অনুশাসনপর্ব – অধ্যায় 111
॥ শ্রীঃ ॥
13.111. অধ্যায়ঃ 111
অথ দানধর্মপর্ব ॥ 1 ॥
Mahabharata – Anushaasana Parva – Chapter Topics
ভীষ্মেণ যুধিষ্ঠিরম্প্রতি গোদানবিধিফলাদিকথনম্॥ 1 ॥
Mahabharata – Anushaasana Parva – Chapter Text
যুধিষ্ঠির উবাচ।
বিধিং গবাং পরং শ্রোতুমিচ্ছামি নৃপ তত্ৎবতঃ।
যেন তাঞ্শাশ্বতাঁল্লোকানর্থিনাং প্রাপ্নুয়াদিহ॥ 13-111-1(85841)
ভীষ্ম উবাচ। 13-111-2x(7117)
ন গোদানাৎপরং কিঞ্চিদ্বিদ্যতে বসুধাধিপ।
গৌর্হি ন্যায়াগতা দত্তা সদ্যস্তারয়তে কুলম্॥ 13-111-2(85842)
সতামর্থে সম্যগুৎপাদিতো যঃ
স বৈ ক্লৃপ্তঃ সম্যগাভ্যঃ প্রজাভ্যঃ।
তস্মাৎপূর্বং হ্যাদিকালপ্রবৃত্তং
গোদানার্থং শৃণু রাজন্বিধিং মে॥ 13-111-3(85843)
পুরা গোষ্ঠে নিলীনাসু গোষু সন্দিগ্ধদর্শিনা।
মাংধাত্রা প্রকৃতং প্রশ্নং বৃহস্পতিরভাষত॥ 13-111-4(85844)
দ্বিজানামন্ত্র্য সৎকৃত্য প্রোক্তং কালমুপোষ্য চ।
গোদানার্থে প্রয়ুঞ্জীত রোহিণীং নিয়তব্রতঃ॥ 13-111-5(85845)
আহ্বানং চ প্রয়ুঞ্জীত সমঙ্গে বহুলেতি চ।
প্রবিশ্য চ গবাং মধ্যমিমাং শ্রুতিমুদাহরেৎ॥ 13-111-6(85846)
গৌর্মে মাতা বৃষভঃ পিতা মে
দিবং গর্ভং জগতী মে প্রতিষ্ঠা।
প্রপদ্যৈবং শর্বরীমুষ্য গোষু
পুনর্বাণীমুৎসৃজেদ্গোপ্রদানে॥ 13-111-7(85847)
স তামেকাং নিশাং গোভিঃ সমসখ্যঃ সমব্রতঃ।
ঐকাত্ম্যগমনাৎসদ্যঃ কলুষাদ্বিপ্রমুচ্যতে॥ 13-111-8(85848)
উৎসৃষ্টবৃষবৎসা হি প্রদেয়া সূর্যদর্শনে।
ত্রিদিবং প্রতিপত্তব্যমর্থবাদাশিষস্তব॥ 13-111-9(85849)
ঊর্জস্বিন্য ঊর্জমেধাশ্চ যজ্ঞে
গর্ভোঽমৃতস্য জগতশ্চ প্রতিষ্ঠা।
ক্ষিতে রোহঃ প্রবহঃ শশ্বদেব।
প্রাজাপত্যাঃ সর্বমিত্যর্থবাদাঃ॥ 13-111-10(85850)
গাবো মমৈনঃ প্রণুদন্তু সৌর্যা-
স্তথা সৌম্যাঃ স্বর্গয়ানায় সন্তু।
আত্মানং মে মাতৃবচ্চাশ্রয়ন্তু
তথাঽনুক্তাঃ সন্তু সর্বাশিষো মে॥ 13-111-11(85851)
শোষোৎসর্গে কর্মভির্দেহমোক্ষে
সরস্বত্যঃ শ্রেয়সে সম্প্রবৃত্তাঃ।
যূয়ং নিত্যং সর্বপুণ্যোপবাহ্যাং
দিশধ্বং মে গতিমিষ্টাং প্রসন্নাঃ॥ 13-111-12(85852)
যা বৈ যূয়ং সোঽহমদ্যৈব ভাবো
যুষ্মান্দত্ৎবা চাহমাত্মপ্রদাতা।
মনশ্চ্যুতা মন এবোপপন্নাঃ
সন্ধুক্ষধ্বং সৌম্যরূপাগ্র্যদেহাঃ॥ 13-111-13(85853)
দানস্যাগ্রে পূর্বমেতদ্বদেত
গবাং দাতা বিধিবৎপর্বদৃষ্টম্।
প্রতিব্রূয়াচ্ছেষমর্ধংদ্বিজাতিঃ
প্রতিগৃহ্ণন্বৈ গোপ্রদানে বিধিজ্ঞঃ॥ 13-111-14(85854)
