আদিপর্ব – অধ্যায় ০৪৩

আদিপর্ব – অধ্যায় ০৪৩

॥ শ্রীঃ ॥

১.৪৩. অধ্যায়ঃ ০৪৩

Mahabharata – Adi Parva – Chapter Topics

স্বদষ্টন্যগ্রোধোজ্জীবনেন পরীক্ষিতস্য কাশ্যপস্য ধনং দৎবা তক্ষকেণ কৃতং পরাবর্তনং পরীক্ষিদ্দংশশ্চ॥ ১ ॥

Mahabharata – Adi Parva – Chapter Text

১-৪৩-০ (১৮৯৩)
তক্ষক উবাচ। ১-৪৩-০x (২০৬)
যদি দষ্টং ময়েহ ৎবং শক্তঃ কিংচিচ্চিকিৎসিতুম্।
ততো বৃক্ষং ময়া দষ্টমিমং জীবয় কাশ্যপ॥ ১-৪৩-১ (১৮৯৪)
পরং মন্ত্রবলং যত্তে তদ্দর্শয় যতস্ব চ।
ন্যগ্রোধমেনং ধক্ষ্যামি পশ্যতস্তে দ্বিজোত্তম॥ ১-৪৩-২ (১৮৯৫)
কাশ্যপ উবাচ। ১-৪৩-৩x (২০৭)
দশ নাগেন্দ্র বৃক্ষং ৎবং যদ্যেতদভিমন্যসে।
অহমেনং ৎবয়া দষ্টং জীবয়িষ্যে ভুজংগম।
`পশ্য মন্ত্রবলং মেঽদ্য ন্যগ্রোধং দশ পন্নগ॥’ ১-৪৩-৩ (১৮৯৬)
সৌতিরুবাচ। ১-৪৩-৪x (২০৮)
এবমুক্তঃ স নাগেন্দ্রঃ কাশ্যপেন মহাত্মনা।
অদশদ্বৃক্ষমভ্যেত্য ন্যগ্রোধং পন্নগোত্তমঃ॥ ১-৪৩-৪ (১৮৯৭)
স বৃক্ষস্তেন দষ্টস্তু পন্নগেন মহাত্মনা।
আশীবিষবিষোপেতঃ প্রজজ্বাল সমন্ততঃ॥ ১-৪৩-৫ (১৮৯৮)
তং দগ্ধ্বা স নগং নাগঃ কাশ্যপং পুনরব্রবীৎ।
কুরু যত্নং দ্বিজশ্রেষ্ঠ জীবয়ৈব বনস্পতিম্॥ ১-৪৩-৬ (১৮৯৯)
সৌতিরুবাচ। ১-৪৩-৭x (২০৯)
ভস্মীভূতং ততো বৃক্ষং পন্নগেন্দ্রস্য তেজসা।
ভস্ম সর্বং সমাহৃত্য কাশ্যপো বাক্যমব্রবীৎ॥ ১-৪৩-৭ (১৯০০)
বিদ্যাবলং পন্নগেন্দ্র পশ্য মেঽদ্য বনস্পতৌ।
অহং সংজীবয়াম্যেনং পশ্যতস্তে ভুজংগম॥ ১-৪৩-৮ (১৯০১)
ততঃ স ভগবান্বিদ্বান্কাশ্যপো দ্বিজসত্তমঃ।
ভস্মরাশীকৃতং বৃক্ষং বিদ্যযা সমজীবয়ৎ॥ ১-৪৩-৯ (১৯০২)
অঙ্কুরং কৃতবাংস্তত্র ততঃ পর্ণদ্বয়ান্বিতম্।
পলাশিনং শাখিনং চ তথা বিটপিনং পুনঃ॥ ১-৪৩-১০ (১৯০৩)
তং দৃষ্ট্বা জীবিতং বৃক্ষং কাশ্যপেন মহাত্মনা।
উবাচ তক্ষকো ব্রহ্মন্নৈতদত্যদ্ভুতং ৎবয়ি॥ ১-৪৩-১১ (১৯০৪)
দ্বিজেন্দ্র যদ্বিষং হন্যা মম বা মদ্বিধস্য বা।
