সভাপর্ব – অধ্যায় 024

সভাপর্ব – অধ্যায় 024
॥ শ্রীঃ ॥
2.24. অধ্যায়ঃ 024
Mahabharata – Sabha Parva – Chapter Topics
ভীমজরাসন্ধয়োঃ স্বস্ত্যযনপূর্বকং যুদ্ধারম্ভঃ॥ 1॥ শ্রীকৃষ্ণপ্রোৎসাহিতস্য ভীমস্য জরাসন্ধবধোদ্যমঃ॥ 2॥
Mahabharata – Sabha Parva – Chapter Text


ততস্তং নিশ্চিতাত্মানং যুদ্ধায় যদুনন্দনঃ।
উবাচ বাগ্মী রাজানং জরাসন্ধমধোক্ষজঃ॥ 2-24-1(12278)
ত্রয়াণাং কেন তে রাজন্যোদ্ধুমুৎসহতে মনঃ।
অস্মদন্যতমেনেহ সজ্জীভবতু কো যুধি॥ 2-24-2(12279)
এবমুক্তঃ স নৃপতির্যুদ্ধং বব্রে মহাদ্যুতিঃ।
জরাসন্ধস্ততো রাজা ভীমসেনেন মাগধঃ॥ 2-24-3(12280)
`ধারয়ন্তং গদাং দিব্যাং বলং শ্রুৎবা চ নির্বৃতঃ।
অর্জুন বাসুদেবং চ বজর্যিৎবা স মাগধঃ॥ 2-24-4(12281)
মৎবা দেবং গোপ ইতি বালোঽর্জুন ইতি স্ম হ’।
আদায় রোজনাং মাল্যং মঙ্গল্যান্যপরাণি চ॥ 2-24-5(12282)
ধারয়ন্নগদান্মুখ্যান্নির্বৃতীর্বেদনানি চ।
উপতস্থে জরাসন্ধং যুয়ুৎসুং বৈ পুরোহিতঃ॥ 2-24-6(12283)
কৃতস্বস্ত্যযনো রাজা ব্রাহ্মণেন যশস্বিনা।
সমনহ্যজ্জরাসন্ধঃ ক্ষাত্রং ধর্মমনুস্মরন্॥ 2-24-7(12284)
অবমুচ্য কিরীটং স কেশান্সমনুমৃজ্য চ।
উদতিষ্ঠজ্জরাসন্ধো বেলাতিগ ইবার্ণবঃ॥ 2-24-8(12285)
উবাচ মতিমান্রাজা ভীমং ভীমপরাক্রমঃ।
ভীম যোৎস্যে ৎবয়া সার্ধং শ্রেয়সা নির্জিতং বরম্॥ 2-24-9(12286)
এবমুক্ৎবা জরাসন্ধো ভীমসেনমরিন্দমঃ।
প্রত্যুদ্যযৌ মহাতেজাঃ শক্রং বল ইবাসুরঃ॥ 2-24-10(12287)
ততঃ সংমন্ত্র্য কৃষ্ণেন কৃতস্বস্ত্যযনো বলী।
ভীমসেনো জরাসন্ধমাসসাদ যুয়ুৎসয়া॥ 2-24-11(12288)
ততস্তৌ নরশার্দূলৌ বাহুশস্ত্রৌ সমীয়তুঃ।
বীরৌ পরমসংহৃষ্টাবন্যোন্যজয়কাঙ্ক্ষিণৌ॥ 2-24-12(12289)
করগ্রহণপূর্বং তু কৃৎবা পাদাভিবন্দনম্।
কক্ষৈঃ কক্ষাং বিধুন্বানাবাস্ফোটং তত্র চক্রতুঃ॥ 2-24-13(12290)
স্কন্ধে দোর্ভ্যাং সমাহত্য নিহত্য চ মুহুর্মুহুঃ।
অঙ্গমঙ্গৈঃ সমাশ্লিষ্য পুনরাস্ফালনং চ চক্রতুঃ। 2-24-14(12291)
চিত্রহস্তাদিকং কৃৎবা সস্ফুলিঙ্গেন চাশনিম্॥
গলগণ্ডাভিঘাতেন সস্ফুলিঙ্গেন চাশনিম্॥ 2-24-15(12292)
বাহুপাশাদিকং কৃৎবা পাদাহতশিরাবুভৌ।
উরোহস্তং ততশ্চক্রে পূর্ণকুম্ভৌ প্রয়ুজ্য তৌ॥ 2-24-16(12293)
করসম্পীডনং কৃৎবা গর্জন্তৌ বারণাবিব।
নর্দন্তৌ মেঘসঙ্কাশৌ বাহুপ্রহরণাবুভৌ॥ 2-24-17(12294)
তলেনাহন্যমানৌ তু অন্যোন্যং কৃতবীক্ষণৌ।
সিংহাবিব সুসংঙ্ক্রুদ্ধাবাকৃষ্যাকৃষ্য যুধ্যতাম্॥ 2-24-18(12295)
অঙ্গেনাঙ্গং সমাপীড্য বাহুভ্যামুভয়োরপি।
আবৃত্য বাহুভিশ্চাপি উদরং চ প্রচক্রতুঃ॥ 2-24-19(12296)
উভৌ কট্যাং সুপার্শ্বে তু তক্ষবন্তৌ চ শিক্ষিতৌ।
অধো হস্তং স্বকণ্ঠে তূদরস্যোরসি চাক্ষিপৎ॥ 2-24-20(12297)
