স্ত্রীপর্ব – অধ্যায় 026

স্ত্রীপর্ব – অধ্যায় 026
॥ শ্রীঃ ॥
11.26. অধ্যায়ঃ 026
Mahabharata – Strii Parva – Chapter Topics
শোকাদ্ভুবি পতিতায়া গান্ধার্যাঃ কৃষ্ণেনাশ্বাসনম্॥ 1 ॥ যুধিষ্ঠিরাজ্ঞয়া বিদুরসঞ্জয়াদিভির্মৃতানাং দাহক্রিয়াকরণম্॥ 2 ॥
Mahabharata – Strii Parva – Chapter Text

11-26-0(65567)
শ্রীভগবানুবাচ। 11-26-0x(5364)
উত্তিষ্ঠোত্তিষ্ঠ গান্ধারি মা চ শোকে মনঃ কৃথাঃ।
তবৈব হ্যপরাধেন কুরবো নিধনং গতাঃ॥ 11-26-1(65568)
যত্ৎবং পুত্রং দুরাত্মানমীর্ষুমত্যন্তমানিনম্।
দুর্যোধনং পুরস্কৃত্য দুষ্কৃতং সাধু মন্যসে॥ 11-26-2(65569)
নিষ্ঠুরং বৈরপুরুষং বৃদ্ধানাং শাসনাতিগম্।
কথমাত্মকৃতং দোষং ময়্যাধাতুমিহেচ্ছসি॥ 11-26-3(65570)
মৃতং বা যদি বা নষ্টং যোঽতীতমনুশোচতি।
দুঃখেন লভতে দুঃখং দ্বাবনর্থৌ প্রপদ্যতে॥ 11-26-4(65571)
তপোর্থীয়ং ব্রাহ্মণী ধত্ত গর্ভং
গৌর্বোঢারং ধাবিতারং তুরঙ্গী।
শূদ্রা দাসং পশুপালং চ বৈশ্যা
বধার্থীয়ং ৎবদ্বিধা রাজপুত্রী॥ 11-26-5(65572)
বৈশম্পায়ন উবাচ। 11-26-6x(5365)
তচ্ছ্রুৎবা বাসুদেবস্য পুনরুক্তং বচোঽপ্রিয়ম্।
তূষ্ণীং বভূব গান্ধারী শোকব্যাকুললোচনা॥ 11-26-6(65573)
ধৃতরাষ্ট্রস্তু রাজর্ষির্নিগৃহ্যাবুদ্ধিজং তমঃ।
পর্যপৃচ্ছত ধর্মজ্ঞো ধর্মরাজং যুধিষ্ঠিরম্॥ 11-26-7(65574)
জীবতাং পরিমাণজ্ঞঃ সৈন্যানামসি পাণ্ডব।
হতানাং যদি জানীষে পরিমাণং বদস্বং মে॥ 11-26-8(65575)
যুধিষ্ঠির উবাচ। 11-26-9x(5366)
দশায়ুতসহস্রাণি সহস্রাণি চ বিংশতিঃ।
কোট্যঃ ষষ্টিশ্চ ষট্ চৈব হ্যস্মিন্রাজন্মৃধে হতাঃ॥ 11-26-9(65576)
আলক্ষাণাং চ বীরাণাং সহস্রাণি চতুর্দশ।
দশ চান্যানি রাজেন্দ্র শতং ষষ্টিশ্চ ভারত॥ 11-26-10(65577)
ধৃতরাষ্ট্র উবাচ। 11-26-11x(5367)
যুধিষ্ঠিরগতিং কাং তে গতাঃ পুরুষসত্তম।
আচক্ষ্ব মে মহাবাহো সর্বজ্ঞো হ্যসি মে মতঃ॥ 11-26-11(65578)
যুধিষ্ঠির উবাচ। 11-26-12x(5368)
যৈর্হুতানি শরীরাণি হৃষ্টৈঃ পরমসংয়ুগে।
দেবরাজসমাঁল্লোকান্গতাস্তে সত্যবিক্রমাঃ॥ 11-26-12(65579)
যে ৎবহৃষ্টেন মনসা মর্তব্যমিতি ভারত।
যুধ্যমানা হতাঃ সঙ্খ্যে গন্ধর্বৈঃ সহ সঙ্গতাঃ॥ 11-26-13(65580)
যে চ সঙ্গ্রামভূমিষ্ঠা যাচমানাঃ পরাঙ্মুখাঃ।
শস্ত্রেণ নিধনং প্রাপ্তা গতাস্তে গুহ্যকান্প্রতি॥ 11-26-14(65581)
