অনুশাসনপর্ব – অধ্যায় 235
॥ শ্রীঃ ॥
13.235. অধ্যায়ঃ 235
অথ দানধর্মপর্ব ॥ 1 ॥
Mahabharata – Anushaasana Parva – Chapter Topics
পরমেশ্বরেণ পার্বতীংপ্রতি অন্নস্বর্ণগোভূকন্যাবিদ্যাদানানাং মহিমপ্রতিপাদনম্॥ 1 ॥
Mahabharata – Anushaasana Parva – Chapter Text
উমোবাচ।
ভগবন্কানি দেয়ানি ধর্মমুদ্দিশ্য মানবৈঃ।
তান্যহং শ্রোতুমিচ্ছামি তন্মে শংসিতুমর্হসি॥ 13-235-1(90673)
মহেশ্বর উবাচ। 13-235-2x(7643)
অজস্রং ধর্মকার্যং চ তথা নৈমিত্তিকং প্রিয়ে।
অন্নং প্রতিশ্রয়ো দীপঃ পানীয়ং তৃণমিন্ধনম্॥ 13-235-2(90674)
স্নেহো গন্ধশ্চ ভৈষজ্যং তিলাশ্চ লবণং তথা।
এবমাদি তথাঽন্যশ্চ দানমাজস্রমুচ্যতে॥ 13-235-3(90675)
অজস্রদানাৎসততমাজস্রমিতি নিশ্চিতম্।
সামান্যং সর্ববর্ণানাং দানং শৃণু সমাহিতা॥ 13-235-4(90676)
অন্নং প্রাণো মনুষ্যাণামন্নদঃ প্রাণদো ভবেৎ।
তস্মাকদন্নং বিশেষেণ দাতুমিচ্ছতি মানবঃ॥ 13-235-5(90677)
ব্রাহ্মণায়াভিরূপায় যো দদ্যাদন্নমীপ্সিতম্।
নিদধাতি নিধিং শ্রেষ্ঠং সোঽনন্তং পারলৌকিকম্॥ 13-235-6(90678)
শ্রান্তমধ্বপরিশ্রান্তমতিথিং গৃহমাগতম্।
অর্চয়ীত প্রয়ত্নেন স হি যজ্ঞো বরপ্রদঃ॥ 13-235-7(90679)
কৃৎবা তু পাতকং কর্ম যো দদ্যাদন্নমর্থিনাম্।
ব্রাহ্মণানাং বিশেষেণ সোপহন্তি স্বকং তমঃ॥ 13-235-8(90680)
পিতরস্তস্য নন্দন্তি সুবৃষ্ট্যা কর্ষকা ইব।
পুত্রো যস্য তু পৌত্রো বা শ্রোত্রিয়ং ভোজয়িষ্যতি॥ 13-235-9(90681)
অপি চণ্ডালশূদ্রাণামন্নদানং ন গর্হতে।
তস্মাৎসর্বপ্রয়ত্নেন দদ্যাদন্নমমৎসরঃ॥ 13-235-10(90682)
কলত্রং পীডয়িৎবাঽপি পোষয়েদতিথীন্সদা।
জন্মাপি মানুষে লোকে তদর্থং হি বিধীয়তে॥ 13-235-11(90683)
অন্নদানাচ্চ লোকাংস্তান্সম্প্রবক্ষ্যাম্যনিন্দিতে।
ভবনানি প্রকাশন্তে দিবি তেষাং মহাত্মনাম্॥ 13-235-12(90684)
অনেকশতভৌমানি সান্তর্জলবনানি চ।
বৈডূর্যার্চিঃপ্রকাশপনি হেমরূপ্যময়ানি চ॥ 13-235-13(90685)
নানারূপাণি সংস্থানাং নানারত্নময়ানি চ।
চন্দ্রমণ্ডলশুভ্রাণি কিঙ্কিণীজালবন্তি চ॥ 13-235-14(90686)
