অনুশাসনপর্ব – অধ্যায় 088
॥ শ্রীঃ ॥
13.88. অধ্যায়ঃ 088
অথ দানধর্মপর্ব ॥ 1 ॥
Mahabharata – Anushaasana Parva – Chapter Topics
পূর্বমন্তর্হিতেন ঘ্যবনেন কুশিকম্প্রতি পুনঃ শয়নে প্রস্বপত আত্মনঃ প্রদর্শনম্॥ 1 ॥ পুনরুত্থিতেন মুনিনা রাজানম্প্রতি আত্মনস্তৈলাভ্যঞ্জননিয়োজনেন স্নানশালায়াং পুনরন্তর্ধানম্॥ 2 ॥ পুনরাবিষ্কৃতাত্মনা তেন সভার্যস্য রাজ্ঞো রথধুরি সংয়োজনপূর্বকং যাচকেভ্যস্তদীয়বিত্তাদিবিতরণেন বীথ্যাং রথেন নির্গমনম্॥ 3 ॥ স্বীয়প্রতোদতাডনেঽপ্যবিকৃতমানসে সভার্যে কুশিকে প্রসীদতা মুনিনা বরদানেন তস্য স্বগৃহপ্রেষণম্॥ 4 ॥
Mahabharata – Anushaasana Parva – Chapter Text
যুধিষ্ঠির উবাচ।
তস্মিন্নন্তর্হিতে বিপ্রে রাজা কিমকরোত্তদা।
ভার্যা চাস্য মহাভাগা তন্মে ব্রূহি পিতামহ॥ 13-88-1(84935)
ভীষ্ম উবাচ। 13-88-2x(7072)
অদৃষ্ট্বা স মহীপালস্তমৃষিং সহ ভার্যযা।
পরিশ্রান্তো নিববৃতে ব্রীডিতো নষ্টচেতনঃ॥ 13-88-2(84936)
স প্রবিশ্য পুরীং দীনো নাভ্যভাষত কিঞ্চন।
তদেব চিন্তয়ামাস চ্যবনস্য বিচেষ্টিতম্॥ 13-88-3(84937)
অথ শূন্যেন মনসা প্রবিবেশ গৃহং নৃপঃ।
দদর্শ শয়নে তস্মিঞ্শয়ানং ভৃগুনন্দনম্॥ 13-88-4(84938)
বিস্মিতৌ তমৃষিং দৃষ্ট্বা তদাশ্চর্যং বিচিন্ত্য চ।
দর্শনাত্তস্য তু তদা বিশ্রান্তৌ সম্বভূবতুঃ॥ 13-88-5(84939)
যথাস্থানং ততো গৎবা তৎপাদৌ সংববাহতুঃ।
অথাপরেণ পার্শ্বেন সুষ্বাপ স মহামুনিঃ॥ 13-88-6(84940)
তেনৈব চ স কালেন প্রত্যবুদ্ধ্যত বীর্যবান্।
ন চ তৌ চক্রতুঃ কিঞ্চিদ্বিকারং ভয়শঙ্কিতৌ॥ 13-88-7(84941)
প্রতিবুদ্ধস্তু স মুনিস্তৌ প্রোবাচ বিশাম্পতে।
তৈলাভ্যঙ্গো দীয়তাং মে স্নাস্যেঽহমিতি ভারত॥ 13-88-8(84942)
তৌ তথেতি প্রতিশ্রুত্য ক্ষুধিতৌ শ্রমকর্শিতৌ।
শতপাকেন তৈলেন মহার্হেণোপতস্থতুঃ॥ 13-88-9(84943)
ততঃ সুখাসীনমৃষিং বাগ্যতৌ সংববাহতুঃ।
ন চ পর্যাপ্তমিত্যাহ ভার্গবঃ সুমহাতপাঃ॥ 13-88-10(84944)
যদা তৌ নির্বিকারৌ তু লক্ষমায়াস ভার্গবঃ।
তত উত্থায় সহসা স্নানশালাং বিবেশ হ॥ 13-88-11(84945)
ক্লৃপ্তমেব তু তত্রাসীৎস্নানীয়ং পার্থিবোচিতম্।
অসৎকৃত্য চ তৎসর্বং তত্রৈবান্তরধীয়ত॥ 13-88-12(84946)
স মুনিঃ পুনরেবাথ নৃপতেঃ পশ্যতস্তদা।
নাসূয়াং চক্রতুস্তৌ চ দম্পতী ভরতর্ষভ॥ 13-88-13(84947)
অথ স্নাতঃ স ভগবান্সিংহাসনগতঃ প্রভুঃ।
