অনুশাসনপর্ব – অধ্যায় 085
॥ শ্রীঃ ॥
13.85. অধ্যায়ঃ 085
অথ দানধর্মপর্ব ॥ 1 ॥
Mahabharata – Anushaasana Parva – Chapter Topics
ভীষ্মেণ যুধিষ্ঠিরম্প্রতি মহদ্দর্শনসহবাসয়োর্গবাং চ প্রভাববোধনায় চ্যবনোপাখ্যানকথনারম্ভঃ॥ 1 ॥ গঙ্গায়মুনা সঙ্গমেঽন্তর্জলে নিমজ্য তপস্যতশ্চ্যবনস্য দাশৈর্জালেন জলচরৈঃ সহ কূলপ্রাপণম্॥ 2 ॥ দাশৈঃ প্রার্থিতেন তেন তান্প্রতি মৎস্যৈ সহ স্বস্য প্রাণজালান্যতরস্মান্মোচনচোদনা॥ 3॥
Mahabharata – Anushaasana Parva – Chapter Text
যুধিষ্ঠির উবাচ।
দর্শনে কীদৃশঃ স্নেহঃ সংবাসে চ পিতামহ।
মহাভাগ্যং গবাং চৈব তন্মে ব্যাখ্যাতুমর্হসি॥ 13-85-1(84819)
ভীষ্ম উবাচ। 13-85-2x(7050)
হন্ত তে কথয়িষ্যামি পুরাবৃত্তং মহাদ্যুতে।
নহুষস্য চ সংবাদং মহর্ষেশ্চ্যবনস্য চ॥ 13-85-2(84820)
পুরা মহর্ষিশ্চ্যবনো ভার্গবো ভরতর্ষভ।
উদবাসকৃতারম্ভো বভূব স মহাব্রতঃ॥ 13-85-3(84821)
নিহত্য মানং ক্রোধং চ প্রহর্ষং শোকমেব চ।
বর্ষাণি দ্বাদশ মুনির্জলবাসে ধৃতব্রতঃ॥ 13-85-4(84822)
আদধৎসর্বভূতেষু বিস্রম্যং পরমং শুভম্।
জলেচরেষু সর্বেষু শীতরশ্মিরিব প্রভুঃ॥ 13-85-5(84823)
স্থাণুভূতঃ শুচির্ভূৎবা দৈবতেভ্যঃ প্রণম্য চ।
গঙ্গায়মুনয়োর্মধ্যে জলং সম্প্রবিবেশ হ॥ 13-85-6(84824)
গঙ্গায়মুনয়োর্বেগং সুভীমং ভীমনিঃস্বনম্।
প্রতিজগ্রাহ শিরসা বাতবেগসমং জবে॥ 13-85-7(84825)
গঙ্গা চ যমুনা চৈব সরিতশ্চ সরাংসি চ।
প্রদক্ষিণমৃষিং চক্রুর্ন চৈনং পর্যপীডয়ন্॥ 13-85-8(84826)
অন্তর্জলেষু সুষ্বাপ কাষ্ঠভূতো মহামুনিঃ।
ততশ্চোর্ধ্বস্থিতো ধীমানভবদ্ভরতর্ষভ॥ 13-85-9(84827)
জলৌকসাং সসৎবানাং বভূব প্রিয়দর্শনঃ।
উপাজিঘ্নন্ত চ তদা মৎস্যাস্তং হৃষ্টমানসাঃ।
তত্র তস্যাসতঃ কালঃ সমতীতোঽভবন্মহান্॥ 13-85-10(84828)
ততঃ কদাচিৎসময়ে কস্মিংশ্চিন্মৎস্যজীবিনঃ।
তং দেশং সমুপাজগ্মুর্জালহস্তা মহাদ্যুতে॥ 13-85-11(84829)
নিষাদা বহবস্তত্র মৎস্যোদ্ধরণনিশ্চয়াঃ।
ব্যায়তা বলিনঃ শূরাঃ সলিলেষ্বনুবর্তিনঃ।
অভ্যায়যুশ্চ তং দেশং নিশ্চিতা জালকর্ম্ণি॥ 13-85-12(84830)
জালং তে যোজয়ামাসুর্নবসূত্রকৃতং দৃঢম্।
