অনুশাসনপর্ব – অধ্যায় ২০৫

অনুশাসনপর্ব – অধ্যায় 205
॥ শ্রীঃ ॥
13.205. অধ্যায়ঃ 205
অথ দানধর্মপর্ব ॥ 1 ॥
Mahabharata – Anushaasana Parva – Chapter Topics
নারদেন কৃষ্ণংপ্রতি উমামহেশ্বরসংবদানুবাদারম্ভঃ॥ 1 ॥ নানামুনিগণাকীর্ণহিমবত্তটমুপবিষ্টে মহাদেবে তৎপৃষ্ঠভাগমুপাগতয়া পার্বত্যা ক্রীডার্থং স্বপাণিভ্যাং তদীয়নয়নদ্বয়পিধানম্॥ 2 ॥ তদা জগত আন্ধ্যপ্রাপ্তৌ দেবেন স্বললাটে তৃতীয়নেত্রসর্জনম্॥ 3 ॥ তত্তেজসা নির্দগ্ধে গিরৌ দেবীপ্রার্থনয়া দেবেন পুনর্গিরেরুজ্জীবনম্॥ 4 ॥
Mahabharata – Anushaasana Parva – Chapter Text

নারদ উবাচ।

ভগবংস্তীর্থয়াত্রার্থং তথৈব চরতা ময়া।
দিব্যমদ্ভুতসঙ্কাশং দৃষ্টং হৈমবতং বনম্॥ 13-205-1(89259)
নানাবৃক্ষসমায়ুক্তং নানাপক্ষিগণৈর্বৃতম্।
নানরত্নগণাকীর্ণং নানাভাবসমন্বিতম্॥ 13-205-2(89260)
দিব্যচন্দনসংয়ুক্তং দিব্যধূপেন ধূপিতম্।
দিব্যপুষ্পসমাকীর্ণং দিব্যগন্ধেন বাসিতম্॥ 13-205-3(89261)
সিদ্ধচারণসংঘাতৈর্ভূতসঙ্ঘৈর্নিষেবিতম্।
বরিষ্ঠাপ্সরসাকীর্ণং নাগগন্ধর্বসঙ্কুলম্॥ 13-205-4(89262)
মৃদঙ্গমুরজোদ্ধুষ্টং শঙ্খবীণাভিনাদিতম্।
নৃত্যদ্ভির্ভূতসঙ্ঘৈশ্চ সর্বতস্ৎবভিশোভিতম্॥ 13-205-5(89263)
নানারূপৈর্বিরূপৈশ্চ ভীমরূপৈর্ভয়ানকৈঃ।
সিংহব্যাঘ্রোরগমৃগৈর্বিডালবদনৈস্তথা॥ 13-205-6(89264)
স্বরোষ্ট্রদ্বীপিবদনৈর্গজবক্ত্রৈস্তথৈব চ।
উলূকশ্যেনবদনৈঃ কাকগৃধ্রমুখৈস্তথা॥ 13-205-7(89265)
এবং বহুবিধাকারৈর্ভূতসঙ্ঘৈর্ভৃশাকুলম্।
নানদ্যমানং বহুধা হরপারিষদৈর্ভৃশম্॥ 13-205-8(89266)
ঘোররূপং সুদুর্দর্শং রক্ষোগণশতৈর্বৃতম্।
সমাজং তদ্বনে দৃষ্টং ময়া ভূতপতেঃ পুরা॥ 13-205-9(89267)
প্রনৃত্তাপ্সরসং দিব্যং দেবগন্ধর্বনাদিতম্।
প্রথমে বর্ষরাত্রে তু মেঘসঙ্ঘনিনাদিতম্॥ 13-205-10(89268)
নানাবর্হিণসংঘুষ্টং গজয়ূথসমাকুলম্।
ষট্পদৈরুপগীতং চ প্রথমে মাসি মাধবে॥ 13-205-11(89269)
