অনুশাসনপর্ব – অধ্যায় 208
॥ শ্রীঃ ॥
13.208. অধ্যায়ঃ 208
অথ দানধর্মপর্ব ॥ 1 ॥
Mahabharata – Anushaasana Parva – Chapter Topics
ঈশ্বরেণ পার্বতীংপ্রতি বর্ণাশ্রমধর্মকথনম্॥ 1 ॥
Mahabharata – Anushaasana Parva – Chapter Text
মহেশ্বর উবাচ।
হন্ত তে কথয়িষ্যামি যত্তে দেবি মনঃপ্রিয়ম্।
শৃণু তৎসর্বমখিলং ধর্মং বর্ণাশ্রমাশ্রিতম্॥ 13-208-1(89395)
ব্রাহ্মণাঃ ক্ষত্রিয়া বৈশ্যাঃ শুদ্রাশ্চেতি চতুর্বিধম্।
ব্রাহ্মণা বিহিতাঃ পূর্বং লোকতন্ত্রমভীপ্সতা।
কর্মাণি চ তদর্হাণি শাস্ত্রেষু বিহিতানি বৈ॥ 13-208-2(89396)
যদীদমেকবর্ণং স্যাজ্জগৎসর্বং বিনশ্যতি।
সহৈব দেবি বর্ণানি চৎবারি বিহিতান্যতঃ॥ 13-208-3(89397)
মুখতো ব্রাহ্মণাঃ সৃষ্টস্তস্মাত্তে বাগ্বিশারদাঃ।
বাহুভ্যাং ক্ষত্রিয়াঃ সৃষ্টাস্তস্মাত্তে বাহুগর্বিতাঃ॥ 13-208-4(89398)
ঊরুভ্যামুদ্গতা বৈশ্যাস্তস্মাদ্বার্তোপজীবিনঃ।
শূদ্রাশ্চ পাদতঃ সৃষ্টাস্তস্মাত্তে পরিচাকাঃ॥ 13-208-5(89399)
তেষাং ধর্মাংশ্চ কর্মাণি শৃণু দেবি সমাহিতা।
বিপ্রাঃ কৃতা ভূমিদেবা লোকানাং ধারণে কৃতাঃ।
তে কৈশ্চিন্নাবমন্তব্যা ব্রাহ্মণা হিতমিচ্ছুভিঃ॥ 13-208-6(89400)
যদি তে ব্রাহ্মণা ন স্যুর্দানয়োগবহাঃ সদা।
উভয়োর্লোকয়োর্দেবি স্থিতির্ন স্যাৎসমাসতঃ॥ 13-208-7(89401)
লোকেষু দুর্লভং কিংতু ব্রাহ্মণৎবমিতি স্মৃতম্।
অবুধো বা দরিদ্রো বা পূজনীয়ঃ সদৈব সঃ॥ 13-208-8(89402)
ব্রাহ্মণান্যোঽবমন্যেত নিন্দেচ্চ ক্রোধয়েচ্চ বা।
প্রহরেত হরেদ্বাঽপি ধনং তেষাং নরাধমঃ॥ 13-208-9(89403)
কারয়েদ্ধীনকর্মণি কামলোভবিমোহনাৎ।
স চ মামবমন্যেত মাং ক্রোধয়তি নিন্দতি॥ 13-208-10(89404)
মামেব প্রহরেন্মূঢো মদ্ধনস্যাপহারকঃ।
মামেব প্রেষণং কৃৎবা নিদন্তে মূঢচেতনঃ॥ 13-208-11(89405)
স্বাধ্যায়ো যজনং দানং তস্য ধর্ম ইতি স্থিতিঃ।
কর্মণ্যধ্যাপনং চৈব যাজনং চ প্রতিগ্রহঃ।
সত্যং শান্তিস্তপঃ শৌচং তস্য ধর্মঃ সনাতনঃ॥ 13-208-12(89406)
বিক্রয়ো রসধান্যানাং ব্রাহ্মণস্য বিগর্হিতঃ।