কং ৎবমর্থমভিপ্রেপ্সুর্যাসি তত্র তপোধন॥ ১-৪৩-১২ (১৯০৫)
যত্তেঽভিলষিতং প্রাপ্তং ফলং তস্মান্নৃপোত্তমাৎ।
অহমেব প্রদাস্যামি তত্তে যদ্যপি দুর্লভম্॥ ১-৪৩-১৩ (১৯০৬)
বিপ্রশাপাভিভূতে চ ক্ষীণায়ুষি নরাধিপে।
ঘটমানস্য তে বিপ্র সিদ্ধিঃ সংশয়িতা ভবেৎ॥ ১-৪৩-১৪ (১৯০৭)
ততো যশঃ প্রদীপ্তং তে ত্রিষু লোকেষু বিশ্রুতম্।
নিরংশুরিব ঘর্মাংশুরন্তর্ধানমিতো ব্রজেৎ॥ ১-৪৩-১৫ (১৯০৮)
কাশ্যপ উবাচ। ১-৪৩-১৬x (২১০)
ধনার্থী যাম্যহং তত্র তন্মে দেহি ভুজংগম।
ততোঽহং বিনিবর্তিষ্যে স্বাপতেয়ং প্রগৃহ্য বৈ॥ ১-৪৩-১৬ (১৯০৯)
তক্ষক উবাচ। ১-৪৩-১৭x (২১১)
যাবদ্ধনং প্রার্থয়সে তস্মাদ্রাজ্ঞস্ততোঽধিকম্।
অহমেব প্রদাস্যামি নিবর্তস্ব দ্বিজোত্তম॥ ১-৪৩-১৭ (১৯১০)
সৌতিরুবাচ। ১-৪৩-১৮x (২১২)
তক্ষকস্য বচঃ শ্রুৎবা কাশ্যপো দ্বিজসত্তমঃ।
প্রদধ্যৌ সুমহাতেজারাজানং প্রতি বুদ্ধিমান্॥ ১-৪৩-১৮ (১৯১১)
দিব্যজ্ঞানঃ স তেজস্বী জ্ঞাৎবা তং নৃপতিং তদা।
ক্ষীণায়ুষং পাণ্ডবেয়মপাবর্তত কাশ্যপঃ॥ ১-৪৩-১৯ (১৯১২)
লব্ধ্বা বিত্তং মুনিবরস্তক্ষকাদ্যাবদীপ্সিতম্।
নিবৃত্তে কাশ্যপে তস্মিন্সময়েন মহাত্মনি॥ ১-৪৩-২০ (১৯১৩)
জগাম তক্ষকস্তূর্ণং নগরং নাগসাহ্বয়ম্।
অথ শুশ্রাব গচ্ছন্স তক্ষকো জগতীপতিম্॥ ১-৪৩-২১ (১৯১৪)
মন্ত্রৈর্বিষহরৈর্দিব্যৈ রক্ষ্যমাণং প্রয়ত্নতঃ। ১-৪৩-২২ (১৯১৫)
সৌতিরুবাচ।
স চিন্তয়ামাস তদা মায়ায়োগেন পার্থিবঃ॥ ১-৪৩-২২x (২১৩)
ময়া বঞ্চয়িতব্যোঽসৌ ক উপায়ো ভবেদিতি।
ততস্তাপসরূপেণ প্রাহিণোৎস ভুজংগমান্॥ ১-৪৩-২৩ (১৯১৬)
ফলপত্রোদকং গৃহ্য রাজ্ঞে নাগোঽথ তক্ষকঃ। ১-৪৩-২৪ (১৯১৭)
তক্ষক উবাচ।
গচ্ছধ্বং যূয়মব্যগ্রা রাজানং কার্যবত্তয়া॥ ১-৪৩-২৪x (২১৪)
ফলপত্রোদকং নাগাঃ প্রতিগ্রাহয়িতুং নৃপম্। ১-৪৩-২৫ (১৯১৮)
সৌতিরুবাচ।
তে তক্ষকসমাদিষ্টাস্তথা চক্রুর্ভুজঙ্গমাঃ॥ ১-৪৩-২৫x (২১৫)
