আশ্রমবাসিকপর্ব – অধ্যায় 029

আশ্রমবাসিকপর্ব – অধ্যায় 029
॥ শ্রীঃ ॥
16.29. অধ্যায়ঃ 029
Mahabharata – AshramaVasika Parva – Chapter Topics
যুধিষ্ঠিরেণ ধৃরাষ্ট্রাভ্যনুজ্ঞয়া ভ্রাত্রাদিভিঃ সহ মহর্ষিণামাশ্রমদর্শনম্॥ 1 ॥ শতয়ূপাদিভিঃ সশিষ্যেণ ব্যাসেন চ যুধিষ্ঠিরাদিভিঃ পরিবৃতস্য ধৃতরাষ্ট্রস্যাশ্রমংপ্রত্যাগমনম্॥ 2 ॥
Mahabharata – AshramaVasika Parva – Chapter Text


বৈশম্পায়ন উবাচ।

ততস্তু রাজন্নেতেষামাশ্রমে পুণ্যকর্মণাম্।
শিবা নক্ষত্রসম্পন্না সা ব্যতীয়ায় শর্বরী॥ 16-29-1(97923)
ততস্তত্র কথাশ্চাসংস্তেষাং ধর্মার্থলক্ষণাঃ।
বিচিত্রপদসঞ্চারা নানাশ্রুতিভিরন্বিতাঃ॥ 16-29-2(97924)
পাণ্ডবাস্ৎবভিতো মাতুর্ধরণ্যাং সুষুপুস্তদা।
উৎসৃজ্য তু মহার্হাণি শয়নানি নরাধিপ॥ 16-29-3(97925)
যদাহারোঽভকবদ্রাজা ধৃতরাষ্ট্রো মহামনাঃ।
তদাহারা নৃবীংরাস্তে ন্যবসংস্তাং নিশাং তদা॥ 16-29-4(97926)
ব্যতীতায়াং তু শর্বর্যাং কৃতপৌর্বাহ্ণিকক্রিয়ঃ।
ভ্রাতৃভিঃ সহিতো রাজা দদর্শাশ্রমমণ্ডলম্॥ 16-29-5(97927)
সান্তঃ পুরপরীবারঃ সভৃত্যঃ সপুরোহিতঃ।
যথাসুখং যথোদ্দেশং ধৃতরাষ্ট্রাভ্যনুজ্ঞয়া॥ 16-29-6(97928)
দদর্শ তত্র বেদীশ্চ সম্প্রজ্বলিতপাবকাঃ।
কৃতাভিষেকৈর্মুনিভির্হুতাগ্নিভিরুপস্থিতাঃ॥ 16-29-7(97929)
বানেয়পুষ্পনিকরৈরাজ্যধূমোদ্গমৈরপি।
ব্রাহ্মেণ বপুষা যুক্তা যুক্তা মুনিগণস্য তাঃ॥ 16-29-8(97930)
মৃগয়ূথৈরনুদ্বিগ্নৈস্তত্রতত্র সমাশ্রিতৈঃ।
অশঙ্কিতৈঃ পক্ষিগণৈঃ প্রগীতৈরিব চ প্রভো॥ 16-29-9(97931)
কেকাভির্নীলকণ্ঠানাং দাত্যূহানাং চ কূজিতৈঃ।
কোকিলানাং কুহুরবৈঃ সুখৈঃ শ্রুতিমনোহরৈঃ॥ 16-29-10(97932)
প্রাধীতদ্বিজঘোষৈশ্চ ক্বচিৎক্বচিদলঙ্কৃতম্।
ফলমূলসমাহারৈর্মহদ্ভিশ্চোপশোভিতম্॥ 16-29-11(97933)
ততঃ স রাজা প্রদদৌ তাপসার্থমুপাহৃতান্।
কলশান্কাঞ্চনান্রাজংস্তথৈবৌদুম্বরানপি॥ 16-29-12(97934)
অজিনানি প্রবেণীশ্চ স্রুক্স্রুবং চ মহীপতিঃ।