দর্শয়ামাস কুশিকং সভার্যং কুরুনন্দন॥ 13-88-14(84948)
সংহৃষ্টবদনো রাজা সভার্যঃ কুশিকো মুনিম্।
সিদ্ধমন্নমিতি প্রহ্বো নির্বিকারো ন্যবেদয়ৎ॥ 13-88-15(84949)
আনীয়তামিতি মুনিস্তং চোবাচ নরাধিপম্।
স রাজা সমুপাজহ্রে তদন্নং সহ ভার্যযা॥ 13-88-16(84950)
মাংসপ্রকারান্বিবিধাঞ্শাকানি বিবিধানি চ।
লেহ্যপিষ্টবিকারাংশ্চ পানকানি লঘূনি চ॥ 13-88-17(84951)
রসালাপূপকাংশ্চিত্রান্মোদকানথ ষড্রসান্।
রসান্নানাপ্রকারাংশ্চ বন্যং চ মুনিভোজনম্॥ 13-88-18(84952)
ফলানি চ বিচিত্রাণি রাজভোজ্যানি ভূরিশঃ।
বদরেঙ্গুদকাশ্মর্যভল্লাতকফলানি চ॥ 13-88-19(84953)
গৃহস্থানাং চ যদ্ভোজ্যং যচ্চাপি বনবাসিনাম্।
সর্বমাহারয়ামাস রাজা শাপভয়ান্মুনেঃ॥ 13-88-20(84954)
অথ সর্বমুপন্যস্তমগ্রতশ্চ্যবনস্য তৎ।
ততঃ সর্বং সমানীয় তচ্চ শয়্যাসনং মুনিঃ॥ 13-88-21(84955)
বস্ত্রৈঃ শুভৈরবচ্ছাদ্য ভোজনোপস্করৈঃ সহ।
সর্বমাদীপয়ামাস চ্যবনো ভৃগুনন্দনঃ॥ 13-88-22(84956)
ন চ তৌ চক্রতুঃ ক্রোধং দম্পতী সুমহাব্রতৌ।
তয়োঃ সম্প্রেক্ষতোরেব পুনরন্তর্হিতোঽভবৎ॥ 13-88-23(84957)
তথৈব চ স রাজর্ষিস্তস্থৌ তাং রজনীং তদা।
সভার্যো বাগ্যতঃ শ্রীমান্ন চকোপং সমাবিশৎ॥ 13-88-24(84958)
নিত্যসংস্কৃতমন্নং তু বিবিধং রাজবেশ্মনি॥
শয়নানি চ মুখ্যানি পরিষেকাশ্চ পুষ্কলাঃ॥ 13-88-25(84959)
বস্ত্রং চ বিবিধাকারমভবৎসমুপার্জিতম্।
ন শশাক ততো দ্রষ্টমন্তরং চ্যবনস্তদা॥ 13-88-26(84960)
পুনরেব চ বিপ্রর্ষিঃ প্রোবাচ কুশিকং নৃপম্।
সভার্যো মাং রথেনাশু বহ যত্র ব্রবীম্যহম্॥ 13-88-27(84961)
তথেতি চ প্রাহ নৃপো নির্বিশঙ্কস্তপোধনম্।
ক্রীডারথোস্তু ভগবন্নুত সাঙ্গ্রামিকো রথঃ॥ 13-88-28(84962)
ইত্যুক্তঃ স মুনী রাজ্ঞা তেন হৃষ্টেন তদ্বচঃ।
চ্যবনঃ প্রত্যুবাচেদং হৃষ্টঃ পরপুরংজয়ম্॥ 13-88-29(84963)
সজ্জীকুরু রথং ক্ষিপ্রং যস্তে সাঙ্গ্রামিকো মতঃ।
সায়ুধঃ সপতাকশ্চ শক্তীকনকয়ষ্টিমান্॥ 13-88-30(84964)
কিংকিণীস্বননির্ঘোষো যুক্তস্তোরণকল্পনৈঃ।
গদাস্বঙ্গনিবদ্ধশ্চ পরমেষুশতান্বিতঃ॥ 13-88-31(84965)
ততঃ স তং তথেত্যুক্ৎবা কল্পয়িৎবা মহারথম্।
ভার্যাং বামে ধুরি তদা চাত্মানং দক্ষিণে তথা॥ 13-88-32(84966)
ত্রিদণ্ডং বজ্রসূচ্যগ্রং প্রতোদং তত্র চাদধৎ।
সর্বমেতত্তথা দত্ৎবা নৃপো বাক্যমঽথাব্রবীৎ॥ 13-88-33(84967)
ভগবন্ক্ব রথো যাতু ব্রবীতু ভৃগুনন্দন।