অনাপদি চ শূদ্রান্নং বৃষলীসঙ্গ্রহস্তথা॥ 13-208-13(89407)
তপ এব সদা ধর্মো ব্রাহ্মণস্য ন সংশয়ঃ।
স তু ধর্মার্থমুৎপন্নঃ পূর্বং ধাত্রা তপোবলাৎ॥ 13-208-14(89408)
তস্যোপনয়নং ধর্মো নিত্যং চোদকধারণম্।
শাস্ত্রস্য শ্রবণং ধর্মো দেবব্রতনিষেবণম্॥ 13-208-15(89409)
অগ্নিকার্যং পরো ধর্মো নিত্যযজ্ঞোপবীতিতা।
শূদ্রান্নবর্জনং ধর্মো ধর্মঃ সৎপথসেবনম্।
ধর্মো নিত্যোপবাসিৎবং ব্রহ্মচর্যং পরং তথা॥ 13-208-16(89410)
গৃহস্থস্য পরো ধর্মো গৃহস্থাশ্রমিণস্তথা।
গৃহসম্মার্জনং ধর্ম আলেপনবিধিস্তথা॥ 13-208-17(89411)
অতিথিপ্রিয়তা ধর্মো ধর্মস্ত্রেতাগ্নিধারণম্।
ইষ্টির্বা পশুবন্ধাশ্চ বিধিপূর্বং পরংতপ॥ 13-208-18(89412)
দম্পত্যোঃ সমশীলৎবং ধর্মো বৈ গৃহমেধিনাম্।
এবং দ্বিজন্মনো ধর্মো গার্হস্থ্যে ধর্মধারণম্॥ 13-208-19(89413)
যস্তু ক্ষত্রগতো ধর্মস্ৎবয়া দেবি প্রয়োদিতঃ।
তমহং তে প্রবক্ষ্যামি শৃণু দেবি সমাহিতা॥ 13-208-20(89414)
ক্ষত্রিয়াস্তু ততো দেবি দ্বিজানাং পালনে স্মৃতাঃ।
যদি নিঃক্ষত্রিয়ো লোকো জগৎস্যাদধরোত্তরম্॥ 13-208-21(89415)
রক্ষণাৎক্ষত্রিয়ৈরেব জগদ্ভবতি শাশ্বতম্।
তস্যাপ্যধ্যযনং দানং যজনং ধর্মতঃ স্মৃতম্॥ 13-208-22(89416)
দীনানাং রক্ষণং চৈব পাপনামনুশাসনম্।
সতাং সম্পোষণং চৈব কর্মষণ্মার্গজীবনম্॥ 13-208-23(89417)
উৎসাহঃ শস্ত্রজীবিৎবং তস্য ধর্মঃ সনাতনঃ।
ভৃত্যানাং ভরণং ধর্মঃ কৃতে কর্মণ্যমোঘতা॥ 13-208-24(89418)
সম্যগ্গুণয়ুতো ধর্মো ধর্মঃ পৌরহিতক্রিয়া।
ব্যবহারস্থিতির্নিত্যং গুণয়ুক্তো মহীপতিঃ॥ 13-208-25(89419)
আর্তবিত্তপ্রদো রাজা ধর্মং প্রাপ্নোত্যনুত্তমম্।
এবং তৈর্বিহিতঃ পূর্বৈর্ধর্মঃ কর্মবিধানতঃ॥ 13-208-26(89420)
তথৈব দেবি বৈশ্যাশ্চ লোকয়াত্রাহিতাঃ স্মৃতাঃ।
অন্যে তানুপজীবন্তি প্রত্যক্ষফলদা হি তে॥ 13-208-27(89421)
যদি ন স্যুস্তথা বৈশ্যা ন ভবেয়ুস্তথা পরে।
তেষামধ্যযনং দানং গজনং ধর্ম উচ্যতে॥ 13-208-28(89422)