পাত্যমানাঃ পরৈর্যে তু হীয়মানা নিরায়ুধাঃ।
হীনিষেবা মহাত্মানঃ পরানভিমুখা রণে॥ 11-26-15(65582)
ছিদ্যমানাঃ শিতৈঃ শস্ত্রৈঃ ক্ষত্রধর্মপরায়ণাঃ।
হতাস্তে ব্রহ্মসদনং গতা বীরাঃ সুবর্চসঃ॥ 11-26-16(65583)
যে ৎবত্র নিহতা রাজন্নন্তরায়োধনং প্রতি।
যথাকথঞ্চিৎপুরুষাস্তে গতা হ্যুত্তরাং গতিম্॥ 11-26-17(65584)
ধৃতরাষ্ট্র উবাচ। 11-26-18x(5369)
কেন জ্ঞানবলেনৈব পুত্র পশ্যসি সিদ্ধবৎ।
তন্মে বদ মহাবাহো শ্রোতব্যং যদি বৈ ময়া॥ 11-26-18(65585)
যুধিষ্ঠির উবাচ। 11-26-19x(5370)
নিদেশাদ্ভবতঃ পূর্বং বনে বিচরতা ময়া।
তীর্থয়াত্রাপ্রসঙ্গেন সম্প্রাপ্তোঽয়মনুগ্রহঃ॥ 11-26-19(65586)
দেবর্ষির্লোমশো দৃষ্টস্ততঃ প্রাপ্তোঽস্ম্যনুস্মৃতিম্।
দিব্যং চক্ষুরপি প্রাপ্তং জ্ঞানয়োগেন বৈ পুরা॥ 11-26-20(65587)
ধৃতরাষ্ট্র উবাচ। 11-26-21x(5371)
যে ৎবনাথা জনাস্তাত নাথবন্তশ্চ পাণ়্ডব।
কচ্চিত্তেষাং শরীরাণি ধক্ষ্যন্তি বিধিপূর্বকম্॥ 11-26-21(65588)
যুধিষ্ঠির উবাচ। 11-26-22x(5372)
ন যেষাং শান্তিকর্তারো ন চ যেঽত্রাহিতাগ্নয়ঃ।
বয়ং চ তেষাং কুর্যামো বহুৎবাত্তাত কর্মণাম্॥ 11-26-22(65589)
যান্সুপর্ণাশ্চ গুধ্রাশ্চ বিকর্ষন্তি ততস্ততঃ।
তেষাং সঙ্কর্ষণা লোকা ভবিষ্যন্তি ন সংশয়ঃ॥ 11-26-23(65590)
বৈশম্পায়ন উবাচ। 11-26-24x(5373)
এবমুক্ৎবা মহারাজ কুন্তীপুত্রো যুধিষ্ঠিরঃ।
আদিদেশ সুধর্মাণং ধৌম্যং সূতং চ সঞ্জয়ম্॥ 11-26-24(65591)
বিদুরং চ মহাবুদ্ধিং যুয়ুৎসুং চৈব কৌরবম্।
ইন্দ্রসেনমুখান্ভৃত্যান্সূতাংশ্চৈব সহস্রশঃ॥ 11-26-25(65592)
ভবন্তঃ কারয়ন্ৎবেষাং প্রেতকার্যাণ্যশেষতঃ।
যথা নাথবতাং কিঞ্চিচ্ছরীরং ন বিনশ্যতি॥ 11-26-26(65593)
শাসনাদ্ধর্মরাজস্য ক্ষত্তা সূতশ্চ সঞ্জয়ঃ।
সুধর্মা ধৌম্যসহিত ইন্দ্রসেনাদয়স্তথা॥ 11-26-27(65594)
চন্দনাগুরুকাষ্ঠানি তথা কালীয়কান্যুত।
ঘৃতং তৈলং চ গন্ধাংশ্চ ক্ষৌমাণি বসনানি চ॥ 11-26-28(65595)
সমাহৃত্য মহার্হাণি দারুণাং চৈব সঞ্চয়ান্।
রথাংশ্চ মৃদিতাস্তত্র নানাপ্রহরণানি চ॥ 11-26-29(65596)
চিতাঃ কৃৎবা প্রয়ত্নেন যথামুখ্যান্নরাধিপান্।
দাহয়ামাসুরব্যাগ্রাঃ শাস্ত্রদৃষ্টেন কর্মণা॥ 11-26-30(65597)
দুর্যোধনং চ রাজানং ভ্রাতৄংশ্চাস্য কর্মণা॥
শল্যং শলং চ রাজানং ভূরিশ্রবসমেব চ॥ 11-26-31(65598)
