অনুশাসনপর্ব – অধ্যায় 081
॥ শ্রীঃ ॥
13.81. অধ্যায়ঃ 081
অথ দানধর্মপর্ব ॥ 1 ॥
Mahabharata – Anushaasana Parva – Chapter Topics
ভীষ্মেণ যুধিষ্ঠিরম্প্রতি স্ত্রীণাং প্রশংসনম্॥ 1 ॥
Mahabharata – Anushaasana Parva – Chapter Text
ভীষ্ম উবাচ।
প্রাচেতসস্য বচনং কীর্তয়ন্তি পুরাবিদঃ।
যস্যাঃ কিঞ্চিন্নাদদতে জ্ঞাতয়ো ন স বিক্রয়ঃ॥ 13-81-1(84645)
অর্হণং তৎকুমারীণামানৃশংস্যং ব্রতং চ তৎ।
সর্বং চ প্রতিদেয়ং স্যাৎকন্যায়ৈ তদশেষতঃ॥ 13-81-2(84646)
পিতৃভির্ভ্রাতৃভিশ্চাপি শ্বশুরৈরথ দেবরৈঃ।
পূজ্যা লালয়িতব্যাশ্চ বহুকল্যাণমীপ্সুভিঃ॥ 13-81-3(84647)
যদি বৈ স্ত্রী ন রোচেত পুমাংসং ন প্রমোদয়েৎ।
অপ্রমোদাৎপুনঃ পুংসঃ প্রজনো ন প্রবর্ধতে॥ 13-81-4(84648)
পূজ্যা লালয়িতব্যাশ্চ স্ত্রিয়ো নিত্যং জনাধিপ।
স্ত্রিয়ো যত্র চ পূজ্যন্তে রমন্তে তত্র দেবতাঃ॥ 13-81-5(84649)
অপূজিতাশ্চ যত্রৈতাঃ সর্বাস্তত্রাফলাঃ ক্রিয়াঃ।
তদা চৈতৎকুলং নাস্তি যদা শোচন্তি জাময়ঃ॥ 13-81-6(84650)
জামীশপ্তানি গেহানি নিকৃত্তানীব কৃত্যযা।
নৈব ভান্তি ন বর্ধন্তে শ্রিয়া হীনানি পার্থিব॥ 13-81-7(84651)
স্ত্রিয়ঃ পুংসাং পরিদদৌ মনুর্জিগমিষুর্দিবম্।
অবলাঃ স্বল্পকৌপীনাঃ সুহৃদ সত্যজিষ্ণবঃ॥ 13-81-8(84652)
ঈর্ষবো মানকামাশ্চ চণ্ডাশ্চ সুহৃদোঽবুধাঃ।
স্ত্রিয়স্তু মানমর্হন্তি তা মানয়ত মানবাঃ॥ 13-81-9(84653)
স্ত্রীপ্রত্যযো হি বৈ ধর্মো রতিভোগাশ্চ কেবলাঃ।
পরিচর্যা নমস্কারাস্তদায়ত্তা ভবন্তু বঃ॥ 13-81-10(84654)
উৎপাদনমপত্যস্য জাতস্য পরিপালনম্।
প্রীত্যর্থং লোকয়াত্রায়াঃ পশ্যত স্ত্রীনিবন্ধনম্॥ 13-81-11(84655)
সম্মান্যমানাশ্চৈতা হি সর্বকার্যাষ্যবাপ্স্যথ।
বিদেহরাজদুহিতা চাত্র শ্লোকমগায়ত॥ 13-81-12(84656)
নাস্তি যজ্ঞঃ স্ত্রিয়াঃ কশ্চিন্ন শ্রাদ্ধং নোপ্রবাসকম্।
ধর্মঃ স্বভর্তৃশুশ্রূষা তয়া স্বর্গং জয়ন্ত্যুত॥ 13-81-13(84657)
পিতা রক্ষতি কৌমারে ভর্তা রক্ষতি যৌবনে।
পুত্রাশ্চ স্থাবিরে ভাবে ন স্ত্রী স্বাতন্ত্র্যমর্হতি॥ 13-81-14(84658)
শ্রিয় এতাঃ স্ত্রিয়ো নাম সৎকার্যা ভূতিমিচ্ছতা।
লালিতাঽনুগৃহীতা চ শ্রীঃ স্ত্রী ভবতি ভারতঃ॥ ॥ 13-81-15(84659)
ইতি শ্রীমন্মহাভারতে অনুশাসনপর্বণি দানধর্মপর্বণি একাশীতিতমোঽধ্যায়ঃ॥ 81 ॥
Mahabharata – Anushaasana Parva – Chapter Footnotes
7-81-1 প্রাচেতসস্য দক্ষস্য। জ্ঞাতয়ঃ কন্যাপক্ষীয়াঃ। স্বয়ং নাদদতেঽথ চ কন্যালঙ্কারর্থমিচ্ছন্তি স বিক্রয়ো ন ভবতীত্যর্থ॥ 7-81-4 ন রোচেত ন কাময়েত। ন প্রমোদয়েৎকামুকং ন কুর্যাৎ। প্রজনঃ সন্ততিঃ॥ 7-81-8 স্বল্প ঈষদায়াসেন অপনেয়ঃ কৌপীনো গুহ্যাচ্ছাদনপটো যাসাম্। সদ্যোহার্যা ইত্যর্থঃ। সুহৃদঃ সৌহার্দয়ুক্তাঃ॥ 7-81-9 বুধ্যন্ত ইত্যবুধাঃ॥ 7-81-10 স্ত্রীপ্রত্যযঃ স্ত্রীহেতুকঃ॥ 7-81-12 অত্র স্ত্রীধর্মবিষয়ে॥