অনুশাসনপর্ব – অধ্যায় 142
॥ শ্রীঃ ॥
13.142. অধ্যায়ঃ 142
অথ দানধর্মপর্ব ॥ 1 ॥
Mahabharata – Anushaasana Parva – Chapter Topics
বনে বিচরতাং সপ্তর্ষীণাং পরিব্রাড্রূপধারিণেন্দ্রেণ সমাগমঃ॥ 1 ॥ অরুন্ধত্যা তস্যাতিপীনাঙ্গৎবে কারণং পৃষ্টৈস্তৈস্তৎকথনঃ॥ 2 ॥ তথা কামপি পদ্মিনীমবলোকিতবদ্ভিস্তৈর্বিসগ্রহণায় তৎসমীপগমনম্॥ 3 ॥ তত্র তদ্রক্ষিণ্যা বৃষাদর্ভিনির্মিতকত্যযা স্বস্বনামনির্বচনেন সরঃপ্রবেশং চোদিসৈস্তাংপ্রতি তন্নির্বচনম্॥ 4 ॥ ভিক্ষুরূপিণেন্দ্রেণ সকৃৎস্বনামনির্বচনেঽপি পুন পৃচ্ছন্ত্যাঃ কৃত্যায়া দণ্ডেন মারণপূর্বকমৃষীন্প্রতি স্বস্বরূপপ্রকটনম্॥ 5 ॥
Mahabharata – Anushaasana Parva – Chapter Text
ভীষ্ম উবাচ।
অথাত্রিপ্রমুখা রাজন্বনে তস্মিন্মহর্ষয়ঃ।
ব্যচরন্ভক্ষয়ন্তো বৈ মূলানি চ ফলানি চ॥ 13-142-1(86872)
অথাপশ্যন্সুপীনাংসপাণিপাদমুখোদরম্।
পরিব্রজন্তং স্থূলাঙ্গং পরিব্রাজং শুনস্সখম্॥ 13-142-2(86873)
অরুন্ধতী তু তং দৃষ্ট্বা সর্বাঙ্গোপচিতং শুভম্।
ভবিতারো ভবন্তো বৈ নৈবমিত্যব্রবীদৃষীন্॥ 13-142-3(86874)
বসিষ্ঠ উবাচ। 13-142-4x(7212)
নৈতস্যেহ যথাঽস্মাকমগ্নিহোত্রমনির্হুতম্।
সায়ং প্রাতশ্চ হোতব্যং তেন পীবাঞ্শুনস্সখঃ॥ 13-142-4(86875)
অত্রিরুবাচ। 13-142-5x(7213)
নৈতস্যেহ যথাঽস্মাকং ক্ষুধয়া বীর্যমাহতম্।
কৃচ্ছ্রাধীতং প্রনষ্টং চ তেন পীবাঞ্ছুনস্সখঃ॥ 13-142-5(86876)
বিশ্বামিত্র উবাচ। 13-142-6x(7214)
নৈতস্যেহ যথাঽস্মাকং শশ্বচ্ছাস্ত্রকৃতো জ্বরঃ।
অলসঃ ক্ষুৎপরো মূর্খস্তেন পীবাঞ্শুনস্সখঃ॥ 13-142-6(86877)
জমদগ্নিরুবাচ। 13-142-7x(7215)
নৈতস্যেহ যথাঽস্মাকং ভক্তমিন্ধনমেব চ।
সঞ্চিত্যং বার্ষিকং চিত্তে তেন পীবাঞ্শুনস্সখঃ॥ 13-142-7(86878)
কশ্যপ উবাচ। 13-142-8x(7216)
নৈতস্যেহ যথাঽস্মাকং চৎবারশ্চ সহোদরাঃ।
দেহিদেহীতি ভিক্ষন্তি তেন পীবাঞ্শুনস্সখঃ॥ 13-142-8(86879)
ভরদ্বাজ উবাচ। 13-142-9x(7217)
নৈতস্যেহ যথাঽস্মাকং ব্রহ্মবন্ধোরচেতসঃ।
শোকো ভার্যাপবাদেন তেন পীবাঞ্শুনস্সখঃ॥ 13-142-9(86880)
গৌতম উবাচ। 13-142-10x(7218)
নৈতস্যেহ যথাঽস্মাকং ত্রিকৌশেয়ং চ রাঙ্কবম্।
একৈকং বৈ ত্রিবর্ষীয়ং তেন পীবাঞ্শুনস্সখঃ॥ 13-142-10(86881)
ভীষ্ম উবাচ। 13-142-11x(7219)
অথ দৃষ্ট্বা পরিব্রাট্ স তান্মহর্ষীঞ্শুনস্সখঃ।
অভিবাদ্য যথান্যায়ং পাণিস্পর্শমথাচরৎ॥ 13-142-11(86882)
পরিচর্যাং বনে তাং তু ক্ষুৎপ্রতীকারকাঙ্ক্ষিণঃ।
