অনুশাসনপর্ব – অধ্যায় 237
॥ শ্রীঃ ॥
13.237. অধ্যায়ঃ 237
অথ দানধর্মপর্ব ॥ 1 ॥
Mahabharata – Anushaasana Parva – Chapter Topics
মহেশ্বরেণ পার্বতীংপ্রতি যজ্ঞপ্রশংসনম্॥ 1 ॥ তথা দেবানাং পূজাদিফলকথনম্॥ 2 ॥ তথা দেবানাং মনুষ্যচিন্তিতবিজ্ঞানসামর্থ্যকথনম্॥ 3 ॥
Mahabharata – Anushaasana Parva – Chapter Text
উমোবাচ।
ভগবন্দেবদেবেশ বিশিষ্টং যজ্ঞমুচ্যতে।
লৌকিকং বৈদিকং চৈব তন্মে শংসিতুমর্হসি॥ 13-237-1(90782)
মহেশ্বর উবাচ। 13-237-2x(7647)
দেবতানাং তু পূজা যা যজ্ঞেষ্বেব সমাহিতা।
যজ্ঞা বেদেষ্বধীতাশ্চ বেদা ব্রাহ্মণসংয়ুতাঃ॥ 13-237-2(90783)
ইদং তু সকলং দিব্যং দিবি বা ভুবি বা প্রিয়ে।
যজ্ঞার্থং বিদ্ধি তৎসৃষ্টং লোকানাং হিতকাম্যযা॥ 13-237-3(90784)
এবং বিজ্ঞায় তৎকর্তা সদারঃ সততং দ্বিজঃ।
প্রেত্যভাবে লভেল্লোকান্ব্রহ্মকর্মসমাধিনা॥ 13-237-4(90785)
ব্রাহ্মণেষ্বেব তদ্ব্রহ্ম নিত্যং দেবি সমাহিতম্।
তস্মাদ্বিপ্রৈর্যথাশাস্ত্রং বিধিদৃষ্টেন কর্মণা॥ 13-237-5(90786)
যজ্ঞকর্মি কৃতং সর্বং দেবতা অভিতর্পয়েৎ।
ব্রাহ্মণাঃ ক্ষত্রিয়াশ্চৈব যজ্ঞার্থং প্রায়শঃ স্মৃতাঃ॥ 13-237-6(90787)
অগ্নিষ্টোমাদিভির্যজ্ঞৈর্বেদেষু পরিকল্পিতৈঃ।
সুশুদ্ধৈর্যজমানৈস্চ ঋৎবিগ্ভিশ্চ যথাবিধিঃ।
শুদ্ধৈর্দ্রব্যোপকরণৈর্যষ্টব্যমিতি নিশ্চয়ঃ॥ 13-237-7(90788)
তথা কৃতেষু যজ্ঞেষু দেবানাং তোষণং ভবেৎ।
তুষ্টেষু সর্বদেবেষু যজ্বা যজ্ঞফলং লভেৎ॥ 13-237-8(90789)
দেবাঃ সন্তোষিতা যজ্ঞৈর্লোকান্সংবর্ধয়ন্ত্যুত।
উভয়োর্লোকয়োর্ভূতির্দেবি যজ্ঞে প্রদৃশ্যতে॥ 13-237-9(90790)
তস্মাদ্যজ্বা দিবং গৎবা অমরৈঃ সহ মোদতে।
নাস্তি যজ্ঞসমং দানং নাস্তি যজ্ঞসমো নিধিঃ॥ 13-237-10(90791)
সর্বধর্মসমুদ্দেশো দেবি যজ্ঞে সমাহিতঃ।
এষা যজ্ঞকৃতা পূজা লৌকিকীমপরাং শৃণু॥ 13-237-11(90792)
দেবসৎকারমুদ্দিশ্য ক্রিয়তে লৌকিকোৎসবঃ॥ 13-237-12(90793)
দেবগোষ্ঠেঽধিসংস্কৃত্য চোৎসবং যঃ করোতি বৈ।
