অনুশাসনপর্ব – অধ্যায় ২১০

অনুশাসনপর্ব – অধ্যায় 210
॥ শ্রীঃ ॥
13.210. অধ্যায়ঃ 210
অথ দানধর্মপর্ব ॥ 1 ॥
Mahabharata – Anushaasana Parva – Chapter Topics
ঈশ্বরেণ পার্বতীংপ্রতি ঋষীণাং কর্মফলবিশেষাদিকথনম্॥ 1 ॥
Mahabharata – Anushaasana Parva – Chapter Text

উমোবাচ।

ভগবন্দেবদেবেশ তেষাং কর্মফলং প্রভো।
শ্রোতুমিচ্ছাম্যহং দেব প্রসাদাত্তে বরপ্রদ॥ 13-210-1(89492)
মহেশ্বর উবাচ। 13-210-2x(7470)
বানপ্রস্থগতং সর্বং ফলপাকং শৃণু প্রিয়ে॥ 13-210-2(89493)
অগ্নিয়োগং ব্রজন্গ্রীষ্মে ততো দ্বাদশবার্ষিকম্।
রুদ্রলোকেঽভিজায়েত বিধিদৃষ্টেন কর্মণা॥ 13-210-3(89494)
উপবাসব্রতং কুর্বন্বর্ষাকালে দৃঢব্রতঃ।
সোমলোকেঽভিজায়েত নরো দ্বাদশবার্ষিকম্॥ 13-210-4(89495)
কাষ্ঠবন্মৌনমাস্থায় নরো দ্বাদশবার্ষিকম্।
মরুতাং লোকমাস্থায় তত্র ভোগৈশ্চ যুজ্যতে॥ 13-210-5(89496)
কুশশর্করসংয়ুক্তে স্থণ্ডিলে সংবিশন্মুনিঃ।
যক্ষলোকেঽভিজায়েত সহস্রাণি চতুর্দশ॥ 13-210-6(89497)
বর্ষাণাং ভোগসংয়ুক্তো নরো দ্বাদশবার্ষিকম্।
বীরাসনগতো যস্তু কণ্টকাফলকাশ্রিতঃ।
গন্ধর্বেষ্বভিজায়েত নরো দ্বাদশবার্ষিকম্॥ 13-210-7(89498)
বীরস্থায়ী চোর্ধ্ববাহুর্নরো দ্বাদশবার্ষিকম্।
দেবলোকেঽভিজায়েত দিব্যভোগসমন্বিতঃ॥ 13-210-8(89499)
পাদাঙ্গুষ্ঠেন যস্তিষ্ঠেদূর্ধ্ববাহুর্জিতেন্দ্রিয়ঃ।
ইন্দ্রলোকেঽভিজায়েত সহস্রাণি চতুর্দশ। 13-210-9(89500)
আহারনিয়মং কৃৎবা মুনির্দ্বাদশবার্ষিকম্।
নাগলোকেঽভিজায়েত সংবৎসরগণান্বহূন্॥ 13-210-10(89501)
এবং দৃঢব্রতা দেবি বানপ্রস্থাশ্চ কর্মভিঃ।
স্থানেষু তত্র তিষ্ঠন্তি তত্তদ্ভোগসমন্বিতাঃ॥ 13-210-11(89502)
তেভ্যো ভ্রষ্টাঃ পুনর্দেবি জায়ন্তে নৃষু ভোগিনঃ।
বর্ণোত্তমকুলেষ্বেব ধনধান্যসমন্বিতাঃ॥ 13-210-12(89503)
এতত্তে কথিতং দেবি কিং ভূয়ঃ শ্রোতুমিচ্ছসি॥ 13-210-13(89504)
উমোবাচ। 13-210-14x(7471)
এষাং যথা বরাণাং তু ধর্মমিচ্ছামি মানদ।
কৃপয়া পরয়াঽঽবিষ্টস্তন্মে ব্রূহি মহেশ্বর॥ 13-210-14(89505)
