আশ্রমবাসিকপর্ব – অধ্যায় 037

আশ্রমবাসিকপর্ব – অধ্যায় 037
॥ শ্রীঃ ॥
16.37. অধ্যায়ঃ 037
অথ পুত্রদর্শনপর্ব ॥ 2 ॥
Mahabharata – AshramaVasika Parva – Chapter Topics
জনমেজয়েন পরিক্ষিৎপ্রদর্শনে প্রার্থিতে ব্যাসেন পরিক্ষিতঃ শমীকমহর্ষঃ শৃঙ্গীণশ্চ প্রদর্শনম্॥ 1 ॥ জনমেজয়েনাবভৃথস্নানানন্তরমাস্তিকপূজনপূর্বকং বৈশম্পায়নংপ্রতি কথাবশেষকথনপ্রার্থনা॥ 2 ॥
Mahabharata – AshramaVasika Parva – Chapter Text


বৈশম্পায়ন উবাচ।

অদৃষ্ট্বা তু নৃপঃ পুত্রান্দর্শনং প্রতিলব্ধবান্।
ঋষেঃ প্রসাদাৎপুত্রাণাং স্বরূপাণাং কুরূদ্বহ॥ 16-37-1(98152)
স রাজা রাজধর্মাংশ্চ ব্রহ্মোপনিষদং তথা।
অবাপ্তবান্নরশ্রেষ্ঠো বুদ্ধিনিশ্চয়মেব চ। 16-37-2(98153)
বিদুরশ্চ মহাপ্রাজ্ঞো যয়ৌ সিদ্ধিং তপোবলাৎ।
ধৃতরাষ্ট্রঃ সমাসাদ্য ব্যাসং চৈব তপস্বিনম্॥ 16-37-3(98154)
জনমেজয় উবাচ। 16-37-4x(8062)
মমাপি বরদো ব্যাসো দর্শয়েৎপিতরং যদি।
তদ্রূপবেষবয়সং শ্রদ্দধ্যাং সর্বমেব তৎ॥ 16-37-4(98155)
প্রিয়ং মে স্যাৎকৃতার্থশ্চ স্যামহং কৃতনিশ্চয়ঃ।
প্রসাদাদৃষিমুখ্যস্য মম কামঃ সমৃদ্ধ্যতাম্॥ 16-37-5(98156)
সৌতিরুবাচ। 16-37-6x(8063)
ইত্যুক্তবচনে তস্মিন্নৃপে ব্যাসঃ প্রতাপবান্।
প্রসাদমকরোদ্ধীমানানয়চ্চ পরিক্ষিতম্॥ 16-37-6(98157)
ততস্তদ্রূপবয়সমাগতং নৃপতিং দিবঃ।
শ্রীমন্তং পিতরং রাজা দদর্শ স পরীক্ষিতম্॥ 16-37-7(98158)
শমীকং চ মহাত্মানং পুত্রং তং চাস্য শৃঙ্গিণম্।
অমাত্যা যে চ নিহতা রাজ্ঞস্তাংশ্চ দদর্শ হ॥ 16-37-8(98159)
ততঃ সোবভৃথে রাজা মুদিতো জনমেজয়ঃ।
পিতরং স্নাপয়ামাস স্বয়ং সস্নৌ চ পার্থিবঃ॥ 16-37-9(98160)
`পরীক্ষিদপি তত্রৈব বভূব স তিরোহিতঃ।’
স্নাৎবা স নৃপতির্বিপ্রমাস্তীকমিদমব্রবীৎ।
যায়াবরকুলোৎপন্নং জরৎকারুসুতং তদা॥ 16-37-10(98161)
আস্তীক বিবিধাশ্চর্যো যজ্ঞেঽয়মিতি মে মতিঃ।
যদদ্যায়ং পিতা প্রাপ্তো মম শোকপ্রণাশনঃ॥ 16-37-11(98162)
আস্তীক উবাচ। 16-37-12x(8064)
ঋষির্দ্বৈপায়নো যত্র পুরাণস্তপসো নিধিঃ।
যজ্ঞে কুরুকুলশ্রেষ্ঠ তস্য লোকাবুভৌ জিতৌ॥ 16-37-12(98163)
শ্রুতং বিচিত্রমাখ্যানং ৎবয়া পাণ্ডবনন্দন।
সর্পাশ্চ ভস্মসান্নীতা গতাশ্চ পদবীং পিতুঃ॥ 16-37-13(98164)
কথংচিত্তক্ষকো মুক্তঃ সত্যৎবাত্তব পার্থিব।
ঋষয়ঃ পূজিতাঃ সর্বে গতির্দৃষ্টা মহাত্মনঃ॥ 16-37-14(98165)
প্রাপ্তঃ সুবিপুলো ধর্মঃ শ্রুৎবা পাপবিনাশনম্।
বিমুক্তো হৃদয়গ্রন্থিরুদারজনদর্শনাৎ॥ 16-37-15(98166)
যে চ পক্ষধরা ধর্মে সদ্বৃত্তরুচয়শ্চ যে।
যান্দৃষ্ট্বা হীয়তে পাপং তেভ্যঃ কার্যা নমস্ক্রিয়া॥ 16-37-16(98167)
সৌতিরুবাচ। 16-37-17x(8065)
এতচ্ছ্রুৎবা দ্বিজশ্রেষ্ঠাৎস রাজা জনমেজয়ঃ।
পূজয়ামাস তমৃষিমনুমান্য পুনঃপুনঃ॥ 16-37-17(98168)
পপ্রচ্ছ তমৃষি চাপি বৈশম্পায়নমচ্যুতম্।
কথাবশেষং ধর্মজ্ঞো বনবাসস্য সত্তম॥ ॥ 16-37-18(98169)

ইতি শ্রীমন্মহাভারতে আশ্রমবাসিকপর্বণি পুত্রদর্শনপর্বণি সপ্তত্রিংশোঽধ্যায়ঃ॥ 37 ॥

Mahabharata – AshramaVasika Parva – Chapter Footnotes
7-37-2 স ধৃতরাষ্ট্রো রাজা বিদুরশ্চ সিদ্ধিং যয়ৌ ইতি দ্বয়োঃ সম্বন্ধঃ। তত্রাপি বিদুরস্তপোবলাৎ। ধৃতরাষ্ট্রো ব্যাসং সমাসাদ্যেতি সম্বন্ধঃ॥ 7-37-15 পাপবিনাশং ইতিহাসমিতি শেষঃ॥ 7-37-16 পক্ষধরাঃ পক্ষস্থাপকাঃ॥