সভাপর্ব – অধ্যায় 017

সভাপর্ব – অধ্যায় 017
॥ শ্রীঃ ॥
2.17. অধ্যায়ঃ 017
Mahabharata – Sabha Parva – Chapter Topics
যুধিষ্ঠিরেণ জরাসন্ধপ্রভাবপ্রশ্নে শ্রীকৃষ্ণেন তদুপোদ্ঘাততয়া বৃহদ্রথরাজোপা খ্যানকথনারম্ভঃ॥ 1॥ অপুত্রস্য বৃহথস্য পত্নীভ্যাং সহ তপোবনগমনম্॥ 2॥ তত্র চণ্ডকৌশিকমুনিনা বৃহদ্রথায় পুত্রীয়াম্রফলদানম্॥ 3॥ প্রবিভক্ততৎফলভোজনেন সঞ্জাতগর্ভয়োস্তদ্ভার্যযোঃ পৃথগেকৈকশরীরখণ্ডসম্ভবঃ॥4॥ তৎপত্নীভ্যাং দাসীদ্বারা বহিস্ত্যাজিতয়োঃ খণ্ডয়োঃ জরানাম্ন্যা রাক্ষস্যা স ন্ধানাজরাসন্ধসম্ভবঃ॥ 5॥ বালকং গৃহীৎবা আগতয়া জরয়া সহ বৃহদ্রথস্য সংবাদঃ॥ 6॥
Mahabharata – Sabha Parva – Chapter Text


বাসুদেব উবাচ॥

জাতস্য ভারতে বংশে তথা কুন্ত্যাঃ সুতস্য চ।
যা বৈ যুক্তা মতিঃ সেয়মর্জুনেন প্রদর্শিতা॥ 2-17-1(11998)
ন স্ম মৃত্যুং বয়ং বিদ্ম রাত্রৌ বা যদি বা দিবা।
ন চাপি কঞ্চিদমরময়ুদ্ধেনানুশুশ্রুম॥ 2-17-2(11999)
এতাবদেব পুরুষৈঃ কার্যং হৃদয়তোষণম্।
নয়েন বিধিদৃষ্টেন যদুপক্রমতে পরান্॥ 2-17-3(12000)
সুনয়স্যানপায়স্য সংয়োগে পরমঃ ক্রমঃ।
সঙ্গত্যা জায়তেঽসাম্যং সাম্যং চ ন ভবেদ্দ্বয়োঃ॥ 2-17-4(12001)
অনয়স্যানুপায়স্য সংয়ুগে পরমঃ ক্ষয়টঃ।
সংশয়ো জায়তে সাম্যাজ্জয়শ্চ ন ভবেদ্দ্বয়োঃ॥ 2-17-5(12002)
তে বয়ং নয়মাস্থায় শত্রুদেশসমীপগাঃ।
কথমন্তং ন গচ্ছেম বৃক্ষস্যেব নদীরয়াঃ॥
পররন্ধ্রে পরাক্রান্তাঃ স্বরন্ধ্রাবরণে স্থিতাঃ॥ 2-17-6(12003)
ব্যূঢানীকৈরতিবলৈর্ন যুদ্ব্যেদরিভিঃ সহ।
ইতি বুদ্ধিমতাং নীতিস্তন্মমাপীহ রোচতে॥ 2-17-7(12004)
অনবদ্যা হ্যসম্বুদ্ধাঃ প্রবিষ্টাঃ শত্রুসদ্ম তৎ।
শত্রুদেশমুপাক্রম্য তং কামং প্রাপ্নুয়ামহে॥ 2-17-8(12005)
একো হ্যেব শ্রিয়ং নিত্যং বিভর্তি পুরুষর্ষভঃ।
অন্তরাত্মেব ভূতানাং তৎক্ষয়ং নৈব লক্ষয়ে॥ 2-17-9(12006)
অথবৈনং নিহত্যাজৌ শেষেণাপি সমাহতাঃ।
প্রাপ্নুয়াম ততঃ স্বর্গং জ্ঞাতিত্রাণপরায়ণাঃ॥ 2-17-10(12007)
যুধিষ্ঠির উবাচ॥ 2-17-11x(1407)
কৃষ্ণ কোঽয়ং জরাসন্ধঃ কিংবীর্যঃ কিম্পরাক্রমঃ।
যস্ৎবাং স্পৃষ্ট্বাঽগ্নিসদৃশং ন দগ্ধঃ শলভো যথা॥ 2-17-11(12008)
কৃষ্ণ উবাচ॥ 2-17-12x(1408)
শৃণু রাজঞ্জরাসন্ধো যদ্বীর্যো যৎপরাক্রমঃ।
যথা চোপেক্ষিতোঽস্মাভির্বহুশঃ কৃতবিপ্রিয়ঃ॥ 2-17-12(12009)