অন্যোন্যেন নিবেদ্যাথ প্রাতিষ্ঠন্ত সহৈব তে॥ 13-142-12(86883)
একনিশ্চয়কার্যাশ্চ ব্যচরন্ত বনানি তে।
আদদানাঃ সমুদ্ধৃত্য মূলানি চ ফলানি চ॥ 13-142-13(86884)
কদাচিদ্বিচরন্তস্তে বৃক্ষৈরবিরলৈর্বৃতাম্।
শুচিপূর্ণপ্রসন্নোদাং দদৃশুঃ পদ্মিনীং শুভাম্॥ 13-142-14(86885)
বালাদিত্যবপুঃপ্রখ্যৈঃ পুষ্করৈরুপশোভিতাম্।
বৈডূর্যবর্ণসদৃশৈঃ পদ্মপত্রৈরথাবৃতাম্॥ 13-142-15(86886)
নানাবিধৈশ্চ বিহগৈর্জলপ্রবরসেবিভিঃ।
একদ্বারামনাদেয়াং সূপতীর্থামকর্দমাম্॥ 13-142-16(86887)
বৃষাদর্ভিপ্রয়ুক্তা তু কৃত্যা বিকৃতদর্শনা।
যাতুধানীতি বিখ্যাতা পদ্মিনীং তামরক্ষত॥ 13-142-17(86888)
শুনস্সখসহায়াস্তু বিসার্থং তে মহর্ষয়ঃ।
পদ্মিনীমভিজগ্মুস্তে সর্বে কৃত্যাভিরক্ষিতাম্॥ 13-142-18(86889)
ততস্তে যাতুধানীং তাং দৃষ্ট্বা বিকৃতদর্শনাম্।
স্থিতাং কমলিনীতীরে কৃত্যামূচুর্মহর্ষয়ঃ॥ 13-142-19(86890)
একা তিষ্ঠসি কা চ ৎবং কস্যার্থে কিং প্রয়োজনম্।
পদ্মিনীতীরমাশ্রিত্য ব্রূহি ৎবং কিং চিকীর্ষসি॥ 13-142-20(86891)
যাতুধান্যুবাচ। 13-142-21x(7220)
যাঽস্মি কাঽস্ম্যনুয়োগো মে ন কর্তব্যঃ কথঞ্চন।
আরক্ষিণীং মা পদ্মিন্যা বিত্ত সর্বে তপোধনাঃ॥ 13-142-21(86892)
ঋষয় ঊচুঃ। 13-142-22x(7221)
সর্ব এব ক্ষুধার্তাঃ স্ম ন চান্যৎকিংচিদস্তি নঃ।
ভবত্যাঃ সম্মতে সর্বে গৃহ্ণীয়াম বিসান্যুত॥ 13-142-22(86893)
যাতুধান্যুবাচ। 13-142-23x(7222)
সময়েন বিসানীতো গৃহ্ণীধ্বং কামকারতঃ।
একৈকো নাম মে প্রোক্ৎবা ততো গৃহ্ণীত মাচিরম্॥ 13-142-23(86894)
ভীষ্ম উবাচ। 13-142-24x(7223)
বিজ্ঞায় যাতুধানীং তাং কৃত্যমৃষিবধৈষিণীম্।
অত্রিঃ ক্ষুধা পরীতাত্মা ততো বচনমব্রবীৎ॥ 13-142-24(86895)
অত্ত্রিরুবাচ। 13-142-25x(7224)
অরাত্ত্রিরত্ত্রিঃ সা রাত্রির্যাং নাধীতে ত্রিরদ্য বৈ।
অরাত্রিরত্রিরিত্যেব নাম মে বিদ্ধি শোভনে॥ 13-142-25(86896)
যাতুধান্যুবাচ। 13-142-26x(7225)
যথোদাহৃতমেতত্তে ৎবয়া নাম মহাদ্যুতে।
দুর্ধার্যমেতন্মনসা গচ্ছাঽবতর পদ্মিনীম্॥ 13-142-26(86897)
বসিষ্ঠ উবাচ। 13-142-27x(7226)
বসিষ্ঠোঽস্মি বরিষ্ঠোঽস্মি বসে বাসগৃহেষ্বপি।
বরিষ্ঠৎবাচ্চ বাসাচ্চ বসিষ্ঠ ইতি বিদ্দি মাম্॥ 13-142-27(86898)
যাতুধান্যুবাচ। 13-142-28x(7227)
নাম নৈরুক্তমেতত্তে দুঃখব্যাভাষিতাক্ষরম্।
নৈতদ্ধারয়িতুং শক্যং গচ্ছাঽবতর পদ্মিনীম্॥ 13-142-28(86899)
কশ্যপ উবাচ। 13-142-29x(7228)
