মৌসলপর্ব – অধ্যায় ০৬

মৌসলপর্ব – অধ্যায় 006
॥ শ্রীঃ ॥
15.6. অধ্যায়ঃ 006
Mahabharata – Mausala Parva – Chapter Topics
দারুকেণ হাস্তিনপুরমেত্য পাণ্ডবেষু সর্বয়াদবক্ষয়নিবেদনম্॥ 1 ॥ অর্জুনেন দ্বারকামেত্য রুক্মিণ্যাদিপরিসান্ৎবনপূর্বকং বসুদেবগৃহংপ্রতি গমনম্॥ 2 ॥
Mahabharata – Mausala Parva – Chapter Text


বৈশম্পায় উবাচ।

দারুকোপি কুরূন্গৎবা দৃষ্ট্বা পার্থান্মহারথান্।
আচষ্ট মৌসলে বৃষ্ণীনন্যোন্যেনোপসংহৃতান্॥ 15-6-1(97053)
শ্রুৎবা বিনষ্টান্বার্ষ্ণেয়ান্সভোজান্ধককৌকুরান্।
পাণ্ডবাঃ শোকসংতপ্তা বিত্রস্তমনসোঽভবন্॥ 15-6-2(97054)
ততোঽর্জুনস্তানামন্ত্র্য কেশবস্য প্রিয়ঃ সখা।
প্রয়যৌ মাতুলং দ্রষ্টুং নেদমস্তীতি চাব্রবীৎ॥ 15-6-3(97055)
স বৃষ্ণিনিলয়ং গৎবা দারুকেণ সহ প্রভো।
দদর্শ দ্বারকাং বীরো মৃতনাথামিব স্ত্রিয়ম্॥ 15-6-4(97056)
যাঃ স্ম তা লোকনাথেন নাথবত্যঃ পুরাঽভবন্।
তাস্ৎবনাথাস্তদা নাথং পার্থং দৃষ্ট্বা বিচুক্রুশুঃ॥ 15-6-5(97057)
ষোডশ স্ত্রীসহস্রাণি বাসুদেবপরিগ্রহাঃ।
তাসামাসীন্মহান্নাদো দৃষ্ট্বৈবার্জুনমাগতম্॥ 15-6-6(97058)
তাস্তু দৃষ্ট্বৈব কৌরব্যো বাষ্পেণাপিহিতেক্ষণঃ।
হীনাঃ কৃষ্ণেন পুত্রৈশ্চ নাশকৎসোভিবীক্ষিতুম্॥ 15-6-7(97059)
স তাং বৃষ্ণ্যন্ধকজলাং হয়মীনাং রথোডুপাম্।
বাদিত্ররথঘোষৌঘাং বেশ্মতীর্থমহাগ্রহাম্॥ 15-6-8(97060)
রত্নশৈবলসংঘাতাং বজ্রপ্রাকারমালিনীম্।
রথ্যাস্রোতোজলাবর্তাং চৎবরস্তিমিতহ্রদাম্॥ 15-6-9(97061)
রামকৃষ্ণমহাগ্রাহাং দ্বারকাং সরিতং তদা।
কালপাশগ্রহাং ভীমাং নদীং বৈতরণীমিব॥ 15-6-10(97062)
দদর্শ বাসবির্ধীমান্বিহীনাং বৃষ্ণিপুঙ্গবৈঃ।
গতশ্রিয়ং বিরানন্দাং পদ্মিনীং শিশিরে যথা। 15-6-11(97063)
তাং দৃষ্ট্বা দ্বারকাং পার্থস্তাশ্চ কৃষ্ণস্য যোষিতঃ।
সস্বনং বাষ্পমুৎসৃজ্য নিপাত মহীতলে॥ 15-6-12(97064)
সাত্রাজিতী ততঃ সত্যা রুক্মিণী চ বিশাংপতে।
অভিপত্য প্ররুরুদুঃ পরিবার্য ধনংজয়ম্॥ 15-6-13(97065)
ততস্তং কাঞ্চনে পীঠে সমুত্তাপ্যোপবেশ্য চ।
অভিনন্দ্য মহাত্মানং পরিবার্যোপতস্থিরে॥ 15-6-14(97066)
ততঃ সংস্তূয় গোবিন্দং কথয়িৎবা চ পাণ্ডবঃ।
আশ্বাস্য তাঃ স্ত্রিয়শ্চাপি মাতুলং দ্রষ্টুমভ্যগাৎ॥ ॥ 15-6-15(97067)

ইতি শ্রীমন্মহাভারতে মৌসলপর্বণি ষষ্ঠোঽধ্যায়ঃ॥ 6 ॥

Mahabharata – Mausala Parva – Chapter Footnotes
7-6-14 অব্রুবন্ত্যো মহামানমিতি ঝ.পাঠঃ॥