গাং দদানীতি বক্তব্যমর্ঘ্যমুৎসৃজ্য সুব্রতঃ।
ঊঢব্যা ভরিতব্যা চ বৈষ্ণবীতি চ চোদয়েৎ॥ 13-111-15(85855)
নাম সঙ্কীর্তয়েত্তস্যা যথাসংখ্যোত্তরং স বৈ।
ফলং ষট্ত্রিংশদষ্টৌ চ সহস্রাণি চ বিংশতিঃ॥ 13-111-16(85856)
এবমেতান্গুণান্বিদ্যাদ্গবাদীনাং যথাক্রমম্।
গোপ্রদাতা সমাপ্নোতি সমস্তানষ্টমে ক্রমে॥ 13-111-17(85857)
গোদঃ শীলী নির্ভয়শ্চার্ঘদাতা
ন স্যাদ্দুঃখী বসুদাতা চ কামম্।
উপস্যোঢা ভারতে যশ্চ বিদ্বা-
ন্বিখ্যাতাস্তে বৈষ্ণবাশ্চন্দ্রলোকাঃ॥ 13-111-18(85858)
গা বৈ দত্ৎবা গোব্রতী স্যাত্ত্রিরাত্রং
নিশাং চৈকাং সংবসেতেহ তাভিঃ।
কাম্যাষ্টভ্যাং বর্তিতব্যং ত্রিরাত্রং
রসৈর্বা গোঃ শকৃতা প্রশ্নবৈর্বা॥ 13-111-19(85859)
দেবব্রতী স্যাদ্বৃষভপ্রদানে
বেদাবাপ্তির্গোয়ুগস্য প্রদানে।
তথা গবাং বিধিমাসাদ্য যজ্বা
লোকানগ্র্যান্বিন্দতে গোবিধিজ্ঞঃ॥ 13-111-20(85860)
কামান্সর্বান্পার্থিবানেকসংস্থা-
ন্যো বৈ দদ্যাৎকামদুঘাং চ ধেনুম্।
সম্যক্তাঃ স্যুর্হব্যকব্যৌঘবত্য
স্তাসামুক্ষ্ণাং জ্যায়সাং সম্প্রদানম্॥ 13-111-21(85861)
ন চাশিষ্যায়াব্রতায়োপকুর্যা-
ন্নাশ্রদ্দধানায় ন বক্রবুদ্ধয়ে।
গুহ্যো হ্যযং সর্বলোকস্য ধর্মো
নেমং ধর্মং যত্র তত্র প্রজল্পেৎ॥ 13-111-22(85862)
সন্তি লোকে শ্রদ্দধানা মনুষ্যাঃ
সন্তি ক্ষুদ্রা রাক্ষসমানুষেষু।
এষামেতদ্দীয়মানং হ্যনিষ্টং
যে নাস্তিক্যং চাশ্রয়ন্তেঽল্পপুণ্যাঃ॥ 13-111-23(85863)
বার্হস্পত্যং বাক্যমেতন্নিশম্য
যে রাজানো গোপ্রদানানি দত্ৎবা।
লোকান্প্রাপ্তাঃ পুণ্যশীলাঃ প্রবৃত্তা-
স্তান্মে রাজন্কীর্ত্যমানান্নিবোধ॥ 13-111-24(85864)
উশীনরো বিশ্বগশ্বো নৃগশ্চ
ভগীরথো বিশ্রুতো যৌবনাশ্বঃ।
মান্ধাতা বৈ মুচুকুন্দশ্চ রাজা
ভূরিদ্যুম্নো নৈষধঃ সোমকশ্চ॥ 13-111-25(85865)
পুরূরবা ভরতশ্চক্রবর্তী
যস্যান্ববায়ে ভরতাঃ সর্ব এব।
তথা বীরো দাশরথিশ্চ রামো
যে চাপ্যন্যে বিশ্রুতাঃ কীর্তিমন্তঃ॥ 13-111-26(85866)
তথা রাজা পৃথুকর্মা দিলীপো
দিবং প্রাপ্তো গোপ্রদানৈর্বিধিজ্ঞঃ।
যজ্ঞৈর্দানৈস্তপসা রাজধর্মৈ-
র্মাংধাতাঽভূদ্গোপ্রদানৈশ্চ যুক্তঃ॥ 13-111-27(85867)
তস্মাৎপার্থ ৎবমপীমাং ময়োক্তাং
বার্হস্পতীং ভারতীং ধারয়স্ব।
দ্বিজাগ্র্যেভ্যঃ সম্প্রয়চ্ছস্ব প্রীতো
গাঃ পুণ্যা বৈ প্রাপ্য রাজ্যং কুরূণাম্॥ 13-111-28(85868)
বৈশম্পায়ন উবাচ। 13-111-29x(7118)
তথা সর্বং কৃতবান্ধর্মরাজো
ভীষ্মেণোক্তো বিধিবদ্গোপ্রদানে
