অনুশাসনপর্ব – অধ্যায় ১৫৫

অনুশাসনপর্ব – অধ্যায় 155
॥ শ্রীঃ ॥
13.155. অধ্যায়ঃ 155
অথ দানধর্মপর্ব ॥ 1 ॥
Mahabharata – Anushaasana Parva – Chapter Topics
ভীষ্মেণি যুধিষ্ঠিরংপ্রতি পুষ্পধূপদীপদানাদিপ্রশংসাপরবলিশুক্রসংবাদানুবাদঃ॥ 1 ॥
Mahabharata – Anushaasana Parva – Chapter Text

যুধিষ্ঠির উবাচ।

আলোকদানং নামৈতৎকীদৃশং ভরতর্ষভ।
কথমেতৎসমুৎপন্নং ফলং বা তদ্ব্রবীহি মে॥ 13-155-1(87345)
ভীষ্ম উবাচ। 13-155-2x(7312)
অত্রাপ্যুদাহরন্তীমমিতিহাসং পুরাতনম্।
মনোঃ প্রজাপতের্বাদং সুবর্ণস্য চ ভারত॥ 13-155-2(87346)
তপস্বী কশ্চিদভবৎসুবর্ণো নাম ভারত।
বর্ণতো হেমবর্ণঃ স সুবর্ণ ইতি বিশ্রুতঃ॥ 13-155-3(87347)
কুলশীলগুণোপেতঃ স্বাধ্যায়োপরমং গতঃ।
বহূন্সুবংশপ্রভবান্সমতীতঃ স্বকৈর্গুণৈঃ॥ 13-155-4(87348)
স কদাচিন্মনুং বিপ্রো দদর্শোপসসর্প চ।
কুশলপ্রশ্নমন্যোন্যং তৌ চোভৌ তত্র চক্রতুঃ॥ 13-155-5(87349)
ততস্তৌ সত্যসংকল্পৌ মেরৌ কাঞ্চনপর্বতে।
দেবর্ষিভিঃ সদা জুষ্টে সহিতৌ সংন্যষীদতাম্॥ 13-155-6(87350)
তত্র তৌ কথয়ন্তৌ স্তাং কথা নানাবিধাশ্রয়াঃ।
ব্রহ্মর্ষিদেবদৈত্যানাং পুরাণানাং মহাত্মনাম্॥ 13-155-7(87351)
সুবর্ণস্ৎবব্রবীদ্বাক্যং মনুং স্বায়ংভুবং প্রতি।
হিতার্থং সর্বভূতানাং প্রশ্নং মে বক্তুমর্হসি॥ 13-155-8(87352)
সুমনোগন্ধধূপাদ্যৈরিজ্যন্তে দৈবতানি চ।
কিমেতৎকথমুৎপন্নং ফলং যোগং চ শংস মে॥ 13-155-9(87353)
মনুরুবাচ। 13-155-10x(7313)
অত্রাপ্যুদাহরন্তীমমিতিহাসং পুরাতনম্।
শুক্রস্য চ বলেশ্চৈব সংবাদং বৈ মহাত্মনোঃ॥ 13-155-10(87354)
বলের্বৈরোচনস্যেহ ত্রৈলোক্যমনুশাসতঃ।
সমীপমাজগামাশু শুক্রো ভৃগুকুলোদ্বহঃ॥ 13-155-11(87355)
তমর্ঘ্যাদিভিরভ্যর্চ্য ভার্গবং সোঽসুরাধিপঃ।
নিষসাদাসনে পশ্চাদ্বিধিবদ্ভূরিদক্ষিণঃ॥ 13-155-12(87356)
কথেয়মভবত্তত্র ৎবয়া যা পরিকীর্তিতা।
সুমনোধূপদীপানাং সম্প্রদানে ফলং প্রতি॥ 13-155-13(87357)
ততঃ পপ্রচ্ছ দৈত্যেন্দ্রঃ কবীন্দ্রং প্রশ্নমুত্তমম্॥ 13-155-14(87358)
সুমনোধূপদীপানাং কিং ফলং ব্রহ্মিবিত্তম।
প্রদানস্য দ্বিজশ্রেষ্ঠ তদ্ভবান্বক্তুমর্হতি॥ 13-155-15(87359)
শুক্র উবাচ। 13-155-16x(7314)
অগ্নীষোমাদিসৃষ্টৌ তু বিষ্ণোঃ সর্বাত্মনঃ প্রভোঃ।
তপঃ পূর্বং সমুৎপন্নং ধর্মস্তস্মাদনন্তরম্॥ 13-155-16(87360)
এতস্মিন্নন্তরে চৈব বীরুদোষধ্য এব চ।
