সভাপর্ব – অধ্যায় 004

সভাপর্ব – অধ্যায় 004
॥ শ্রীঃ ॥
2.4. অধ্যায়ঃ 004
Mahabharata – Sabha Parva – Chapter Topics
ব্রাহ্মণান্ভোজয়িৎবা যুধিষ্ঠিরস্য সভাপ্রবেশঃ॥1॥ ঋষীণাং ক্ষত্রিয়াণাং দেবগন্ধর্বাদীনাং চ তত্রোপবেশনম্॥ 2॥
Mahabharata – Sabha Parva – Chapter Text


বৈশম্পায়ন উবাচ॥

`তাং তু কৃৎবা সভাং শ্রেষ্ঠাং ময়শ্চার্জুনমব্রবীৎ।
ভূতানাং চ মহাবীর্যো ধ্বজাগ্রে কিঙ্করো গণঃ॥ 2-4-1(11368)
তব বিষ্ফারঘোষেণ মেঘবন্নিনদিষ্যতি।
অয়ং হি সূর্যসঙ্কাশো জ্বলনস্য রথো মহান্॥ 2॥ 2-4-2(11369)
ইমে চ দিবিজাঃ শ্বেতা বীর্যবন্তো হয়োত্তমাঃ।
মায়াময়ঃ কৃতো হ্যেষ ধ্বজো বানরলক্ষণঃ॥ 2-4-3(11370)
অসজ্জমানো বৃক্ষেষু ধূমকেতুরিবোচ্ছ্রিতঃ।
বহুবর্ণং হি লক্ষ্যেত ধ্বজং বানরলক্ষণম্॥ 2-4-4(11371)
ধ্বজোৎকটং হ্যনবমং যুদ্ধে দ্রক্ষ্যসি বিষ্ঠিতম্।
এব বীরঃ সব্যসাচিন্ধ্বজস্যান্তে ভবিষ্যতি॥ 2-4-5(11372)
বৈশম্পায়ন উবাচ। 2-4-6x(1384)
ইত্যুক্ৎবাঽঽলিঙ্গ্য বীভৎসুং বিসৃষ্টঃ প্রয়যৌ ময়ঃ’। 2-4-6(11373)
ততঃ প্রবেশনং তস্যাং চক্রে রাজা যুধিষ্ঠিরঃ।
অয়ুতং ভোজয়িৎবা তু ব্রাহ্মণানাং নরাধিপঃ॥ 2-4-7(11374)
সাজ্যেন পায়সেনৈব মধুনা মিশ্রিতেন চ।
ভক্ষ্যৈর্মূলৈঃ ফলৈশ্চৈব মাংসৈর্বারাহহারিণৈঃ।
কৃসরেণাথ জীবন্ত্যা হবিষ্যেণ চ সর্বশঃ॥ 2-4-8(11375)
মাংসপ্রকারৈর্বিবিধৈঃ খাদ্যৈশ্চাপি তথা নৃপ।
চোষ্যৈশ্চ বিবিধৈ রাজন্পেয়ৈশ্চ বহুবিস্তরৈঃ॥ 2-4-9(11376)
অহতৈশ্চৈব বাসোভির্মাল্যৈরুচ্চাবচৈরপি।
তর্পয়ামাস বিপ্রেন্দ্রান্নানাদিগ্ভ্যঃ সমাগতান্॥ 2-4-10(11377)
দদৌ তেভ্যঃ সহস্রাণি গবাং প্রত্যেকশঃ পুনঃ।
পুণ্যাহঘোষস্তত্রাসীদ্দিবস্পৃগিব ভারত॥ 2-4-11(11378)
বাদিত্রৈর্বিবিধৈর্দিব্যৈর্গন্ধৈরুচ্চাবচৈরপি।
পূজয়িৎবা কুরুশ্রেষ্ঠো দেবতানি নিবেশ্য চ॥ 2-4-12(11379)
তত্র মল্লা নটা ঝল্লাঃ সূতা বৈতালিকাস্তথা।
উপতস্থুর্মহাত্মানং ধর্মপুত্রং যুধিষ্ঠিরম্॥ 2-4-13(11380)
তথা স কৃৎবা পূজাং তাং ভ্রাতৃভিঃ সহ পাণ্ডবঃ।