বৈশ্যস্য সততং ধর্মঃ পাশুপাল্যং কৃষিস্তথা।
অগ্নিহোত্রপরিস্পন্দাস্ত্রয়ো বর্ণা দ্বিজাতয়ঃ॥ 13-208-29(89423)
বাণিজ্যং সৎপথে স্থানমাতিথেয়ৎবমেব চ।
বিপ্রাণাং স্বাগতন্যায়ো বৈশ্যধর্মঃ সনাতনঃ॥ 13-208-30(89424)
তিলগন্ধরসাশ্চৈব ন বিক্রেয়াঃ কথঞ্চন।
বণিক্পথমুপাসদ্ভির্বৈশ্যৈর্বৈশ্যপথি স্থিতৈঃ॥ 13-208-31(89425)
সর্বাতিথ্যং ত্রিবর্গস্য যথাশক্তি দিবানিশম্।
এবং তে বিহিতা দেবি লোকয়াত্রা স্বয়ংভুবা॥ 13-208-32(89426)
তথৈব শূদ্রা বিহিতাঃ সর্বধর্মপ্রসাধকাঃ।
শূদ্রাশ্চ যদি তে ন স্যুঃ কর্মকর্তা ন বিদ্যতে॥ 13-208-33(89427)
ত্রয়ঃ পূর্বে শূদ্রমূলাঃ সর্বে কর্মকরাঃ স্মৃতাঃ।
ব্রাহ্মণাদিষু শুশ্রূষা দাসধর্ম ইতি স্মৃতঃ॥ 13-208-34(89428)
বার্তা চ কারুকর্মাণি শিল্যং নাট্যং তথৈব চ।
অহিংসকঃ শুভাচারো দেবতদ্বিজবন্দকঃ॥ 13-208-35(89429)
শূদ্রো ধর্মফলৈরিষ্টৈঃ স্বধর্মেণোপপদ্যতে।
এবমাদি তথাঽন্যচ্চ শূদ্রধর্ম ইতি স্মৃতঃ॥ 13-208-36(89430)
তেঽপ্যেবং বিহিতা লোকে কর্ময়োগ্যাঃ শুভাননে॥ 13-208-37(89431)
এবং চতুর্ণাং বর্ণানাং বর্ণলোকাঃ পরত্র চ।
বিহিতাশ্চ তথা দৃষ্টা যথাবদ্ধর্মচারিণি॥ 13-208-38(89432)
এষ বর্ণাশ্রয়ো ধর্মঃ কর্ম চৈব তদর্পণম্।
কথিতং শ্রোতুকামায়াঃ কিং ভূয়ঃ শ্রোতুমিচ্ছসি॥ 13-208-39(89433)
উমোবাচ। 13-208-40x(7461)
ভগবন্দেবদেবেশ নমস্তে বৃষভধ্বজ।
শ্রোতুমিচ্ছাম্যহং দেব ধর্মমাশ্রমিণাং বিভো॥ 13-208-40(89434)
মহেশ্বর উবাচ। 13-208-41x(7462)
তথাঽঽশ্রমগতং ধর্মং শৃণু দেবি সমাহিতা।
আশ্রমাণাং তু যো ধর্মঃ ক্রিয়তে ব্রহ্মবাদিভিঃ॥ 13-208-41(89435)
গৃহস্থঃ প্রবরস্তেষাং গার্হস্থ্যং ধর্মমাশ্রিতঃ।
পঞ্চয়জ্ঞক্রিয়াশৌচং দারতুষ্টিরতন্দ্রিতা॥ 13-208-42(89436)
ঋতুকালাভিগমনং দানয়জ্ঞতপাংসি চ।
অবিপ্রবাসস্তস্যেষ্টঃ স্বাধ্যায়শ্বাগ্নিপূর্বকম্॥ 13-208-43(89437)
অতিথীনামাভিমুখ্যং শক্ত্যা চেষ্টনিমন্ত্রণম্।
অনুগ্রহশ্চ সর্বেষাং মনোবাক্কায়কর্মভিঃ॥ 13-208-44(89438)
