অনুশাসনপর্ব – অধ্যায় ২১২

অনুশাসনপর্ব – অধ্যায় 212
॥ শ্রীঃ ॥
13.212. অধ্যায়ঃ 212
অথ দানধর্মপর্ব ॥ 1 ॥
Mahabharata – Anushaasana Parva – Chapter Topics
মহেশ্বরেণ পার্বতীংপ্রতি বিস্তরেণ রাজধর্মকথনম্॥ 1 ॥
Mahabharata – Anushaasana Parva – Chapter Text

উমোবাচ।

দেবদেব নমস্তুভ্যং ত্র্যক্ষ ভো বৃষভধ্বজ।
শ্রুতং মে ভগবন্সর্বং ৎবৎপ্রসাদান্মহেশ্বর॥ 13-212-1(89596)
সঙ্গৃহীতং ময়া তচ্চ তব বাক্যমনুত্তমম্।
ইদানীমস্তি সংদেহো মানুষেষ্বিহ কশ্চন॥ 13-212-2(89597)
তুল্যপ্রাণশিরঃকায়ো রাজাঽয়মিতি মৃশ্যতে।
কেন কর্মবিপাকেন সর্বপ্রাধান্যমর্হতি॥ 13-212-3(89598)
স চাপি দণ্ডয়ন্মর্ত্যান্ভর্ৎসয়ন্বিধমন্নপি।
প্রেত্যভাবে কথং লোকাঁল্লভতে পুণ্যকর্মণা।
রাজবৃত্তমহং তস্মাচ্ছ্রোতুমিচ্ছামি মানদ॥ 13-212-4(89599)
মহেশ্বর উবাচ। 13-212-5x(7485)
তদহং তে প্রবক্ষ্যামি রাজধর্মং শুভাননে॥ 13-212-5(89600)
রাজায়ত্তং হি যৎসর্বং লোকবৃত্তং শুভাশুভম্।
মহতস্তপসো দেবি ফলং রাজ্যমিতি স্মৃতম্॥ 13-212-6(89601)
তপোদানময়ং রাজ্যং পরং স্থানং বিধীয়তে।
তস্মাদ্রাজ্ঞঃ সদা মর্ত্যাঃ প্রণমন্তি যতস্ততঃ॥ 13-212-7(89602)
ন্যায়তস্ৎবং মহাভাগে শ্রোতুকামাঽসি ভামিনি।
তস্মাত্তস্যৈব চরিতং জগৎপথ্যং শৃণু প্রিয়ে॥ 13-212-8(89603)
অরাজকে পুরা ৎবাসীৎপ্রজানাং সঙ্কুলং মহৎ।
তদৃষ্ট্বা সঙ্কুলং ব্রহ্মা মনুং রাজ্যে ন্যবেদয়ৎ।
তদাপ্রভৃতি সংদৃষ্টং রাজ্ঞাং বৃত্তং শুভাশুভম্॥ 13-212-9(89604)
তন্মে শৃণু বরারোহে তস্য পথ্যং জগদ্ধিতম্।
যথা প্রেত্য লভেৎস্বর্গং যথা বীর্যং যশস্তথা॥ 13-212-10(89605)
পিত্র্যং বা ভূতপূর্বং বা স্বয়মুৎপাদ্য বা পুনঃ।
রাজ্যধর্মমনুষ্ঠায় বিধিবদ্ভোক্তুমর্হতি॥ 13-212-11(89606)
আত্মানমেব প্রথমং বিনয়ৈরুপপাদয়েৎ।
অনু ভৃত্যান্প্রজাঃ পশ্চাদিত্যেষ বিনয়ক্রমঃ॥ 13-212-12(89607)
স্বামিনং চোষমাং কৃৎবা প্রজাস্তদ্বৃত্তকাঙ্ক্ষয়া।