উৎক্রোশৎক্রৌঞ্চকুররৈঃ সারসৈর্জীবজীবকৈঃ।
মত্তাভিঃ পরপুষ্টাভিঃ কূজন্তীভিঃ সমাকুলম্॥ 13-205-12(89270)
উত্তমাবাসসঙ্কাশং ভীমরূপতরং ততঃ।
দ্রষ্টুং ভবতি ধর্মস্য ধর্মভাগিজনস্য চ॥ 13-205-13(89271)
যে চোধ্বরেতসঃ সিদ্ধাস্তত্রতত্র সমাগতাঃ।
মার্তাণ্ডরশ্মিসঞ্চারা বিশ্বেদেবগণাস্তথা॥ 13-205-14(89272)
তথা নাগাস্তথা দিব্যা লোকপালা হুতাশনাঃ।
বাতাশ্চ সর্বে চায়ান্তি দিব্যপুষ্পসমাকুলাঃ॥ 13-205-15(89273)
কিরন্তঃ সর্বপুষ্পাণি কিরন্তোঽদ্ভুতদর্শনাঃ।
ওষধ্যঃ প্রজ্বলন্ত্যশ্চ দ্যোতয়ন্ত্যো দিশো দশ॥ 13-205-16(89274)
বিহগাশ্চ মুদা যুক্তা নৃত্যন্তি চ নদন্তি চ।
ততঃ সমন্ততস্তত্র দিব্যা দিব্যজনপ্রিয়াঃ॥ 13-205-17(89275)
তত্র দেবো গিরিতটে হেমধাতুবিভূষিতে।
পর্যঙ্ক ইব বভ্রাজ উপবিষ্টো মহাদ্যুতিঃ॥ 13-205-18(89276)
ব্যাঘ্রচর্মপরীধানো গজচর্মোত্তরচ্ছদঃ।
ব্যালয়জ্ঞোপবীতশ্চ লোহিতান্ত্রবিভূষিতঃ॥ 13-205-19(89277)
হরিশ্মশ্রুজটো ভীমো ভয়কর্তাঽমরদ্বিষাম্।
ভয়হেতুরভক্তানাং ভক্তানামভয়ঙ্করঃ॥ 13-205-20(89278)
কিন্নরৈর্দেবগন্ধর্বৈঃ স্তূয়মানস্ততস্ততঃ।
ঋষিভিশ্চাপ্সরোভিশ্চ সর্বতশ্চৈব শোভিতঃ॥ 13-205-21(89279)
তত্র ভূতপতেঃ স্থানং দেবদানবসঙ্কুলম্।
সর্বতেজোময়ং ভূম্না লোকপালনিষেবিতম্॥ 13-205-22(89280)
মহোরগসমাকীর্ণং সর্বেষাং রোমহর্ষণম্।
ভীমরূপমনির্দেশ্যমপ্রধৃষ্যতমং বিভোঃ॥ 13-205-23(89281)
তত্র ভূতপতিং দেবমাসীনং শিখরোত্তমে।
ঋষয়ো ভূতসঙ্ঘাশ্চ প্রণম্য শিরসা হরম্।
গীর্ভিঃ পরমশুদ্ধাভিস্তুষ্টুবুস্চ মনোহরম্॥ 13-205-24(89282)
বিমুক্তাশ্চৈব পাপেভ্যো বভূবুর্বিগতজ্বরাঃ।
ঋষয়ো বালকিল্যাশ্চ তথা বিপ্রর্ষয়শ্চ যে॥ 13-205-25(89283)
অয়োনিজা যোনিজাশ্চ তপঃসিদ্ধা মহর্ষয়ঃ।
ততস্তং দেবদেবেশং ভগবন্তমুপাসতে। 13-205-26(89284)
ততস্তস্মিন্ক্ষণে দেবী ভূতস্ত্রীগণসংবৃতা।
হরতুল্যাম্বরধরা সমানব্রতচারিণী॥ 13-205-27(89285)