কমণ্ডলূংশ্চি স্থালীশ্চ পিঠরাণি চ ভারত॥ 16-29-13(97935)
ভাজনানি চ লৌহানি পাত্রীশ্চ বিবিধা নৃপ।
যদ্যদিচ্ছতি যাবচ্চ যদন্যদপি কাঙ্ক্ষিতম্॥ 16-29-14(97936)
এবং স রাজা ধর্মাত্মা পরীত্যাশ্রমমণ্ডলম্।
বসু বিশ্রাণ্য তৎসর্বং পুনরায়ান্মহীপতিঃ॥ 16-29-15(97937)
কৃতাহ্নিকং চ রাজানং ধৃতরাষ্ট্রং মহীপতিম্।
দদর্শাসীনমব্যগ্রং গান্ধারীসহিতং তদা॥ 16-29-16(97938)
মাতরং চাবিদূরস্থাং শিষ্যবৎপ্রণতাং স্থিতাম্।
কুন্তীং দদর্শ ধর্মাত্মা শিষ্টাচারসমন্বিতাম্॥ 16-29-17(97939)
স তমভ্যর্চ্য রাজানং নাম সংশ্রাব্য চাত্মনঃ।
নিষীদেত্যভ্যনুজ্ঞাতো বৃস্যামুপবিবেশ হ॥ 16-29-18(97940)
ভীমসেনাদয়শ্চৈব পাণ্ডব ভরতর্ষভ।
অভিবাদ্যোপসঙ্গৃহ্য নিষেদুঃ পার্থিবাজ্ঞয়া॥ 16-29-19(97941)
স তৈঃ পরিবৃতো রাজা শুশুভেঽতীব কৌরবঃ।
বিভ্রদ্ব্রাহ্মীং শ্রিয়ং দীপ্তাং দেবৈরিব বৃহস্পতিঃ॥ 16-29-20(97942)
তথা তেষূপবিষ্টেষু সমাজগ্মুর্মহর্ষয়ঃ।
শতয়ূপপ্রভৃতয়ঃ কুরুক্ষেত্রনিবাসিনঃ॥ 16-29-21(97943)
ব্যাসশ্চ ভগবান্বিপ্রো দেবর্ষিগণসেবিতঃ।
বৃতঃ শিষ্যৈর্মহাতেজা দর্শয়ামাস পার্থিবম্॥ 16-29-22(97944)
ততঃ স রাজা কৌরব্যঃ কুন্তীপুত্রশ্চ ধর্মরাট্।
ভীমসেনাদয়শ্চৈব প্রত্যুত্থায়াভ্যবাদয়ন্॥ 16-29-23(97945)
সমাগতস্ততো ব্যাসঃ শতয়ূপাদিভির্বৃতঃ।
ধৃতরাষ্ট্রং মহীপালমাস্যতামিত্যভাষত॥ 16-29-24(97946)
বরং তু বিষ্টরং কৌশ্যং কৃষ্ণাজিনকুশোত্তরম্।
প্রতিপেদে তদা ব্যাসস্তদর্থমুপকল্পিতম্॥ 16-29-25(97947)
তে চ সর্বে দ্বিজশ্রেষ্ঠা বিষ্টরেষু সমন্ততঃ।
দ্বৈপায়নাভ্যনুজ্ঞাতা নিষেদুর্বিপুলৌজসঃ॥ ॥ 16-29-26(97948)

ইতি শ্রীমন্মহাভারতে আশ্রমবাসিকপর্বণি আশ্রমবাসপর্বণি একোনত্রিংশোঽধ্যায়ঃ॥ 29 ॥

Mahabharata – AshramaVasika Parva – Chapter Footnotes
7-29-8 মুনিগণস্য মুনিগণেন। তা বৈদিক্যো লৌকিক্যশ্চ॥ 7-29-9 মৃগয়ূথাদিভিরলঙ্কৃতমাশ্রমম্॥ 7-29-12 ঔদুম্বরান্ কলশান্॥ 7-29-13 প্রবেণীঃ কুথাঃ॥