কুলংকুলং চ কুবমঃ কুবমঃ কশ্যপো দ্বিজঃ।
কাশ্যঃ কাশনিকাশৎবাদেতন্মে নাম ধারয়॥ 13-142-29(86900)
যাতুধান্যুবাচ। 13-142-30x(7229)
যথোদাহৃতমেতত্তে ময়ি নাম মহাদ্যুতে।
দুর্ধার্যমেতন্মনসা গচ্ছাঽবতর পদ্মিনীম্॥ 13-142-30(86901)
ভরদ্বাজ উবাচ। 13-142-31x(7230)
ভরেঽসুতান্ভরে পোষ্যান্ভরে দেবান্ভরে দ্বিজান্।
ভরে ভার্যামহং ব্যাজাদ্ভরদ্বাজোঽস্মি শোভনে॥ 13-142-31(86902)
যাতুধান্যুবাচ। 13-142-32x(7231)
নাম নৈরুক্তমেতত্তে দুঃখব্যাভাষিতাক্ষরম্।
নৈতদ্ধারয়িতুং শক্যং গচ্ছাঽবতর পদ্মিনীম্॥ 13-142-32(86903)
গৌতম উবাচ। 13-142-33x(7232)
গোদমো দমতোঽধূমোঽদমস্তে সমদর্শনাৎ।
বিদ্ধি মাং গোতমং কৃত্যে যাতুধানি নিবোধ মাং 13-142-33(86904)
যাতুধান্যুবাচ। 13-142-34x(7233)
যথোদাহৃতমেতত্তে ময়ি নাম মহামুনে।
নৈতদ্ধারয়িতুং শক্যং গচ্ছাঽবতর পদ্মিনীম্॥ 13-142-34(86905)
বিশ্বামিত্র উবাচ। 13-142-35x(7234)
বিশ্বেদেবাশ্চ মে মিত্রং মিত্রমস্মি গবাং তথা।
বিশ্বামিত্র ইতি খ্যাতং যাতুধানি নিবোধ মাং 13-142-35(86906)
যাতুধান্যুবাচ। 13-142-36x(7235)
নাম নৈরুক্তমেতত্তে দুঃখব্যাভাষিতাক্ষরম্।
নৈতদ্ধারয়িতুং শক্যং গচ্ছাঽবতর পদ্মিনীম্॥ 13-142-36(86907)
জমদগ্নিরুবাচ। 13-142-37x(7236)
জাজমদ্যজজানেঽহং জিজাহীহ জিজায়িষি।
জমদগ্নিরিতি খ্যাতং ততো মাং বিদ্ধি শোভনে॥ 13-142-37(86908)
যাতুধান্যুবাচ। 13-142-38x(7237)
যথোদাহৃতমেতত্তে ময়ি নাম মহামুনে।
নৈতদ্ধারয়িতুং শক্যং গচ্ছাঽবতর পদ্মিনীম্॥ 13-142-38(86909)
অরুন্ধত্যুবাচ। 13-142-38x(7238)
ধরান্ধরিত্রীং বসুধাং ভর্তুস্তিষ্ঠাম্যনন্তরম্।
মনোঽনুরুন্ধতী ভর্তুরিতি মাং বিদ্ধ্যরুন্ধতীম্॥ 13-142-39(86910)
যাতুধান্যুবাচ। 13-142-40x(7239)
নামনৈরুক্তমেতত্তে দুঃখব্যাভাষিতাক্ষরম্।
নৈতদ্ধারয়িতুং শক্যং গচ্ছাঽবতর পদ্মিনীম্॥ 13-142-40(86911)
গণ্ডোবাচ। 13-142-41x(7240)
বক্ত্রৈকদেশে গণ্ডেতি ধাতুমেতং প্রচক্ষতে।
তেনোন্নতেন গণ্ডেতি বিদ্ধি মাঽনলসম্ভবে॥ 13-142-41(86912)
যাতুধান্যুবাচ। 13-142-42x(7241)
নামনৈরুক্তমেতত্তে দুঃখব্যাভাষিতাক্ষরম্।
নৈতদ্ধারয়িতুং শক্যং গচ্ছাবতর পদ্মিনীম্॥ 13-142-42(86913)
পশুসখ উবাচ। 13-142-43x(7242)
পশূন্যঞ্জামি দৃষ্ট্বাঽহং পশূনাং চ সদা সখা।
গৌণং পশুসখেত্যেবং বিদ্ধি মামগ্নিসম্ভবে॥ 13-142-43(86914)
যাতুধান্যুবাচ। 13-142-44x(7243)
নামনৈরুক্তমেতত্তে দুঃখব্যাভাষিতাক্ষরম্।