মহেশ্বর উবাচ। 13-210-15x(7472)
ধর্মং যথা বরাণাং ৎবং শৃণু ভামিনি তৎপরা॥ 13-210-15(89506)
ব্রতোপবাসশুদ্ধাঙ্গাস্তীর্থস্নানপরায়ণাঃ।
ধৃতিমন্তঃক ক্ষমায়ুক্তাঃ সত্যব্রতপরায়ণাঃ॥ 13-210-16(89507)
পক্ষমাসোপবাসৈশ্চ কর্শিতা ধর্মদর্শিনঃ।
বর্ষৈঃ শীতাতপৈশ্চৈব কুর্বন্তঃ পরমং তপঃ॥ 13-210-17(89508)
কালয়োগেন গচ্ছন্তি শক্রলোকং শুচিস্মিতে।
তত্র তে ভোগসংয়ুক্তা দিব্যগন্ধসমন্বিতাঃ॥ 13-210-18(89509)
দিব্যভূষণসংয়ুক্তা বিমানবরসংয়ুতাঃ।
বিচরন্তি যথাকামং দিব্যস্ত্রীগণসংয়ুতাঃ।
এতত্তে কথিতং দেবি কিং ভূয়ঃ শ্রোতুমিচ্ছসি॥ 13-210-19(89510)
উমোবাচ। 13-210-20x(7473)
তেষাং চক্রচরাণাং চ ধর্মমিচ্ছামি বৈ প্রভো॥ 13-210-20(89511)
মহেশ্বর উবাচ। 13-210-21x(7474)
হন্ত তে কথয়িষ্যামি শৃণু শাকটিকং শুভে॥ 13-210-21(89512)
সংবহন্তো ধুরং দানৈঃ শকটানাং তু সর্বদা।
প্রার্থয়ন্তে যথাকালং শকটৈর্ভৈক্ষচর্যযা॥ 13-210-22(89513)
তপোর্জনপরা ধীরাস্তপসা ক্ষীণকল্মষাঃ।
পর্যটন্তো দিশঃ সর্বাঃ কামক্রোধবিবর্জিতাঃ॥ 13-210-23(89514)
তেনৈব কালয়োগেন ত্রিদিবং যান্তি শোভনে।
তত্র প্রমুদিতা ভোগৈর্বিচরন্তি যথাসুখম্॥ 13-210-24(89515)
এতত্তে কথিতং দেবি কিং ভূয়ঃ শ্রোতুমিচ্ছসি॥ 13-210-25(89516)
উমোবাচ। 13-210-26x(7475)
বৈখানসানাং বৈ ধর্মং শ্রোতুমিচ্ছাম্যহং প্রভো॥ 13-210-26(89517)
মহেশ্বর উবাচ। 13-210-27x(7476)
তে বৈ বৈখানসা নাম বানপ্রস্থাঃ শুভেক্ষণে।
তীব্রেণ তপসা যুক্তা দীপ্তিমন্তঃ স্বতেজসা।
সত্যব্রতপরা ধীরাস্তেষাং নিষ্কল্মষং তপঃ॥ 13-210-27(89518)
অশ্মকুট্টাস্তথাঽন্যে চ দন্তোলূখলিনস্তথা।
শীর্ণপর্ণাশিনশ্চান্যে উঞ্ছবৃত্তাস্তথা পরে॥ 13-210-28(89519)
কপোতবৃত্তয়শ্চান্যে কাপোতীং বৃত্তিমাশ্রিতাঃ।
পশুপ্রচারনিরতাঃ ফেনপাশ্চ তথা পরে॥ 13-210-29(89520)
মৃগবন্মৃগচর্যায়াং সঞ্চরন্তি তথা পরে।
অব্ভক্ষা বায়ুভক্ষাশ্চ নিরাহারাস্তথৈব চ॥ 13-210-30(89521)
কেচিচ্চরন্তি সদ্বিষ্ণোঃ পাদপূজনমুত্তমম্।