স্বয়ং বিনয়সম্পন্না ভবন্তীহ শুভেক্ষণে॥ 13-212-13(89608)
স্বস্মাৎপূর্বতরা রাজা বিনয়ত্যেব বৈ প্রজাঃ।
অপহাস্যো ভবেত্তাদৃক্স্বদোষস্যানবেক্ষণাৎ॥ 13-212-14(89609)
বিদ্যাভ্যাসৈর্বৃদ্ধয়োগৈরাত্মানং বিনয়ং নয়েৎ।
বিদ্যা ধর্মার্থফলিনী তদ্বিদো বৃদ্ধসংজ্ঞিতাঃ॥ 13-212-15(89610)
ইন্দ্রিয়াণাং জয়ো দেবি অত ঊর্ধ্বমুদাহৃতঃ।
অজয়ে সুমহান্দোষো রাজানং বিনিপাতয়েৎ॥ 13-212-16(89611)
পঞ্চৈব স্ববশে কৃৎবা তদর্থান্পঞ্চ শোষয়েৎ।
ষডুৎসৃজ্য যথায়োগং জ্ঞানেন বিনয়েন চ।
সাস্ত্রচক্ষুর্নয়পরো ভূৎবা ভৃত্যান্সমাহরেৎ॥ 13-212-17(89612)
বৃত্তশ্রুতকুলোপেতানুপধাবিঃ পরীক্ষিতান্।
অমাত্যানুপধাতীতান্সোপসর্পাঞ্জিতেন্দ্রিয়ান্।
যোজয়েত যথায়োগং যথার্হং স্বেষু কর্মসু॥ 13-212-18(89613)
অমাত্যা বুদ্ধিসম্পন্না রাষ্ট্রং বহুজনপ্রিয়ম্।
দুরাধর্ষং পুরশ্রেষ্ঠং কোশঃ কৃচ্ছ্রসহঃ স্মৃতঃ॥ 13-212-19(89614)
অনুরক্তং বলং সাম্নামদ্বৈধং মন্ত্রমেব চ।
এতাঃ প্রকৃতয়ঃ স্বেষু স্বামী বিনয়তৎববিৎ। 13-212-20(89615)
প্রজানাং রক্ষণার্থায় সর্বমেতদ্বিনির্মিতম্।
আভিঃ করণভূতাভিঃ কুর্যাল্লোকহিতং নৃপঃ॥ 13-212-21(89616)
আত্মরক্ষা নরেন্দ্রস্য প্রজারক্ষার্থমিষ্যতে।
তস্মাৎসততমাত্মানং সংরক্ষেদপ্রমাদবান্॥ 13-212-22(89617)
ভোজনাচ্ছাদনস্নানাদ্বহির্নিষ্ক্রমণাদপি।
নিত্যং স্ত্রীগণসংয়োগাদ্রক্ষেদাত্মানমাত্মবান্॥ 13-212-23(89618)
স্বেভ্যশ্চৈব পরেভ্যশ্চ শশ্ত্রাদপি বিষাদপি।
সততং পুত্রদারেভ্যো রক্ষেদাত্মানমাত্মবান্॥ 13-212-24(89619)
সর্বেভ্য এব স্থানেভ্যো রক্ষেদাত্মানমাত্মবান্।
প্রজানাং রক্ষণার্থায় প্রজাহিতকরো ভবেৎ॥ 13-212-25(89620)
প্রজাকার্যং তু তৎকার্যং প্রজাসৌখ্যং তু তৎসুখম্।
প্রজাপ্রিয়ং প্রিয়ং তস্য স্বহিতং তু প্রজাহিতম্।
প্রজার্তং তস্য সর্বস্বমাত্মার্থং ন বিধীয়তে। 13-212-26(89621)
প্রকৃতীনাং হি রক্ষার্থং রাগদ্বেষৌ ব্যুদস্য চ।
উভয়োঃ পক্ষয়োর্বাদং শ্রুৎবা চৈব যথাতথম্।