কাঞ্চনং কলশং গৃহ্য সর্বতীর্থাম্বুপূরিতম্।
পুষ্পবৃষ্ট্যাঽভিবর্ষন্তী দিব্যগন্ধসমাবৃতা॥ 13-205-28(89286)
সরিদ্বরাভিঃ সর্বাভিঃ পৃষ্ঠতোঽনুগতা বরা।
সেবিতুং ভগবৎপার্শ্বমাজগাম শুচিস্মিতা॥ 13-205-29(89287)
আগম্য তু গিরেঃ পুত্রী দেবদেবস্য চান্তিকম্।
মনঃপ্রিয়ং চিকীর্ষন্তী ক্রীডার্থং শঙ্করান্তিকে॥ 13-205-30(89288)
মনোহরাভ্যাং পাণিভ্যাং হরনেত্রে পিধায় তু।
অবেক্ষ্য হৃষ্টা স্বগণান্স্ময়ন্তী পৃষ্ঠতঃ স্থিতা॥ 13-205-31(89289)
দেব্যা চান্ধীকৃতে দেবে কশ্মলং সমপদ্যত।
নিমীলিতে ভূতপতৌ নষ্টচন্দ্রার্কতারকম্॥ 13-205-32(89290)
নিঃস্বাধ্যায়বষট্কারং তমসা চাভিসংবৃতম্।
বিষণ্ণং ভয়বিত্রস্তং জগদাসীদ্ভয়াকুলম্॥ 13-205-33(89291)
হাহাকারমৃষীণাং চ লোকানামভবত্তদা।
তমোভিভূতে সম্ভ্রান্তে লোকে জীবনসংক্ষয়ে॥ 13-205-34(89292)
তৃতীয়ং চাস্য সম্ভূতং ললাটে নেত্রমায়তম্।
দ্বাদশাদিত্যসঙ্কাশং লোকান্ভাসাঽবভাসয়ৎ॥ 13-205-35(89293)
তত্রক তেনাগ্নিনা তেন যুগান্তাগ্নিনিভেন বৈ।
অদহ্যত গিরিঃ সর্বো হিমবানগ্রতঃ স্থিতঃ॥ 13-205-36(89294)
দহ্যমানে গিরৌ তস্মিন্মৃগপক্ষিসমাকুলে।
সবিদ্যাধরগন্ধর্বে দিব্যৌষধসমাকুলে॥ 13-205-37(89295)
ততো গিরিসুতা চাপি বিস্ময়োৎফুল্ললোচনা।
বভূব চ জগৎসর্বং তথা বিস্ময়সংয়ুতম্॥ 13-205-38(89296)
পশ্যতামেব সর্বেষাং দেবদানবরক্ষসাম্।
নেত্রজেনাগ্নিনা তেন দগ্ধ এব নগোত্তমঃ॥ 13-205-39(89297)
তং দৃষ্ট্বা মথিতং শৈলং শৈলপুত্রী সবিক্লবা।
পিতুঃ সম্মানমিচ্ছন্তী পপাত ভুবি পাদূয়োঃ॥ 13-205-40(89298)
তং দৃষ্ট্বা দেবদেবেশো দেব্যা দুঃখমনুত্তমম্।
হৈমবত্যাঃ প্রিয়ার্থং চ গিরিং পুনরবৈক্ষত॥ 13-205-41(89299)
দৃষ্টমাত্রে ভগবতা সৌম্যযুক্তেন চেতসা।
ক্ষণেন হিমবাঞ্শৈলঃ প্রকৃতিস্থোঽভবৎপুনঃ॥ 13-205-42(89300)
হৃষ্টপুষ্টবিহঙ্গৈশ্চ প্রফুল্লদ্রুমকাননঃ।
সিদ্ধচারণসঙ্ঘৈশ্চ প্রীতিয়ুক্তৈঃ সমাকুলঃ॥ 13-205-43(89301)