তরুণাদিত্যবর্ণানি স্থাবরাণি চরাণি চ।
যথেষ্টভক্ষ্যভোজ্যানি শয়নাসনবন্তি চ॥ 13-235-15(90687)
সর্বকামফলাশ্চাত্র বৃক্ষা ভবনসংস্থিতাঃ।
বাপ্যো বহ্ব্যশ্চ কূপাশ্চ দীর্ঘিকাশ্চ সহস্রশঃ॥ 13-235-16(90688)
অরুজানি বিশোকানি নিত্যানি বিবিধানি চ।
ভবনানি বিচিত্রাণি প্রাণদানাং ত্রিবিষ্টপে॥ 13-235-17(90689)
বিবস্বতশ্চ সোমস্য ব্রহ্মণশ্চ প্রজাপতেঃ।
বিশন্তি লোকাংস্তে নিত্যং জগত্যন্নোদকপ্রদাঃ॥ 13-235-18(90690)
তত্র তে সুচিরং কালং বিহৃত্যাপ্সরসাং গণৈঃ।
জায়ন্তে মানুষে লোকে সর্বকল্যাণসংয়ুতাঃ॥ 13-235-19(90691)
বলসংহননোপেতা নীরোগাশ্চিরজীবিনঃ।
কুলীনা মতিমন্তশ্চ ভবন্ত্যন্নপ্রদা নরাঃ॥ 13-235-20(90692)
তস্মাদন্নং বিশেষেণ দাতব্যং ভূতিমিচ্ছতা।
সর্বকালং চ সর্বস্য সর্বত্র চ সদৈব চ॥ 13-235-21(90693)
সুবর্ণদানং পরমং স্বর্গ্যং স্বস্ত্যযনং মহৎ।
তস্মাত্তে বর্ণয়িষ্যামি যথাবদনুপূর্বশঃ॥ 13-235-22(90694)
অপি পাপকৃতং ক্রূরং দত্তং রুক্মং প্রকাশয়েৎ॥ 13-235-23(90695)
সুবর্ণং যে প্রয়চ্ছন্তি শ্রোত্রিভেভ্যঃ সুচেতসঃ।
দেবতাস্তে তর্পয়ন্তি সমস্তা ইতি বৈদিকম্॥ 13-235-24(90696)
অগ্নির্হি দেবতাঃ সর্বাঃ সুবর্ণং চাগ্নিরুচ্যতে।
তস্মাৎসুবর্ণদানেন তৃপ্তাঃ স্যুঃ সর্বদেবতাঃ॥ 13-235-25(90697)
অগ্ন্যভাবে তু কুর্বন্তি বহ্নিস্থানেষু কাঞ্চনম্।
তস্মাৎসুবর্ণদাতারঃ সর্বান্কামানবাপ্নুয়ুঃ॥ 13-235-26(90698)
আদিত্যস্য হুতাশস্য লোকান্নানাবিধাঞ্শুভান্।
কাঞ্চনং সম্প্রদায়াশু প্রবিশন্তি ন সংশয়ঃ॥ 13-235-27(90699)
অলঙ্কারং কৃতং চাপি কেবলান্প্রবিশিষ্যতে।
সৌবর্ণৈর্ব্রাহ্মণং কালে তৈরলঙ্কৃত্য ভোজয়েৎ॥ 13-235-28(90700)
য এতৎপরমং দানং দত্ৎবা সৌবর্ণমদ্ভুতম্।
দ্যুতিং মেধাং বপুঃ কীর্তিং পুনর্জাতে লবেদ্ধ্রুবম্॥ 13-235-29(90701)
তস্মাৎস্বশক্ত্যা দাতব্যং কাঞ্চনং ভুবি মানবৈঃ।
ন হ্যেতস্মাৎপরং লোকেষ্বন্যৎপাপাৎপ্রমুচ্যতে॥ 13-235-30(90702)
অত ঊর্ধ্বং প্রবক্ষ্যামি গবাং দানমনিন্দিতে।
নহি গোভ্যঃ পরং দানং বিদ্যতে জগতি প্রিয়ে॥ 13-235-31(90703)