তমর্থং বিমৃশেদ্বুদ্ধ্যা স্বয়মাতৎবদর্শনাৎ॥ 13-212-27(89622)
তৎববিদ্ভিশ্চ বহুভির্বৃদ্ধৈঃ সহ নরোত্তমৈঃ।
কর্তারমপরাধং চ দেশকালৌ নয়ানয়ৌ॥ 13-212-28(89623)
জ্ঞাৎবা সম্যগ্যথাশাস্ত্রং ততো দণ্ডং নয়েন্নৃষু।
এবং কুর্বংল্লভেদ্ধর্মং পক্ষপাতবিবর্জনাৎ॥ 13-212-29(89624)
প্রত্যক্ষাপ্তোপদেশাভ্যামনুমানেন বা পুনঃ।
বোদ্ধব্যং সততং রাজ্ঞা দেশবৃত্তং শুভাশুভম্॥ 13-212-30(89625)
চারৈঃ কর্মপ্রবৃত্ত্যা চ তদ্বিজ্ঞায় বিচারয়েৎ।
অশুভং নির্হরেৎসদ্যো জোষয়েচ্ছুভমাত্মনঃ॥ 13-212-31(89626)
গর্হ্যান্বিগর্হয়েদেব পূজ্যান্সম্পূজয়েত্তথা।
দণ্ড্যাংশ্চ দণ্ডয়েদ্দেবি নাত্র কার্যা বিচারণা॥ 13-212-32(89627)
পঞ্চাবেক্ষন্সদা মন্ত্রং কুর্যাদ্বুদ্ধিয়ুতৈর্নরৈঃ।
কুলবৃত্তশ্রুতোপেতৈর্নিত্যং মন্ত্রপরো ভবেৎ॥ 13-212-33(89628)
কামকারেণ বৈ মুখ্যৈর্ন চ মন্ত্রমনা ভবেৎ।
রাজা রাষ্ট্রহিতাপেক্ষং সত্যধর্মাণি কারয়েৎ॥ 13-212-34(89629)
সর্বোদ্যোগং স্বয়ং কুর্যাদ্দুর্গাদিষু সদা নৃষু।
দেশবৃদ্ধিকরান্ভৃত্যানপ্রমাদেন কারয়েৎ॥ 13-212-35(89630)
দেশক্ষয়করান্সর্বানপ্রিয়াংশ্চ বিবর্জয়েৎ।
অহন্যহনি সম্পশ্যেদনুজীবিগণং স্বয়ম্॥ 13-212-36(89631)
সুমুখঃ সুপ্রিয়ো দত্ৎবা সম্যগ্বৃত্তং সমাচরেৎ।
অধর্ম্যং পরুষং তীক্ষ্ণং বাক্যং বক্তুং ন চার্হতি॥ 13-212-37(89632)
অসংবিশ্বাস্য বচনং বক্তুং সৎসু ন চার্হতি।
নরেনরে গুণান্দোষান্সম্যগ্বেদিতুমর্হতি॥ 13-212-38(89633)
স্বেঙ্গিতং বৃণুয়াদ্ধৈর্যং ন কুর্যাৎক্ষুদ্রসংবিদম্।
পরেঙ্গিতজ্ঞো লোকেষু ভূৎবা সংসর্গমাচরেৎ॥ 13-212-39(89634)
স্বতশ্চ পরতশ্চৈব পরস্পরভয়াদপি।
অমানুষভয়েভ্যশ্চ স্বাঃ প্রজাঃ পালয়েন্নৃপঃ॥ 13-212-40(89635)
লুব্ধাঃ কঠোরাশ্চাপ্যস্য মানবা দস্যুবৃত্তয়ঃ।
নিগ্রাহ্যা এব তে রাজ্ঞা সঙ্গৃহীৎবা যতস্ততঃ॥ 13-212-41(89636)
কুমারান্বিনয়োদ্বোধৈর্জন্মপ্রভৃতি যোজয়েৎ।
তেষামাত্মগুণোপেতং যৌবরাজ্যেন যোজয়েৎ॥ 13-212-42(89637)
