অনুশাসনপর্ব – অধ্যায় 203
॥ শ্রীঃ ॥
13.203. অধ্যায়ঃ 203
অথ দানধর্মপর্ব ॥ 1 ॥
Mahabharata – Anushaasana Parva – Chapter Topics
কৃষ্ণেন পুত্রার্থং কৈলাসে তপশ্চরণম্॥ 1 ॥ তত্র কৃষ্ণদর্শনায় নারদাদীনামাগমনম্॥ 2 ॥ কৃষ্ণেন স্বমুখনিঃসৃতাগ্নিনা তৎপর্বতস্য ভস্মীকরণম্॥ 3 ॥ তথা পুনঃ প্রসন্নদৃষ্ট্যা গিরেরুজ্জীবনম্॥ 4 ॥ তথা নারদাদীন্প্রতি তৎকারণকথনম্॥ 5 ॥
Mahabharata – Anushaasana Parva – Chapter Text
ভীষ্ম উবাচ।
অয়ং নারায়ণঃ শ্রীমান্পুত্রার্থে ব্রতকাঙ্ক্ষয়া।
দীক্ষিতোঽভূন্মহাবাহুঃ পুরা দ্বাদশবার্ষিকম্॥ 13-203-1(89199)
দীক্ষিতং কেশবং দ্রষ্টুমভিজগ্মুর্মহর্ষয়ঃ।
সেবিৎবা চ মহাত্মানঃ প্রীয়মাণং জনার্দনম্॥ 13-203-2(89200)
নারদঃ পর্বতশ্চৈব কৃষ্ণদ্বৈপায়নস্তথা।
দেবলঃ কাশ্যপশ্চৈব হস্তিকাশ্যপ এব চ।
জমদগ্নিশ্চ রাজেন্দ্র ধৌম্যো বাল্মীকিরেব চ॥ 13-203-3(89201)
অপরেঽপি তপঃসিদ্ধাঃ সত্যব্রতপরায়ণাঃ।
শিষ্যৈরনুগতাঃ সর্বে ব্রহ্মবিদ্ভিরকল্মষৈঃ॥ 13-203-4(89202)
কেশবস্তানভিগতান্প্রীত্যা সম্পরিগৃহ্য চ।
তেষামতিথিসৎকারং পূজনার্থং কুলোচিতম্।
দেবকীতনয়ো হৃষ্টো দেবতুল্যমকল্পয়ৎ॥ 13-203-5(89203)
উপবিষ্টেষু সর্বেষু বিষ্টরেষু তদাঽনঘ।
বিশ্বস্তেষ্ব্নভিতুষ্টেষু কেশবার্চনয়া পুনঃ॥ 13-203-6(89204)
পরস্পরং কথা দিব্যাঃ প্রাবর্তন্ত মনোরমাঃ।
বিষ্ণোর্নারায়ণস্যৈব প্রসাদাৎকথয়ামি তাঃ॥ 13-203-7(89205)
তস্যৈব ব্রতচর্যায়াং মুনিভির্বিস্মিতং পুরা।
যত্র গোবৃষভাঙ্কস্য প্রভাবোঽভূন্মহাত্মনঃ॥ 13-203-8(89206)
যত্র দেবী মহাদেবমপৃচ্ছৎসংশয়ান্পুরা।
কথয়ামাস সর্বাংস্তান্দেব্যাঃ প্রিয়চিকীর্ষয়া॥ 13-203-9(89207)
উমাপত্যোশ্চ সংবাদং শৃণু তাত মনোরমম্।
বর্ণাশ্রমাণাং ধর্মশ্চ তত্র তাত সমাহিতঃ॥ 13-203-10(89208)
ঋষিধর্মশ্চ নিখিলো রাজধর্মস্চ পুষ্কলঃ।
গৃহস্থধর্মশ্চ শুভঃ কর্মপাকফলানি চ॥ 13-203-11(89209)
দেবগুহ্যং চ বিবিধং দানধর্মবিধিস্তথা।
বিধানমত্র প্রোক্তং যদ্যমস্য নিয়মস্য চ॥ 13-203-12(89210)
যমলোকবিধানং চ স্বর্গলোকগতিস্তথা।
প্রাণমোক্ষবিধিশ্চৈব তীর্থচর্যা চ পুষ্কলা॥ 13-203-13(89211)
মোক্ষধর্মবিধানং চ সাঙ্খ্যযোগসমন্বিতম্।
স্ত্রীধর্মশ্চ স্বয়ং দেব্যা দেবদেবায় ভাষিতঃ॥ 13-203-14(89212)
এবমাদি শুভং সর্বং তত্র তাত সমাহিতম্।
রুদ্রাণ্যাঃ সংশয়প্রশ্নো যত্র তাত প্রবর্ততে॥ 13-203-15(89213)
ধন্যং যশস্যমায়ুষ্যং ধর্ম্যং চ পরমং হিতম্।
পুষ্টিয়োগমিমং দিব্যং কথ্যমানং ময়া শৃণু॥ 13-203-16(89214)
ইতিহাসমিমং দিব্যং পবিত্রং পরমং শুভম্।
সায়ং প্রাতঃ সদা সম্যক্ শ্রোতব্যং চ বুভূষতা॥ 13-203-17(89215)
ভীষ্ম উবাচ। 13-203-18x(7442)
ততো নারায়ণো দেবঃ সংক্লিষ্টো ব্রতচর্যযা।
বহ্নির্বিনিঃসৃতো বক্ত্রাৎকৃষ্ণস্যাদ্ভুতদর্শনঃ॥ 13-203-18(89216)
অগ্নিনা তেন মহতা নিঃসৃতেন মুখাদ্বিভোঃ।