তস্যাং সভায়াং রম্যায়াং রেমে শক্রো যথা দিবি॥ 2-4-14(11381)
সভায়ামৃষয়স্তস্যাং পাণ্ডবৈঃ সহ আসতে।
আসাঞ্চক্রুর্নরেন্দ্রাশ্চ নানাদেশসমাগতাঃ॥ 2-4-15(11382)
অসিতো দেবলঃ সত্যঃ সর্পির্মালী মহাশিরাঃ।
অর্বা বসুঃ সুমিত্রশ্চ মৈত্রেয়ঃ শুনকো বলিঃ॥ 2-4-16(11383)
বকো দাল্ভ্যঃ স্থূলশিরাঃ কৃষ্ণদ্বৈপায়নঃ শুকঃ।
সুমন্তুর্জৈমিনিঃ পৈলো ব্যাসশিষ্যাস্তথা বয়ম্ ॥ 2-4-17(11384)
তিত্তিরির্যাজ্ঞবল্ক্যশ্চ সসুতো রোমহর্ষণঃ।
অপ্সুহোম্যশ্চ ধৌম্যশ্চ অণীমাণ্ডব্যকৌশিকৌ॥ 2-4-18(11385)
দামোষ্ণীপস্ত্রৈবলীশ্চ পর্ণাদো ঘটজানুকঃ।
মৌঞ্জায়নো বায়ুভক্ষঃ পারাশর্যশ্চ সারিকঃ॥ 2-4-19(11386)
বলিবাকঃ সিনীবাকঃ সপ্তপালঃ কৃতশ্রমঃ।
জাতূকর্ণঃ শিখাবাংশ্চ আলম্বঃ পারিজাতকঃ॥ 2-4-20(11387)
পর্বতশ্চ মহাভাগো মার্কণ্ডেয়ো মহামুনিঃ।
পবিত্রপাণিঃ সাবর্ণো ভালুকির্গালবস্তথা॥ 2-4-21(11388)
জঙ্ঘাবন্ধুশ্চ রৈভ্যশ্চ কোপবেগস্তথা ভৃগুঃ।
হরিবভ্রুশ্চ কৌণ্ডিন্যো বভ্রুমালী সনাতনঃ॥ 2-4-22(11389)
কাক্ষীবানৌশিজশ্চৈব নাচিকেতোঽথ গৌতমঃ।
পৈঙ্গ্যো বরাহঃ শুনকঃ শাণ্ডিল্যশ্চ মহাতপাঃ॥ 2-4-23(11390)
কুক্কুরো বেণুজঙ্ঘোঽথ কালাপঃ কঠ এব চ।
মুনয়ো ধর্মবিদ্বাংসো ধৃতাত্মানো জিতেন্দ্রিয়াঃ॥ 2-4-24(11391)
এতে চান্যে চ বহবো বেদবেদাঙ্গপারগাঃ।
উপাসতে মহাত্মানং সভায়ামৃষিসত্তমাঃ॥ 2-4-25(11392)
কথয়ন্তঃ কথাঃ পুণ্যা ধর্মজ্ঞাঃ শুচয়োঽমলাঃ।
তথৈব ক্ষত্রিয়শ্রেষ্ঠা ধর্মরাজমুপাসতে॥ 2-4-26(11393)
শ্রীমান্মহাত্মা ধর্মাত্মা মুঞ্জকেতুর্বিবর্ধনঃ।
সঙ্গ্রামজিদ্দুর্মুখশ্চ উগ্রসেনশ্চ বীর্যবান্। 2-4-27(11394)
কক্ষসেনঃ ক্ষিতিপতিঃ ক্ষেমকশ্চাপরাজিতঃ।
কম্বোজরাজঃ কমঠঃ কম্পনশ্চ মহাবলঃ॥ 2-4-28(11395)
সততং কম্পয়ামাস যবনানেক এব যঃ।
বলপৌরুষসম্পন্নান্কৃতাস্ত্রানমিতৌজসঃ।
যথাঽসুরান্কালকেয়ান্দেবো বজ্রধরস্তথা॥ 2-4-29(11396)
জটাসুরো মদ্রকানাং চ রাজা
কুন্তিঃ পুলিন্দশ্চ কিরাতরাজঃ।
তথাঙ্গবাঙ্গৌ সহপুণ্ড্রকেণ
পাণ্ড্যোড্ররাজৌ চ সহান্ধ্রকেণ ॥ 2-4-30(11397)
অঙ্গো বঙ্গঃ সুমিত্রশ্চ শৈব্যশ্চামিত্রকর্শনঃ।