অক্ষৌহিণীনাং তিসৃণাং পতিঃ সমরদর্পিতঃ।
রাজা বৃহদ্রথো নাম মগধাধিপতির্বলী॥ 2-17-13(12010)
রূপবান্বীর্যসম্পন্নঃ শ্রীমানতুলবিক্রমঃ।
নিত্যং দীক্ষাঙ্কিততনুঃ শতক্রতুরিবাপরঃ॥ 2-17-14(12011)
তেজসা সূর্যসঙ্কাশঃ ক্ষময়া পৃথিবীসমঃ।
যশ্চান্তকসমঃ ক্রোধে শ্রিয়া বৈশ্রবণোপমঃ॥ 2-17-15(12012)
`স্বরাজ্যং কারয়ামাস মগধেষু গিরিব্রজে’।
তস্যাভিজনসংয়ুক্তৈর্গণৈর্ভরতসত্তম।
ব্যাপ্তেয়ং পৃথিবী সর্বা সূর্যস্যেব গভস্তিভিঃ॥ 2-17-16(12013)
স কাশিরাজস্য সুতে যমজে ভরতর্ষভঃ।
উপয়েমে মহাবীর্যো রূপদ্রবিণসংয়ুতে। 2-17-17cতয়োশ্চকার সময়ং মিথঃ স পুরুষর্ষভঃ॥ 2-17-17(12014)
নাতিবর্তিষ্য ইত্যেবং পত্নীভ্যাং সন্নিধৌ তদা।
স তাভ্যাং শুশুভে রাজা পত্নীভ্যাং বসুধাধিপঃ॥ 2-17-18(12015)
প্রিয়াম্ভামনুরূপাভ্যাং করেণুভ্যামিব দ্বিপঃ।
তয়োর্মধ্যগতশ্চাপি ররাজ বসুধাধিপঃ॥ 2-17-19(12016)
গঙ্গায়মুনয়োর্মধ্যে মূর্তিমানিব সাগরঃ।
বিষয়েষু নিমগ্রস্য তস্য যৌবনমত্যগাৎ॥ 2-17-20(12017)
ন চ বংশকরঃ পুত্রস্তস্যাজায়ত কশ্চন।
মঙ্গলৈর্বভির্হোমৈঃ পুত্রকামাভিরিষ্টিভিঃ॥ 2-17-21(12018)
নাসসাদ নৃপশ্রেষ্ঠঃ পুত্রং কুলবিবর্ধনম্।
স ভার্যাভ্যাং চ সহিতো নির্বেদমগমদ্ধৃশম্॥ 2-17-22(12019)
`রাজ্যং চাপি পরিত্যজ্য তপোবনমথাশ্রয়ৎ। ‘
বার্যমাণঃ প্রকৃতিভির্নৃপভক্ত্যা বিশাম্পতে’॥ 2-17-23(12020)
অথ কাক্ষীবতঃ পুত্রং গৌতমস্য মহাত্মনঃ॥
শুশ্রাব তপসি শ্রেষ্ঠমুদারং চণ্ডকৌশিকম্॥ 2-17-24(12021)
যদৃচ্ছয়াঽঽগতং তং তু বৃক্ষমূলমুপাশ্রিতম্।
পত্নীভ্যাং সহিতো রাজা সর্বয়ত্নৈরতোষয়ৎ॥ 2-17-25(12022)
`বৃহদ্রথং চ স ঋষির্যথাবচ্চাভ্যনন্দত। ‘
উপবিষ্টঃ স তেনাথ অনুজ্ঞাতো মহাত্মনা॥ 2-17-26(12023)
তমপৃচ্ছত্তদা বিপ্রঃ কিমাগমনমিত্যথ।
বিপ্রৈরনুগতস্যৈব পত্নীভ্যাং সহিতস্য চ॥ 2-17-27(12024)
স উবাচ মুনিং রাজা ভগবন্নাস্তি মে সুতঃ।
অপুত্রস্য তু রাজ্যেন বৃদ্ধৎবে কিং প্রয়োজনম্॥ 2-17-28(12025)
সোঽহং তপশ্চরিষ্যামি পত্নীভ্যাং সহিতো বনে।
নাপ্রজস্য মুনে কির্তিঃ স্বধা চৈবাক্ষয়া ভবেৎ।
এবমুক্তঃ স রাজ্ঞা তু মুনিঃ কারুণ্যমাগতঃ॥ 2-17-29(12026)
তমব্রবীৎসত্যধৃতিঃ সত্যবাগৃষিসত্তমঃ।
পরিতুষ্টোঽস্মি রাজেন্দ্র বরং বরয় সুব্রত॥ 2-17-30(12027)
ততঃ সভার্যঃ প্রণতস্তমুবাচ বৃহদ্রথঃ।
পুত্রদর্শননৈরাশ্যাদ্বাষ্পসন্দিগ্ধয়া গিরা॥ 2-17-31(12028)