লোকান্সিসৃক্ষুণা পূর্বং গাবঃ সৃষ্টাঃ স্বয়ংভুবা।
বৃত্ত্যর্থং সর্বভূতানাং তস্মাত্তা মাতরঃ স্মৃতাঃ॥ 13-235-32(90704)
লোকজ্যেষ্ঠা লোকবৃত্ত্যা প্রবৃত্তা
ময়্যায়ত্তাঃ সোমনিষ্যন্দভূতাঃ।
সৌম্যাঃ পুণ্যাঃ প্রাণদাঃ কামদাশ্চ
তস্মাৎপূজ্যাঃ পুণ্যকামৈর্মনুষ্যৈঃ॥ 13-235-33(90705)
ধেনুং দত্ৎবা নিভৃতাং সুশীলাং
কল্যাণবৎসাং চ পয়স্বিনীং চ।
যাবন্তি রোমাণি ভবন্তি তস্যা-
স্তাবৎসমাঃ স্বর্গফলানি ভুঙ্ক্তে॥ 13-235-34(90706)
প্রয়চ্ছতে যঃ কপিলাং সচেলাং
সকাংস্যদোহাং কনকাগ্র্যশৃঙ্গীম্।
পুত্রাশ্চ পৌত্রাংশ্চ কুলং চ সর্ব-
মাসপ্তমং তারয়তে পরত্র চ॥ 13-235-35(90707)
অন্তর্জাতাঃ ক্রীতকা দ্যূতলব্ধাঃ।
প্রাণক্রীতাঃ সোদকাশ্চৌজসা বা।
কৃচ্ছ্রোৎসৃষ্টাঃ পোষণার্থাগতাশ্চ
দ্বারৈরেতৈস্তাঃ প্রলব্ধাঃ প্রদদ্যাৎ॥ 13-235-36(90708)
কৃসায় বহুপুত্রায় শ্রোত্রিয়ায়াহিতাগ্নয়ে।
প্রদায় নীরুজাং ধেনুং লোকান্প্রাপ্নোত্যনুত্তমান্॥ 13-235-37(90709)
নৃশংসস্য কৃতঘ্নস্য লুব্ধস্যানৃতবাদিনঃ।
হব্যকব্যব্যপেতস্য ন দদ্যাদ্গাঃ কথঞ্চন॥ 13-235-38(90710)
সমানবৎসাং যো দদ্যাদ্ধের্নুং বিপ্রে পয়স্বিনীম্।
সুবৃত্তাং বস্ত্রসংছন্নাং সোমলোকে মহীয়তে॥ 13-235-39(90711)
সমানবৎসাং যো দদ্যাৎকৃষ্ণাং ধেনুং পয়স্বিনীম্।
সুবৃত্তাং বস্ত্রসংছন্নাং লোকান্প্রাপ্নোত্যপাংপতেঃ॥ 13-235-40(90712)
হিরণ্যবর্ণাং পিঙ্গাক্ষীং সবৎসাং কাংস্যদোহনাম্।
প্রদায় বস্ত্রসম্পন্নাং যান্তি কৌকবেরসদ্মনঃ॥ 13-235-41(90713)
বায়ুরেণুসবর্মাং চ সবৎসাং কাংস্যদোহনাম্।
প্রদায় বস্ত্রসম্পন্নাং বায়ুলোকে মহীয়তে॥ 13-235-42(90714)
সমানবৎসাং যো ধেনুং দত্ৎবা গৌরীং পয়স্বিনীম্।
সুবৃত্তাং বস্ত্রসংছন্নামগ্নিলোকে মহীয়তে॥ 13-235-43(90715)
যুবানং বলিনং শ্যামং শতেন সহ যূথপম্।
গবেন্দ্রং ব্রাহ্মণেন্দ্রায় ভূরিশৃঙ্গমলংকৃতম্॥ 13-235-44(90716)
ঋষভং যে প্রয়চ্ছন্তি শ্রোত্রিয়াণাং মহাত্মনাম্।
ঐশ্বর্যমভিজায়ন্তে জায়মানাঃ পুনঃপুনঃ॥ 13-235-45(90717)
গবাং মূত্রপুরীষাণি নোদ্বিজেন কদাচন।
