আদিপর্ব – অধ্যায় ২২৬
॥ শ্রীঃ ॥
১.২২৬. অধ্যায়ঃ ২২৬
Mahabharata – Adi Parva – Chapter Topics
পাণ্ডবানাং হাস্তিনপুরগমনংপ্রতি শ্রীকৃষ্ণদ্রুপদয়োরশ্যনুজ্ঞা॥ ১ ॥ পৃথাবিদুরসংবাদঃ॥ ২ ॥ প্রস্থিতানাং পাণ্ডবানাং দ্রুপদেন পারিবর্হদানম্॥ ৩ ॥ প্রত্যুদ্গমনায়াগতৈঃ কৌরবৈঃ সহ পাণ্ডবানাং ভীষ্মাদিবন্দনপুরঃসরং গৃহপ্রবেশঃ॥ ৪ ॥
Mahabharata – Adi Parva – Chapter Text
১-২২৬-০ (৯৭৬৬)
দ্রুপদ উবাচ। ১-২২৬-০x (১২৩১)
এবমেতন্মহাপ্রাজ্ঞ যথাত্থ বিদুরাদ্য মাম্।
মমাপি পরমো হর্ষঃ সংবন্ধেঽস্মিন্কৃতে প্রভো॥ ১-২২৬-১ (৯৭৬৭)
গমনং চাপি যুক্তং স্যাদ্দৃঢমেষাং মহাত্মনাম্।
ন তু তাবন্ময়া যুক্তমেতদ্বক্তুং স্বয়ং গিরা॥ ১-২২৬-২ (৯৭৬৮)
যদা তু মন্যতে বীরঃ কুন্তীপুত্রো যুধিষ্ঠিরঃ।
ভীমসেনার্জুনৌ চৈব যমৌ চ পুরুষর্ষভৌ॥ ১-২২৬-৩ (৯৭৬৯)
রামকৃষ্ণৌ চ ধর্মজ্ঞৌ তদা গচ্ছন্তু পাণ্ডবাঃ।
এতৌ হি পুরুষব্যাঘ্রাবেষাং প্রিয়হিতে রতৌ॥ ১-২২৬-৪ (৯৭৭০)
যুধিষ্ঠির উবাচ। ১-২২৬-৫x (১২৩২)
পরবন্তো বয়ং রাজংস্ৎবয়ি সর্বে সহানুগাঃ।
যথা বক্ষ্যসি নঃ প্রীত্যা তৎকরিষ্যামহে বয়ম্॥ ১-২২৬-৫ (৯৭৭১)
বৈশম্পায়ন উবাচ। ১-২২৬-৬x (১২৩৩)
ততোঽব্রবীদ্বাসুদেবো গমনং রোচতে মম।
যথা বা মন্যতে রাজা দ্রুপদঃ সর্বধর্মবিৎ॥ ১-২২৬-৬ (৯৭৭২)
দ্রুপদ উবাচ। ১-২২৬-৭x (১২৩৪)
যথৈব মন্যতে বীরো দাশার্হঃ পুরুষোত্তমঃ।
প্রাপ্তকালং মহাবাহুঃ সা বুদ্ধির্নিশ্চিতা মম॥ ১-২২৬-৭ (৯৭৭৩)
যথৈব হি মহাভাগাঃ কৌন্তেয়া মম সাংপ্রতম্।
তথৈব বাসুদেবস্য পাণ্ডুপুত্রা ন সংশয়ঃ॥ ১-২২৬-৮ (৯৭৭৪)
ন তদ্ধ্যায়তি কৌন্তেয়ঃ পাণ্ডুপুত্রো যুধিষ্ঠিরঃ।
যথৈষাং পুরুষব্যাঘ্রঃ শ্রেয়ো ধ্যায়তি কেশবঃ॥ ১-২২৬-৯ (৯৭৭৫)
বৈশম্পায়ন উবাচ। ১-২২৬-১০x (১২৩৫)
`পৃথায়াস্তু ততো বেশ্ম প্রবিবেশ মহামতিঃ।
পাদৌ স্পৃষ্ট্বা পৃথায়াস্তু শিরসা চ মহীং গতঃ॥ ১-২২৬-১০ (৯৭৭৬)
দৃষ্ট্বা তু দেবরং কুন্তী শুশোচ চ মুহুর্মুহুঃ। ১-২২৬-১১ (৯৭৭৭)
কুন্ত্যুবাচ।
বৈচিত্রবীর্য তে পুত্রাঃ কথংচিজ্জীবিতাস্ৎবয়া॥ ১-২২৬-১১x (১২৩৬)
