আদিপর্ব – অধ্যায় ২৩০

আদিপর্ব – অধ্যায় ২৩০

॥ শ্রীঃ ॥

১.২৩০. অধ্যায়ঃ ২৩০

Mahabharata – Adi Parva – Chapter Topics

সুন্দোপসুন্দয়োঃ দিগ্বিজয়ঃ কুরুক্ষেত্রে নিবাসশ্চ॥ ১ ॥

Mahabharata – Adi Parva – Chapter Text

১-২৩০-০ (১০০০৬)
নারদ উবাচ। ১-২৩০-০x (১২৫৮)
উৎসবে বৃত্তমাত্রে তু ত্রৈলোক্যাকাঙ্ক্ষিণাবুভৌ।
মন্ত্রয়িৎবা ততঃ সেনাং তাবজ্ঞাপয়তাং তদা॥ ১-২৩০-১ (১০০০৭)
সুহৃদ্ভিরপ্যনুজ্ঞাতৌ দৈত্যৈর্বৃদ্ধৈশ্চ মন্ত্রিভিঃ।
কৃৎবা প্রাস্থানিকং রাত্রৌ মঘাসু যয়তুস্তদা॥ ১-২৩০-২ (১০০০৮)
গদাপিট্টশধারিণ্যা শূলমুদ্গরহস্তয়া।
প্রস্থিতৌ সহ বর্মিণ্যা মহত্যা দৈত্যসেনয়া॥ ১-২৩০-৩ (১০০০৯)
মঙ্গলৈঃ স্তুতিভিশ্চাপি বিজয়প্রতিসংহিতৈঃ।
চারণৈঃ স্তূয়মানৌ তৌ জগ্মতুঃ পরয়া মুদা॥ ১-২৩০-৪ (১০০১০)
তাবন্তরিক্ষমুৎপ্লুত্য দৈত্যৌ কামগমাবুভৌ।
দেবানামেব ভবনং জগ্মতুর্যুদ্দুর্মদৌ॥ ১-২৩০-৫ (১০০১১)
তয়োরাগমনং জ্ঞাৎবা বরদানং চ তৎপ্রভোঃ।
হিৎবা ত্রিবিষ্টপং জগ্মুর্ব্রহ্মলোকং ততঃ সুরাঃ॥ ১-২৩০-৬ (১০০১২)
তাবিন্দ্রলোকং নির্জিত্য যক্ষরক্ষোগণাংস্তদা।
খেচরাণ্যপি ভূতানি জঘ্নতুস্তীব্রবিক্রমৌ॥ ১-২৩০-৭ (১০০১৩)
অন্তর্ভূমিগতান্নাগাঞ্জিৎবা তৌ চ মহারথৌ।
সমুদ্রবাসিনীঃ সর্বা ম্লেচ্ছজাতীর্বিজিগ্যতুঃ॥ ১-২৩০-৮ (১০০১৪)
ততঃ সর্বাং মহীং জেতুমারব্ধাবুগ্রশাসনৌ।
সৈনিকাংশ্চ সমাহূয় সুতীক্ষ্ণং বাক্যমূচতুঃ॥ ১-২৩০-৯ (১০০১৫)
রাজর্ষয়ো মহায়জ্ঞৈর্হব্যকব্যৈর্দ্বিজাতয়ঃ।
তেজো বলং চ দেবানাং বর্ধন্তি শ্রিয়ং তথা॥ ১-২৩০-১০ (১০০১৬)
তেষামেবং প্রবৃত্তানাং সর্বেষামসুরদ্বিষাম্।
সংভূয় সর্বৈরস্মাভিঃ কার্যঃ সর্বাত্মনা বধঃ॥ ১-২৩০-১১ (১০০১৭)
এবং সর্বান্সমাদিশ্য পূর্বতীরে মহোদধেঃ।
ক্রূরাং মতিং সমাস্থায় জগ্মতুঃ সর্বতোমুখৌ॥ ১-২৩০-১২ (১০০১৮)
যজ্ঞৈর্যজন্তি যে কেচিদ্যাজয়ন্তি চ যে দ্বিজাঃ।
তান্সর্বান্প্রসভং হৎবা বলিনৌ জগ্মতুস্ততঃ॥ ১-২৩০-১৩ (১০০১৯)
আশ্রমেষ্বগ্নিহোত্রাণি মুনীনাং ভাবিতাত্মনাম্।
গৃহীৎবা প্রক্ষিপন্ত্যপ্সু বিশ্রব্ধং সৈনিকাস্তয়োঃ॥ ১-২৩০-১৪ (১০০২০)
