আদিপর্ব – অধ্যায় ২০২

আদিপর্ব – অধ্যায় ২০২

॥ শ্রীঃ ॥

১.২০২. অধ্যায়ঃ ২০২

Mahabharata – Adi Parva – Chapter Topics

ব্রাহ্মণমধ্যস্থান্পাণ্ডবান্বিজ্ঞায় শ্রীকৃষ্ণেন বলরামায় কথংন॥ ১ ॥ ধনুর্দর্শনেনৈব কেষাংচিদ্রাজ্ঞাং ধনুঃপূরণে নিরশত॥ ২ ॥ শিশুপালাদীনাং ধনুঃপূরণে ভঙ্গঃ॥ ৩ ॥ অর্জুনস্য ধনুঃপূরণে এষণা॥ ৪ ॥

Mahabharata – Adi Parva – Chapter Text

১-২০২-০ (৮৯৩৬)
বৈশম্পায়ন উবাচ। ১-২০২-০x (১১৩৩)
তেঽলঙ্কৃতাঃ কুণ্ডলিনো যুবানঃ
পরস্পরং স্পর্ধমানা নরেন্দ্রাঃ।
অস্ত্রং বলং চাত্মনি মন্যমানাঃ
সর্বেং সমুৎপেতুরুদায়ুধাস্তে॥ ১-২০২-১ (৮৯৩৭)
রূপেণ বীর্যেণ কুলে চৈব
শীলেন বিত্তেন চ যৌবনেন।
সমিদ্ধদর্পা মদবেগভিন্না
মত্তা যথা হৈমবতা গজেন্দ্রাঃ॥ ১-২০২-২ (৮৯৩৮)
পরস্পরং স্পর্ধয়া প্রেক্ষমাণাঃ
সঙ্কল্পজেনাভিপরিপ্লুতাঙ্গাঃ।
কৃষ্ণা মমৈবেত্যভিভাষমাণা
নৃপাঃ সমুৎপেতুরথাসনেভ্যঃ॥ ১-২০২-৩ (৮৯৩৯)
তে ক্ষত্রিয়া রঙ্গগতাঃ সমেতা
জিগীষমাণা দ্রুপদাত্মজাং তাম্।
চকাশিরে পর্বতরাজকন্যা-
মুমাং যথা দেবগণাঃ সমেতাঃ॥ ১-২০২-৪ (৮৯৪০)
কন্দর্পবাণাভিনিপীডিতাঙ্গাং
কৃষ্ণাগতৈস্তে হৃদয়ৈর্নরেন্দ্রাঃ।
রঙ্গাবতীর্ণা দ্রুপদাত্মজার্থং
দ্বেষং প্রচক্রুঃ সুহৃদোঽপি তত্র॥ ১-২০২-৫ (৮৯৪১)
অথায়যুর্দেবগণা বিমানৈ
রুদ্রাদিত্যা বসবোঽথাশ্বিনৌ চ।
সাধ্যাশ্চ সর্বে মরুতস্তথৈব
যমং পুরস্কৃত্য ধনেশ্বরং চ॥ ১-২০২-৬ (৮৯৪২)
দৈত্যাঃ সুপর্ণাশ্চ মহোরগাশ্চ
দেবর্ষয়ো গুহ্যকাশ্চারণাশ্চ।
বিশ্বাবসুর্নারদপর্বতৌ চ
গন্ধর্বমুখ্যাঃ সহসাঽপ্সরোভিঃ॥ ১-২০২-৭ (৮৯৪৩)
হলায়ুধস্তত্র জনার্দনশ্চ
বৃষ্ণ্যন্ধকাশ্চৈব যতাপ্রধানম্।
প্রেক্ষাং স্ম চক্রুর্যদুপুঙ্গবাস্তে
স্থিতাশ্চ কৃষ্ণস্য মতে মহান্তঃ॥ ১-২০২-৮ (৮৯৪৪)
দৃষ্ট্বা তু তান্মত্তগজেন্দ্ররূপা-
ন্পঞ্চাভিপদ্মানিব বারণেন্দ্রান্।
ভস্মাবৃতাঙ্গানিব হব্যবাহান্
কৃষ্ণঃ প্রদধ্যৌ যদুবীরমুখ্যঃ॥ ১-২০২-৯ (৮৯৪৫)
শশংস রামায় যুধিষ্ঠিরং স
ভীমং সজিষ্ণুং চ যমৌ চ বীরৌ।
শনৈঃশনৈস্তান্প্রসমীক্ষ্য রামো
জনার্দনং প্রীতমনা দদর্শ হ॥ ১-২০২-১০ (৮৯৪৬)
অন্যে তু বীরা নৃপপুত্রপৌত্রাঃ
কৃষ্ণাগতৈর্নত্রমনঃস্বভাবৈঃ।
ব্যায়চ্ছমানা দদৃশুর্ন তান্বৈ