প্রকৃতীনাং যথা ন স্যাদ্রাজ্যভ্রংশো ভবেদ্ভয়ম্।
এতৎসংচিন্তয়েন্নিত্যং তদ্বিধানং তথার্হতি॥ 13-212-43(89638)
অরাজকং ক্ষণমপি রাজ্যং ন স্যাদ্ধি শোভনে।
আত্মনোঽনুবিধানায় যৌবরাজ্যং সদেষ্যতে॥ 13-212-44(89639)
কুলজানাং চ বৈদ্যানাং শ্রোত্রিয়াণাং তপস্বিনাম্।
অন্যেষাং বৃত্তিয়ুক্তানাং বিশেষং কর্তুমর্হতি॥ 13-212-45(89640)
আত্মার্থং রাজ্যতন্ত্রার্থং কোশার্থং চ সমাচরেৎ।
দুর্গাদ্রাষ্ট্রাৎসমুদ্রাচ্চ বণিগ্ভ্যঃ পুরুষাত্যযাৎ॥ 13-212-46(89641)
পরাত্মগুণসারাভ্যাং ভৃত্যপোষণমাচরেৎ।
বাহনানাং প্রকুর্বীত পোষণং যোধকর্মসু॥ 13-212-47(89642)
সাদরঃ সততং ভূৎবা অবেক্ষাব্রতমাচরেৎ।
চতুর্দা বিভজেৎকোশং ধর্মভৃত্যাত্মকারণাৎ॥ 13-212-48(89643)
আপদর্থং চ নীতিজ্ঞো দেশকালবশেন তু।
অনাথান্ব্যথিতান্বৃদ্ধান্স্বে দেশে পোষয়েন্নৃপঃ॥ 13-212-49(89644)
সন্ধিং চ বিগ্রহং চৈব তদ্বিশেষাংস্তথা পারন্।
যথাবৎসংবিমৃশ্যৈব বুদ্ধিপূর্বং সমাচরেৎ॥ 13-212-50(89645)
সর্বেষাং সম্প্রিয়ো ভূৎবা মণ্ডলং সততং চরেৎ।
শুভেষ্বপি চ কার্যেষু চ চৈকান্তঃ সমাচরেৎ॥ 13-212-51(89646)
স্বতশ্চ পরতশ্চৈব ব্যসনানি বিমৃশ্য সঃ।
পরেণি ধার্মিকান্যোগান্নাতীয়াদ্দ্বেষলোভতঃ॥ 13-212-52(89647)
রক্ষ্যৎবং বৈ প্রজাধর্মঃ ক্ষত্রধর্মস্তু রক্ষণম্।
কুনৃপৈঃ পীডিতাস্তস্মাৎপ্রজাঃ সর্বত্র পালয়েৎ॥ 13-212-53(89648)
যাত্রাকালেঽনবেক্ষ্যৈব পশ্চাৎকোপফলোদয়ঃ।
তদ্যুক্তাশ্চাপদশ্চৈব শাসনাদিতি চিন্তয়েৎ॥ 13-212-54(89649)
ব্যসনেভ্যো বলং রক্ষেন্নয়তো ব্যযতোপি বা।
প্রায়শো বর্জয়েদ্যুদ্ধং প্রাণরক্ষণকারণাৎ॥ 13-212-55(89650)
কারণাদেবি যোদ্ধব্যং নাত্মনঃ পরদোষতঃ।
সুয়ুদ্ধে প্রাণমোক্ষশ্চ তস্য ধর্মায় ইষ্যতে॥ 13-212-56(89651)
অভিয়ুক্তো বলবতা কুর্যাদাপদ্বিধিং নৃপঃ।
অনুনীয় তথা সর্বান্প্রজানাং হিতকারণাৎ॥ 13-212-57(89652)
অন্যপ্রকৃতিয়ুক্তানাং রাজ্ঞাং বৃত্তিবিচারিণাম্।