নৈতদ্ধারয়িতুং শক্যং গচ্ছাঽবতর পদ্মিনীম্॥ 13-142-44(86915)
শুনঃসখ উবাচ। 13-142-45x(7244)
এভিরুক্তং যথা নাম নাহং বক্তুমিহোৎসহে।
শুনঃসখসখায়ং মাং যাতুধান্যুপধারয়॥ 13-142-45(86916)
যাতুধান্যুবাচ। 13-142-46x(7245)
নাম ন ব্যক্তমুক্তং বৈ বাক্যং সংদিগ্ধয়া গিরা।
তস্মাৎসকৃদিদানীং ৎবং ব্রূহি যন্নাম তে দ্বিজ॥ 13-142-46(86917)
শুনঃসখ উবাচ। 13-142-47x(7246)
সকৃদুক্তং ময়া নাম ন গৃহীতং ৎবয়া যদি।
তস্মাত্ত্রিদণ্ডাভিহতা গচ্ছ ভস্মেতি মাচিরম্॥ 13-142-47(86918)
ভীষ্ম উবাচ। 13-142-48x(7247)
সা ব্রহ্মদণ্ডকল্পেন তেন মূর্ধ্নি হতা তদা।
কৃত্যা পপাত মেদিন্যাং ভস্ম সাচ জগাম হ॥ 13-142-48(86919)
শুনঃসখশ্চ হৎবা তাং যাতুধানীং মহাবলাম্।
ভুবি ত্রিদণ্ডং বিষ্টভ্য শাদ্বলে সমুপাবিশৎ॥ 13-142-49(86920)
ততস্তে মুনয়ঃ সর্বেঃ পুষ্করাণি বিসানি চ।
যথাকামমুপাদায় সমুত্তস্থুর্মুদাঽন্বিতাঃ॥ 13-142-50(86921)
শ্রমেণ মহতা যুক্তাস্তে বিসানি কলাপশঃ।
তীরে নিক্ষিপ্য পদ্মিন্যাস্তর্পণং চক্রুরম্ভসা॥ 13-142-51(86922)
অথোত্থায় জলাত্তস্মাৎসর্বে তে সমুপাগমন্।
নাপশ্যংশ্চাপি তে তানি বিসানি পুরুষর্ষভাঃ॥ 13-142-52(86923)
ঋষয় ঊচুঃ। 13-142-53x(7248)
কেন ক্ষুধাভিভূতানামস্মাকং পাপকর্মণাম্।
নৃশংসেনাপনীতানি বিসান্যাহারকাঙ্ক্ষিণাম্॥ 13-142-53(86924)
ভীষ্ম উবাচ। 13-142-54x(7249)
তে শঙ্কমানাস্ৎবন্যোন্যং পপ্রচ্ছুর্দ্বিজসত্তমাঃ।
ত ঊচুঃ শপথং সর্বে কুর্ম ইত্যরিকর্শন॥ 13-142-54(86925)
ত উক্ৎবা বাঢমিত্যেব সর্ব এব তদা সমম্।
ক্ষুধার্তাঃ সুপরিশ্রান্তাঃ শপথায়োপচক্রমুঃ॥ 13-142-55(86926)
অত্রিরুবাচ। 13-142-56x(7250)
স গাং স্পৃশতু পাদেন সূর্যং চ প্রতিমেহতু।
অধ্যায়েষ্বধীয়ীত বিসস্তৈন্যং করোতি যঃ॥ 13-142-56(86927)
বসিষ্ঠ উবাচ। 13-142-57x(7251)
অনধ্যায়ে পঠেল্লোকে শুনঃ স পরিকর্ষতু।
পরিব্রাট্ কামবৃত্তিস্তু বিসস্তৈন্যং করোতি যঃ॥ 13-142-57(86928)
শরণাগতং হন্তু মিত্রং স্বসুতাং চোপজীবতু।
অর্থান্কাঙ্ক্ষতু কীনাশাদ্বিসস্তৈন্যং করোতি যঃ॥ 13-142-58(86929)
কশ্যপ উবাচ। 13-142-59x(7252)
‘বিষ্ণুং ব্রহ্মণ্যদেবেশং দেবদেবং জগদ্গুরুম্।
আধাতারং বিধাতারং সন্ধাতারং জগদ্গুরুম্।
বিহায় স ভজৎবন্যং বিসস্তৈন্যং করোতি যঃ॥’ 13-142-59(86930)
সর্বত্র সর্বং লপতু ন্যাসলোপং করোতু চ।
কূটসাক্ষিৎবমভ্যেতু বিসস্তৈন্যং করোতি যঃ॥ 13-142-60(86931)