কিরাতরাজঃ সুমনা যবনাধিপতিস্তথা॥ 2-4-31(11398)
চাণূরো দেবরাতশ্চ ভোজো ভীমরথশ্চ যঃ।
শ্রুতায়ুধশ্চ কালিঙ্গো জয়সেনশ্চ মাগধঃ॥ 2-4-32(11399)
সুকর্মা চেকিতানশ্চ পুরুশ্চামিত্রকর্শনঃ।
কেতুমান্বসুদানশ্চ বৈদেহোঽথ কৃতক্ষণঃ॥ 2-4-33(11400)
সুধর্মা চানিরুদ্ধশ্চ শ্রুতায়ুশ্চ মহাবলঃ।
অনূপরাজো দুর্ধর্পঃ ক্রমজিচ্চ সুদর্শনঃ॥ 2-4-34(11401)
শিশুপালঃ সহসুতঃ করূপাধিপতিস্তথা।
বৃষ্ণীনাং চৈব দুর্ধর্পাঃ কুমারা দেবরূপিণঃ॥ 2-4-35(11402)
আহুকো বিপৃথুশ্চৈব গদঃ সারণ এব চ।
অক্রূরঃ কৃতবর্মা চ সত্যকশ্চ শিনেঃ সুতঃ॥ 2-4-36(11403)
ভীষ্মকোঽথাকৃতিশ্চৈব দ্যুমৎসেনশ্চ বীর্যবান্।
কেকয়াশ্চ মহেষ্বাসা যজ্ঞসেনশ্চ সোমকিঃ॥ 2-4-37(11404)
কেতুমান্বসুমাংশ্চৈব কৃতাস্ত্রশ্চ মহাবলঃ।
এতে চান্যে চ বহবঃ ক্ষত্রিয়া মুখ্যসংমতাঃ। 2-4-38(11405)
উপাসতে সভায়াং স্ম কুন্তীপুত্রং যুধিষ্ঠিরম্।
অর্জুনং যে ব সংশ্রিত্য রাজপুত্রা মহাবলাঃ॥ 2-4-39(11406)
অশিক্ষন্ত ধনুর্বেদং রৌরবাজিনবাসসঃ।
তত্রৈব শিক্ষিতা রাজন্কুমারা বৃষ্ণিনন্দনাঃ। 2-4-40(11407)
রৌক্মিণেয়শ্চ সাম্বশ্চ যুয়ুধানশ্চ সাত্যকিঃ।
সুধর্মা চানিরুদ্ধশ্চ শৈব্যশ্চ নরপুঙ্গবঃ॥ 2-4-41(11408)
এতে চান্যে চ বহবো রাজানঃ পৃথিবীপতে।
ধনঞ্জয়সখা চাত্র নিত্যমাস্তে স্ম তুম্বুরুঃ॥ 2-4-42(11409)
উপাসতে মহাত্মানমাসীনং সপ্তবিংশতিঃ।
চিত্রসেনঃ সহামাত্যো গন্ধর্বাপ্সরসস্তথা॥ 2-4-43(11410)
গীতবাদিত্রকুশলাঃ সাম্যতালবিশারদাঃ।
প্রমাণোঽথ লয়ে স্থানে কিন্নরাঃ কৃতনিশ্রমাঃ॥ 2-4-44(11411)
সঞ্চোদিতাস্তুম্বুরুণা গন্ধর্বসহিতাস্তদা।
গায়ন্তি দিব্যতানৈস্তে যথান্যায়ং মনস্বিনঃ॥ 2-4-45(11412)
পাণ্ডুপুত্রানৃষীংশ্চৈব রময়ন্ত উপাসতে।
তস্যাং সভায়ামাসীনাঃ সুব্রতাঃ সত্যসঙ্গরাঃ॥ 2-4-46(11413)
দিবীব দেবা ব্রহ্মাণং যুধিষ্ঠিরমুপাসতে॥ ॥ 2-4-47(11414)

ইতি শ্রীমন্মহাভারতে সভাপর্বণি মন্ত্রপর্বণি চতুর্থোঽধ্যায়ঃ॥ 4॥

Mahabharata – Sabha Parva – Chapter Footnotes
2-4-29 কালকেয়াঃ কালকায়া অপত্যান্যসুরাঃ॥