুস্থমাসীনমুপাসীনো যুধিষ্ঠিরঃ।
অপৃচ্ছৎপাণ্ডবস্তত্র রাজমধ্যে মাহদ্যুতিঃ॥ 2-6-6(11552)
ভবাৎসঞ্চরতে লোকান্সদা নানাবিধান্বহূন্।
ব্রহ্মণা নির্মিতান্পূর্বং প্রেক্ষমাণো মনোজবঃ। 2-6-7(11553)
ঈদৃশী ভবিতা কাচিদ্দৃষ্টপূর্বা সভা ক্বচিৎ।
ইতো বা শ্রেয়সী ব্রহ্মংস্তন্মমাচক্ষ্ব পৃচ্ছতঃ॥ 2-6-8(11554)
বৈশম্পায়ন উবাচ। 2-6-9x(1393)
তচ্ছ্রুৎবা নারদস্তস্য ধর্মরাজস্য ভাষিতম্।
পাণ্ডবং প্রত্যুবাচেদং স্ময়ন্মধুরয়া গিরা॥ 2-6-9(11555)
নারদ উবাচ। 2-6-10x(1394)
মানুষেষু ন মে তাত দৃষ্টপূর্বা ন চ শ্রুতা।
সভা মণিময়ী রাজন্যথেয়ং তব ভারত॥ 2-6-10(11556)
সভাং তু পিতৃরাজস্য বরুণস্য চ ধীমতঃ।
কথয়িষ্যে তথেন্দ্রস্য কৈলাসনিলয়স্য চ॥ 2-6-11(11557)
ব্রহ্মণশ্চ সভাং দিব্যাং কথয়িষ্যে গতক্লমাম্।
দিব্যাদিব্যৈরভিপ্রায়ৈরুপেতাং বিশ্বরূপিণীম্॥ 2-6-12(11558)
দেবৈঃ পিতৃগণৈঃ সাধ্যৈর্যজ্বভির্নিয়তাত্মভিঃ।
জুষ্টাং মুনিগণৈঃ শান্তৈর্বেদয়জ্ঞৈঃ সদক্ষিণৈঃ॥
যদি তে শ্রবণে বুদ্ধির্বর্ততে ভরতর্ষভ॥ 2-6-13(11559)
নারদেনৈবমুক্তস্তু ধর্মরাজো যুধিষ্ঠিরঃ।
প্রাঞ্জলির্ভ্রাতৃভিঃ সার্ধং তৈশ্চ সর্বৈর্দ্বিজোত্তমৈঃ॥ 2-6-14(11560)
নারদং প্রত্যবাচেদং ধর্মরাজো মহামনাঃ।
সভাঃ কথয় তাঃ সর্বাঃ শ্রোতুমিচ্ছামহে বয়ম্॥ 2-6-15(11561)
কিন্দ্রব্যাস্তাঃ সভা ব্রহ্মন্কিংবিস্তারাঃ কিমায়তাঃ।
পিতামহং চ কে তস্যাং সভায়াং পর্যুপাসতে॥ 2-6-16(11562)
বাসবং দেবরাজং চ যমং বৈবস্বতং চ কে।
বরুণং চ কুবেরং চ সভায়াং পর্যুপাসতে॥ 2-6-17(11563)
এতৎসর্বং যথান্যায়ং ব্রহ্মর্ষে বদতস্তব।
শ্রোতুমিচ্ছাম সহিতাঃ পরং কৌতূহলং হি নঃ॥ 2-6-18(11564)
এবমুক্তঃ পাণ্ডবেন নারদঃ প্রত্যভাষত।
ক্রমেণ রাজন্দিব্যাস্তাঃ শ্রূয়ন্তামিহ নঃ সভাঃ॥ ॥ 2-6-19(11565)

ইতি শ্রীমন্মহাভারতে সভাপর্বণি মন্ত্রপর্বণি ষষ্ঠোঽধ্যায়ঃ॥ 6॥

Mahabharata – Sabha Parva – Chapter Footnotes
2-6-11 কৈলাসনিলয়স্য কুবেরস্য॥