অনুশাসনপর্ব – অধ্যায় 125
॥ শ্রীঃ ॥
13.125. অধ্যায়ঃ 125
অথ দানধর্মপর্ব ॥ 1 ॥
Mahabharata – Anushaasana Parva – Chapter Topics
ব্যাসেন শুকম্প্রতি ব্রাহ্মণেতরবর্ণানাং কপিলাক্ষীরোপজীবনার্হৎবাদিকথনম্॥ 1 ॥
Mahabharata – Anushaasana Parva – Chapter Text
‘শুক উবাচ।
ক্ষত্রিয়াশ্চৈব শূদ্রাশ্চ মন্ত্রহীনাশ্চ যে দ্বিজাঃ।
কপিলামুপজীবন্তি কথমেতৎপিতর্ভবেৎ॥ 13-125-1(86235)
শ্রীব্যাস উবাচ। 13-125-2x(7155)
ক্ষত্রিয়াশ্চৈব শূদ্রাশ্চ মন্ত্রহীনাশ্চ যে দ্বিজাঃ।
কপিলামুপজীবন্তি তেষাং বক্ষ্যামি নির্ণয়ম্॥ 13-125-2(86236)
কপিলাস্তূত্তমা লোকে গোষু চৈবোত্তমা মতাঃ।
তাসাং দাতা লভেৎস্বর্গং বিধিনা যশ্চ সেবতে॥ 13-125-3(86237)
স্পৃশেত কপিলাং যস্তু দণ্ডেন চরণেন বা।
স তেন স্পর্শমাত্রেণ নরকায়োপপদ্যতে॥ 13-125-4(86238)
মন্ত্রেণ যুঞ্জ্যাৎকপিলাং মন্ত্রেণৈব প্রমুঞ্চতে।
মন্ত্রিহীনং তু যো যুঞ্জাৎকৃমিয়োনৌ প্রসূয়তে॥ 13-125-5(86239)
প্রহারাহতমর্মাঙ্গা দুঃখেন চ জডীকৃতা।
পদানি যাবদ্গচ্ছেত তাবল্লোকান্কৃমির্ভবেৎ॥ 13-125-6(86240)
যাবন্তো বিন্দবস্তস্যাঃ শোণিতস্য ক্ষিতিং গতাঃ।
তাবদ্বর্ষসহস্রাণি নরকং প্রতিপদ্যতে॥ 13-125-7(86241)
মন্ত্রেণ যুঞ্জ্যাৎকপিলাং মন্ত্রেণ বিনিয়োজয়েৎ।
মন্ত্রহীনৈরনুয়ুতো মঞ্জয়েত্তমসি প্রভো॥ 13-125-8(86242)
কপিলাং যেঽপি জীবন্তি বুদ্ধিমোহান্বিতা নরাঃ।
তেঽপি বর্ষসহস্রাণি পতন্তি নরকে নৃপ॥ 13-125-9(86243)
অথ ন্যায়েন যে বিপ্রাঃ কপিলামুপয়ুঞ্জতে।
তস্মিংল্লোকে প্রমোদন্তে লোকাশ্চৈষামনাময়াঃ॥ 13-125-10(86244)
বিধিনা যে ন কুর্বন্তি শূদ্রাস্তানুপধারয়॥’ ॥ 13-125-11(86245)
ইতি শ্রীমন্মহাভারতে অনুশাসনপর্বণি দানধর্মপর্বণি পঞ্চবিংশত্যধিকশততমোঽধ্যায়ঃ॥ 125 ॥