যাগান্দেবোপহারাংশ্চ শুচির্ভূৎবা যথাবিধি।
দেবান্সন্তোষয়িৎবা স দেবি ধর্মমবাপ্নুয়াৎ॥ 13-237-13(90794)
গন্ধমাল্যৈশ্চ বিবিধৈঃ পরমান্নেন ধূপনৈঃ।
বহ্বীভিঃ স্তুতিভিশ্চৈব স্তুবদ্ভিঃ প্রয়তৈর্নরৈঃ॥ 13-237-14(90795)
নৃত্তৈর্বাদ্যৈশ্চ গান্ধর্বৈরন্যৈর্দৃষ্টিবিলোভনৈঃ।
দেবসৎকারমুদ্দিশ্য কুর্বতে যে নরা ভুবি॥ 13-237-15(90796)
তেষাং ভক্তিকৃতেনৈব সৎকারেণৈব পূজিতাঃ।
তেনৈব তোষং সংয়ান্তি দেবি দেবাস্ত্রিবিষ্টপে॥ 13-237-16(90797)
মানুষৈশ্চোপকারৈর্বা শুচিভিঃ সৎপরায়ণৈঃ।
ব্রহ্মচর্যপরৈরেতৎকৃতং ধর্মফলং লভেৎ॥ 13-237-17(90798)
কেবলৈঃ স্তুতিভির্দেবি গন্ধমাল্যসমাহিতৈঃ।
প্রয়তৈঃ শুদ্ধগাত্রৈস্তু শুদ্ধদেশে সুপূজিতাঃ।
সন্তোষং যান্তি তে দেবা ভক্তৈঃ সম্পূজিতাস্তথা॥ 13-237-18(90799)
দেবান্সন্তোষয়িৎবৈব দেবি ধর্মমবাপ্নুয়াৎ॥ 13-237-19(90800)
উমোবাচ। 13-237-20x(7648)
ত্রিবিষ্টপস্থা বৈ ভূমৌ দেবা মানুষচেষ্টিতম্।
কথং জ্ঞাস্যন্তি বিধিবত্তন্মে শংসিতুমর্হসি॥ 13-237-20(90801)
মহেশ্বর উবাচ। 13-237-21x(7649)
তদহং তেপ্রবক্ষ্যামি যথা তৈর্বিদ্যতে প্রিয়ে।
প্রাণিনাং তু শরীরেষু অন্তরাত্মা ব্যবস্থিতঃ॥ 13-237-21(90802)
আত্মানং পরমং দেবমিতি বিদ্ধি শুভেক্ষণে।
আত্মা মনোব্যবস্থানাৎসর্বং বেত্তি শুভাশুভম্॥ 13-237-22(90803)
আত্মৈব দেবাস্তদ্বিদ্যুরব্যগ্রমনসা কৃতম্।
সতাং মনোব্যবস্থানাচ্ছুভং ভবতি বৈ নৃণাম্॥ 13-237-23(90804)
তস্মাদ্দেবাঽভিসম্পূজ্যা ব্রাহ্মণানাং তথৈব চ।
যজ্ঞাশ্চ ধর্মকার্যাণি গুরুপূজা চ শোভনে॥ 13-237-24(90805)
শুদ্ধগাত্রৈর্ব্রতয়ুতৈস্তন্ময়ৈস্তৎপরায়ণৈঃ।
এবং ব্যবস্থিতৈর্নিত্যং কর্তব্যমিতি নিশ্চয়ঃ॥ 13-237-25(90806)
এবং কৃৎবা শুভাকাঙ্ক্ষী পরত্রেহ চ মোদতে।
অন্যথা মন আবিশ্য কৃতং ন ফলতি প্রিয়ে।
ঋতেঽপি তু মনো দেবি অশুভং ফলতি ধ্রুবম্॥ ॥ 13-237-26(90807)
ইতি শ্রীমন্মহাভারতে অনুশাসনপর্বণি দানধর্মপর্বণি সপ্তত্রিংশদধিকদ্বিশততমোঽধ্যায়ঃ॥ 237 ॥