জয়দ্রথং চ রাজানমভিমন্যুং চ ভারত।
দৌঃশাসনিং লক্ষ্মণং চ ধৃষ্টকেতুং চ পার্থিবম্॥ 11-26-32(65599)
বৃহদ্বলং সোমদত্তং সৃঞ্জয়ং চ মহারথম্।
রাজানং ক্ষেমধন্বানং বিরাটদ্রুপদৌ তথা॥ 11-26-33(65600)
শিখণ্ডিনং চ পাঞ্চাল্যং ধৃষ্টদ্যুম্নং চ পার্ষতম্।
যুধামন্যুং চ বিক্রান্তমুত্তমৌজসমেব চ॥ 11-26-34(65601)
কৌসল্যং দ্রৌপদেয়াংশ্চ শকুনিং চাপি সৌবলম্।
অচলং বৃষকং চৈব ভগদত্তে চ পার্থিবম্॥ 11-26-35(65602)
কর্ণং বৈকর্তনং চৈব সহপুত্রমমর্ষণম্।
কেকয়াংশ্চ মহেষ্বাসাংস্ত্রিগর্তাংশ্চ মহারথান্॥ 11-26-36(65603)
ঘটোৎকচং রাক্ষসেন্দ্রং বকভ্রাতরমেব চ।
অলম্বুসং রাক্ষসেন্দ্রং জলসন্ধং চ পার্থিবম্॥ 11-26-37(65604)
এতাংশ্চান্যাংস্চ সুবহূন্পার্থিবাংশ্চ সহস্রশঃ।
ধৃতধারাহুতৈর্দীপ্তৈঃ পাবকৈঃ সমদাহয়ন্। 11-26-38(65605)
পিতৃমেধাশ্চ কেষাঞ্চিৎপ্রাবর্তন্ত মহাত্মনাম্।
সামভিশ্চাপ্যগায়ন্ত তেঽন্বশাসত চাপরৈঃ॥ 11-26-39(65606)
সাম্নামৃচাং চ নাদেন স্ত্রীণাং চ রুদিতস্বনৈঃ।
কশ্মলং সর্বভূতানাং নিশায়াং সমপদ্যত॥ 11-26-40(65607)
হুতাশ্চ তৎপ্রদীপ্তাশ্চ দীপ্যমানাশ্চ পাবকাঃ।
নভসীবান্বদৃশ্যন্ত গ্রহাস্তন্বভ্রসংবৃতাঃ॥ 11-26-41(65608)
যে চাপ্যনাথাস্তত্রাসন্নানাদেশসমাগতাঃ।
তাংশ্চ সর্বান্সমানীয় রাশীকৃৎবা সহস্রশঃ॥ 11-26-42(65609)
চিৎবা দারুভিরব্যগ্রৈঃ প্রভূতৈঃ স্নেহপাচিতৈঃ।
দাহয়ামাস তান্সর্বান্বিদুরো রাজশাসনাৎ॥ 11-26-43(65610)
কারয়িৎবা ক্রিয়াস্তেষাং কুরুরাজো যুধিষ্ঠিরঃ।
ধৃতরাষ্ট্রং পুরস্কৃত্য গঙ্গামভিমুখোঽগমৎ॥ ॥ 11-26-44(65611)

ইতি শ্রীমন্মহাভারতে স্ত্রীপর্বণি শ্রাদ্ধপর্বণি ষড্বিংশোঽধ্যায়ঃ॥ 26 ॥

Mahabharata – Strii Parva – Chapter Footnotes
11-26-2 দুষ্কৃতং দুরাচরিতং স্বকীয়ম্॥ 11-26-3 বৈরপ্রিয়ং পুরুষং xxxxষম্॥ 11-264- দ্বৌ পূর্বাপরদুঃখদ্বয়রূপৌ॥ 11-26-5 তপোরূপায়ার্থায় উৎপন্নং তপোর্থীয়ম্। ৎবদ্বিধা বধার্থীয়মেব গর্ভং ধত্তে। অন্যা তু জয়ার্থীয়ং কীর্ত্যাদ্যর্থীয়মপীতি ভাবঃ। তপোর্থিনং, বধার্থিনং ইতি ক.পাঠঃ॥ 11-26-17 তে গতাস্তূত্তরান্কুরূনিতি ছ.পাঠঃ। তে গতাস্তূত্তমাং গতিমিতি ট.পাঠঃ। তে গতা হ্যধমাং গতিমিতি ক.পাঠঃ॥ 11-26-24 সুধর্মাণং দুর্যোধনপুরোহিতম্॥ 11-26-43 স্নেহপাচিতৈঃ স্নেহসংয়ুক্তৈঃ॥ 11-26-26 ষড্বিংশোঽধ্যায়ঃ॥