স মান্ধাতুর্বেদ দেবোপদিষ্টং
সম্যগ্ধর্মং ধারয়ামাস রাজা॥ 13-111-29(85869)
ইতি নৃপ সততং গবাং প্রদানে
যবশকলান্সহ গোময়ৈঃ পিবানঃ।
ক্ষিতিতলশয়নঃ শিখী যতাত্মা
বৃষ ইব রাজবৃষস্তদা বভূব॥ 13-111-30(85870)
নরপতিরভবৎসদৈব তাভ্যঃ
প্রয়তমনাস্ৎবভিসংস্তুবংশ্চ গা বৈ।
নৃপতিধুরি চ গাময়ুক্ত ভূপ-
স্তুরগবরৈরগমচ্চ যত্র তত্র॥ ॥ 13-111-31(85871)
ইতি শ্রীমন্মহাভারতে অনুশাসনপর্বণি দানধর্মপর্বণি একাদশাধিকশততমোঽধ্যায়ঃ॥ 111 ॥।
Mahabharata – Anushaasana Parva – Chapter Footnotes
7-111-3 যো বিধিরুৎপাদিতঃ। সম্যগিজ্যাঃ প্রজাভ্য ইতি থ.ধ.পাঠঃ॥ 7-111-5 দ্বিজাতিমতিসৎকৃত্য শ্বঃ কালমভিবেদ্য চেতি ঝ. পাঠঃ। রোহিণীং লোহিতবর্ণাম্॥ 7-111-8 সমসংখ্যো গা অনিবারয়ন্। সমব্রতঃ ভূতলশায়িৎবদংশাদ্যনিবারকৎবাদিগুণয়ুক্তঃ॥ 7-111-9 উৎসৃষ্টঃ বৃষবৎসো যয়া সার্ধং সা উৎসৃষ্টবৃষবৎসা। ৎবয়া প্রদেয়া ত্রিদিবং চ প্রতিপত্তব্যং গন্তব্যম্। অর্থবাদমন্ত্রোক্তা আশিষশ্চ তব ভবিষ্যন্তীতি যোজ্যম্॥ 7-111-10 আশিষমেবাহ ঊর্জস্বিন্য ইতি। বলবত্য উৎসাহবত্যো বা ঊর্জস্বিন্যঃ। ঊর্জমেধা উপগতপ্রজ্ঞাঃ। যজ্ঞে অমৃ-তস্য তৎসাধনস্য হবিষো গর্ভ ইব গর্ভঃ ক্ষেত্রভূতাঃ। ক্ষিতেঃ ঐশ্বর্যস্য রোহঃ। শশ্বৎ শাশ্বতঃ ক্ষিতেঃ প্রহবঃ প্রবাহরূপাশ্চ। প্রাজাপত্যঃ সর্ববদ্যাপ্রবাদ ইতি থ.ধ.পাঠঃ॥ 7-111-11 অনুক্তাঃ মন্ত্রদ্বয়েন উক্তা আশিষো মে সন্তু। আম্নাতায়ামনধীতাঃ শ্রয়ন্তু ইতি থ.পাঠঃ॥ 7-111-12 শোষোৎসর্গে ক্ষয়রোগোপতাপাপনয়ে ক্ষয়রোগাদিনিবৃত্তৌ দেহমোক্ষে চ কর্মভিঃ পঞ্চগব্যাদিভিঃ সেবিতাঃ সত্যঃ সরস্বত্যো নদ্য ইব শ্রেয়সে সম্প্রবৃত্তাঃ॥ 7-111-13 মনশ্চ্যুতাঃ দাতুর্মমৎবাভিমানাচ্চ্যুতাঃ। মনএব উপপন্নাঃ মদীয়মমতাস্পদীভূতাঃ। সন্ধুধ্বং দাতারং মাং চ ইষ্টৈর্ভোগৈঃ প্রকাশয়ধ্বম্॥ 7-111-18 গবাদীনাং গোপ্রতিনিধীনাং এব তৎফলম্। প্রত্যক্ষগোদানে গোপ্রতিগ্রহীতুর্গৃহং গচ্ছন্ত্যা অষ্টমে পদে ভবন্তি কিমু তদ্গৃহগমনাদিষ্বিতি ভাবঃ। গুণান্বৃদ্ধান্ভাবনীয়ং যথাক্রমমিতি থ.ধ. পাঠঃ। শীলী শীলবান্ অর্ঘদাতা নির্ভয় ইতি সম্বন্ধঃ। উষস্যং প্রাতঃ স্নানাদিকর্ম ঊঢং প্রাপ্তং যৈঃ। ভারতে বিদ্বান্ ভারতবেত্তা। বৈষ্ণবাঃ বিষ্ণুভক্তাঃ। চন্দ্রবৎ লোক আলোকো যেষাং এব বিখ্যাতাঃ কথিতাঃ॥ 7-111-21 একসংস্থান্ একীকৃতান্। তাসাং তাভ্যোঽধিকমিতি শেষঃ। উক্ষ্ণাং বৃষভাণাম্॥ 7-111-22 উপকুর্যাৎ এতৎকথনেন॥