পশ্যতামেব সর্বেষাং দগ্ধ এব নগোত্তমঃ॥ 13-203-19(89217)
মৃগপক্ষিগণাকীর্ণঃ শ্বাপদৈরপি সঙ্কুলঃ।
বৃক্ষগুল্মলতাকীর্ণো মথিতো দীনদর্শনঃ॥ 13-203-20(89218)
পুনঃ স দৃষ্টমাত্রেণ হরিণা সৌম্যচেতসা।
স বভূব গিরিঃ ক্ষিপ্রং প্রফুল্লদ্রুমকাননঃ॥ 13-203-21(89219)
সিদ্ধচারণসঙ্ঘৈশ্চ প্রসন্নৈরুপশোভিতঃ।
মত্তবারণসংয়ুক্তো নানাপক্ষিগণৈর্যুতঃ।
তদদ্ভুতমচিন্ত্যং চ সর্বেষামভবদ্ভৃশম্॥ 13-203-22(89220)
তং দৃষ্ট্বা হৃষ্টরোমাণঃ সর্বে মুনিগণাস্তদা।
বিস্তিতাঃ পরমায়ত্তাঃ সাধ্যসাকুললোচনাঃ।
ন কিঞ্চিদব্রুবংস্তত্র শুভং বা যদি বেতরৎ॥ 13-203-23(89221)
ততো নারায়ণো দেবো মুনিসঙ্ঘে তু বিস্মিতে।
তান্সমীক্ষ্যৈব মধুরং বভাষে পুষ্করেক্ষণঃ॥ 13-203-24(89222)
কিমর্থং মুনিসঙ্ঘেঽস্মিন্বিস্ময়োঽয়মনুত্তমঃ।
এতন্মে সংশয়ং সর্বে যাথাতথ্যেন নন্দিতাঃ।
ঋষয়ো বক্তুমর্হন্তি নিশ্চয়েনার্থকোবিদাঃ॥ 13-203-25(89223)
কেশবস্য বচঃ শ্রুৎবা তুষ্টুবুর্মুনিপুঙ্গবাঃ।
ভবান্সৃজতি বৈ লোকান্ভবান্সংহরতি প্রজাঃ।
ভবাঞ্শীতং ভবানুষ্ণং ভবান্সত্যং ভবান্ক্রতুঃ॥ 13-203-26(89224)
ভবানাদির্ভবানন্তো ভবতোঽন্যন্ন বিদ্যতে।
স্থাবরং জঙ্গমং সর্বং ৎবমেব পুরুষোত্তম॥ 13-203-27(89225)
ৎবত্তঃ সর্বমিদং তাত লোকচক্রং প্রবর্ততে।
ৎবমেবার্হসি তদ্বক্তুং মুখাদগ্নিবিনির্গমম্॥ 13-203-28(89226)
এতন্নো বিস্ময়করং বভূব মধুসূদন।
ততো বিগতসংত্রাসা ভবাম পুরুষোত্তম।
যদিচ্ছেত্তত্র বক্তব্যং কুতোঽস্মাকং নিয়োগতঃ॥ 13-203-29(89227)
শ্রীভগবানুবাচ। 13-203-30x(7443)
নিত্যং হিতার্থং লোকানাং ভবদ্ভিঃ ক্রিয়তে তপঃ।
তস্মাল্লোকহিতং গুহ্যং শ্রূয়তাং কথয়ামি বঃ॥ 13-203-30(89228)
অসুরঃ সাম্প্রতং কশ্চিদহিতো লোকনাশনঃ।
মায়াস্ত্রকুশলশ্চৈব বলদর্পসমন্বিতঃ॥ 13-203-31(89229)
বভূব স ময়া বদ্ধো লোকানাং হিতকাম্যযা।
পুত্রেণ মে বধো দৃষ্টস্তস্য বৈ মুনিপুঙ্গবাঃ॥ 13-203-32(89230)
তদর্থং পুত্রমেবাহং সিসৃক্ষুর্বনমাগতঃ।
আত্মনঃ সদৃশং পুত্রমহং জনয়িতুং ব্রতৈঃ॥ 13-203-33(89231)
এবং ব্রতপরীতস্য তপস্তীব্রতয়া মম।
অথাত্মা মম দেহস্থঃ সোগ্নির্ভূৎবা বিনিঃসৃতঃ॥ 13-203-34(89232)
বিনিঃসৃত্য গতো দ্রষ্টুং ক্ষণেন চ পিতামহম্।
ব্রহ্মণা মন্মথোঽনঙ্গঃ পুত্রৎবেন প্রকল্পিতঃ।
অনুজ্ঞাতশ্চ তেনৈব পুনরায়ান্মমান্তিকম্॥ 13-203-35(89233)
এবং মে বৈষ্ণবং তেজো মম বক্ত্রাদ্বিনিঃসৃতম্।
তত্তেজসা নির্মথিতঃ পুরতোঽয়ং গিরিঃ স্থিতঃ॥ 13-203-36(89234)
দৃষ্ট্বা দাহং গিরেস্তস্য সৌম্যভাবতয়া মম।
পুনঃ স দৃষ্টমাত্রেণ গিরিরাসীদ্যথা পুরা॥ 13-203-37(89235)
এতদ্গুহ্যং যথাতথ্যং কথিতং বঃ সমাসতঃ।
ভবন্তো ব্যথিতা যেন বিস্মিতাশ্চ তপোধনাঃ॥ 13-203-38(89236)
ঋষীণামেবমুক্ৎবা তু তান্পুনঃ প্রত্যভাষত॥ ॥ 13-203-39(89237)
ইতি শ্রীমন্মহাভারতে অনুশাসনপর্বণি দানধর্মপর্বণি ত্র্যধিকদ্বিশততমোঽধ্যায়ঃ॥ 203 ॥