সন্দষ্টদন্তচ্ছদতাম্রনেত্রাঃ॥ ১-২০২-১১ (৮৯৪৭)
তথৈব পার্থাঃ পৃথুবাহবস্তে
বীরৌ যমৌ চৈব মহানুভাবৌ।
তাং দ্রৌপদীং প্রেক্ষ্য তদা স্ম সর্বে
কন্দর্পবাণাভিহতা বভূবুঃ॥ ১-২০২-১২ (৮৯৪৮)
দেবর্ষিগন্ধর্বসমাকুলং ত-
ৎসুপর্ণনাগাসুরসিদ্ধজুষ্টম্।
দিব্যেন গন্ধেন সমাকুলং চ
দিব্যৈশ্চ পুষ্পৈরবকীর্যমাণম্॥ ১-২০২-১৩ (৮৯৪৯)
মহাস্বনৈর্দুন্দুভিনাদিতৈশ্চ
বভূব তৎসঙ্কুলমন্তরিক্ষম্।
বিমানসংবাধমভূৎসমন্তা-
ৎসবেণুবীণাপণবানুনাদম্॥ ১-২০২-১৪ (৮৯৫০)
`সমাজবাটোপরি সংস্থিতানাং
মেঘৈঃ সমন্তাদিব গর্জমানৈঃ।’
ততস্তু তে রাজগণাঃ ক্রমেণ
কৃষ্ণানিমিত্তং কৃতবিক্রমাশ্চ।
সকর্ণদুর্যোধনশাল্বশল্য-
দ্রৌণায়নিক্রাথসুনীথবক্রাঃ॥ ১-২০২-১৫ (৮৯৫১)
কলিঙ্গবঙ্গাধিপপাণ্ড্যপৌণ্ড্রা
বিদেহরাজো যবনাধিপশ্চ।
অন্যে চ নানানৃপপুত্রপৌত্রা
রাষ্ট্রাধিপাঃ পঙ্কজপত্রনেত্রাঃ॥ ১-২০২-১৬ (৮৯৫২)
কিরীটহারাঙ্গদচক্রবালৈ-
র্বিভূষিতাঙ্গাঃ পৃথুবাহবস্তে।
অনুক্রমং বিক্রমসৎবয়ুক্তা
বলেন বীর্যেণ চ নর্দমানাঃ॥ ১-২০২-১৭ (৮৯৫৩)
তৎকার্মুকং সংহননোপপন্নং
সজ্যং ন শেকুর্মনসাঽপি কর্তুম্।
তে বিক্রমন্তঃ স্ফুরতা দৃঢেন
বিক্ষিপ্যমাণা ধনুষা নরেন্দ্রাঃ॥ ১-২০২-১৮ (৮৯৫৪)
বিচেষ্টমানা ধরণীতলস্থা
যথাবলং শৈক্ষ্যগুণক্রমাশ্চ।
গতৌজসঃ স্নস্তকিরীটহারা
বিনিঃশ্বসন্তঃ শময়াংবভূবুঃ॥ ১-২০২-১৯ (৮৯৫৫)
হহাকৃতং তদ্ধনুষা দৃঢেন
বিস্রস্তহারাঙ্গদচক্রবালম্।
কৃষ্ণানিমিত্তং বিনিবৃত্তকামং
রাজ্ঞাং তদা মণ্ডলমার্তমাসীৎ॥ ১-২০২-২০ (৮৯৫৬)
`এবং তেষু নিবৃত্তেষু ক্ষত্রিয়েষু সমন্ততঃ।
চেদীনামধিপো বীরো বলবানন্তকোপমঃ॥ ১-২০২-২১ (৮৯৫৭)
দমঘোষাত্মজো ধীমাঞ্শিশুপালো মহাদ্যুতিঃ।
ধনুষোঽভ্যাশমাগম্য তস্থৌ রাজ্ঞাং সমক্ষতঃ॥ ১-২০২-২২ (৮৯৫৮)
তদপ্যারোপ্যমাণং তু মাষমাত্রেঽভ্যতাডয়ৎ।
ধনুষা পীড্যমানস্তু জানুভ্যামগমন্মহীম্॥ ১-২০২-২৩ (৮৯৫৯)
তত উত্থায় রাজা স স্বরাষ্ট্রাণ্যভিজগ্মিবান্।
ততো রাজা জরাসন্ধো মহাবীর্যো মহাবলঃ॥ ১-২০২-২৪ (৮৯৬০)
কম্বুগ্রীবঃ পৃথুব্যংসো মত্তবারণবিক্রমঃ।
মত্তবারণতাম্রাক্ষো মত্তবারণবেগবান্॥ ১-২০২-২৫ (৮৯৬১)
ধনুষোঽভ্যাশমাগত্য তস্থৌ গিরিরিবাচলঃ।
ধনুরারোপ্যমাণং তু সর্ষমাত্রেঽভ্যতাডয়ৎ॥ ১-২০২-২৬ (৮৯৬২)