উপনিন্যুস্তথা রাজ্ঞে দর্ভানম্ভঃ ফলানি চ।
তচ্চ সর্বং স রাজেন্দ্রঃ প্রতিজগ্রাহ বীর্যবান্॥ ১-৪৩-২৬ (১৯১৯)
কৃৎবা তেষাং চ কার্যাণি গম্যতামিত্যুবাচ তান্।
গতেষু তেষু নাগেষু তাপসচ্ছদ্মরূপিষু॥ ১-৪৩-২৭ (১৯২০)
অমাত্যান্সুহৃদশ্চৈব প্রোবাচ স নরাধিপঃ।
ভক্ষয়ন্তু ভবন্তো বৈ স্বাদূনীমানি সর্বশঃ॥ ১-৪৩-২৮ (১৯২১)
তাপসৈরুপনীতানি ফলানি সহিতা ময়া।
ততো রাজা সসচিবঃ ফলান্যাদাতুমৈচ্ছত॥ ১-৪৩-২৯ (১৯২২)
বিধিনা সংপ্রয়ুক্তো বৈ ঋষিবাক্যেন তেন তু।
যস্মিন্নেব ফলে নাগস্তমেবাভক্ষয়ৎস্বয়ম্॥ ১-৪৩-৩০ (১৯২৩)
ততো ভক্ষয়তস্তস্য ফলাৎকৃমিরভূদণুঃ।
হ্রস্বকঃ কৃষ্ণনয়নস্তাম্রবর্ণোঽথ শৌনক॥ ১-৪৩-৩১ (১৯২৪)
স তং গৃহ্য নৃপশ্রেষ্ঠঃ সচিবানিদমব্রবীৎ।
অস্তমভ্যেতি সবিতা বিষাদদ্য ন মে ভয়ম্॥ ১-৪৩-৩২ (১৯২৫)
সত্যবাগস্তু স মুনিঃ কৃমির্মাং দশতাময়ম্।
তক্ষকো নাম ভূৎবা বৈ তথা পরিহৃতং ভবেৎ॥ ১-৪৩-৩৩ (১৯২৬)
তে চৈনমন্ববর্তন্ত মন্ত্রিণঃ কালচোদিতাঃ।
এবমুক্ৎবা স রাজেন্দ্রো গ্রীবায়াং সন্নিবেশ্যহ॥ ১-৪৩-৩৪ (১৯২৭)
কৃমিকং প্রাহসত্তূর্ণং মুমূর্ষুর্নষ্টচেতনঃ।
প্রহসন্নেব ভোগেন তক্ষকেণাভিবেষ্টিতঃ॥ ১-৪৩-৩৫ (১৯২৮)
তস্মাৎফলাদ্বিনিষ্ক্রম্য যত্তদ্রাজ্ঞে নিবেদিতম্।
বেষ্টয়িৎবা চ ভোগেন বিনদ্য চ মহাস্বনম্।
অদশৎপৃথিবীপালং তক্ষকঃ পন্নগেশ্বরঃ॥ ॥ ১-৪৩-৩৬ (১৯২৯)

ইতি শ্রীমন্মহাভারতে আদিপর্বণি আস্তীকপর্বণি ত্রিচৎবারিংশোঽধ্যায়ঃ॥ ৪৩ ॥

Mahabharata – Adi Parva – Chapter Footnotes

১-৪৩-৩ দশ দংশং কুরু॥ ১-৪৩-৬ নগ বৃক্ষম্॥ ১-৪৩-১৩ যৎ ফলং প্রাপ্তুমভিলষিতং তৎ ইত্যন্বয়ঃ॥ ১-৪৩-১৪ ঘটমানস্য সজ্জমানস্য॥ ১-৪৩-১৬ স্বাপতেয়ং ধনম্॥ ১-৪৩-২২ তত্রাগতৈর্বিষহরৈরিতি পাঠান্তরম্॥ ১-৪৩-৩১ যজ্জগ্রাহ ফলং রাজা তত্র ক্রিমিরভূদণুঃ ইতি পাঠান্তরম্॥ ১-৪৩-৩৩ ক্রিমিকো মাং দশৎবয়ং ইতি পাঠান্তরম্॥ ত্রিচৎবারিশোঽধ্যায়ঃ॥ ৪৩ ॥