বৃথা মাংসাশনশ্চাস্তু বৃথা দানং করোতু চ।
যাতু স্ত্রিয়ং দিবা চৈব বিসস্তৈন্যং করোতি যঃ॥ 13-142-61(86932)
ভরদ্বাজ উবাচ। 13-142-62x(7253)
নৃশংসস্ত্যক্তধর্মাঽস্তু স্ত্রীষু জ্ঞাতিষু গোষু চ।
ব্রাহ্মণং চাপি জয়তাং বিসস্তৈন্যং করোতি যঃ॥ 13-142-62(86933)
উপাধ্যায়মধঃ কৃৎবা ঋচোঽধ্যেতু যজূংষি চ।
জুহোতু চ স কক্ষাগ্নৌ বিসস্তৈন্যং করোতি যঃ॥ 13-142-63(86934)
জমদগ্নিরুবাচ। 13-142-64x(7254)
পুরীষমুৎসৃজৎবপ্সু হন্তু গাং চৈব দ্রুহ্যৎ।
অনৃতৌ মৈথুনং যাতু বিসস্তৈন্যং করোতি যঃ॥ 13-142-64(86935)
দ্বেষ্যো ভার্যোপজীবী স্যাদ্দুরবন্ধুশ্চ বৈরবান্।
অন্যোন্যস্যাতিথিশ্চাস্তু বিসস্তৈন্যং করোতি যঃ॥ 13-142-65(86936)
গৌতম উবাচ। 13-142-66x(7255)
অধীত্য বেদাংস্ত্যজতু ত্রীনগ্নীনপবিধ্যতু।
বিক্রীণাতু তথা সোমং বিসস্তৈন্যং করোতি যঃ॥ 13-142-66(86937)
উদপানোদকে গ্রামে ব্রাহ্মণো বৃষলীপতিঃ।
তস্য সালোক্যতাং যাতু বিসস্তৈন্যং করোতি যঃ॥ 13-142-67(86938)
বিশ্বামিত্র উবাচ। 13-142-68x(7256)
জীবতো বৈ গুরূন্ভৃত্যান্ভরন্ৎবস্য পরে জনাঃ।
দরিদ্রো বহুপুত্রঃ স্যাদ্বিসস্তৈন্যং করোতি যঃ॥ 13-142-68(86939)
অশুচির্ব্রহ্মকূটোঽস্তু মিথ্যা চৈবাপ্যহঙ্কৃতঃ।
কর্ষকো মৎসরী চাস্তু বিসস্তৈন্যং করোতি যঃ॥ 13-142-69(86940)
হর্ষং করোতু ভৃতকো রাজ্ঞশ্বাস্তু পুরোহিতঃ।
অয়াজ্যস্য ভবেদৃৎবিক্ বিসস্তৈন্যং করোতি যঃ 13-142-70(86941)
অরুন্ধত্যুবাচ। 13-142-71x(7257)
নিত্যং পরিভবেচ্ছ্বশ্রূং ভর্তুর্ভবতু দুর্মনাঃ।
একা স্বাদু সমশ্নাতু বিসস্তৈন্যং করোতি যা॥ 13-142-71(86942)
জ্ঞাতীনাং গৃহমধ্যস্থা সক্তূনত্তু দিনক্ষয়ে।
অভোগ্যা বীরসূরস্তু বিসস্তৈন্যং করোতি যা॥ 13-142-72(86943)
গণ্ডোবাচ। 13-142-73x(7258)
অনৃতং ভাষতু সদা বন্ধুভিশ্চ বিরুধ্যতু।
দদাতু কন্যাং শুল্কেন বিসস্তৈন্যং করোতি যা॥ 13-142-73(86944)
সাধয়িৎবা স্বয়ং প্রাশেদ্দাস্যে জীর্যতু চৈব হ।
বিকর্মণা প্রমীয়েত বিসস্তৈন্যং করোতি যা॥ 13-142-74(86945)
পশুসখ উবাচ। 13-142-75x(7259)
দাস এব প্রজায়েতামপ্রসূতিরকিঞ্চন।
দৈবতেষ্বনমস্কারো বিসস্তৈন্যং করোতি যঃ॥ 13-142-75(86946)
শুনঃসখ উবাচ। 13-142-76x(7260)
অধ্বর্যবে দুহিতরং বা দদাতু
চ্ছন্দোগে বাঽঽচরিতব্রহ্মচর্যে।
আথর্বণং বেদমধীত্য বিপ্রঃ
স্নায়ীত বা যো হরতে বিসানি॥ 13-142-76(86947)
ঋষয় ঊচুঃ। 13-142-77x(7261)
ইষ্টমেতদ্দ্বিজাতীনাং যোঽয়ং তে শপথঃ কৃতঃ।