যত্র বক্ষ্যসি বিপ্রর্ষে তত্র যাস্যতি তে রথঃ॥ 13-88-34(84968)
এবমুক্তস্তু ভগবান্প্রত্যুবাচাথ তং নৃপম্।
ইতঃ প্রভৃতি যাতব্যং পদকম্পদকং শনৈঃ॥ 13-88-35(84969)
শ্রমো মম যথা ন স্যাত্তথা মচ্ছন্দচারিণৌ।
সুসুখং চৈব বোঢব্যো জনঃ সর্বশ্চ পশ্যতু॥ 13-88-36(84970)
নোৎসার্যাঃ পথিকাঃ কেচিত্তেভ্যোদাস্যে বসু হ্যহম্।
ব্রাহ্মণেভ্যশ্চ যে কামানর্থয়িষ্যন্তিমাং পথি॥ 13-88-37(84971)
সর্বান্দাস্যাম্যশেষেণ ধনং রত্নানি চৈব হি।
ক্রিয়তাং নিখিলেনৈতন্মা বিচারয় পার্থিব॥ 13-88-38(84972)
তস্য তদ্বচনং শ্রুৎবা রাজা ভৃত্যাংস্তথাঽব্রবীৎ।
যদ্যদ্ব্রূয়ান্মুনিস্তত্তৎসর্বং দেয়মশঙ্কিতৈঃ॥ 13-88-39(84973)
ততো রত্নান্যনেকানি স্ত্রিয়ো যুগ্যমজাবিকম্।
কৃতাকৃতং চ কনকং গজেন্দ্রাশ্চাচলোপমাঃ॥ 13-88-40(84974)
অন্বগচ্ছন্ত তমৃষিং রাজামাত্যাশ্চ সর্বশঃ।
হাহাভূতং চ তৎসর্বমাসীন্নগরমার্তবৎ॥ 13-88-41(84975)
তৌ তীক্ষ্ণাগ্রেণ সহসা প্রতোদেন প্রতোদিতৌ।
পৃষ্ঠে বিদ্ধৌ কটে চৈব নির্বিকারৌ তমূহতুঃ॥ 13-88-42(84976)
বেপমানৌ নিরাহারৌ পঞ্চাশদ্রাত্রকর্শিতৌ।
কথংচিদূহতুর্ধৈর্যাদ্দম্পতী তং রথোত্তমম্॥ 13-88-43(84977)
বহুশো ভৃশবিদ্ধৌ তৌ ক্ষরমাণৌ ক্ষতোদ্ভবম্।
দদৃশাতে মহারাজ পুষ্পিতাবিব কিংশুকৌ॥ 13-88-44(84978)
তৌ দৃষ্ট্বা পৌরবর্গস্তু ভৃশং শোকসমাকুলঃ।
অভিশাপভয়ত্রস্তো ন তং কিঞ্চিদুবাচ হ॥ 13-88-45(84979)
দ্বন্দ্বশশ্চাব্রুবন্সর্বে পশ্যধ্বং তপসো বলম্।
ক্রুদ্ধা অপি মুনিশ্রেষ্ঠং বীক্ষিতুং নেহ শুক্নুমঃ॥ 13-88-46(84980)
অহো ভগবতো বীর্যং মহর্ষের্ভাবিতাত্মনঃ।
রাজ্ঞশ্চাপি সভার্যস্য ধৈর্যং পশ্যত যাদৃশম্॥ 13-88-47(84981)
শ্রান্তাবপি হি কচ্ছ্রেণ রথমেনং সমূহতুঃ।
ন চৈতয়োর্বিকারং বৈ দদর্শং ভৃগুনন্দনঃ॥ 13-88-48(84982)
ভীষ্ম উবাচ। 13-88-49x(7073)
ততঃ স নির্বিকারৌ তু দৃষ্ট্বা ভৃগুকুলোদ্বহঃ।
বসু বিশ্রাণয়ামাস যথা বৈশ্রবণস্তথা॥ 13-88-49(84983)
তত্রাপি রাজা প্রীতাত্মা যথাদিষ্টমথাকরোৎ।
ততোঽস্য ভগবান্প্রীতো বভূব মুনিসত্তমঃ॥ 13-88-50(84984)
অবতীর্য রথশ্রেষ্ঠাদ্দম্পতী তৌ মুমোচ হ।
বিমোচ্য চৈতৌ বিধিবত্ততো বাক্যমুবাচ হ॥ 13-88-51(84985)
স্নিগ্ধগম্ভীরয়া বাচা ভার্গবঃ সুপ্রসন্নয়া।
দদামি বাং বরং শ্রেষ্ঠং তং ব্রূতামিতি ভারত॥ 13-88-52(84986)
সুকুমারৌ চ তৌ বিদ্ধৌ করাভ্যাং মুনিসত্তমঃ।