ৎবৎপ্রসাদাজ্জতুগৃহে মৃতাঃ প্রত্যাগতাস্তথা।
কূর্মী চিন্তয়তে পুত্রান্যত্র বা তত্র সংমতা॥ ১-২২৬-১২ (৯৭৭৮)
চিন্তয়া বর্ধিতাঃ পুত্রা যথা কুশলিনস্তথা।
তব পুত্রাস্তু জীবন্তি ৎবদ্ভক্ত্যা ভরতর্ষভ॥ ১-২২৬-১৩ (৯৭৭৯)
যথা পরভৃতঃ পুত্রানরিষ্টা বর্ধয়েৎসদা।
তথৈব পুত্রাস্তু মম ৎবয়া তাত সুরক্ষিতাঃ॥ ১-২২৬-১৪ (৯৭৮০)
ক্লেশাস্তু বহবঃ প্রাপ্তাস্তথা প্রাণান্তিকা ময়া।
অতঃ পরং ন জানামি কর্তব্যং জ্ঞাতুমর্হসি॥ ১-২২৬-১৫ (৯৭৮১)
বিদুর উবাচ। ১-২২৬-১৬x (১২৩৭)
ন বিনশ্যন্তি লোকেষু তব পুত্রা মহাবলাঃ।
অচিরেণৈব কালেন স্বরাজ্যস্থা ভবন্তি তে॥ ১-২২৬-১৬ (৯৭৮২)
বান্ধবৈঃ সহিতাঃ সর্বে ন শোকং কুরু মাধবি। ১-২২৬-১৭ (৯৭৮৩)
বৈশম্পায়ন উবাচ।’
ততস্তে সমনুজ্ঞাতা দ্রুপদেন মহাত্মনা॥ ১-২২৬-১৭x (১২৩৮)
পাণ্ডবাশ্চৈব কৃষ্ণশ্চ বিদুরশ্চ মহামতিঃ।
আদায় দ্রৌপদীং কৃষ্ণাং কুন্তীং চৈব যশস্বিনীম্॥ ১-২২৬-১৮ (৯৭৮৪)
সবিহারং সুখং জগ্মুর্নগরং নাগসাহ্বয়ম্।
`সুবর্ণকক্ষ্যাগ্রৈবেয়ান্সুবর্ণাঙ্কুশভূষিতান্॥ ১-২২৬-১৯ (৯৭৮৫)
জাম্বূনদপরিষ্কারান্প্রভিন্নকরটামুখান্।
অধিষ্ঠিতান্মহামাত্রৈঃ সর্বশস্ত্রসমন্বিতান্॥ ১-২২৬-২০ (৯৭৮৬)
সহস্রং প্রদদৌ রাজা গজানাং বরবর্মিণাম্।
রথানাং চ সহস্রং বৈ সুবর্ণমণিচিত্রিতম্॥ ১-২২৬-২১ (৯৭৮৭)
চতুর্যুজাং ভানুমচ্চ পঞ্চানাং প্রদদৌ তদা।
সুবর্ণপরিবর্হাণাং বরচামরমালিনাম্॥ ১-২২৬-২২ (৯৭৮৮)
জাত্যশ্বানাং চ পঞ্চাশৎসহস্রং প্রদদৌ নৃপঃ।
দাসীনাময়ুতং রাজা প্রদদৌ বরভূষণম্।
ততঃ সহস্রং দাসানাং প্রদদৌ বরধন্বনাম্॥ ১-২২৬-২৩ (৯৭৮৯)
হৈমানি শয়্যাসনবাজনানি
দ্রব্যাণি চান্যানি চ গোধনানি।
পৃথক্পৃথক্বৈব দদৌ স কোটিং
পাঞ্চালরাজঃ পরমপ্রহৃষ্টঃ॥ ১-২২৬-২৪ (৯৭৯০)
শিবিকানাং শতং পূর্ণং বাহান্পঞ্চশতং নরান্॥ ১-২২৬-২৫ (৯৭৯১)
এবমেতানি পাঞ্চালো জন্যার্থে প্রদদৌ ধনম্।
হরণং চাপি পাঞ্চাল্যা জ্ঞাতিদেয়ং চ সোমকঃ॥ ১-২২৬-২৬ (৯৭৯২)
ধৃষ্টদ্যুম্নো যয়ৌ তত্র ভগিনীং গৃহ্য ভারত।
নানদ্যমানো বহুশস্তূর্যঘোষৈঃ সহস্রশঃ॥’ ১-২২৬-২৭ (৯৭৯৩)