ন চাসাং মাংসমশ্নীয়াদ্গোষু ভক্তঃ সদা ভবেৎ॥ 13-235-46(90718)
গ্রাসমুষ্টিং পরগবে দদ্যাৎসংবৎসরং শুচি।
অকৃৎবা স্বয়মাহারং ব্রতং তৎসার্বকামিকম্॥ 13-235-47(90719)
গবামুভয়তঃ কালে নিত্যং স্বস্ত্যযনং বদেৎ।
ন চাসাং চিন্তয়েৎপাপমিতি ধর্মবিদো বিদুঃ॥ 13-235-48(90720)
গাবঃ পবিত্রং পরমং গোষু লোকাঃ প্রতিষ্ঠিতাঃ।
কথঞ্চিন্নাবমন্তব্যা গাবো লোকস্য মাতরঃ॥ 13-235-49(90721)
তস্মাদেব গবাং দানং বিশিষ্টমিতি কথ্যতে।
গোষু পূজা চ ভক্তিশ্চ নরস্যায়ুষ্যতাং বহেৎ॥ 13-235-50(90722)
অতঃপরং প্রবক্ষ্যামি ভূমিদানং মহাফলম্।
ভূমিদানসমং দানং লোকে নাস্তীতি নিশ্চয়ঃ॥ 13-235-51(90723)
গৃহয়ুক্ক্ষেত্রয়ুগ্বাঽপি ভূমিভাগঃ প্রদীয়তে।
সুখভোগং নিরাক্রোশং বাস্তুপূর্বং প্রকল্প্য চ॥ 13-235-52(90724)
গ্রহীতারমলঙ্কৃত্য বস্ত্রপুষ্পানুলোপনৈঃ।
সভৃত্যং সপরীবারং ভোজয়িৎবা যথেষ্টতঃ।
যো দদ্যাদ্দক্ষিণাং কালে ত্রিরদ্ভির্গৃহ্যতামিতি॥ 13-235-53(90725)
এবং ভূম্যাং প্রদত্তায়াং শ্রদ্ধয়া বীতমৎসরৈঃ।
যাবত্তিষ্ঠতি সা ভূমিস্তাবদ্দত্তফলং বিদুঃ॥ 13-235-54(90726)
ভূমিদঃ স্বর্গমারুহ্য রমতে শাশ্বতীঃ সমাঃ।
অচলা হ্যক্ষয়া ভূমিঃ সর্বকামান্দুধুক্ষতি॥ 13-235-55(90727)
যৎকিঞ্চিৎকুরুতে পাপং পুরুষো বৃত্তিকর্শিতঃ।
অপি গোকর্ণমাত্রেণ ভূমিদানন মুচ্যতে॥ 13-235-56(90728)
সুবর্ণং রজতং বস্ত্রং মণিমুক্তাবসূনি চ।
সর্বমেতন্মহাভাগে ভূমিদানে প্রতিষ্ঠিতম্॥ 13-235-57(90729)
ভর্তুর্নিঃ শ্রেয়সে যুক্তাস্ত্যক্তাত্মানো রণে হতাঃ।
ব্রহ্মলোকায় সংসিদ্ধা নাতিক্রামন্তি ভূমিদম্॥ 13-235-58(90730)
হলকৃষ্টাং মহীং দদ্যাৎসর্ববীজফলান্বিতাম্।
সুকূপশরণাং বাঽপি সা ভবেৎসর্বকামদা॥ 13-235-59(90731)
নিষ্পন্নসস্যাং পৃথিবীং যো দদাতি দ্বিজন্মনাম্।
বিমুক্তঃ কলুষৈঃ সর্বৈঃ শকলোকং স গচ্ছতি॥ 13-235-60(90732)
যথা জনিত্রী ক্ষীরেণি স্বপুত্রমভিবর্ধয়েৎ।
এবং সর্বফলৈর্ভূমির্দাতারমভিবর্ধয়েৎ॥ 13-235-61(90733)
ব্রাহ্মণং বৃত্তসম্পন্নমাহিতাগ্নিং শুচিব্রতম্।
গ্রাহয়িৎবা নিজাং ভূমিং ন যান্তি যমসাদনম্॥ 13-235-62(90734)