ৎবয়া কৃতং বিসস্তৈন্যং সর্বেষাং নঃ শুনঃসখ॥ 13-142-77(86948)
শুনঃসখ উবাচ। 13-142-78x(7262)
ন্যস্তমদ্যং ন পশ্যদ্ভির্যদুক্তং কৃতকর্মভিঃ।
সত্যমেতন্ন মিথ্যৈতদ্বিসস্তৈন্যং কৃতং ময়া॥ 13-142-78(86949)
ময়া হ্যন্তর্হিতানীহ বিসানীমানি পশ্যত।
পরীক্ষার্থং ভগবতাং কৃতমেবং ময়াঽনঘাঃ॥ 13-142-79(86950)
রক্ষণার্থং চ সর্বেষাং ভবতামহমাগতঃ।
যাতুধানী হ্যতিক্রূরা কৃত্যৈষা বো বধৈষিণী॥ 13-142-80(86951)
বৃষাদর্ভিপ্রয়ুক্তৈষা নিহতা মে তপোধনাঃ।
দুষ্টা হিংস্যাদিয়ং পাপা যুষ্মান্প্রত্যগ্নিসম্ভবা॥ 13-142-81(86952)
তস্মাদস্ম্যাগতো বিপ্রা বাসবং মাং নিবোধত।
অলোভাদক্ষয়া লোকাঃ প্রাপ্তা বঃ সার্বকামিকাঃ।
উত্তিষ্ঠধ্বমিতঃ ক্ষিপ্রং তানবাপ্নুত বৈ দ্বিজাঃ॥ 13-142-82(86953)
ভীষ্ম উবাচ। 13-142-83x(7263)
ততো মহর্ষয়ঃ প্রীতাস্তথেত্যুক্ৎবা পুরন্দরম্।
সহৈব ত্রিদশেন্দ্রেণ সর্বে জগ্মুস্ত্রিবিষ্টপম্॥ 13-142-83(86954)
এবমেতে মহাত্মানো যোগৈর্বহুবিধৈরপি।
ক্ষুধা পরময়া যুক্তাশ্ছন্দ্যমানা মহাত্মভিঃ।
নৈব লোভং তদা যক্রুস্ততঃ স্বর্গমবাপ্নুবন্॥ 13-142-84(86955)
তস্মাৎসর্বাস্ববস্থাসু নরো লোভং বিবর্জয়েৎ।
এষ ধর্মঃ পরো রাজংস্তস্মাল্লোভং বিবর্জয়েৎ॥ 13-142-85(86956)
ইদং নরঃ সুচরিতং সমবায়েষু কীর্তয়ন্।
অর্থভাগী চ ভবতি ন চ দুর্গাণ্যবাপ্নুতে॥ 13-142-86(86957)
প্রীয়ন্তে পিতরশ্চাস্য ঋষয়ো দেবতাস্তথা।
যশোধর্মার্থভাগী চ ভবতি প্রেত্য মানবঃ॥ ॥ 13-142-87(86958)
ইতি শ্রীমন্মহাভারতে অনুশাসনপর্বণি দানধর্মপর্বণি দ্বিচৎবারিংশদধিকশততমোঽধ্যায়ঃ॥ 142 ॥
Mahabharata – Anushaasana Parva – Chapter Footnotes
7-142-2 পরিব্রাজং শুনা সহেতি ঝ.পাঠঃ॥ 7-142-4 তেন পীবান্শুনা সহেতি ঝ.পাঠঃ॥ 7-142-9 ভার্যাপবাদঃ কৃত্তিকাস্বভিশাপাৎ॥ 7-142-10 ত্রিকৌশেয়ং কুশা রজ্জুস্তয়া নির্বৃত্তং কাশেয়ং পাটিতসন্ধানম্। ত্রীণি কৌশেয়ানি যস্মিন্। রাঙ্কবং রঙ্কোর্মৃগাবেশেষস্য চর্ম তদপি ত্রিবর্ষীয়মতিজীর্ণম্॥ 7-142-12 পরিচর্যাং করিষ্যামি কুর্বিত্যন্যোন্যমুক্ৎবেত্যর্থঃ॥ 7-142-13 একরূপ এব নিশ্চয়ঃ কার্যং চ যেষাং তে॥ 7-142-16 উপতীর্থমবতরণমার্গঃ॥ 7-142-24 নামার্থদ্বারা সামর্থ্যং জ্ঞাৎবা অস্মাকং বধৈষিণীয়মিতি বিজ্ঞায়েত্যর্থঃ॥ 