শ্রুৎবা চোপস্থিতান্বীরান্ধৃতরাষ্ট্রোঽম্বিকাসুতঃ।
প্রতিগ্রহায় পাণ্ডূনাং প্রেষয়ামাস কৌরবান্॥ ১-২২৬-২৮ (৯৭৯৪)
বিকর্ণং চ মহেষ্বাসং চিত্রসেনং চ ভারত।
দ্রোণং চ পরমেষ্বাসং গৌতমং কৃপমেব চ॥ ১-২২৬-২৯ (৯৭৯৫)
তৈস্তৈঃ পরিবৃতাঃ শূরৈঃ শোভমানা মহারথাঃ।
নগরং হাস্তিনপুরং শনৈঃ প্রবিবিশুস্তদা॥ ১-২২৬-৩০ (৯৭৯৬)
`পাণ্ডবানাগতাঞ্ছ্রুৎবা নাগরাস্তু কুতূহলাৎ।
মণ্ডয়াঞ্চক্রিরে তত্র নগরং নাগসাহ্বয়ম্॥ ১-২২৬-৩১ (৯৭৯৭)
মুক্তপুষ্পাবকীর্ণং তু জলসিক্তং তু সর্বতঃ।
ধূপিতং দিব্যধূপেন মঙ্গলৈশ্চাভিসংবৃতম্॥ ১-২২৬-৩২ (৯৭৯৮)
পতাকোচ্ছ্রিতমাল্যং চ পুরমপ্রতিমং বভৌ।
শঙ্খভেরীনিনাদৈশ্চ নানাবাদিত্রনিস্বনৈঃ॥’ ১-২২৬-৩৩ (৯৭৯৯)
কৌতূহলেন নগরং পূর্যমাণমিবাভবৎ।
যত্র তে পুরুষব্যাঘ্রাঃ শোকদুঃখসমন্বিতাঃ॥ ১-২২৬-৩৪ (৯৮০০)
`নির্গতাশ্চ পুরাৎপূর্বং ধৃতরাষ্ট্রপ্রবাধিতাঃ।
পুনর্নিবৃত্তা দিষ্ট্যা বৈ সহ মাত্রা পরন্তপাঃ॥ ১-২২৬-৩৫ (৯৮০১)
ইত্যেবমীরিতা বাচো জনৈঃ প্রিয়চিকীর্ষুভিঃ।’
তত উচ্চাবচা বাচঃ প্রিয়াঃ সর্বত্র ভারত॥ ১-২২৬-৩৬ (৯৮০২)
উদীরিতাস্তদাঽশৃণ্বন্পাণ্ডবা হৃদয়ংগমাঃ। ১-২২৬-৩৭ (৯৮০৩)
পৌরা ঊচুঃ
অয়ং স পুরুষব্যাঘ্রঃ পুনরায়াতি ধর্মবিৎ॥ ১-২২৬-৩৭x (১২৩৯)
যো নঃ স্বানিব দায়াদান্ধর্মেণ পরিরক্ষতি।
অদ্য পাণ্ডুর্মহারাজো বনাদিব মনঃপ্রিয়ম্॥ ১-২২৬-৩৮ (৯৮০৪)
আগতশ্চৈবমস্মাকং চিকীর্ষন্নাত্র সংশয়ঃ।
কিং ন্বদ্য সুকৃতং কর্ম সর্বেষাং নঃ প্রিয়ং পরম্॥ ১-২২৬-৩৯ (৯৮০৫)
যন্নঃ কুন্তীসুতা বীরা ভর্তারঃ পুনরাগতাঃ।
যদি দত্তং যদি হুতং যদি বাপ্যস্তি নস্তপঃ।
তেন তিষ্ঠন্তু নগরে পাণ্ডবাঃ শরদাং শতম্॥ ১-২২৬-৪০ (৯৮০৬)
ততস্তে ধৃতরাষ্ট্রস্য ভীষ্মস্য চ মহাত্মনঃ।
অন্যেষাং চ তদর্হাণাং চক্রুঃ পাদাভিবন্দনম্॥ ১-২২৬-৪১ (৯৮০৭)
পৃষ্টাস্তু কুশলপ্রশ্নং সর্বেণ নগরেণ তে।
সমাবিশন্ত বেশ্মানি ধৃতরাষ্ট্রস্য শাসনাৎ॥ ॥ ১-২২৬-৪২ (৯৮০৮)
ইতি শ্রীমন্মহাভারতে আদিপর্বণি বিদুরাগমনরাজ্যলাভপর্বণি ষড্বিংশত্যধিকদ্বিশততমোঽধ্যায়ঃ॥ ২২৬ ॥