ততঃ শল্যো মহাবীর্যো মদ্ররাজো মহাবলঃ।
ধনুরারোপ্যমাণং তু মুদ্গমাত্রেঽভ্যতাডয়ৎ॥ ১-২০২-২৭ (৮৯৬৩)
তদৈবাগাৎস্বয়ং রাজ্যং পশ্চাদনবলোকয়ন্।
ইদং ধনুর্বরং কোঽদ্য সজ্যং কুর্বীত পার্থিবঃ॥ ১-২০২-২৮ (৮৯৬৪)
ইতি নিশ্চিত্য মনসা ভূয় এব স্থিতস্তদা।
ততো দুর্যোধনো রাজা ধার্তরাষ্ট্রঃ পরন্তপঃ॥ ১-২০২-২৯ (৮৯৬৫)
মানী দৃঢাস্ত্রসংপন্নঃ সর্বৈশ্চ নৃপলক্ষণৈঃ।
উত্থিতঃ সহসা তত্র ভ্রাতৃমধ্যে মহাবলঃ॥ ১-২০২-৩০ (৮৯৬৬)
বিলোক্য দ্রৌপদীং হৃষ্টো ধনুষোঽভ্যাশমাগমৎ।
স বভৌ ধনুরাদায় শক্রশ্চাপধরো যথা॥ ১-২০২-৩১ (৮৯৬৭)
ধনুরারোপয়ামাস তিলমাত্রেঽভ্যতাডয়ৎ।
আরোপ্যমাণং তদ্রাজা ধনুষা বলিনা তদা॥ ১-২০২-৩২ (৮৯৬৮)
উত্তানশয়্যমপতদঙ্গুল্যন্তরতাডিতঃ।
স যয়ৌ তাডিতস্তেন ব্রীডন্নিব নরাধিপঃ॥ ১-২০২-৩৩ (৮৯৬৯)
ততো বৈকর্তনঃ কর্ণো বৃষা বৈ সূতনন্দনঃ।
ধনুরভ্যাশমাগম্য তোলয়ামাস তদ্ধনুঃ॥ ১-২০২-৩৪ (৮৯৭০)
তং চাপ্যারোপ্যমাণং তদ্রোমমাত্রেঽভ্যতাডয়ৎ।
ত্রৈলোক্যবিজয়ী কর্ণঃ সৎবে ত্রৈলোক্যবিশ্রুতঃ॥ ১-২০২-৩৫ (৮৯৭১)
ধনুষা সোঽপি নির্ধূত ইতি সর্বে ভয়াকুলাঃ।
এবং কর্ণে বিনির্ধূতে ধনুষা চ নৃপোত্তমাঃ॥ ১-২০২-৩৬ (৮৯৭২)
চক্ষুর্ভিরপি নাপশ্যন্বিনম্রমুখপঙ্কজাঃ।
দৃষ্ট্বা কর্ণং বিনির্ধূতং লোকে বীরা নৃপোত্তমাঃ॥ ১-২০২-৩৭ (৮৯৭৩)
নিরাশা ধনুরুদ্ধারে দ্রৌপদীসংগমেঽপি চ॥ ১-২০২-৩৮ (৮৯৭৪)
তস্মিংস্তু সংভ্রান্তজনে সমাজে
নিক্ষিপ্তবাদেষু জনাধিপেষু।
কুন্তীসুতো জিষ্ণুরিয়েষ কর্তুং
সজ্যং ধনুস্তৎসশরং চ বীরঃ॥ ১-২০২-৩৯ (৮৯৭৫)
ততো বরিষ্ঠঃ সুরদানবানা-
মুদরধীর্বৃষ্ণিকুলপ্রবীরঃ।
জহর্ষ রামেণ স পীড্য হস্তং
হস্তংগতাং পাণ্ডুসুতস্য মৎবা॥ ১-২০২-৪০ (৮৯৭৬)
ন জজ্ঞিরেঽন্যে নৃপবিপ্রমুখ্যাঃ
সংছন্নরূপানথ পাণ্ডুপুত্রান্।
বিনা হি লোকে চ যদুপ্রবীরৌ
ধৌম্যং হি ধর্মং সহ সোদরাংশ্চ॥ ॥ ১-২০২-৪১ (৮৯৭৭)

ইতি শ্রীমন্মহাভারতে আদিপর্বণি স্বয়ংবরপর্বণি দ্ব্যধিকদ্বিশততমোঽধ্যায়ঃ॥ ২০২ ॥

Mahabharata – Adi Parva – Chapter Footnotes

১-২০২-৩ সংকল্পজেন কামেন॥ ১-২০২-৯ অভিতঃ পদ্মা লক্ষ্মীর্যেষাং তান্সর্বাঙ্গসুন্দরানিত্যর্থঃ॥ দ্ব্যধিকদ্বিশততমোঽধ্যায়ঃ॥ ২০২ ॥