7-142-25 অরাত্ত্রিঃ অরয়ঃ কামাদয়ঃ সন্ত্যস্মিন্নিত্যরং পাপং অর্শআদিভ্যোঽজিত্যচ্। তস্মাত্ত্রায়ত ইত্যরাত্ত্রিঃ। অরশব্দাদলুপ্তপঞ্চমীকাৎ পরস্য ত্রায়তেরুপরি ক্বিপ্প্রত্যযঃ। যস্মাদরাত্রিস্তস্মাদত্রিঃ। অত্তীত্যদ্ মৃত্যুস্তস্মাত্ত্রায়ত ইত্যত্রিঃ। মৃত্যুশব্দস্য পাপ্মনি প্রয়োগদর্শনাৎ॥ 7-142-26 ময়ি নাম মহামুনে ইতি ঝ.পাঠঃ॥ 7-142-27 বায়ুশ্চ পৃথিবী চেতি শ্রুতিপ্রসিদ্ধা বায়্বাদয়ো বসবস্তে যস্য স্বাধীনা ভবন্তি স বসুমান্প্রাপ্তাণিমাদ্যৈশ্বর্যো মহায়োগী। অতিশয়েন বসুমানিতি বসিষ্ঠস্তাদৃশোঽহমস্তি। বসুমচ্ছব্দাদিষ্ঠন্প্রত্যযে পরে মতুব্লোপে টিলোপে চ বসিষ্ঠঃ। বাসগৃহেষু বাসয়োগ্যেষু গৃহস্থাশ্রমেষু সর্বেষামুপজীব্যেষু বসে বসামি অতোঽহং বস্তৄণাং মধ্যে অতিশ্রেষ্ঠ ইতি বসিষ্ঠোঽস্মি॥ 7-142-29 কশা অশ্বতাডনরজ্জুস্তামর্হন্তি তে কশ্যা অশ্বাঃ। ইন্দ্রিয়াণ্যেবাশ্বাঃ কশ্যাস্তদাশ্রয়ৎবাচ্ছরীরাণ্যপি কশ্যানি। কুলঙ্কুলমিতি বীপ্সায়াং দ্বির্বচনম্। সর্বশরীরেষ্বহমেবৈকঃ কশ্যপো নাম দ্বিজোঽস্মি। কশ্যানি শরীরাণি পাতি রক্ষতি পিবতি ভুঙ্ক্তে পায়যতি যোষয়তি বা কশ্যপ ইতি যোগাৎ। কুবমঃ কুবম ইতি। কুঃ পৃথবীং তস্যাং বমতি বর্ষতীতি কুবম আদিত্যঃ পূর্ববদ্দ্বিবচনম্। সর্বোপ্যাদিত্যোঽহমেব। মৎপুত্রৎবাৎসর্বেষামাদিত্যানামিত্যর্থঃ। কাশ্যো দীপ্তিমান্। তত্র হেতুঃ। কাশনিকাশৎবাৎ বহুকালীনৎবেন কাশপুষ্পসদৃশঃ সর্বতঃ পলিতশ্চিরন্তনস্তপসা দীপ্তোঽস্মীস্তর্থঃ। কুলং কুলং চ কুশলঃ কুপয়ঃ কাশ্যপো দ্বিজঃ। কাশ্যপঃ কাশনীকাশ এতন্মে নাম ধারয়েতি ক.ড.থ.পাঠঃ॥ 7-142-31 প্রজা বৈ বাজস্তা এষ বিভর্তীতি শ্রুত্যনুসারেণ স্বনামাহ ভরে ইতি। অসুতান্ অপুত্রানুদাসীনানপি দীনানদীনান্পালয়ামি। ভরে সুতান্ভরে শিষ্যানিতি ঝ.পাঠঃ॥ 7-142-33 গোপদার্থং স্বর্গং ভূমিং চ দময়তি বশীকরোতীতি গোদমঃ। তত্র হেতুঃ দমত ইতি। দমেন ইন্দ্রিয়জয়েন দময়তীতি জিতেন্দ্রিয়ৎবাৎ গাং দ্যাং চ দমিতুং শক্তোস্মীত্যর্থঃ। অধূমঃ নির্ধূমাগ্নিতুল্যঃ। অত এবাদমঃ অন্যেন দমিতুময়োগ্যঃ তত্র হেতুঃ। তে ৎবয়ি। সমদর্শনাৎসমস্য ব্রহ্মণো দর্শনাৎ ব্রহ্মজ্ঞানিৎবাদিত্যর্থঃ। অত্র দকারস্থানে তকারঃ। গৌতমো দমগোধূমো ধূমো দুর্দর্শনশ্চ তে ইতি থ.ধ.পাঠঃ॥ 7-142-35 মিত্রে চর্ষৌ ইতি বিশ্বপদান্তস্য দীর্ঘঃ। গবাং ইন্দ্রিয়াণাম্॥ 7-142-37 জজামাদ্যং জজামায়ং জজামাহং জজায়ুষীতি ক.থ.ধ.