মৎস্যোদ্ধরণমাকর্ষস্তদা ভরতসত্তম॥ 13-85-13(84831)
ততস্তে বহুভির্যোগৈঃ কৈবর্তা মৎস্যকাঙ্ক্ষিণঃ।
গঙ্গায়মুনয়োর্বারি জালেনাবকিরন্তি তে॥ 13-85-14(84832)
জালং সুবিততং তেষাং নবসূত্রকৃতং তথা।
বিস্তারায়ামসম্পন্নং যত্তত্র সলিলে ক্ষমম্॥ 13-85-15(84833)
ততস্তে সুমহচ্চৈব বলবচ্চ সুবর্তিতম্।
অবতীর্য ততঃ সর্বে জালং চকৃষিরে তদা॥ 13-85-16(84834)
অভীতরূপাঃ সংহৃষ্টা অন্যোন্যবশবর্তিনঃ।
ববন্ধুস্তত্র মৎস্যাংশ্চ তথাঽন্যাঞ্জলচারিণঃ॥ 13-85-17(84835)
তথা মৎস্যৈঃ পরিবৃতং চ্যবনং ভৃগুনন্দনম্।
আকর্ষয়ন্মহারাজ জালেনাথ যদৃচ্ছয়া॥ 13-85-18(84836)
নদীশৈবলদিগ্ধাঙ্গং হরিশ্মশ্রুজটাধরম্।
লগ্নৈঃ শঙ্খনখৈর্গাত্রে ক্রোডৈশ্চিত্রৈরিবার্পিতম্। 13-85-19(84837)
তং জালেনোদ্ধৃতং দৃষ্ট্বা তে তদা বেদপারগম্।
সর্বে প্রাঞ্জলয়ো দাশাঃ শিরোভিঃ প্রাপতন্ভুবি॥ 13-85-20(84838)
পরিখেদপরিত্রাসাজ্জালস্যাকর্ষণেন চ।
মৎস্যা বভূবুর্ব্যাপন্নাঃ স্থলসংস্পর্শনেন চ॥ 13-85-21(84839)
স মুনিস্তত্তদা দৃষ্ট্বা মৎস্যানাং কদনং কৃতম্।
বভূব কৃপয়াবিষ্টো নিঃশ্বসংশ্চ পুনঃপনঃ॥ 13-85-22(84840)
নিষাদা ঊচুঃ। 13-85-23x(7051)
অজ্ঞানাদ্যৎকৃতং পাপং প্রসাদং তত্র নঃ কুরু।
করবাম প্রিয় কিং তে তন্নো ব্রূহি মহামুনে॥ 13-85-23(84841)
ইত্যুক্তো মৎস্যমধ্যস্থশ্চ্যবনো বাক্যমব্রবীৎ।
যো মেঽদ্য পরমঃ কামস্তং শৃণুধ্বং মসাহিতাঃ॥ 13-85-24(84842)
প্রাণোৎসর্গং বিসর্গং বা মৎস্যৈর্যাস্যাম্যহং সহ।
সংবাসান্নোৎসহে ত্যক্তুং সলিলেঽধ্যুপিতানহম্॥ 13-85-25(84843)
ইত্যুক্তাস্তে নিষাদাস্তু সুভৃশং ভয়কম্পিতাঃ।
সর্বে বিবর্ণবদনা নহুষায় ন্যবেদয়ন্॥ ॥ 13-85-26(84844)
ইতি শ্রীমন্মহাভারতে অনুশাসনপর্বণি দানধর্মপর্বণি পশ্চাশীতিতমোঽধ্যায়ঃ॥ 85 ॥
Mahabharata – Anushaasana Parva – Chapter Footnotes
7-85-1 পরপীডাদর্শনে পরৈঃ সহ সংবাসে চ কীদৃশঃ স্নেহ আতৃশংস্যং চ কর্তব্যম্। গবাং মাহাত্ম্যং চ ব্রূহীতি প্রশ্নদূয়ম্॥ 7-85-8 সরিতশ্চ তথানুগা ইতি ট.থ.ধ.পাঠঃ॥ 7-85-9 ঊর্ধ্বস্থিতঃ উপবিষ্টঃ॥ 7-85-10 আসতঃ আসীনস্য॥ 7-85-19 শঙ্খানাং জলজন্তুবিশেষাণাং নখানি তৈঃ॥