সোমস্যাত্মা চ বহুধা সম্ভূতঃ পৃথিবীতলে।
অমৃতং চ বিষং চৈব যাশ্চান্যাস্তৃণজাতয়ঃ॥ 13-155-17(87361)
অমৃতং মনসঃ প্রীতিং সদ্যস্তৃপ্তিং দদাতি চ।
মনো গ্লপয়তে তীব্রং বিষং গন্ধেন সর্বশঃ॥ 13-155-18(87362)
অমৃতং মঙ্গলং বিদ্ধি মহদ্বিষমমঙ্গলম্।
ওষধ্যো হ্যমৃতং সর্বা বিষং তেজোগ্নিসম্ভবম্॥ 13-155-19(87363)
অমৃতং মনো হ্লাদয়তে শ্রিয়ং চাপি দদাতি চ।
তস্মাৎসুমনসঃ প্রোক্তা নরৈঃ সুকৃতকর্মভিঃ॥ 13-155-20(87364)
দেবতাভ্যঃ সুমনসো যো দদাতি নরঃ শুচিঃ।
তস্মৈ সুমনসো দেবাস্তস্মাৎসুমনসঃ স্মৃতাঃ॥ 13-155-21(87365)
যংয়মুদ্দিশ্য দীয়েরন্দেবং সুমনসঃ প্রভো।
মঙ্গলার্তং স তেনাস্য প্রীতো ভবতি দৈত্যপ॥ 13-155-22(87366)
জ্ঞেয়াস্তূগ্রাশ্চ সৌম্যাশ্চ তেজস্বিন্যশ্চ তাঃ পৃথক্।
ওষধ্যো বহুবীর্যা হি বহুরূপাস্তথৈব চ॥ 13-155-23(87367)
যজ্ঞিয়ানাং চ বৃক্ষাণাময়জ্ঞীয়ান্নিবোধ মে।
আসুরাণি চ মাল্যানি দৈবতেভ্যো হিতানি চ॥ 13-155-24(87368)
রক্ষসামুরগাণাং চ যক্ষাণাং চ তথা প্রিয়াঃ।
মনুষ্যাণাং পিতৄণাং চ কান্তা যাস্ৎবনুপূর্বশঃ॥ 13-155-25(87369)
বন্যা গ্রাম্যাশ্চেহ তথা কৃষ্টোপ্তাঃ পর্বতাশ্রয়াঃ।
অকণ্টকাঃ কণ্টকিনো গন্ধরূপরসান্বিতাঃ॥ 13-155-26(87370)
দ্বিবিধো হি স্মৃতো গন্ধ ইষ্টোঽনিষ্টশ্চ পুষ্পজঃ।
ইষ্টগন্ধানি দেবানাং পুষ্পাণীতি বিভাবয়॥ 13-155-27(87371)
অকণ্টকানাং বৃক্ষাণাং শ্বেতপ্রায়াশ্চ বর্ণতঃ।
তেষাং পুষ্পাণি দেবানামিষ্টানি সততং প্রভো॥ 13-155-28(87372)
‘পদ্মং চ তুলসী জাতিরাপঃ সর্বেষু পূজিতা।’
জলজানি চ মাল্যানি পদ্মাদীনি চ যানি বৈ।
গন্ধর্বনাগয়ক্ষেভ্যস্তানি দদ্যাদ্বিচক্ষণঃ॥ 13-155-29(87373)
ওপধ্যো রক্তপুষ্পাশ্চ কটুকাঃ কণ্টকান্বিতাঃ।
শত্রূণামভিচারার্থমথর্বসু নিদর্শিতাঃ॥ 13-155-30(87374)
তীক্ষ্ণবীর্যাস্তু ভূতানাং দুরালম্ভাঃ সকণ্টকাঃ।
রক্তভূয়িষ্ঠবর্ণাশ্চ কৃষ্ণাশ্চৈবোপহারয়েৎ॥ 13-155-31(87375)
মনোহৃদয়নন্দিন্যো বিমর্দে মধুরাশ্চ যাঃ।
চারুররূপাঃ সুমনসো মানুপাণাং স্মৃতা বিভো॥ 13-155-32(87376)
ন তু শ্মশানসম্ভূতা ন দেবায়তনোদ্ভবাঃ।
সন্নয়েৎপুষ্টিয়ুক্তেষু বিবাহেষু রহঃসু চ॥ 13-155-33(87377)
গিরিসানুরুহাঃ সৌম্যা দেবানামুপধারয়েৎ।
প্রোক্ষিতাভ্যুক্ষিতাঃ সৌম্যা যথায়োগং যথাস্মৃতি॥ 13-155-34(87378)
গন্ধেন দেবাস্তুষ্যন্তি দর্শনাদ্যক্ষরাক্ষসাঃ।
নাগাঃ সমুপভোগেন ত্রিভিরেতৈস্তু মানুষাঃ॥ 13-155-35(87379)