পাঠঃ। ভূয়োভূয়োঽতিশয়েন জমন্তি যুগপদনেকেষু যজ্ঞাদিষ্বনেকবারং পুনঃপুনর্ভক্ষয়ন্তি হবীংষি তে জাজমন্তো দেবাঃ। ‘জমু ভক্ষণে’ যঙ্লুকি শত্রন্তস্য রূপম্। ইজ্যন্তে দেবতা অস্মিন্নিতি যজোঽগ্নিঃ তেষাং জান আবির্ভাবস্তস্মিন জিজায়িষি জাতোঽস্মি ইহলোকে অতো মাং জিজাহি জানীহি। ততো যোগাৎ মাং জমদগ্নিরিতি নামতো বিদ্ধি। জাজমদিত্যত্রাদ্যপদে প্রথমাক্ষরলোপে দ্বিতীয়স্যাগ্নিৎবে জমদগ্নিরিতি সিদ্ধম্। ততো জাজমন্তোঽগ্নিশ্চাস্মিন্ সন্তীতি জমদগ্নিমান্। ততো মতুব্লোপেন জমদগ্নিরিতি পদম্। এতেনাপি স্বস্যাধর্ষণীয়ৎবমুক্তম্॥ 7-142-39 ধরান্পর্বতান্। ধরিত্রীং ভুবম্। বসূন্দেবান্ধত্তে ইতি ব্যুৎপত্ত্যা বসুধাং দিবং চ তিষ্ঠামি অধিতিষ্ঠামি। ভর্তুর্বসিষ্ঠস্যানন্তরং অব্যবধানেন অনুরুন্ধতীত্যা নুকারলোপঃ। সারং ধরিত্রীবসুধাং নেচ্ছে ভর্তুরনন্তরম্। ইতি ধ.পাঠঃ। বসুধামিচ্ছে ভর্তুরিতি ক.থ.পাঠঃ॥ 7-142-41 গডি বদনৈকদেশ ইতি ধাতোঃ গণ্ডেতি নুমা সহিতস্যানুকরণম্। মা মাম্। বৃষাদর্ভিণাঽগ্নৌ হুৎবাঽস্যা উৎপাদিতৎবাদনলসংভবৎবম্। গণ্ডং গতবতী গণ্ডং গণ়্ডা গণ্ডেতি সংজ্ঞিতা। গণ্ডং গণ্ডেতি গণ্ডেতীতি ধ.পাঠঃ। চণ্ডং গতবৎপ্রচণ্ডা চণ্ডাচণ্ডেতি সংজ্ঞিতা। চণ্ডাচণ্ডেতি চণ্ডেতীতি থ.পাঠঃ॥ 7-142-43 পশূন্ জীবান্ রঞ্জামি রঞ্জয়ামি। মাং মম নামেত্যর্থঃ। সখে সখায়ৌ সখ্যেয় ইতি থ.পাঠঃ। সহেঽপরাধং সখ্যেয় ইতি ঙ.পাঠঃ॥ 7-142-45 শ্বা ধর্মঃ তৎসখায়ো মুনয়ঃ তেষাং সখা শুনঃসখসখঃ তম্। শুনাং সদা সখায়ং মামিতি ঙ.থ. পাঠঃ॥ 7-142-47 ভস্ম ভস্মতাম্॥ 7-142-51 কলাপশঃ সঙ্ঘশঃ॥ 7-142-55 সর্ব এব শুনস্সখমিতি থ.ধ.পাঠঃ॥ 7-142-57 শুনঃ সারমেয়ান্পরিকর্ষতু ক্রীডার্থং মৃগয়ার্থং বা। পরিব্রাট্ কর্মবৃত্তিস্ৎবিতি থ.ধ.পাঠঃ॥ 7-142-58 স্বসুতাং শুল্কগ্রহণেন। কীনাশাৎ কর্ষকাৎ॥ 7-142-60 সর্বত্র সর্বং পণতু ন্যাসলোভং করোতু চেতি ট.থ.পাঠঃ॥ 7-142-61 বৃথা যাগাদিনিমিত্তং বিনা। বৃথা নটনর্তকাদৌ॥ 7-142-62 জয়তাং যুদ্ধে বাদে বা। মাতরং চাপি জহৎবিতি ক.পাঠঃ॥ 7-142-63 কক্ষাপ্তৌ তত্র হি হুতং ভস্মীভাবমপ্রাপ্য হোতুর্দোষকরমিত্যাশয়ঃ॥ 7-142-67 নির্গুণান্বিভৃয়াদ্ভৃত্যানিতি ক.ট.থ.পাঠঃ॥ 7-142-69 ঋদ্ধ্যা চৈবাপ্যহংকৃত ইতি ঝ.পাঠঃ॥ 7-142-70 বর্ষাচরোস্তু ভৃতক ইতি ঝ.পাঠঃ॥ 7-142-72 জ্ঞাতীনাং অনাদরে ষষ্ঠী। জ্ঞাতীননাদৃত্যেত্যর্থঃ। অভোগ্যা যোনিদূষিতা॥ 7-142-73 সাধুভিশ্চ বিরুধ্যৎবিতি ট.থ.পাঠঃ॥ 7-142-74 সাধয়িৎবা অন্নং পক্ৎবা॥ 7-142-78 অদ্যং ভক্ষ্যম্॥ 7-142-79 অন্তর্হিতানি অন্তর্ধানং প্রাপিতানি॥ 7-142-85 রাজন্ব্রাহ্মণস্য প্রকীর্তিত ইতি ক.থ.পাঠঃ॥