ভীষ্মপর্ব – অধ্যায় 001

ভীষ্মপর্ব – অধ্যায় 001
॥ শ্রীঃ ॥
6.1. অধ্যায়ঃ 001
কুরুক্ষেত্রে কুরুপাণ্ডবসেনয়োঃ পরস্পরসমাগমঃ|| ১|| উভয়পক্ষীয়ৈঃ পরস্পরং সময়করণং ||২|| শ্রীবেদব্যাসায় নমঃ নারায়ণং নমস্কৃত্য নরং নরোত্তমম্|
Mahabharata – Bhishma Parva – Chapter Text

দেবীং সরস্বতীং চৈব ততো জয়মুদীরয়েৎ|| ১ 6-1-0(38622)

জনমেজয় উবাচ|

কথং যুয়ুধিরে বীরাঃ কুরুপাণ্ডবসোমকাঃ
পার্থিবাশ্চ মহাত্মানো নানাদেশসমাগতাঃ|| ১ 6-1-1(38623)

বৈশম্পায়ন উবাচ

যথা যুয়ুধিরে বীরাঃ কুরুপাণ্ডবসোমকাঃ|
কুরুক্ষেত্রে তপঃক্ষেত্রে শৃণু ৎবং পৃথিবীপতে|| ২ 6-1-2(38624)
তেঽবতীর্য কুরুক্ষেত্রং পাণ্ডবাঃ সহসোমকাঃ|
কৌরবানভ্যবর্তন্ত জিগীষন্তো মহাবলাঃ|| ৩ 6-1-3(38625)
বেদাধ্যযনসংপন্নাঃ সর্বে যুদ্দাভিনন্দিনঃ|
আশংসন্তো জয়ং যুদ্ধে বলেনাভিমুখা রণে|| ৪ 6-1-4(38626)
অভিয়ায় চ দুর্ধর্ষাং ধার্তরাষ্ট্রস্য বাহিনীং|
প্রাঙ্মুখাঃ পশ্চিমে ভাগে ন্যবশন্ত সসৈনিকাঃ ৫ 6-1-5(38627)
স্যমন্তপঞ্চকাদ্বাহ্যং শিবিরাণি সহস্রশঃ|
কারয়ামাস বিধিবৎকুন্তীপুত্রো যুধিষ্ঠিরঃ|| ৬ 6-1-6(38628)
শূন্যেব পৃথিবী সর্বা বালবৃদ্ধাবশেষিতা|
নিরশ্বপুরুষেবাসীদ্রথকুঞ্জরবর্জিতা|| ৭ 6-1-7(38629)
যাবত্তপতি সুর্যো হি জম্বুদ্বীপস্য মণ্ডলং|
তাবদেব সমাবৃত্তং বলং পার্থিবসত্তম|| ৮ 6-1-8(38630)
একস্থাঃ সর্ববর্ণাস্তে মণ্ডলং বহুয়োজনম্ ।
পর্যাক্রামন্ত দেশাংশ্চ নদীঃ শৈলান্বনানি চ ॥ 6-1-9(38631)
তেষাং যুধিষ্ঠিরো রাজা সর্বেষাং পুরুষর্ষভ ।
ব্যাদিদেশ সবাহানাং ভক্ষ্যভোজ্যমনুত্তমম্ ॥ 6-1-10(38632)
সংজ্ঞায় বিবিধাস্তাত তেষাং চক্রে যুধিষ্ঠিরঃ।
এবংবাদী বেদিতব্যঃ পাণ্ডবেয়োঽয়মিত্যুত ॥ 6-1-11(38633)
অভিজ্ঞানানি সর্বেষাং সংজ্ঞাশ্চাভরণানি চ ।
যোজয়ামাস কৌরব্যো যুদ্ধকাল উপস্থিতে ॥ 6-1-12(38634)
দৃষ্ট্বা ধ্বজাগ্রং পার্থস্য ধার্তরাষ্ট্রো মহামনাঃ ।
সহ সর্বৈর্মহীপালৈঃ প্রত্যব্যূহত পাণ্ডবম্ ॥ 6-1-13(38635)
পাণ্ডুরেণাতপত্রেণ ধ্রিয়মাণেন মূর্ধনি ।
মধ্যে নাগসহস্রস্য ভ্রাতৃভিঃ পরিবারিতঃ ॥ 6-1-14(38636)
দৃষ্ট্বা দুর্যোধনং হৃষ্টাঃ পাঞ্চালা যুদ্ধনন্দিনঃ ।
দধ্মুঃ প্রীতা মহাশঙ্খান্ভেরীর্জঘ্নুঃ সহস্রশঃ ॥ 6-1-15(38637)
ততঃ প্রহৃষ্টাং স্বাং সেনামভিবীক্ষ্যাথ পাণ্ডবাঃ ।
বভূবুর্হৃষ্টমনসো বাসুদেবশ্চ বীর্যবান্ ॥ 6-1-16(38638)
স্বয়োধান্হর্ষয়ন্তৌ চ বাসুদেবধনঞ্জয়ৌ ।
দধ্মতুঃ পুরুষব্যাঘ্রৌ দিব্যৌ শঙ্খৌ রথে স্থিতৌ ॥ 6-1-17(38639)
পাঞ্চজন্যস্য শঙ্খস্য দেবদত্তস্য চোভয়োঃ ।
শ্রুৎবা তু নিনদং যোধাঃ শকৃন্মূত্রং প্রসুস্রুবুঃ ॥ 6-1-18(38640)
যথা সিংহস্য নদতঃ স্বনং শ্রুৎবেতরে মৃগাঃ ।
ত্রয়েয়ুর্নিনদং শ্রুৎবা তথাঽসীদত তদ্বলম্ ॥ 6-1-19(38641)
উদতিষ্ঠদ্রজো ভৌমং ন প্রাজ্ঞায়ত কিংচন।
অস্তং গত ইবাদিত্যঃ সৈন্যেন রজসা বৃতঃ ॥ 6-1-20(38642)
সবর্ষ তত্র পর্জন্যো মাংসশোণিতবৃষ্টিমান্।
ব্যুক্ষন্সর্বাণি সৈন্যানি তদদ্ভুতমিবাভবৎ ॥ 6-1-21(38643)
বায়ুস্ততঃ প্রাদূরভূন্নীচৈঃ শর্করকর্ষণঃ ।
বিনিঘ্নংস্তান্যনীকানি শতশোঽথ সহস্রশঃ ॥ 6-1-22(38644)
উভে সৈন্যে চ রাজেন্দ্র যুদ্ধায় মুদিতে ভৃশম্ ।
কুরুক্ষেত্রে স্থিতে যত্তে সাগরক্ষুভিতোপমে ॥ 6-1-23(38645)
তয়োস্তু সেনয়োরাসীদদ্ভুতঃ স তু সংগমঃ ।
যুগান্তে সমনুপ্রাপ্তে দ্বয়োঃ সাগরয়োরিব ॥ 6-1-24(38646)
শূন্যাঽঽসীৎপৃথিবী সর্বা বৃদ্ধবালাবশেষিতা।
নিরশ্বপুরুষেবাসীদ্রথকুঞ্জরবর্জিতা।
তেন সেনাসমূহেন সমানীতেন কৌরবৈঃ ॥ 6-1-25(38647)
ততস্তে সময়ং চক্রুঃ কুরুপাণ্ডবসোমকাঃ।
ধর্মান্সংস্থাপয়ামাসুর্যুদ্ধানাং ভরতর্ষভ ॥ 6-1-26(38648)
নিবৃত্তে বিহিতে যুদ্ধে স্যাৎপ্রীতির্নঃ পরস্পরম্ ।
যথাপরং যথায়োগং ন চ স্যাৎকস্যচিৎপুনঃ ॥ 6-1-27(38649)
বাচা যুদ্ধে প্রবৃত্তানাং বাচৈব প্রতিয়োধনম্ ।
নিষ্ক্রান্তাঃ পৃতনামধ্যান্ন হন্তব্যাঃ কদাচন ॥ 6-1-28(38650)
রথী চ রথিনা যোধ্যো গজেন গজধূর্গতঃ ।
অশ্বেনাশ্বী পদাতিশ্চ পাদাতেনৈব ভারত ॥ 6-1-29(38651)
যথায়োগং যথাকামং যথোৎসাহং যথাবলম্ ।
সমাভাষ্য প্রহর্তব্যং ন বিশ্বস্তে ন বিহ্বলে ॥ 6-1-30(38652)
পরেণ সহ সংয়ুক্তঃ প্রমত্তো বিমুখস্তথা ।
ক্ষীণশস্ত্রো বিবর্মা চ ন হন্তব্যঃ কদাচন ॥ 6-1-31(38653)
ন সূতেষু ন ধুর্যেষু ন চ শস্ত্রোপনায়িষু ।
ন ভেরীশঙ্খবাদেষু প্রহর্তব্যং কথংচন ॥ 6-1-32(38654)
এবং তে সময়ং কৃৎবা কুরুপাণ্ডবসোমকাঃ ।
বিস্ময়ং পরমং জগ্মুঃ প্রেক্ষমাণাঃ পরস্পরম্ ॥ 6-1-33(38655)
নিবিশ্য চ মহাত্মানস্ততস্তে পুরুষর্ষভাঃ ।
হৃষ্টরূপাঃ সমুনসো বভূবুঃ সহসৈনিকাঃ ॥ ॥ 6-1-34(38656)