অন্যাংশ্চাপৎপ্রপন্নানাং ন তান্সংয়োক্তুমর্হতি॥ 13-212-58(89653)
শুভাশুভং যদা দেবি ব্রতং তূভয়সাধনম্।
আত্মৈব তচ্ছুভং কুর্যাদশুভং যোজয়েৎপরান্। 13-212-59(89654)
এবমুদ্দেশতঃ প্রোক্তমলেপৎবং যথা ভবেৎ।
এষ দেবি সমাসেন রাজধর্মঃ প্রকীর্তিতঃ॥ 13-212-60(89655)
এবং সংবর্তমানস্তু দণ্ডয়ন্ভর্ৎসয়ন্প্রজাঃ।
নিষ্কল্মষমবাপ্নোতি পদ্মপত্রমিবাম্ভসা॥ 13-212-61(89656)
এবং সংবর্তমানস্য কালধর্মো যদা ভবেৎ।
স্বর্গলোকে তদা রাজা ত্রিদশৈঃ সহ তোষ্যতে॥ 13-212-62(89657)
দ্বিবিধং রাজ্যবৃত্তং চ ন্যায়ভাগ্যসমন্বিতম্।
এবং ন্যায়ানুগং বৃত্তং কথিতং তে শুভেক্ষণে॥ 13-212-63(89658)
রাজ্যং ন্যায়ানুগং তাত বুদ্ধিশাস্ত্রানুগং ভবেৎ।
ধর্ম্যং পথ্যং যশস্যং চ স্বর্গ্যং চৈব তথা ভবেৎ॥ 13-212-64(89659)
রাজ্যং ভাগ্যানুগং নাম অয়থাবৎপ্রদৃশ্যতে।
তত্তু শাস্ত্রবিনির্মুক্তং সতাং কোপকরং ভবেৎ।
অধর্ম্যময়শস্যং চ দুরন্তং চ ভবেদ্ধ্রুবম্॥ 13-212-65(89660)
যত্র স্বচ্ছন্দতঃ সর্বং ক্রিয়তে কর্ম রাজভিঃ।
তত্র ভাগ্যবশাদ্ভৃত্যা লভন্তে ন বিশেষতঃ॥ 13-212-66(89661)
যত্র দণ্ড্যা ন দণ্ড্যন্তে পূজ্যন্তে বা নরাধমাঃ।
যত্র সন্তোপি হন্যন্তে তত্র ভাগ্যানুগং ভবেৎ॥ 13-212-67(89662)
শুভাশুভং যথা যত্র বিপরীতং প্রদৃশ্যতে।
রাজ্ঞি চাসুরপক্ষে তু তত্র ভাগ্যানুগং ভবেৎ॥ 13-212-68(89663)
ভাগ্যানুগে তু রাজানো বর্তমানা যথাতথা।
প্রাপ্যাকীর্তিমনর্থং চ ইহ লোকে শুভেক্ষণে॥ 13-212-69(89664)
পরত্র সুমহাঘোরং তমঃ প্রাপ্য দুরত্যযম্।
তিষ্ঠন্তি নরকে দেবি প্রলয়ান্তাদিতি স্থিতিঃ॥ 13-212-70(89665)
মোক্ষং দুষ্কৃতিনাং চাপি বিদ্যতে কালপর্যযাৎ।
নাস্ত্যেব মোক্ষণং দেবি রাজ্ঞাং দুষ্কৃতিকারিণাম্॥ 13-212-71(89666)
এতৎসর্বং সমাসেন রাজবৃত্তং শুভাশুভম্।
কথিতং তে মহাভাগে ভূয়ঃ শ্রোতুং কিমিচ্ছসি॥ ॥ 13-212-72(89667)

ইতি শ্রীমন্মহাভারতে অনুশাসনপর্বণি দানধর্মপর্বণি দ্বাদশাধিকদ্বিশততমোঽধ্যায়ঃ॥ 212 ॥