আদিপর্ব – অধ্যায় ০৬১
॥ শ্রীঃ ॥
১.৬১. অধ্যায়ঃ ০৬১
Mahabharata – Adi Parva – Chapter Topics
বৈশম্পায়নেন জনমেজয়ায় সংক্ষিপ্য ভারতকথাকথনম্॥ ১ ॥
Mahabharata – Adi Parva – Chapter Text
১-৬১-০ (২৩৮৫)
বৈশম্পায়ন উবাচ। ১-৬১-০x (২৯৭)
`শৃণু রাজন্যথা বীরা ভ্রাতরঃ পঞ্চ পাণ্ডবাঃ।
বিরোধমন্বগচ্ছন্ত ধার্তরাষ্ট্রৈর্দুরাত্মভিঃ॥’ ১-৬১-১ (২৩৮৬)
গুরবে প্রাঙ্নমস্কৃত্য মনোবুদ্ধিসমাধিভিঃ।
সংপূজ্য চ দ্বিজান্সর্বাংস্তথান্যান্বিদুষো জনান্॥ ১-৬১-২ (২৩৮৭)
মহর্ষের্বিশ্রুতস্যেহ সর্বলোকেষু ধীমতঃ।
প্রবক্ষ্যামি মতং কৃৎস্নং ব্যাসস্যামিততেজসঃ॥ ১-৬১-৩ (২৩৮৮)
শ্রোতুং পাত্রং চ রাজংস্ৎবং প্রাপ্যেমাং ভারতীং কথাম্।
গুরোর্বক্ত্রপরিস্পন্দো মনঃ প্রোৎসাহতীব মে॥ ১-৬১-৪ (২৩৮৯)
শৃণু রাজন্যথা ভেদঃ কুরুপাণ্ডবয়োরভূৎ।
রাজ্যার্থে দ্যূতসংভূতো বনবাসস্তথৈব চ॥ ১-৬১-৫ (২৩৯০)
যথা চ যুদ্ধমভবৎপৃথিবীক্ষয়কারকম্।
তত্তেঽহং কথয়িষ্যামি পৃচ্ছতে ভরতর্ষভ॥ ১-৬১-৬ (২৩৯১)
মৃতে পিতরি তে বীরা বনাদেত্য স্বমন্দিরম্।
নচিরাদেব বিদ্বাংসো বেদে ধনুষি চাভবন্॥ ১-৬১-৭ (২৩৯২)
তাংস্তথা সৎববীর্যৌজঃসংপন্নান্পৌরসংমতান্।
নামৃষ্যন্কুরবো দৃষ্ট্বা পাণ্ডবাঞ্শ্রীয়শোভৃতঃ॥ ১-৬১-৮ (২৩৯৩)
ততো দুর্যোধনঃ ক্রূরঃ কর্ণশ্চ সহসৌবলঃ।
তেষাং নিগ্রহনির্বাসান্বিবিধাংস্তে সমারভন্॥ ১-৬১-৯ (২৩৯৪)
ততো দুর্যোধনঃ ক্রূরঃ কুলিঙ্গস্য মতে স্থিতঃ।
পাম্ডবান্বিবিধোপায়ৈ রাজ্যহেতোরপীডয়ৎ॥ ১-৬১-১০ (২৩৯৫)
দদাবথ বিষং পাপো ভীমায় ধৃতরাষ্ট্রজঃ।
জরয়ামাস তদ্বীরঃ সহান্নেন বৃকোদরঃ॥ ১-৬১-১১ (২৩৯৬)
প্রমাণকোট্যাং সংসুপ্তং পুনর্বদ্ধ্বা বৃকোদরম্।
তোয়েষু ভীমং গঙ্গায়াঃ প্রক্ষিপ্য পুরমাব্রজৎ॥ ১-৬১-১২ (২৩৯৭)
যদা বিবুদ্ধঃ কৌন্তেয়স্তদা সংছিদ্য বন্ধনম্।
উদতিষ্ঠন্মহাবাহুর্ভীমসেনো গতব্যথঃ॥ ১-৬১-১৩ (২৩৯৮)
আশীবিষৈঃ কৃষ্ণসর্পৈঃ সুপ্তং চৈনমদংশয়ৎ।
সর্বেষ্বেবাঙ্গদেশেষু ন মমার স শত্রুহা॥ ১-৬১-১৪ (২৩৯৯)
তেষাং তু বিপ্রকারেষু তেষু তেষু মহামতিঃ।
মোক্ষণে প্রতিকারে চ বিদুরোঽবহিতোঽভবৎ॥ ১-৬১-১৫ (২৪০০)
স্বর্গস্থো জীবলোকস্য যথা শক্রঃ সুখাবহঃ।