তপোধনৈশ্চ যে ক্রুদ্ধৈঃ শাপা উক্তা মহাত্মভিঃ।
নাক্রামন্ত তয়োস্তেঽপি বরদাননিরাকৃতাঃ॥ ১-২৩০-১৫ (১০০২১)
নাক্রামন্ত যদা শাপা বাণা মুক্তাঃ শিলাস্বিব।
নিয়মান্সংপরিত্যজ্য ব্যদ্রবন্ত দ্বিজাতয়ঃ॥ ১-২৩০-১৬ (১০০২২)
পৃথিব্যাং যে তপঃসিদ্ধা দান্তাঃ শমপরায়ণাঃ।
তয়োর্ভয়াদ্দুদ্রুবুস্তে বৈনতেয়াদিবোরগাঃ॥ ১-২৩০-১৭ (১০০২৩)
মথিতৈরাশ্রমৈর্ভগ্নৈর্বিকীর্ণকলশস্রুবৈঃ।
শূন্যমাসীজ্জগৎসর্বং কালেনেব হতং তদা॥ ১-২৩০-১৮ (১০০২৪)
ততো রাজন্নদৃশ্যদ্ভির্ঋষিভিশ্চ মহাসুরৌ।
উভৌ বিনিশ্চয়ং কৃৎবা বিকুর্বাতে বধৈষিণৌ॥ ১-২৩০-১৯ (১০০২৫)
প্রভিন্নকরটৌ মত্তৌ ভূৎবা কুঞ্জররূপিণৌ।
সংলীনমপি দুর্গেষু নিন্যতুর্যমসাদনম্॥ ১-২৩০-২০ (১০০২৬)
সিংহৌ ভূৎবা পুনর্ব্যাঘ্রৌ পুনশ্চান্তর্হিতাবুভৌ।
তৈস্তৈরুপায়ৈস্তৌ ক্রূরাবৃষীন্দৃষ্ট্বা নিজঘ্নতুঃ॥ ১-২৩০-২১ (১০০২৭)
নিবৃত্তয়জ্ঞস্বাধ্যায়া প্রনষ্টনৃপতিদ্বিজা।
উৎসন্নোৎসবয়জ্ঞা চ বভূব বসুধা তদা॥ ১-২৩০-২২ (১০০২৮)
হাহাভূতা ভয়ার্তা চ নিবৃত্তবিপণাপণা।
নিবৃত্তদেবকার্যা চ পুণ্যোদ্বাহবিবর্জিতা॥ ১-২৩০-২৩ (১০০২৯)
নিবৃত্তকৃষিগোরক্ষা বিধ্বস্তনগরাশ্রমা।
অস্থিকঙ্কালসংকীর্ণা ভূর্বভূবোগ্রদর্শনা॥ ১-২৩০-২৪ (১০০৩০)
নিবৃত্তপিতৃকার্যং চ নির্বষট্কারমঙ্গলম্।
জগৎপ্রতিভয়াকারং দুষ্প্রেক্ষ্যমভবত্তদা॥ ১-২৩০-২৫ (১০০৩১)
চন্দ্রাদিত্যৌ গ্রহাস্তারা নক্ষত্রাণি দিবৌকসঃ।
জগ্মুর্বিষাদং তৎকর্ম দৃষ্ট্বা সুন্দোপসুন্দয়োঃ॥ ১-২৩০-২৬ (১০০৩২)
এবং সর্বা দিশো দৈত্যৌ জিৎবা ক্রূরেণ কর্মণা।
নিঃসপত্নৌ কুরুক্ষেত্রে নিবেশমভিচক্রতুঃ॥ ॥ ১-২৩০-২৭ (১০০৩৩)

ইতি শ্রীমন্মহাভারতে আদিপর্বণি বিদুরাগমনরাজ্যলাভপর্বণি ত্রিংশদধিকদ্বিশততমোঽধ্যায়ঃ॥ ২৩০ ॥

Mahabharata – Adi Parva – Chapter Footnotes

১-২৩০-৩ প্রস্থিতৌ সহধর্মিণ্যা ইতি খ.পাঠঃ। জয়মরণরূপতুল্যধর্ম পত্যেত্যর্থঃ। রত্নo॥ ১-২৩০-১৯ অদৃশ্যদ্ভিঃ অদৃশ্যৈঃ তৃতীয়াচেয়ং সপ্তর্ম্যেথ ঋষিষ্বদৃশ্যেষু সৎস্বিত্যর্থঃ॥ ত্রিংশদধিকদ্বিশততমোঽধ্যায়ঃ॥ ২৩০ ॥