আশ্রমবাসিকপর্ব – অধ্যায় 025

আশ্রমবাসিকপর্ব – অধ্যায় 025
॥ শ্রীঃ ॥
16.25. অধ্যায়ঃ 025
অথাশ্রমবাসপর্ব ॥ 1 ॥
Mahabharata – AshramaVasika Parva – Chapter Topics
যুধিষ্ঠিরেণ নানায়ানারূঢৈঃ পৌরৈর্ভ্রাতৃভিশ্চ সহ ধৃতরাষ্ট্রাদিদিদৃক্ষয়া শতয়ূপাশ্রমবনপ্রবেশঃ॥ 1 ॥
Mahabharata – AshramaVasika Parva – Chapter Text


বৈশম্পায়ন উবাচ।

আজ্ঞাপয়ামাস ততঃ সেনাং ভরতসত্তমঃ।
অর্জুনপ্রমুখৈর্গুপ্তাং লোকপালোপমৈর্নরৈঃ॥ 16-25-1(97828)
যোগোয়োগ ইতি প্রীত্যা ততঃ শব্দো মহানভূৎ।
ক্রোশতাং সাদিনাং তত্র যুজ্যতাং যুজ্যতামিতি॥ 16-25-2(97829)
কেচিদ্যানৈর্নরা জগ্মুঃ কেচিদশ্বৈর্মহাজবৈঃ।
কাঞ্চনৈশ্চ রথৈঃ কেচিজ্জ্বলিতজ্বলনোপমৈঃ॥ 16-25-3(97830)
গজেন্দ্রৈশ্চ তথৈবান্যে কেচিদুষ্ট্রৈর্নরাধিপ।
পদাতয়স্তথৈবান্যে নখরপ্রাসয়োধিনঃ॥ 16-25-4(97831)
পৌরজানপদাশ্চৈব যানৈর্বহুবিধৈস্তথা।
অন্বয়ুঃ কুরুরাজানং ধৃতরাষ্ট্রং দিদক্ষবঃ॥ 16-25-5(97832)
স চাপি রাজবচনাদাচার্যো গৌতমঃ কৃপঃ।
সেনামাদায় সেনানীঃ প্রয়যাবাশ্রমং প্রতি॥ 16-25-6(97833)
ততো দ্বিজৈঃ পরিবৃতঃ কুরুরাজো যুধিষ্ঠিরঃ।
সংস্তূয়মানো বহুভিঃ সূতমাগধবন্দিভিঃ॥ 16-25-7(97834)
পাণ্ডুরেণাতপত্রেণ ধ্রিয়মাণেন মূর্ধনি।
রতানীকেন মহতা নির্জগাম কুরূদ্বহঃ॥ 16-25-8(97835)
গজৈশ্চাচলসংকাশৈর্ভীমকর্মা বৃকোদরঃ।
সজ্জয়ন্ত্রায়ুধোপেতৈঃ প্রয়যৌ পবনাত্মজঃ॥ 16-25-9(97836)
মাদ্রীপুত্রাবপি তথা হয়ারোহৌ সুসংবৃতৌ।
জগ্মতুঃ শীঘ্রগমনৌ সন্নদ্ধকবচধ্বজৌ॥ 16-25-10(97837)
অর্জুনশ্চ মহাতেজা রথেনাদিত্যবর্চসা।
বশী শ্বেতৈর্হয়ৈর্যুক্তৈর্দিব্যেনান্বগমন্নৃপম্॥ 16-25-11(97838)
দ্রৌপদীপ্রমুখাশ্চাপি স্ত্রীসঙ্ঘাঃ শিবিকাগতাঃ।
স্ত্র্যধ্যক্ষগুপ্তাঃ প্রয়যুর্বিসৃজন্তোঽমিতং বসু॥ 16-25-12(97839)
সমৃদ্ধরথহস্ত্যশ্বং বেণুবীণানুনাদিতম্।
শুশুভে পাণ্ডবং সৈন্যং তত্তদা ভরতর্ষভ॥ 16-25-13(97840)
নদীতীরেষু রম্যেষু সরঃসু চ বিশাম্পতে।
বাসান্কৃৎবা ক্রমেণাথ জগ্মুস্তে কুরুপুঙ্গবাঃ॥ 16-25-14(97841)
যুয়ুৎসুশ্চ মহাতেজা ধৌম্যশ্চৈবি পুরোহিতঃ।
যুধিষ্ঠিরস্য বচনাৎপুরগুপ্তিং প্রচক্রতুঃ॥ 16-25-15(97842)
ততো যুধিষ্ঠিরো রাজা কুরুক্ষেত্রমবাতরৎ।
ক্রমোণোত্তীর্য যমুনাং নদীং পরমপাবিনীম্॥ 16-25-16(97843)
স দদর্শাশ্রমং দূরাদ্রাজর্ষেস্তস্য ধীমতঃ।
শতয়ূপস্য কৌরব্য ধৃতরাষ্ট্রস্য চৈব হ॥ 16-25-17(97844)
ততঃ প্রমুদিতঃ সর্বো জনস্তদ্বনমঞ্জসা।
বিবেশ সুমহানাদৈরাপূর্য ভরতর্ষভ॥ ॥ 16-25-18(97845)

ইতি শ্রীমন্মহাভারতে আশ্রমিবাসিকপর্বণি আশ্রমিবাসপর্বণি পঞ্চবিংশোঽধ্যায়ঃ॥ 25 ॥

Mahabharata – AshramaVasika Parva – Chapter Footnotes
7-25-3 যানৈমনুষ্যবাহ্যঃ॥ 7-25-4 নখরপ্রাসঃ ব্যাঘ্রনখবৎপরাচীনফলককুক্ষির্যঃ॥