রাজোবাচ॥ 2-17-32x(1409)
ভগবন্ রাজ্যমুৎসৃজ্য প্রস্থিতস্য তপোবনম্।
কিং বরেণাল্পভাগ্যস্য কিং রাজ্যেনাপ্রজস্য মে॥ 2-17-32(12029)
কৃষ্ণ উবাচ। 2-17-33x(1410)
এতচ্ছ্রুৎবা মুনির্ধ্যানমগমন্ক্ষুভিতেন্দ্রিয়ঃ।
তস্যৈব চাম্রবৃক্ষস্য ছায়ায়াং সমুপাবিশত॥ 2-17-33(12030)
তস্যোপবিষ্টস্য মুনেরুৎসঙ্গে নিপপাত হ।
অবানমশুকাদষ্টমেকমাম্রফলং কিল॥ 2-17-34(12031)
তৎপ্রগৃহ্য মুনিশ্রেষ্ঠো হৃদয়েনাভিমন্ত্র্য চ।
রাজ্ঞে দদাবপ্রতিমং পুত্রসম্প্রাপ্তিকারণম্॥ 2-17-35(12032)
উবাচ চ মহাপ্রাজ্ঞস্তং রাজানং মহামুনিঃ।
গচ্ছ রাজন্কৃতার্থোঽসি নিবর্তস্ব নরাধিপ॥ 2-17-36(12033)
`এষ তে তনয়ো রাজন্মা তপেহ তপোবনে।
প্রজাঃ পালয় ধর্মেণ এব ধর্মো মহীক্ষিতাম্॥ 2-17-37(12034)
যজস্ব বিবিধৈর্যজ্ঞৈরিন্দ্রং তর্পয় চেন্দুনা।
পুত্রং রাজ্যে প্রতিষ্ঠাপ্য তত আশ্রমমাব্রজ॥ 2-17-38(12035)
অষ্টৌ বরান্প্রয়চ্ছামি তব পুত্রস্য পার্থিব।
ব্রহ্মণ্যৎবমজেয়ৎবং যুদ্ধেষু চ তথা মতিঃ॥ 2-17-39(12036)
প্রিয়াতিথেয়তাং চৈব দীনানামন্ববেক্ষণম্।
তথা বলং চ সুভহল্লোকে কীর্তি চ শাশ্বতীম্॥ 2-17-40(12037)
অনুরাগং প্রজানাং চেত্যেবমষ্টৌ বরান্নৃপ।
গচ্ছ ৎবং কৃতকৃত্যোঽসি নিবর্তস্ব জনাধিপ’॥ 2-17-41(12038)
অনুজ্ঞাতঃ স ঋষিণা পত্নীভ্যাং সহিতো নৃপঃ।
পৌরৈরনুগতশ্চাপি বিবেশ স্বপুরং ততঃ॥ 2-17-42(12039)
যথাসময়মাজ্ঞায় তদা স নৃপসত্তমঃ।
দ্বাভ্যামেকং ফলং প্রাদাৎপত্নীভ্যাং ভরতর্ষভ॥ 2-17-43(12040)
মুনেশ্চ বহুমানেন কালস্য চ বিপর্যযাৎ।
তে তদাম্রং দ্বিধা কৃৎবা ভক্ষয়ামাসতুঃ শুভে। 2-17-44(12041)
তয়োঃ সমভবদ্গর্ভঃ ফলপ্রাশনসম্ভবঃ।
তে চ দৃষ্ট্বা স নৃপতিঃ পরাং মুদমবাপ হ॥ 2-17-45(12042)
অথ কালে মহাপ্রাজ্ঞ যথাসময়মাগতে।
প্রজায়েতামুভে রাজঞ্শরীরশকলে তদা॥ 2-17-46(12043)
একাক্ষিবাহুচরণে অর্ধোদরমুখস্ফিচে।
দৃষ্ট্বা শরীরশকলে প্রবেপতুরুভে ভৃশম্॥ 2-17-47(12044)
উদ্বিগ্রে সহ সংমন্ত্র্য তে ভগিত্যৌ তদাঽবলে।
সজীবে প্রাণিশকলে তত্যজাতে সুদুঃখিতে॥ 2-17-48(12045)
তয়োর্ধাত্র্যৌ সুসংবীতে কৃৎবা তে গর্ভসম্প্লবে।
নির্গম্যান্তঃ পুরদ্বারাৎসমুৎসৃজ্যাভিজগ্মতুঃ॥ 2-17-49(12046)
`দুকূলাভ্যাং সুসঞ্ছন্নে পাণ্ডরাভ্যামুভে তদা।
অজ্ঞাতে কস্যচিত্তে তু জহতুস্তে চতুষ্পথে॥ 2-17-50(12047)