সদ্যঃ প্রীণাতি দেবান্বৈ তে প্রীতা ভাবয়ন্ত্যুত।
সঙ্কল্পসিদ্ধা মর্ত্যানামীপ্সিতাশ্চ মনোরথাঃ॥ 13-155-36(87380)
দেবাঃ প্রীণন্তি সততং মানিতা মানয়ন্তি চ।
অবজ্ঞাতাবধূতাশ্চ নির্দহন্ত্যধমান্নরান্॥ 13-155-37(87381)
অত ঊর্ধ্বং প্রবক্ষ্যামি ধূপদানবিধেঃ ফলম্।
ধূপাংশ্চ বিবিধান্সাধূনসাধূংশ্চ নিবোধ মে॥ 13-155-38(87382)
নির্যাসাঃ সরলাশ্চৈব কৃত্রিমাশ্চৈব তে ত্রয়ঃ।
ইষ্টোঽনিষ্টো ভবেদ্গন্ধস্তন্মে বিস্তরশঃ শৃণু॥ 13-155-39(87383)
নির্যাসাঃ সল্লকীবর্জ্যা দেবানাং দয়িতাস্তু তে।
গুগ্গুলুঃ প্রবরস্তেষাং সর্বেপামিতি নিশ্চয়ঃ॥ 13-155-40(87384)
অগুরুঃ সারিণাং শ্রেষ্ঠো যক্ষরাক্ষসভোগিনাম্।
দৈত্যানাং সল্লকীজশ্চ কাঙ্ক্ষিতো যশ্চ তদ্বিধঃ॥ 13-155-41(87385)
অথ সর্জরসাদীনাং গন্ধৈঃ পার্থিবদারবৈঃ।
ফাণিতাসবসংয়ুক্তৈর্মনুষ্যাণাং বিধীয়তে॥ 13-155-42(87386)
দেবদানবভূতানাং সদ্যস্তুষ্ঠিকরঃ স্মৃতঃ।
যেঽন্যে বৈহারিকাস্তত্র মানুষাণামিতি স্মৃতাঃ॥ 13-155-43(87387)
য এবোক্তাঃ সুমনসাং প্রদানে গুণহেতবঃ।
ধূপেষ্বপি পরিজ্ঞেয়াস্ত এব প্রীতিবর্ধনাঃ॥ 13-155-44(87388)
দীপদানে প্রবক্ষ্যামি ফলয়োগমনুত্তমম্।
যথা যেন যদা চৈব প্রদেয়া যাদৃশাশ্চ তে॥ 13-155-45(87389)
জ্যোতিস্তেজঃ প্রকাশং বাঽপ্যূধ্বগং চাপি বর্ধতে।
প্রদানং তেজসাং তস্মাত্তেজো বর্ধয়তে নৃণাম্॥ 13-155-46(87390)
অন্ধতমস্তমিস্রং চ দক্ষিণায়নমেব চ।
উত্তরায়ণমেতস্মাজ্জ্যোতির্দানং প্রশস্যতে॥ 13-155-47(87391)
যস্মাদূর্ধ্বগমে তত্তু তমসশ্চৈব ভেষজম্।
তস্মাদূর্ধ্বগতের্দাতা ভবেদত্রেতি নিশ্চয়ঃ॥ 13-155-48(87392)
দেবাস্তেজস্বিনো যস্মাৎপ্রভাবন্তঃ প্রকাশকাঃ।
তামসা রাক্ষসাশ্চৈব তস্মাদ্দীপঃ প্রদীয়তে॥ 13-155-49(87393)
আলোকদানাচ্চক্ষুষ্মান্প্রভায়ুক্তো ভবেন্নরঃ।
তান্দত্ৎবা নোপহিংসেন ন হরেন্নোপনাশয়েৎ॥ 13-155-50(87394)
দীপহার্তা ভবেদন্ধস্তমোগতিরসুপ্রভঃ।
দীপপ্রদঃ স্বর্গলোকে দীপমালী বিরাজতে॥ 13-155-51(87395)
হবিপা প্রথমঃ কল্পো দ্বিতীয়শ্চৌষধীরসৈঃ।
বসামেদোস্থিনির্যাসৈর্ন কার্যঃ পুষ্টিমিচ্ছতা॥ 13-155-52(87396)
দেবালয়ে সভায়াং চ গিরৌ চৈত্যচতুষ্পথে।
দীপদাতা ভবেন্নিত্যং য ইচ্ছেদ্ভূতিমাত্মনঃ॥ 13-155-53(87397)
কুলোদ্যোতো বিশুদ্ধাত্মা প্রকাশৎবং চ গচ্ছতি।
জ্যোতিষাং চৈব সালোক্যং দীপদাতা ভবেন্নরঃ॥ 13-155-54(87398)