ইতি শ্রীমন্মহাভারতে ভীষ্মপর্বণি জম্বূখণ্ডবিনির্মাণপর্বণি প্রথমোঽধ্যায়ঃ ॥

Mahabharata – Bhishma Parva – Chapter Footnotes
6-1-5 6-1-6 6-1-11 তব্যঃ ইতি ঝo পাঠঃ তৎপাঠে এবমিতি। এবংবেদী বিদ্বান্ ইতি অন্যৈঃ পাণ্ডবেয়ো জ্ঞাতব্য ইত্যেতদর্থমিত্যর্থঃ ॥ 6-1-19 অসীদ্ত অবসন্নমভূৎ ॥ 6-1-23 সাগরক্ষুভিতোপমে ক্ষুভিতসাগরোপমে ॥ 6-1-27 ধর্মসংস্থাপনমেবাহ যথাপরমিতি। যথায়োগং তুল্যযোর্যোগস্যানতিক্রমণাম্। যথা যেন প্রকারেণ অপরং অনুৎকৃষ্টং অন্যায়্যমিত্যর্থঃ । তথা ন কস্যচিত্তুল্যযোগাতিক্রমঃ স্যাদ্তি ভাবঃ ॥ 6-1-29 গজধূর্গতঃ গজস্কন্ধগতঃ ॥