সঞ্চরন্তি তপো ঘোরং ব্যাধিমৃত্যুবিবর্জিতাঃ।
স্ববশাদেব তে মৃত্যুং ভীষয়ন্তি চ নিত্যশঃ॥ 13-210-31(89522)
ইন্দ্রলোকে তথা তেষাং নির্মিতা ভোগসঞ্চয়াঃ।
অমরৈঃ সমতাং যান্তি দেববদ্ভোগসংয়ুতাঃ॥ 13-210-32(89523)
বরাপ্সরোভিঃ সংয়ুক্তাশ্চিরকালমনিন্দিতে।
এতত্তে কথিতং দেবি ভূয়ঃ শ্রোতুং কিমিচ্ছসি॥ 13-210-33(89524)
উমোবাচ। 13-210-34x(7477)
ভগবঞ্শ্রোতুমিচ্ছামি বালখিল্যাংস্তপোধনান্॥ 13-210-34(89525)
মহেস্বর উবাচ। 13-210-35x(7478)
ধর্মচর্যাং তথা দেবি বালখিল্যগতাং শৃণু॥ 13-210-35(89526)
মৃগনির্মোকবসনা নির্দ্বন্দ্বাস্তে তপোধনাঃ।
অঙ্গুষ্ঠমাত্রাঃ সুশ্রোণি তেষ্বেবাঙ্গেষু সংশ্রিতাঃ॥ 13-210-36(89527)
উদ্যন্তং সততং সূর্যং স্তুবন্তো বিবিধৈঃ স্তবৈঃ।
ভাস্করস্যেব কিরণৈঃ সহসা যান্তি নিত্যদা।
দ্যোতয়ন্তো দিশঃ সর্বা ধর্মজ্ঞাঃ সত্যবাদিনঃ॥ 13-210-37(89528)
তেষ্বেব নির্মলং সত্যং লোকার্থং তু প্রতিষ্ঠিতম্।
লোকোঽয়ং ধার্যতে দেবি তেষামেব তপোবলাৎ॥ 13-210-38(89529)
মহাত্মনাং তু তপসা সত্যেন চ শুচিস্মিতে।
ক্ষময়া চ মহাভাগে ভূতানাং সংস্থিতিং বিদুঃ॥ 13-210-39(89530)
প্রজার্থমপি লোকার্থং মহদ্ভিঃ ক্রিয়তে তপঃ।
তপসা প্রাপ্যতে সর্বং তপসা প্রাপ্যতে ফলম্।
দুষ্প্রাপমপি যল্লোকে তপসা প্রাপ্যতে হি তৎ॥ 13-210-40(89531)
পঞ্চভূতার্থতৎবে চ লোকসৃষ্টিবির্ধনম্।
এতৎসর্বং সমাসেন তপোয়োগাদ্বিনির্মিতম্॥ 13-210-41(89532)
তস্মাদয়ং ৎবৃষিগণস্তপস্তপ ইতি প্রিয়ে।
ধর্মান্বেষী তপঃ কর্তুং যততে সততং প্রিয়ে॥ 13-210-42(89533)
অমরৎবং শিবৎবং চ তপসা প্রাপয়েৎসদা।
এতত্তে কথিতং সর্বং শৃণ্বন্ত্যাস্তে শ্রুতং প্রিয়ে।
প্রিয়ার্থমৃষিসঙ্ঘস্য প্রজানাং হিতকাম্যযা॥ 13-210-43(89534)
নারদ উবাচ। 13-210-44x(7479)
এবং ব্রুবন্তং দেবেশমৃষয়শ্চাপি তুষ্টুবুঃ।
ভূয়ঃ পরতরং যত্তু তদাপ্রভৃতি চক্রিরে॥ ॥ 13-210-44(89535)

ইতি শ্রীমন্মহাভারতে অনুশাসনপর্বণি দানধর্মপর্বণি দশাধিকদ্বিশততমোঽধ্যায়ঃ॥ 210 ॥