এবমাদি শুভং চান্যৎকুর্যাত্তদ্বৃত্তিমান্গৃহী।
এবং সঞ্চরতস্তস্য পুণ্যলোকা ন সংশয়ঃ। 13-208-45(89439)
তথৈব বানপ্রস্থস্য ধর্মাঃ প্রোক্তাঃ সনাতনাঃ॥ 13-208-46(89440)
গৃহবাসং সমুৎসৃকজ্য নিশ্চিত্যৈকমনাঃ শুভৈঃ।
বন্যৈরেব তদাহারৈঃ বর্তয়েদিতি চ স্থিতিঃ॥ 13-208-47(89441)
ভূমিশয়্যা জটাশ্মশ্রুচর্মবল্কলধারণম্।
দেবতাতিথিসৎকারো মহাকৃচ্ছ্রাভিপূজনম্॥ 13-208-48(89442)
অগ্নিহোত্রং ত্রিষবণং নিত্যং তস্য বিধীয়তে।
ব্রহ্মচর্যং ক্ষমা শৌচং তস্য ধর্মঃ সনাতনঃ।
এবং স বিগতে প্রাণে দেবলোকে মহীয়তে॥ 13-208-49(89443)
যতিধর্মাস্তথা দেবি গৃহাংস্ত্যক্ৎবা যতস্ততঃ।
আকিঞ্চন্যমনারম্ভঃ সর্বতঃ শৌচমার্জবম্॥ 13-208-50(89444)
সর্বত্র ভৈক্ষচর্যা চ সর্বত্রৈব বিবাসনম্।
সদা ধ্যানপরৎবং চ দেহশুদ্ধিঃ ক্ষমা দয়া।
তৎবানুগতবুদ্ধিৎবং তস্য ধর্মবিধির্ভবেৎ॥ 13-208-51(89445)
ব্রহ্মচারী চ যো দেবি জন্মপ্রভৃতি ভিক্ষিতঃ।
ব্রহ্মচর্যপরো ভূৎবা সাধয়েদ্গুরুমাত্মনঃ।
সর্বকালেষু সর্বত্র গুরুপূজাং সমাচরেৎ॥ 13-208-52(89446)
ভৈক্ষচর্যাগ্নিকার্যং চ সদা জলনিষেবণম্।
স্বাধ্যায়ঃ সততং তস্য এষ ধর্মঃ সনাতনঃ॥ 13-208-53(89447)
তস্য চেষ্টা তু গুর্বর্থমাপ্রাণান্তমিতি স্থিতিঃ।
গুরোরভাবে তৎপুত্রে গুরুবদ্বৃত্তিমাচরেৎ॥ 13-208-54(89448)
এবং সোপ্যমলাঁল্লোকান্ব্রাহ্মণঃ প্রতিপদ্যতে।
এষ তে কথিতো দেবি ধর্মশ্চাশ্রমবাসিনাম্॥ 13-208-55(89449)
চতুর্ণামাশ্রমো যুক্তো লোক ইত্যেব বিদ্যতে।
কথিতং তে সমাসেন কিং ভূয়ঃ শ্রোতুমিচ্ছসি॥ ॥ 13-208-56(89450)
ইতি শ্রীমন্মহাভারতে অনুশাসনপর্বণি দানধর্মপর্বণি অষ্টোত্তরদ্বিশততমোঽধ্যায়ঃ॥ 208 ॥
Mahabharata – Anushaasana Parva – Chapter Footnotes
7-208-9 ব্রাহ্মণোঽভিহিতা শুচিঃ ইতি ক.পাঠঃ॥ 7-208-55 আয়ুষ্কামো দ্বিজো দেবি ধারয়েদ্ভস্য নিৎপশঃ। মোক্ষকামী চ যো বিপ্রো ভূতিকামোথবা পুনঃ। পুনরাবৃত্তিরহিতং লোকং সম্প্রতিপদ্যতে। ইতি থ.পাঠঃ॥