অনুশাসনপর্ব – অধ্যায় 274
॥ শ্রীঃ ॥
13.274. অধ্যায়ঃ 274
অথ দানধর্মপর্ব ॥ 1 ॥
Mahabharata – Anushaasana Parva – Chapter Topics
ভীষ্মেণ ভগবদ্ধ্যানপূর্বকং স্বশরীরমূর্ধমধ্যোদ্ভেদনেন তেজো জ্বালারূপেণ সর্বাপরোক্ষমাকাশপ্রবেশনেন ক্ষণাদন্তর্ধানম্॥ 1 ॥ ততো ধৃতরাষ্ট্রয়ুধিষ্ঠিরাদিবী রাজবৈভবেন চিতারোপণেন বিধিবদগ্নিনা সমুদ্দীপনম্॥ 2 ॥ ততো গঙ্গামবগাহ্য কৃতোদকেষু যুধিষ্ঠিরাদিষু মূর্তীভূয় জলাদুদ্গত্য ভীষ্মংপ্রতি সকরুণং বিলাপেন শোচন্তীং গঙ্গাংপ্রতি কৃষ্ণাদিভিরাশ্বাসনম্॥ 3 ॥
Mahabharata – Anushaasana Parva – Chapter Text
বৈশম্পায়ন উবাচ।
এবমুক্ৎবা কুরূন্সর্বান্ভীষ্মঃ শান্তনবস্তদা।
তূষ্ণীং বভূব কৌরব্যঃ স মুহূর্তমরিংদম॥ 13-274-1(92332)
ধারয়ামাস চাত্মানং ধারণাসু যথাক্রমম্।
তস্যোর্ধ্বমগমন্প্রাণাঃ সন্নিরুদ্ধা মহাত্মনঃ॥ 13-274-2(92333)
ইদমাশ্চর্যমাসীচ্চ মধ্যে তেষাং মহাত্মনাম্।
সহিতৈর্ঋষিভিঃ সর্বৈস্তদা ব্যাসাদিভিঃ প্রভো॥ 13-274-3(92334)
যদ্যন্মুঞ্চতি গাত্রং হি স শন্তনুসুতস্তদা।
তত্তদ্বিশল্যমভবদ্যোগয়ুক্তস্য বৈ ক্রমাৎ।
ক্ষণেন প্রেক্ষতাং তেষাং বিশল্যঃ সোঽভবত্তদা॥ 13-274-4(92335)
তদ্দৃষ্ট্বা বিস্মিতাঃ সর্বে বাসুদেবপুরোগমাঃ।
সহ তৈর্মুনিভিঃ সর্বৈস্তদা ব্যাসাদিভির্নৃপ॥ 13-274-5(92336)
সন্নিরুদ্ধস্তু তেনাত্মা সর্বেষ্বায়তনেষু চ।
জগাম ভিত্ৎবা মূর্ধানং দিবমভ্যুৎপপাত হ॥ 13-274-6(92337)
দেবদুন্দুভিনাদশ্চ পুষ্পবর্ষৈঃ সহাভবৎ।
সিদ্ধা ব্রহ্মর্ষয়শ্চৈব সাদুসাধ্বিতি হর্ষিতাঃ॥ 13-274-7(92338)
মহোল্কেব চ ভীষ্মস্য মূর্ধদেশাজ্জনাধিপ।
নিঃসৃকত্যাকাশমাবিশ্য ক্ষণেনান্তরধীয়ত॥ 13-274-8(92339)
এবং স রাজশার্দূল নৃপঃ শান্তনবস্তদা।
সময়ুজ্যত লোকৈঃ স্বৈর্ভরতানাং কুলোদ্বহঃ॥ 13-274-9(92340)
ততস্ৎবাদায় দারূণি গন্ধাংশ্চ বিবিধান্বহূন্।
চিতাং চক্রুর্মহাত্মানঃ পাণ্ডবা বিদুরস্তথা।
যুয়ুৎসুশ্চাপি কৌরব্যং প্রেক্ষকাস্ৎবিতরেঽভবন্॥ 13-274-10(92341)
যুধিষ্ঠিরশ্চ গাঙ্গেয়ং ধৃতরাষ্ট্রশ্চ দুঃখিতৌ।