যথা চন্দ্রমসো বৃদ্ধিরহন্যহনি দৃশ্যতে।
তথা ভূমেঃ কৃতং দানং সস্যেসস্যে বিবর্ধতে॥ 13-235-63(90735)
যথা বীজানি রোহন্তি প্রকীর্ণানি মহীতলে।
তথা কামাঃ প্ররোহন্তি ভূমিদানগুণার্জিতাঃ॥ 13-235-64(90736)
পিতরঃ পিতৃলোকস্থা দেবতাশ্চ দিবি স্থিতাঃ।
সন্তর্পয়ন্তি ভোগৈস্তং যো দদাতি বসুন্ধরাম্॥ 13-235-65(90737)
দীর্ঘায়ুষ্যং বরাঙ্গৎবং স্ফীতাং চ শ্রিয়মুত্তমাম্।
পরত্র লভতে মর্ত্যঃ সম্প্রদায় বসুন্ধরাম্॥ 13-235-66(90738)
এতৎসর্বং ময়োদ্দিষ্টং ভূমিদানস্য যৎফলম্।
শ্রদ্দধানৈর্নরৈর্নিত্যং শ্রাব্যমেতৎসনাতনম্॥ 13-235-67(90739)
অতঃ পরং প্রবক্ষ্যামি কন্যাদানং যথাবিধি।
কন্যা দেয়া মহাদেবি পরেষামাত্মনোপি বা॥ 13-235-68(90740)
কন্যাং শুদ্ধব্রতাচারাং কুলরূপসমন্বিতাম্।
যস্মৈ দিৎসতি পাত্রায় তেনাপি ভৃশকামিতাম্॥ 13-235-69(90741)
প্রথমং তৎসমাকল্প্য বন্ধুভিঃ কৃতনিশ্চয়ঃ।
কারয়িৎবা গৃহং পূর্বং দাসীদাসপরিচ্ছদৈঃ॥ 13-235-70(90742)
গৃহোপকরণৈশ্চৈব পশুধান্যেন সংয়ুতাম্।
তদর্থিনে তদর্হায় কন্যাং তাং সমলঙ্কৃতাম্॥ 13-235-71(90743)
সবিবাহং যথান্যায়ং প্রচচ্ছেদগ্নিসাক্ষিকম্।
বৃত্ত্যাতীং যথা কৃৎবা সদ্গৃহে তৌ নিবেশয়েৎ॥ 13-235-72(90744)
এবং কৃৎবা বধূদানং তস্য দানস্য গৌরবাৎ।
প্রেত্যভাবে মহীয়েত স্বর্গলোকে যথাসুখম্॥ 13-235-73(90745)
পুনর্জাতস্য সৌভাগ্যং কুলবৃদ্ধিং তথাঽঽপ্নুয়াৎ॥ 13-235-74(90746)
বিদ্যাদানং তথা দেবি পাত্রভূতায় বৈ দদৎ।
প্রেত্যভাবে লভেন্মর্ত্যো মেধাং বৃদ্ধিং ধৃতিং স্মৃতিম্॥ 13-235-75(90747)
অনুরূপায় শিষ্যায় যশ্চ বিদ্যাং প্রয়চ্ছতি।
যথোক্তস্য প্রদানস্য ফলমানন্ত্যমশ্নুতে॥ 13-235-76(90748)
দাপনং ৎবথ বিদ্যানাং দরিদ্রেভ্যোঽর্থবেদনৈঃ।
স্বয়ং দত্তেন তুল্যং স্যাদিতি বিদ্ধি শুভাননে॥ 13-235-77(90749)
এবং তে কথিতান্যেব মহাদানানি মানিনি।
ৎবৎপ্রিয়ার্থং ময়া দেবি ভূয়ঃ শ্রোতুং কিমিচ্ছসি॥ ॥ 13-235-78(90750)
ইতি শ্রীমন্মহাভারতে অনুশাসনপর্বণি দানধর্মপর্বণি পঞ্চত্রিংশদধিকদ্বিশততমোঽধ্যায়ঃ॥ 235 ॥