পস্পর্শামৃতকল্পাভ্যাং স্নেহাদ্ভরতসতম॥ 13-88-53(84987)
অথাব্রবীন্নৃপো বাক্যং শ্রমো নাস্ত্যাবয়োরিহ।
বিশ্রান্তৌ স্বঃ প্রভাবাত্তে ধ্যানেনৈবেহ ভার্গব॥ 13-88-54(84988)
অথ তৌ ভগবান্প্রাহ প্রহৃষ্টশ্চ্যনস্তদা।
ন বৃথা ব্যাহৃতং পূর্বং যন্ময়া তদ্ভবিষ্যতি॥ 13-88-55(84989)
রমণীয়ঃ সমুদ্দেশো গঙ্গাতীরমিদং শুভম্।
কিঞ্চিৎকালং ব্রতপরো নিবৎস্যামীহ পার্থিব॥ 13-88-56(84990)
গম্যতাং স্বপুরং পুত্র বিশ্রান্তঃ পুনরেষ্যসি।
ইহস্থং মাং সভার্যস্ৎবং দ্রষ্টাসি শ্বো নরাধিপ॥ 13-88-57(84991)
ন চ মন্যুস্ৎবয়া কার্যঃ শ্রেয়স্ৎবাং সমুপস্থিতম্।
যৎকাঙ্ক্ষিতং হৃদিস্থং তে তৎসর্বং হি ভবিষ্যতি॥ 13-88-58(84992)
ইত্যেবমুক্তঃ কুশিকঃ প্রহৃষ্টেনান্তরাত্মনা।
প্রোবাচ মুনিশার্দূলমিদং বচনমর্থবৎ॥ 13-88-59(84993)
ন মে মন্যুর্মহাভাগ পূতৌ স্বো ভগবংস্ৎবয়া।
সংবৃতৌ যৌবনস্থৌ স্বো বপুষ্মন্তৌ বলান্বিতৌ॥ 13-88-60(84994)
প্রতোদেন ব্রণা যে মে সভার্যস্য ৎবয়া কৃতাঃ।
তান্ন পশ্যামি গাত্রেষু স্বস্থোস্মি সহ ভার্যযা॥ 13-88-61(84995)
ইমাং চ দেবীং পশ্যামি বপুষাঽপ্সরসোপমাম্।
শ্রিয়া পরময়া যুক্তা তথা দৃষ্টা পুরা ময়া॥ 13-88-62(84996)
তব প্রসাদসংবৃত্তমিদং সর্বং মহামুনে।
নৈতচ্চিত্রং তু ভগবংস্ৎবয়ি সত্যপরাক্রম॥ 13-88-63(84997)
ইত্যুক্তঃ প্রত্যুবাচৈনং কুশিকং চ্যবনস্তদা।
আগচ্ছেথাঃ সভার্যশ্চ ৎবমিহেতি নরাধিপ॥ 13-88-64(84998)
ইত্যুক্তঃ সমনুজ্ঞাতো রাজর্ষিরভিবাদ্য তম্।
প্রয়যৌ বপুষা যুক্তো নগরং দেবরাজবৎ॥ 13-88-65(84999)
তত এনমুপাজগ্মুরমাত্যাঃ সপুরোহিতাঃ।
বলস্থা গণিকায়ুক্তাঃ সর্বাঃ প্রকৃতয়স্তথা॥ 13-88-66(85000)
তৈর্বৃতঃ কুশিকো রাজা শ্রিয়া পরময়া জ্বলন্।
প্রবিবেশ পুরং হৃষ্টঃ পূজ্যমানোঽথ বন্দিভিঃ॥ 13-88-67(85001)
ততঃ প্রবিশ্য নগরং কৃৎবা পৌর্বাহ্ণিকীঃ ক্রিয়াঃ।
ভুক্ৎবা সভার্যো রজনীমুবাস স মহাদ্যুতিঃ॥ 13-88-68(85002)
ততস্তু তৌ নবমভিবীক্ষ্য যৌবনং
পরস্পরং বিগতজরাবিবামরৌ।
ননন্দতুঃ শয়নগতৌ বপুর্ধরৌ
শ্রিয়া যুতৌ দ্বিজবরদত্তয়া তদা॥ 13-88-69(85003)
অথাপ্যুষির্ভৃগুকুলকীর্তিবর্ধন-
স্তপোধনো বনমভিরামমৃদ্ধিমৎ।
মনীষয়া বহুবিধরত্নভূষিতং
সসর্জ যন্ন পুরি শতক্রতোরপি॥ ॥ 13-88-70(85004)
ইতি শ্রীমন্মহাভারতে অনুশাসনপর্বণি দানধর্মপর্বণি অষ্টাশীষ্টিতমোঽধ্যায়ঃ॥ 88 ॥