ছাদয়ামাসতুরুভৌ ক্ষৌমের্মাল্যৈশ্চ কৌরবম্॥ 13-274-11(92342)
ধারয়ামাস তস্যাথ যুয়ুৎসুশ্ছত্রমুত্তমম্।
চামরে ব্যজনে শুভ্রে ভীমসেনার্জুনাবুভৌ।
উষ্ণীষে পরিগৃহ্ণীতাং মাদ্রীপুত্রাবুভৌ তথা॥ 13-274-12(92343)
যুধিষ্ঠিরেণ সহিতো ধৃতরাষ্ট্রশ্চ পাদতঃ।
বৃদ্ধা স্ত্রিয়ঃ কৌরবাণাং ভীষ্মং কুরুকুলোদ্বহম্।
তালবৃন্তান্যুপাদায় পর্যবীজন্ত সর্বশঃ॥ 13-274-13(92344)
ততোস্য বিদিবচ্চক্রুঃ পিতৃমেধং মহাত্মনঃ।
যাজকা জুহুবুশ্চাগ্নৌ জগুঃ সামানি সমাগাঃ॥ 13-274-14(92345)
ততশ্চন্দনকাষ্ঠৈশ্চ তথা কালীয়কৈরপি।
কালাগুরুপ্রভৃতিভির্গন্ধৈশ্চোচ্চাবচ্চৈস্তথা॥ 13-274-15(92346)
সমবচ্ছাদ্য গাঙ্গেয়ং সম্প্রজ্বাল্য হুতাশনম্।
অপসব্যমকুর্বন্ত ধৃতরাষ্ট্রমুখাশ্চিতাম্॥ 13-274-16(92347)
সংস্কৃত্য চ কুরুশ্রেষ্ঠং গাঙ্গেয়ং কুরুসত্তমাঃ।
জগ্মুর্ভাগীরথীং পুণ্যামৃষিজুষ্টাং কুরূদ্বহাঃ॥ 13-274-17(92348)
অনুগম্যমানা ব্যাসেন নারদেনাসিতেন চ।
কৃষ্ণেন ভরতস্ত্রীভির্যে চ পৌরাঃ সমাগতাঃ॥ 13-274-18(92349)
উদকং চক্রিরে সর্বে গাঙ্গেয়স্য মহাত্মনঃ।
বিধিবৎক্ষত্রিয়শ্রেষ্ঠাঃ স চ সর্বো জনস্তদা॥ 13-274-19(92350)
ততো ভাগীরথী দেবী তনয়স্যোদকে কৃতে।
উত্থায় সলিলাত্তস্মাদ্রুদতী শোকবিহ্বলা।
পরিদেবয়তী তত্র কৌরকবানভ্যভাষত॥ 13-274-20(92351)
নিবোধত যথাবৃত্তমুচ্যমানং ময়া নৃপাঃ।
রাজবৃত্তেন সম্পন্নঃ প্রজ্ঞয়াভিজনেন চ।
সৎকর্তা কুরুবৃদ্ধানাং পিতৃভক্তো দৃঢব্রতঃ॥ 13-274-21(92352)
জামদগ্ন্যেন রামেণ যঃ পুরা ন পরাজিতঃ।
দিব্যৈরস্ত্রৈর্মহাবীর্যঃ স হতোঽদ্য শিখণ্ডিনা॥ 13-274-22(92353)
অশ্মসারময়ং নূনং হৃদয়ং মম পার্থিবাঃ।
অপশ্যন্ত্যাঃ প্রিয়ং পুত্রং যন্ন দীর্যতি মেঽদ্য বৈ॥ 13-274-23(92354)
সমেতং পার্থিবং ক্ষত্রং কাশিপুর্যাং স্বয়ংপরে।
বিজিত্যৈকরথেনাজৌ কন্যাশ্চায়ং জহারহ॥ 13-274-24(92355)
যস্য নাস্তি বলে তুল্যঃ পৃথিব্যামপি কশ্চন।
হতং শিখণ্ডিনা শ্রুৎবা যন্ন দীর্যতি মে মনঃ॥ 13-274-25(92356)
জামদগ্ন্যঃ কুরুক্ষেত্রে যুধি যেন মহাত্মনা।
পীডিতো নাতিয়ত্নেন স হতোঽদ্য শিখণ্ডিনা॥ 13-274-26(92357)