ততো বিবিশতুর্ধাত্র্যৌ পুনরন্তঃ পুরং তদা।
কথয়ামাসতুরুভে দেবীভ্যাং তু পৃথক্পৃথক্’॥ 2-17-51(12048)
তে চতুষ্পথনিক্ষিপ্তে জরা নামাথ রাক্ষসী।
জগ্রাহ মনুজব্যাঘ্র মাংসশোণিতভোজনা॥ 2-17-52(12049)
কর্তুকামা সুখবহে শকলে সা তু রাক্ষসী।
সংয়োজয়ামাস তদা বিধানবলচোদিতা॥ 2-17-53(12050)
তে সমানীতমাত্রে তু শকলে পুরুষর্ষভ।
একমূর্তিধরো বীরঃ কুমারঃ সমপদ্যত॥ 2-17-54(12051)
ততঃ সা রাক্ষসী রাজন্বিস্ময়োৎফুল্ললোচনা।
ন শশাক সমুদ্বোদুং বজ্রসারময়ং শিশুম্॥ 2-17-55(12052)
বালস্তাম্রতলং মুষ্টিং কৃৎবা চাস্যে নিধায় সঃ।
প্রাক্রোশদতিসংরব্ধঃ সতোয় ইব তোয়দঃ॥ 2-17-56(12053)
তেন শব্দেন সম্ভ্রান্তঃ সহসাঽন্তঃ পুরে জনঃ।
নির্জগাম নরব্যাঘ্র রাজ্ঞা সহ পরন্তপ॥ 2-17-57(12054)
তে চাবলে পরিম্লানে পয়ঃ পূর্ণপয়োধরে।
নিরাশে পুত্রলাভায় সহসৈবাব্যগচ্ছতাম্॥ 2-17-58(12055)
তে চ দৃষ্ট্বা তথাভূতে রাজানং চেষ্টসংততিম্।
তং চ বালং সুবলিনং চিন্তয়ামাস রাক্ষসী॥ 2-17-59(12056)
নার্হামি বিষয়ে রাজ্ঞো বসন্তী পুত্রগৃদ্ধিনঃ।
বালং পুত্রমিমং হন্তুং ধার্মিকস্য মহাত্মনঃ॥ 2-17-60(12057)
সা তং বালমুপাদায় মেঘলেখেন ভাস্করম্।
কৃৎবা চ মানুষং রূপমুবাচ বসুধাধিপম্॥ 2-17-61(12058)
বৃহদ্রথ সুতস্তেঽয়ং ময়া দত্তঃ প্রগৃহ্যতাম্।
তব পত্নীদ্বয়ে জাতো দ্বিজাতিবরশাসনাৎ।
ধাত্রীজনপরিত্যক্তো ময়াঽয়ং পরিরক্ষিতঃ॥ 2-17-62(12059)
কৃষ্ণ উবাচ। 2-17-63x(1411)
ততস্তে ভরতশ্রেষ্ঠ কাশিরাজসুতে শুভে।
তং বালমভিপদ্যাশু প্রস্রবৈরভ্যষিঞ্জতাম্॥ 2-17-63(12060)
ততঃ স রাজা সংহৃষ্টঃ সর্বং তদুপলভ্য চ।
অপৃচ্ছদ্ধেমগর্ভাভাং রাক্ষসীং তামরাক্ষসীম্॥ 2-17-64(12061)
কাৎবং কমলগর্ভাভে মম পুত্রপ্রদায়িনী।
কামং মা ব্রূহি কল্যাণি দেবতা প্রতিভাসি মে॥ ॥ 2-17-65(12062)

ইতি শ্রীমন্মহাভারতে সভাপর্বণি মন্ত্রপর্বণি সপ্তদশোঽধ্যায়ঃ॥ 17॥

Mahabharata – Sabha Parva – Chapter Footnotes
2-17-4 ক্রমঃ উপক্রমঃ॥ 2-17-9 তৎক্ষয়ে বলক্ষয়ঃ ইতি পাঠঃ॥ 2-17-34 অবানমশুষ্কং সরসমিতি যাবৎ। অমারুতমনাবিদ্ধং ইতি ঘ.পাঠঃ॥ 2-17-46 প্রজায়েতাং সুষুবতুঃ॥ 2-17-47 স্ফিক্ কট্যা অধোভাগঃ॥ 2-17-53 সুখবহে একীকৃতয়োর্বহনং হি সুখেন ভবতীতি প্রসিদ্ধম্॥ 2-17-54 সমানীতমাত্রে সংয়োজিতমাত্রে॥ 2-17-64 অরাক্ষসী বেষতঃ॥