পাণ্ডবানাং তথা নিত্যং বিদুরোঽপি সুখাবহঃ॥ ১-৬১-১৬ (২৪০১)
যদা তু বিবিধোপায়ৈঃ সংবৃতৈর্বিবৃতৈরপি।
নাশকদ্বিনিহন্তুং তান্দৈবভাব্যর্থরক্ষিতান্॥ ১-৬১-১৭ (২৪০২)
ততঃ সংমন্ত্র্য সচিবৈর্বৃষদুঃশাসনাদিভিঃ।
ধৃতরাষ্ট্রমনুজ্ঞাপ্য জাতুষং গৃহমাদিশৎ॥ ১-৬১-১৮ (২৪০৩)
`তত্র তান্বাসয়ামাস পাণ্ডবানমিতৌজসঃ।’
সুতপ্রিয়ৈষী তান্রাজা পাণ্ডবানম্বিকাসুতঃ।
ততো বিবাসয়ামাস রাজ্যভোগবুভুক্ষয়া॥ ১-৬১-১৯ (২৪০৪)
তে প্রাতিষ্ঠন্ত সহিতা নগরান্নাগসাহ্বয়াৎ।
প্রস্থানে চাভবন্মন্ত্রী ক্ষত্তা তেষাং মহাত্মনাম্॥ ১-৬১-২০ (২৪০৫)
তেন মুক্তা জতুগৃহান্নিশীথে প্রাদ্রবন্বনম্।
ততঃ সংপ্রাপ্য কৌন্তেয়া নগরং বারণাবতম্॥ ১-৬১-২১ (২৪০৬)
ন্যবসন্ত মহাত্মানো মাত্রা সহ পরন্তপাঃ।
ধৃতরাষ্ট্রেণ চাজ্ঞপ্তা উষিতা জাতুষে গৃহে॥ ১-৬১-২২ (২৪০৭)
পুরোচনাদ্রক্ষমাণাঃ সংবৎসরমতন্দ্রিতাঃ।
সুরুঙ্গাং কারয়িৎবা তু বিদুরেণ প্রচোদিতাঃ॥ ১-৬১-২৩ (২৪০৮)
আদীপ্য জাতুষং বেশ্ম দগ্ধ্বা চৈব পুরোচনম্।
প্রাদ্রবন্ভয়সংবিগ্না মাত্রা সহ পন্তপাঃ॥ ১-৬১-২৪ (২৪০৯)
দদৃশুর্দারুমং রক্ষো হিডিম্বং বননির্ঝরে।
হৎবা চ তং রাক্ষসেন্দ্রং ভীতাঃ সমববোধনাৎ॥ ১-৬১-২৫ (২৪১০)
নিশি সংপ্রাদ্রবন্পার্থা ধার্তরাষ্ট্রভয়ার্দিতাঃ।
প্রাপ্তা হিডিম্বা ভীমেন যত্র জাতো ঘটোৎকচঃ॥ ১-৬১-২৬ (২৪১১)
একচক্রাং ততো হৎবা পাণ্ডবাঃ সংশিতব্রতাঃ।
বেদাধ্যযনসংপন্নাস্তেঽভবন্ব্রহ্মচারিণঃ॥ ১-৬১-২৭ (২৪১২)
তে তত্র নিয়তাঃ কালং কংচিদূষুর্নরর্ষভাঃ।
মাত্রা সহৈকচক্রায়াং ব্রাহ্মণস্য নিবেশনে॥ ১-৬১-২৮ (২৪১৩)
তত্রাসসাদ ক্ষুধিতং পুরুষাদং বৃকোদরঃ।
ভীমসেনো মহাবাহুর্বকং নাম মহাবলম্॥ ১-৬১-২৯ (২৪১৪)
তং চাপি পুরুষব্যাঘ্রো বাহুবীর্যেণ পাণ্ডবঃ।
নিহত্য তরসা বীরো নাগরান্পর্যসান্ৎবয়ৎ॥ ১-৬১-৩০ (২৪১৫)
ততস্তে শুশ্রুবুঃ কৃষ্ণাং পঞ্চালেষু স্বয়ংবরাম্।
শ্রুৎবা চৈবাভ্যগচ্ছ্ত গৎবা চৈবালভন্ত তাম্॥ ১-৬১-৩১ (২৪১৬)
তে তত্র দ্রৌপদীং লব্ধ্বা পরিসংবৎসরোষিতাঃ।
বিদিতা হাস্তিনপুরং প্রত্যাজগ্মুররিন্দমাঃ॥ ১-৬১-৩২ (২৪১৭)
তে উক্তা ধৃতরাষ্ট্রেণ রাজ্ঞা শান্তনবেন চ।