পিতরং প্রকৃতিস্থং চ দৃষ্ট্বা হৈমবতী ভৃশম্।
অভবৎপ্রীতিসংয়ুক্তা মুদিতাত্র পিনাকিনম্॥ 13-205-44(89302)
দেবী বিস্ময়সংয়ুক্তা প্রষ্টুকামা মহেশ্বরম্।
হিতার্তং সর্বলোকানাং প্রজানাং হিতকাম্যযা।
দেবদেবং মহাদেবী বভাষেদং বচোঽর্থবৎ॥ 13-205-45(89303)
ভগবন্দেবদেবেশ শূলপাণে মহাদ্যুতে।
বিস্ময়ো মে মহাঞ্জাতস্তস্মিন্নেত্রাগ্নিসম্ভবে॥ 13-205-46(89304)
কিমর্থং দেবদেবেশ ললাটেঽস্মিন্প্রকাশতে।
অতিসূর্যাগ্নিসঙ্কাশং তৃতীয়ং নেত্রমায়তম্॥ 13-205-47(89305)
নেত্রাগ্নিনা তু মহতা নির্দগ্ধো হিমবানসৌ।
পুনঃ সংদৃষ্টমাত্রস্তু প্রকৃতিস্থঃ পিতা মম॥ 13-205-48(89306)
এষ মে সংশয়ো দেব হৃদি মে সম্প্রবর্ততে।
দেবদেব নমস্তুভ্যং তন্মে সংসিতুমর্হসি॥ 13-205-49(89307)
নারদ উবাচ। 13-205-50x(7445)
এবমুক্তস্তয়া দেব্যা প্রীয়মাণোঽব্রবীদ্ভবঃ।
স্থানে সংশয়িতুং দেবি ধর্মজ্ঞে প্রিয়ভাষিণি॥ 13-205-50(89308)
ৎবদৃতে মাং হি বৈ প্রষ্টুং ন শক্যং কেন চেৎপ্রিয়ে।
প্রকাশং যদি বা গুহ্যং প্রিয়ার্থং প্রব্রবীম্যহম্॥ 13-205-51(89309)
শৃণু তৎসর্বমকিলমস্যাং সংসদি ভামিনি।
সর্বেষামেব লোকানাং কূটস্থং বিদ্ধি মাং প্রিয়ে॥ 13-205-52(89310)
মদধীনাস্ত্রয়ো লোকা যথা বিষ্ণৌ তথা ময়ি।
স্রষ্টা বিষ্ণুরহং গোপ্তা ইত্যেতদ্বিদ্ধি ভামিনি॥ 13-205-53(89311)
তস্মাদ্যদা মাং স্পৃশতি শুভং বা যদি বেতরৎ।
তথৈবেদং জগৎসর্বং তত্তদ্ভবতি শোভনে॥ 13-205-54(89312)
এতদ্গুহ্যমজানন্ত্যা ৎবয়া বাল্যাদনিন্দিতে।
মন্নেত্রে পিহিতে দেবি ক্রীডনার্থং দৃঢব্রতে॥ 13-205-55(89313)
তৎকৃতে নষ্টচন্দ্রার্কং জগদাসীদ্ভয়াকুলম্।
নষ্টাদিত্যে তমোভূতে লোকে গিরিসুতে প্রিয়ে॥ 13-205-56(89314)
তৃতীয়ং লোচনং সৃষ্টং লোকং সংরক্ষিতুং ময়া।
কথিতং সংশয়স্থানং নির্বিশঙ্কা ভব প্রিয়ে॥ ॥ 13-205-57(89315)

ইতি শ্রীমন্মহাভারতে অনুশাসনপর্বণি দানধর্মপর্বণি পঞ্চাধিকদ্বিশততমোঽধ্যায়ঃ॥ 205 ॥