সর্বাতিক্রান্তমর্যাদং পৃষ্ঠভঙ্গং চ চক্রতুঃ।
সম্পূর্ণমূর্চ্ছাং বাহুভ্যাং পূর্ণকুম্ভং প্রচক্রতুঃ॥ 2-24-21(12298)
তৃণপীডং যথাকামং পূর্ণয়োগং সমুষ্টিকম্।
এবমাদীনি যুদ্ধানি প্রকুর্বন্তৌ পরস্পরম্॥ 2-24-22(12299)
তয়োর্যুদ্ধং ততো দ্রষ্টুং সমেতাঃ পুরবাসিনাঃ।
ব্রাহ্মণা বণিজশ্চৈব ক্ষত্রিয়াশ্চ সহস্রশঃ॥ 2-24-23(12300)
শূদ্রাশ্চ নরশার্দূল স্ত্রিয়ো বৃদ্ধাশ্চ সর্বশঃ।
নিরন্তরমভূত্তত্র জনৌঘৈরভিসংবৃতম্॥ 2-24-24(12301)
তয়োরথ ভুজাঘাতান্নিগ্রহপ্রগ্রহাত্তথা।
আসীৎসুভীমসম্পাতো বজ্রপর্বতয়োরিব॥ 2-24-25(12302)
উভৌ পরমসংহৃষ্টৌ বলেন বলিনাং বরৌ।
অন্যোন্যস্যান্তরং প্রেপ্সূ পরস্পরজয়ৈষিণৌ॥ 2-24-26(12303)
` শিরোভিরিব তৌ মেষৌ বৃক্ষৈরিব নিশাচরৌ।
পদৈরিব শুভাবশ্বৌ তুণ্ডাভ্যাং তিত্তিরী ইব’॥ 2-24-27(12304)
তদ্ভীমমুৎসার্য জনং যুদ্ধমাসীদুপপ্লবে।
বলিনোঃ সংয়ুগে রাজন্বৃত্রবাসবয়োরিব॥ 2-24-28(12305)
প্রকর্ষণাকর্ষণাভ্যামনুকর্ষবিকর্ষণৈঃ।
আচকর্ষতুরন্যোন্যং জানুভিশ্চাবজঘ্নতুঃ॥ 2-24-29(12306)
ততঃ শব্দেন মহতা ভর্ৎসয়ন্তৌ পরস্পরম্।
পাষাণসঙ্ঘাতনিভৈঃ প্রহারৈরভিজঘ্নতুঃ॥ 2-24-30(12307)
`ততো ভীমং জরাসন্ধো জঘানোরসি মুষ্টিনা।
ভীমোষি তং জরাসন্ধং বক্ষস্যভিজঘান হ’॥ 2-24-31(12308)
ব্যূঢোরস্কৌ দীর্ঘভুজৌ নিয়ুদ্ধকুশলাবুভৌ।
বাহুভিঃ সমসজ্জোতামায়সৈঃ পরিঘৈরিব॥ 2-24-32(12309)
কার্তিকস্য তু মাসস্য প্রবৃত্তং প্রথমেঽহনি।
তদা তদ্যুদ্ধমভবদ্দিনানি দশ পঞ্চ চ।
অনাহারং দিবারাত্রমবিশ্রান্তমবর্তত॥ 2-24-33(12310)
তদ্বৃত্তং তু ত্রয়োদশ্যাং সমবেতং মহাত্মনোঃ।
চতুর্দশ্যাং নিশায়াং তু নিবৃত্তো মাগধঃ ক্লমাৎ॥ 2-24-34(12311)
তং রাজানং তথা ক্লান্তং দৃষ্ট্বা রাজঞ্জনার্দনঃ।
উবাচ ভীমকর্মাণং ভীমং সম্বোধয়ন্নিব॥ 2-24-35(12312)
ক্লান্তঃ শত্রুর্হি কৌন্তেয় শক্যঃ পীডয়িতুং রণে।
পীড্যমানো হি কার্ৎস্ন্যেন জহ্যাজ্জীবিতমাত্মনঃ॥ 2-24-36(12313)
তস্মাত্তেঽদ্যৈব কৌন্তেয় পীডনীয়ো জনাধিপঃ।
সমমেতেন যুধ্যস্ব বাহুভ্যাং ভরতর্ষভ॥ 2-24-37(12314)
বৈশম্পায়ন উবাচ। 2-24-38x(1426)
এবমুক্তঃস কৃষ্ণেন পাণ্ডবঃ পরবীরহা।
জরাসন্দস্য তদ্রন্ধ্রং জ্ঞাৎবা চক্রে মতিং বধে॥ 2-24-38(12315)
ততস্তমজিতং জেতুং জরাসন্দং বৃকোদরঃ।
সংরম্ভাদ্বলিনাং শ্রেষ্ঠো জগ্রাহ কুরুনন্দনঃ॥ ॥ 2-24-39(12316)

ইতি শ্রীমন্মহাভারতে সভাপর্বণি জরাসন্ধবধপর্বণি চতুর্বিশোঽধ্যায়ঃ॥ 24॥

Mahabharata – Sabha Parva – Chapter Footnotes
2-24-6 নির্বৃতীর্বেদনানি চ দুঃখমূর্ছয়োঃ কালে সুখসঞ্জ্ঞাকরাণি॥ 2-24-13 কক্ষৈঃ দোর্মূলৈঃ ॥ 2-24-16 গ্রথিতাঙ্গুলিভ্যাং হস্তাভ্যাং পরশিরসঃ পীডনে পূর্ণকুম্ভঃ॥ 2-24-20 তক্ষবন্তৌ গ্রাত্রসঙ্কোচবন্তৌ॥