ভ্রাতৃভির্বিগ্রহস্তাত কথং বো ন ভবেদিতি॥ ১-৬১-৩৩ (২৪১৮)
অস্মাভিঃ খাণ্ডবপ্রস্থে যুষ্মদ্বাসোঽনুচিন্তিতঃ।
তস্মাজ্জনপদোপেতং সুবিভক্তমহাপথম্॥ ১-৬১-৩৪ (২৪১৯)
বাসায় স্বাণ্ডবপ্রস্থং ব্রজধ্বং গতমৎসরাঃ।
তয়োস্তে বচনাজ্জগ্মুঃ সহ সর্বৈঃ সুহৃজ্জনৈঃ॥ ১-৬১-৩৫ (২৪২০)
নগরং খাণ্ডবপ্রস্থং রত্নান্যাদায় সর্বশঃ।
তত্র তে ন্যবসন্পার্থাঃ সংবৎসরগণাংন্বহূন্॥ ১-৬১-৩৬ (২৪২১)
বশে শস্ত্রপ্রতাপেন কুর্বন্তোঽন্যান্মহীভৃতঃ।
এবং ধর্মপ্রধানাস্তে সত্যব্রতপরায়ণাঃ॥ ১-৬১-৩৭ (২৪২২)
অপ্রমত্তোত্থিতাঃ ক্ষান্তাঃ প্রতপন্তোঽহিতান্বহূন্।
অজয়দ্ভীমসেনস্তু দিশং প্রাচীং মহায়শাঃ॥ ১-৬১-৩৮ (২৪২৩)
উদীচীমর্জুনো বীরঃ প্রতীচীং নকুলস্তথা।
দক্ষিণাং সহদেবস্তু বিজিগ্যে পরবীরহা॥ ১-৬১-৩৯ (২৪২৪)
এবং চক্রুরিমাং সর্বে বশে কৃৎস্নাং বসুন্ধরাম্।
পঞ্চভিঃ সূর্যসঙ্কাশৈঃ সূর্যেণ চ বিরাজতা॥ ১-৬১-৪০ (২৪২৫)
ষট্সূর্যেবাভবৎপৃথ্বী পাণ্ডবৈঃ সত্যবিক্রমৈঃ।
ততো নিমিত্তে কস্মিংশ্চিদ্ধর্মরাজো যুধিষ্ঠিরঃ॥ ১-৬১-৪১ (২৪২৬)
বনং প্রস্থাপয়ামাস তেজস্বী সত্যবিক্রমঃ।
প্রাণেভ্যোঽপি প্রিয়তরং ভ্রাতরং সব্যসাচিনম্॥ ১-৬১-৪২ (২৪২৭)
অর্জুনং পুরুষব্যাঘ্রং স্থিরাত্মানং গুণৈর্যুতম্।
স বৈ সংবৎসরং পূর্ণং মাসং চৈকং বনে বসন্॥ ১-৬১-৪৩ (২৪২৮)
`তীর্থয়াত্রাং চ কৃতবান্নাগকন্যামবাপ চ।
পাণ্ড্যস্য তনয়াং লব্ধ্বা তত্র তাভ্যাংসহোষিতঃ’॥ ১-৬১-৪৪ (২৪২৯)
ততোঽগচ্ছদ্ধৃষীকেশং দ্বারবত্যাং কদাচন।
লব্ধবাংস্তত্র বীভৎসুর্ভার্যাং রাজীবলোচনাম্॥ ১-৬১-৪৫ (২৪৩০)
অনুজাং বাসুদেবস্য সুভদ্রাং ভদ্রভাষিণীম্।
সা শচীব মহেন্দ্রেণ শ্রীঃ কৃষ্ণেনেব সঙ্গতা॥ ১-৬১-৪৬ (২৪৩১)
সুভদ্রা যুয়ুজে প্রীত্যা পাণ্ডবেনার্জুনেন হ।
অতর্পয়চ্চ কৌন্তেয়ঃ খাণ্ডবে হব্যবাহনম্॥ ১-৬১-৪৭ (২৪৩২)
বীভৎসুর্বাসুদেবেন সহিতো নৃপস্তম।
নাতিভারো হি পার্থস্য কেশবেন সহাভবৎ॥ ১-৬১-৪৮ (২৪৩৩)
ব্যবসায়সহায়স্য বিষ্ণোঃ শত্রুবধেষ্বিব।
পার্থায়াগ্নির্দদৌ চাপি গাণ্ডীবং ধনুরুত্তমম্॥ ১-৬১-৪৯ (২৪৩৪)
ইষুধী চাক্ষয়ৈর্বাণৈ রথং চ কপিলক্ষণম্।
মোক্ষয়ামাস বীভৎসুর্ময়ং যত্র মহাসুরম্॥ ১-৬১-৫০ (২৪৩৫)
