মৌসলপর্ব – অধ্যায় ০৭

মৌসলপর্ব – অধ্যায় 007
॥ শ্রীঃ ॥
15.7. অধ্যায়ঃ 007
Mahabharata – Mausala Parva – Chapter Topics
বসুদেবেন স্বগৃহমাগতেঽর্জুনে যাদবক্ষয়নিদাননিবেদনপূর্বকং কৃষ্ণাদ্যনুস্মরণেন পরিশোচনম্॥ 1 ॥ তথা তংপ্রতি কৃষ্ণবচননিবেদনেন রাজ্যস্ত্রীধনাদিসমর্পণপূর্বকং স্বেন স্বপ্রাণত্যজনপ্রতিজ্ঞানম্॥ 2 ॥
Mahabharata – Mausala Parva – Chapter Text


বৈশম্পায়ন উবাচ।

তং প্রবিষ্টং মহাত্মানং বীরমানকদুন্দুভিঃ।
পুত্রশোকেন সংতপ্তো দদর্শ কুরুপুঙ্গবম্॥ 15-7-1(97068)
তস্যাশ্রুপরিপূর্ণাক্ষো ব্যূঢোরস্কো মহাভুজঃ।
আর্তস্যার্ততরঃ পার্থঃ পাদৌ জগ্রাহ ভারত॥ 15-7-2(97069)
তস্য মূর্ধানমাঘ্রাতুমিয়েষানকদুন্দুভিঃ।
স্বস্রীয়স্য মহাবাহুর্ন শশাক চ শত্রুহন্॥ 15-7-3(97070)
সমালিঙ্গ্যার্জুনং বৃদ্ধঃ স ভুজাভ্যাং মহাভুজঃ।
রুরোদাথ স্মরঞ্শৌরিং বিললাপ সুবিহ্বলঃ।
ভ্রাতৄন্পুত্রাংশ্চ পৌত্রাংশ্চ দৌহিত্রান্স সখীনপি॥ 15-7-4(97071)
বসুদেব উবাচ। 15-7-5x(8025)
যৈর্জিতা ভূমিপালাশ্চ দৈত্যাশ্চ শতশোঽর্জুন।
তান্সর্বান্নেহ পশ্যামি জীবাম্যর্জুন দুর্মরঃ॥ 15-7-5(97072)
যো তাবর্জুনশিষ্যৌ তে প্রিয়ৌ বহুমতৌ সদা।
তয়োরপনয়াৎপার্থ বৃষ্ণয়ো নিধনং গতাঃ॥ 15-7-6(97073)
যৌ তৌ বৃষ্ণিপ্রবীরাণাং দ্বাবেবাতিরথৌ মতৌ।
প্রদ্যুম্নো যুয়ুধানশ্চি কথনন্কত্থসে চ যৌ॥ 15-7-7(97074)
তৌ সদা কুরুশার্দূল কৃষ্ণস্য প্রিয়ভাজনৌ।
তাবুভৌ বৃষ্ণিনাশস্য মুখমাস্তাং ধনংজয়॥ 15-7-8(97075)
ন তু গর্হামি শৈনেয়ং হার্দিক্যং চাহমর্জুন।
অক্রূরং রৌক্মিণেয়ং চ শাপো হ্যেবাত্র কারণম্॥ 15-7-9(97076)
কেশিনং যস্তু কংসং চ বিক্রম্যি হতবান্প্রভুঃ।
বিদেহমকরোৎপার্থং চৈদ্যং চ বলগর্বিতম্॥ 15-7-10(97077)
নৈষাদিমেকলব্যং চ চক্রে কালিঙ্গমাগধান্।
গান্ধারান্কাশিরাজং চ মরুভূমৌ চ পার্থিবান্॥ 15-7-11(97078)
প্রাচ্যাংশ্চ দাক্ষিণাত্যাংশ্চ পার্বতীয়াংস্তথা নৃপান্।
সোভ্যুপেক্ষিতবানেবমনয়ান্মধুসূদনঃ॥ 15-7-12(97079)
ৎবং হি তং নারদশ্চৈব মুনয়শ্চ সনাতনম্।