এবংবিধং বহু তদা বিলন্পতীং নহানদীম্।
আশ্বাসয়ামাস তদা সাম্না দামোদরো বিভুঃ॥ 13-274-27(92358)
সমাশ্বসিহি ভদ্রে ৎবং মা শুচঃ শুভদর্শনে।
গতঃ স পরমং লোকং তব পুত্রো ন সংশয়ঃ॥ 13-274-28(92359)
বসুরেষ মহাতেজাঃ শাপদোষেণ শোভনে।
মানুষৎবমনুপ্রাপ্তো নৈনং শোচিতুমর্হসি॥ 13-274-29(92360)
স এষ ক্ষত্রধর্মেণ যুধ্যমানো রণাজিরে।
ধনংজয়েন নিহতো নৈষ দেবি শিখণ্ডিনা॥ 13-274-30(92361)
ভীষ্মং হি কুরুশার্দূলমুদ্যতেষু মহারণে।
ন শক্তঃ সংয়ুগে হন্তুং সাক্ষাদপি শতক্রতুঃ॥ 13-274-31(92362)
স্বচ্ছন্দতস্তব সুতো গতঃ স্বর্গং শুভাননে।
ন শক্তা বিনিহন্তুং হি রণে তং সর্বদেবতাঃ॥ 13-274-32(92363)
তস্মান্মা ৎবং সরিচ্ছ্রেষ্ঠে শোচস্য কুরুনন্দনম্।
বসূনেষ গতো দেবি পুত্রস্তে বিজ্বরা ভব॥ 13-274-33(92364)
বৈশম্পায়ন উবাচ। 13-274-34x(7729)
ইত্যুক্তা সা তু কৃষ্ণেন ব্যাসেন তু সরিদ্বরা।
ত্যক্ৎবা শোকং মহারাজ স্বং বার্যবততার হ॥ 13-274-34(92365)
সৎকৃত্য তে তাং সরিতং ততঃ কৃষ্ণমুখা নৃপ।
অনুজ্ঞাতাস্তয়া সর্বে ন্যবর্তন্ত জনাধিপাঃ॥ ॥ 13-274-35(92366)
ইতি শ্রীমন্মহাভারতে শতসাহস্রিকায়াং সংহিতায়াং বৈয়াসিক্যাং অনুশাসনপর্বণি ভীষ্মস্বর্গারোহণপর্বণি চতুঃসপ্তত্যধিকদ্বিশততমোঽধ্যায়ঃ॥ 274 ॥ ইতি অনুশাসনপর্ব সমাপ্তম্॥ 13 ॥
Mahabharata – Anushaasana Parva – Chapter Footnotes
13-274-2 সমাদধৎস্বমাত্মানং ধারণানুক্রমস্থিতঃ। ইতি ক.ধ.পাঠঃ॥ 13-274-12 উষ্ণীষে কিরীটশিরোবেষ্টে॥ 13-274-21 সমর্থঃ কুরুবৃদ্ধানামিতি ট.থ.পাঠঃ॥ 13-274-23 দৃষ্টাপ্যেবংবিধং পুত্রং ন দীর্যতি সহস্রধেতি ক.ট.থ.পাঠঃ॥ 13-274-35 অনুজ্ঞাপ্য চ তে সর্বে ইতি ট.থ.পাঠঃ॥
অতঃ পরমাশ্বমেধিকং পর্ব ভবিষ্যতি॥ 14 ॥ তস্যায়মাদ্যঃ শ্লোকঃ॥ বৈশম্পায়ন উবাচ। কৃতোদকং তু রাজনং ধৃতরাষ্ট্রং যুধিষ্ঠিরঃ। পুরস্কৃত্য মহাবাহুরুত্ততারাকুলেন্দ্রিয়ঃ॥ ইদং অনুশাসনপর্ব কুম্ভঘোণস্থেন টী.আর্.কৃষ্ণাচার্যেণ টী.আর্.ব্যাসাচার্যেণ চ মুম্বয়্যাং নির্ণয়সাগরমুদ্রায়ন্ত্রে মুদ্রাপিতম্। শকাব্দাঃ 1831 সন