স চকার সভাং দিব্যাং সর্বরত্নসমাচিতাম্।
তস্যাং দুর্যোধনো মন্দো লোভং চক্রে সুদুর্মতিঃ॥ ১-৬১-৫১ (২৪৩৬)
ততোঽক্ষৈর্বঞ্চয়িৎবা চ সৌবলেন যুধিষ্ঠিরম্।
বনং প্রস্থাপয়ামাস সপ্তবর্ষাণি পঞ্চ চ॥ ১-৬১-৫২ (২৪৩৭)
অজ্ঞাতমেকং রাষ্ট্রে চ ততো বর্ষং ত্রয়োদশম্।
ততশ্চতুর্দশে বর্ষে যাচমানাঃ স্বকং বসু॥ ১-৬১-৫৩ (২৪৩৮)
নালভন্ত মহারাজ ততো যুদ্ধমবর্তত।
ততস্তে ক্ষত্রমুৎসাদ্য হৎবা দুর্যোধনং নৃপম্॥ ১-৬১-৫৪ (২৪৩৯)
রাজ্যং বিহতভূয়িষ্ঠং প্রত্যপদ্যন্ত পাণ্ডবাঃ।
`ইষ্ট্বা ক্রতূংশ্চ বিবিধানশ্বমেধাদিকান্বহূন্॥ ১-৬১-৫৫ (২৪৪০)
ধৃতরাষ্ট্রে গতে স্বর্গং বিদুরে পঞ্চতাং গতে।
গময়িৎবা ক্রিয়াং স্বর্গ্যাং রাজ্ঞামমিততেজসাম্॥ ১-৬১-৫৬ (২৪৪১)
স্বং ধাম যাতে বার্ষ্ণেয়ে কৃষ্ণদারান্প্ররক্ষ্য চ।
মহাপ্রস্থানিকং কৃৎবা গতাঃ স্বর্গমনুত্তমম্’॥ ১-৬১-৫৭ (২৪৪২)
এবমেতৎপুরাবৃত্তং তেষামক্লিষ্টকর্মণাম্।
ভেদো রাজ্যবিনাশশ্চ জয়শ্চ জয়তাংবর॥ ॥ ১-৬১-৫৮ (২৪৪৩)
ইতি শ্রীমন্মহাভারতে আদিপর্বণি অংশাবতরণপর্বণি একষষ্টিতমোঽধ্যায়ঃ॥ ৬১ ॥
Mahabharata – Adi Parva – Chapter Footnotes
১-৬১-৪ প্রোৎসাহতীব প্রোৎসাহয়তীব। পরিস্পন্দমুদুৎসাহয়তীব মে ইতি পাঠেগুরোর্বক্ত্রপরিস্পন্দস্ৎবং কথাং কথয়েত্যাজ্ঞাবচনং তজ্জন্যা মুৎপ্রীতিঃ সা প্রোৎসাহয়তী॥ ৪ ॥ ১-৬১-৭ নচিরাৎ শীঘ্র। বিদ্বাংসোঽমবন্॥ ১-৬১-১২ প্রমাণকোট্যাং গঙ্গায়াস্তীর্থবিশেষে। বৃকনামা বহুভ ক্ষোঽগ্নিরুদরে যস্য স বৃকোদরঃ॥ ১-৬১-১৭ সংবৃতৈর্গুপ্তৈঃ। বিবৃতৈ প্রকাশৈঃ। দৈবভাব্যর্থরক্ষিতান্ দৈবেনাদৃষ্টেন ভাবী কুরুক্ষয়পাণ্ড বরাজ্যলাভাদিরর্থস্তস্মৈ রক্ষিতান্॥ ১-৬১-১৮ বৃষঃ কর্ণঃ জাতুষং লাক্ষাময়ম্॥ ১-৬১-২০ অভবন্মিত্রমিত্যপি পাঠঃ। ক্ষত্তা বিদুরঃ॥ ১-৬১-২১ তেন ক্ষত্তুর্মন্ত্রণেন॥ ১-৬১-৩১ স্বয়ং বৃণুতে ইতি স্বয়ংবরা তাম্॥ ১-৬১-৩৩ শান্তনবেন ভীষ্মেণ॥ ১-৬১-৩৬ আদায় ভাগশ ইত্যপি পাঠঃ॥ ১-৬১-৪৮ নাতীতি খাণ্ডবদাহ ইতি শেষঃ॥ ১-৬১-৪৯ ব্যবসায়ো বুদ্ধিঃ॥ ১-৬১-৫০ বাণৈর্যুক্তাবিতি শেষঃ। কপিলক্ষণং বানরধ্বজং। যত্র খাণ্ডবদাহে॥ একষষ্টিতমোঽধ্যায়ঃ॥ ৬১ ॥