বলিকর্মসু বক্ষ্যামি গুণান্কর্মফলোদয়ান্।
দেবয়ক্ষোরগনৃণাং ভূতানামথ রক্ষসাম্॥ 13-155-55(87399)
যেষাং নাগ্রভুজো বিপ্রা দেবতাতিথিবালকাঃ।
রাক্ষসানেব তান্বিদ্ধি নির্বষট্কারমঙ্গলান্॥ 13-155-56(87400)
তস্মাদগ্রং প্রয়চ্ছেত দেবভ্যঃ প্রতিপূজিতম্।
শিরসা প্রণতশ্চাপি হরেদ্বলিমতন্দ্রিতঃ॥ 13-155-57(87401)
গৃহ্ণন্তি দেবতা নিত্যমাশংসন্তি সদা গৃহান্।
বাহ্যাশ্চাগন্তবো যেঽন্যে যক্ষরাক্ষসপন্নগাঃ॥ 13-155-58(87402)
ইতো দত্তেন জীবন্তি দেবতাঃ পিতরস্তথা।
তে প্রীতাঃ প্রীণয়ন্ত্যেনমায়ুষা যশসা ধনৈঃ॥ 13-155-59(87403)
বলয়ঃ সহ পুষ্পৈস্তু দেবানামুপহারয়েৎ।
দধিদুগ্ধময়াঃ পুণ্যাঃ সুগন্ধাঃ প্রিয়দর্শনাঃ॥ 13-155-60(87404)
কার্যা রুধিরমাংসাঢ্যা বলয়ো যক্ষরক্ষসাম্।
সুরাসবপুরস্কারা লাজোল্লাপিকভূষিতাঃ॥ 13-155-61(87405)
নাগানাং দয়িতা নিত্যং পদ্মোৎপলবিমিশ্রিতাঃ।
তিলান্গুডসুসম্পন্নান্ভূতানামুপহারয়েৎ॥ 13-155-62(87406)
অগ্রদাতাঽগ্রভোগী স্যাদ্বলবীর্যসমন্বিতঃ।
তস্মাদগ্রং প্রয়চ্ছেত দেবভ্যঃ প্রতিপূজিতম্॥ 13-155-63(87407)
জ্বলন্ত্যহরহো বেশ্ম যাশ্চাস্য গৃহদেবতাঃ।
তাঃ পূজ্যা ভূতিকামেন প্রসৃতাগ্রপ্রদায়িনা॥ 13-155-64(87408)
ইত্যেতদসুরেন্দ্রায় কাব্যঃ প্রোবাচ ভার্গবঃ।
সুবর্ণায় মনুঃ প্রাহ সুবর্ণো নারদায় চ॥ 13-155-65(87409)
নারদোঽপি ময়ি প্রাহ গুণানেতান্মহাদ্যুতে।
ৎবমপ্যেতদ্বিদিৎবেহ সর্বমাচর পুত্রক॥ ॥ 13-155-66(87410)

ইতি শ্রীমন্মহাভারতে অনুশাসনপর্বণি দানধর্মপর্বণি পঞ্চপঞ্চাশদধিকশততমোঽধ্যায়ঃ॥ 155 ॥

Mahabharata – Anushaasana Parva – Chapter Footnotes

7-155-6 রমণীয়ে শিলাপৃষ্ঠ ইতি ঝ.পাঠঃ॥ 7-155-7 স্তাং অভবতাম্॥ 7-155-16 তপঃ বর্ণাশ্রমধর্মঃ। ধর্মো দয়াদিঃ॥ 7-155-17 লতাঃ ওষধ্যো ব্রীহ্যাদয়ঃ॥ 7-155-40 প্রবরস্তেষাং ঘৃতমিশ্রোঽথ কুঞ্জর ইতি থ.পাঠঃ॥ 7-155-46 জ্যোতির্দীপাদি। তেজঃ কান্তিঃ। প্রকাশঃ কীর্তিঃ॥ 7-155-47 তমিস্রং অন্ধকারঃ। অন্ধং তমো নাম নরকরূপম্। তথা দক্ষিণায়নমপ্যন্ধং তম এব। অত উত্তরায়ণে রাত্রৌ তমোনাশকং জ্যোতির্দেয়ং নরকনিবৃত্ত্যর্থং॥ 7-155-52 হবিষা ঘৃতেন ওষধীরসৈঃ তিলসর্ষপাদিস্নেহৈঃ। বসামেদোস্থীনি প্রাণ্যবয়বাস্তেষাং নির্যাসাঃ স্নেহাঃ। বসাদয়ঃ পৃথগ্বা নির্যাসাৎ॥ 7-155-60 দধিদ্রপ্সয়ুতাঃ পুণ্যা ইতি ধ.পাঠঃ॥ 7-155-61 লাজোল্লাপিকভূষিতাঃ। উল্লাপিক উপরিলাপনম্॥