গোবিন্দমনঘং দেবমভিজানীধ্বমচ্যুতম্॥ 15-7-13(97080)
প্রত্যপশ্যচ্চ স বিভুর্জ্ঞাতিক্ষয়মধোক্ষজঃ।
সমুপেক্ষিতবান্নিত্যং স্বয়ং স মম পুত্রকঃ॥ 15-7-14(97081)
গান্ধার্যা বচনং যত্তদৃষীণাং চ পরংতপ।
তন্নূনমন্যথা কর্তুং নৈচ্ছৎস জগতঃ প্রভুঃ॥ 15-7-15(97082)
প্রত্যক্ষং ভবতশ্চাপি তব পৌত্রঃ পরংতপ।
অশ্বত্থাম্না হতশ্চাপি জীবিতস্তস্য তেজসা।
ইমাংস্তু নৈচ্ছৎস্বান্জ্ঞাতীন্রক্ষিতুং চ সখা তব॥ 15-7-16(97083)
ততঃ পুত্রাংশ্চ পৌত্রাংশ্চ ভ্রাতৄনথ সখীংস্তথা।
শয়ানান্নিহতান্দৃষ্ট্বা কৃষ্ণো মামব্রবীদিদম্॥ 15-7-17(97084)
সম্প্রাপ্তোঽদ্যায়মস্যান্তঃ কুলস্য ভরতর্ষভ।
আগমিষ্যতি বীভৎসুরিমাং দ্বারবতীং পুরীম্।
আখ্যেয়ং তস্য যদ্বৃত্তং বৃষ্ণীনাং বৈশসং মহৎ॥ 15-7-18(97085)
স তু শ্রুৎবা মহাতেজা যদূনাং নিধনং প্রভো।
আগন্তা ক্ষিপ্রমেবেহ ন মেঽত্রাস্তি বিচারণা॥ 15-7-19(97086)
যোঽহং তমর্জুনং বিদ্ধি যোঽর্জুনঃ সোহমেব তু।
যদ্ব্রূয়াত্তত্তথা কার্যমিতি বুদ্ধ্যস্ব ভারত॥ 15-7-20(97087)
স স্ত্রীষু প্রাপ্তকালাসু পাণ্ডবো বালকেষু চ।
প্রতিপৎস্যতি বীভৎসুর্ভবতশ্চৌর্ধ্বদ্গেহিকম্॥ 15-7-21(97088)
ইমাং চ নগরীং সদ্যঃ প্রতিয়াতে ধনংজয়ে।
প্রাকারট্টালকোপেতাং সমুদ্রঃ প্লাবয়িষ্যতি॥ 15-7-22(97089)
অহং দেশে তু কস্মিংশ্চিৎপুণ্যে নিয়মমাস্থিতঃ।
কালং কাঙ্ক্ষে সদ্য এব রামেণ সহিতো বনে॥ 15-7-23(97090)
এবমুক্ৎবা হৃষীকেশো মামচিন্ত্যপরাক্রমঃ।
হিৎবা মাং বালকৈঃ সার্ধং দিশং কামপ্যগাৎপ্রভুঃ॥ 15-7-24(97091)
সোহং তৌ চ মহাত্মানৌ চিন্তয়ন্রামকেশবৌ।
ঘোরং জ্ঞাতিবধং চৈব ন ভুঞ্জে শোককর্শিতঃ॥ 15-7-25(97092)
ন মোক্ষ্যেন চ জীবিষ্যে দিষ্ট্যা প্রাপ্তোসি পাণ্ডব।
যদুক্তং পার্থং কৃষ্ণেন তৎসর্বমখিলং কুরু॥ 15-7-26(97093)
এতত্তে পার্থ রাজ্যং চ স্ত্রিয়ো রত্নানি চৈব হি।
ইষ্টান্প্রাণানহং হীমাংস্ত্যক্ষ্যামি রিপুসূদন॥ ॥ 15-7-27(97094)

ইতি শ্রীমন্মহাভারতে মৌসলপর্বণি সপ্তমোঽধ্যায়ঃ॥ 7 ॥

Mahabharata – Mausala Parva – Chapter Footnotes
7-7-11 কাশিরাজং পৌণ্ড্রকম্॥