আদিপর্ব – অধ্যায় ১৯৭
॥ শ্রীঃ ॥
১.১৯৭. অধ্যায়ঃ ১৯৭
Mahabharata – Adi Parva – Chapter Topics
বসিষ্ঠবাক্যেন লোকবিনাশান্নিবৃত্তেন পরাশরেণ রাক্ষসনাশার্থং যজ্ঞারম্ভঃ॥ ১ ॥ পুলস্ত্যপ্রার্থনয়া পরাশরেণ যজ্ঞসমাপনম্॥ ২ ॥
Mahabharata – Adi Parva – Chapter Text
১-১৯৭-০ (৮৭৭৭)
গন্ধর্ব উবাচ। ১-১৯৭-০x (১১২১)
এবমুক্তঃ স বিপ্রর্ষির্বসিষ্ঠেন মহাত্মনা।
ন্যযচ্ছদাত্মনঃ ক্রোধং সর্বলোকপরাভবাৎ॥ ১-১৯৭-১ (৮৭৭৮)
ঈজে চ স মহাতেজাঃ সর্ববেদবিদাং বরঃ।
ঋষী রাক্ষসসত্রেণ শাক্তেয়োঽথ পরাশরঃ॥ ১-১৯৭-২ (৮৭৭৯)
ততো বৃদ্ধাংশ্চ বালাংশ্চ রাক্ষসান্স মহামুনিঃ।
দদাহ বিততে যজ্ঞে শক্তের্বধমনুস্মরন্॥ ১-১৯৭-৩ (৮৭৮০)
ন হি তং বারয়ামাস বসিষ্ঠো রক্ষসাং বধাৎ।
দ্বিতীয়ামস্য মাং ভাঙ্ক্ষং প্রতিজ্ঞামিতি নিশ্চয়াৎ॥ ১-১৯৭-৪ (৮৭৮১)
ত্রয়াণাং পাবকানাং চ সত্রে তস্মিন্মহামুনিঃ।
আসীৎপুরস্তাদ্দীপ্তানাং চতুর্থ ইব পাবকঃ॥ ১-১৯৭-৫ (৮৭৮২)
তেন যজ্ঞেন শুভ্রেণ হূয়মানেন শক্তিতঃ।
তদ্বিদীপিতমাকাশং সূর্যেণেব ঘনাত্যযে॥ ১-১৯৭-৬ (৮৭৮৩)
তং বসিষ্ঠাদয়ঃ সর্বে মুনয়স্তত্র মেনিরে।
তেজসা দীপ্যমানং বৈ দ্বিতীয়মিব ভাস্করম্॥ ১-১৯৭-৭ (৮৭৮৪)
ততঃ পরমদুষ্প্রাপমন্যৈর্ঋষিরুধারধীঃ।
সমাপিপয়িষুঃ সত্রং তমত্রিঃ সমুপাগমৎ॥ ১-১৯৭-৮ (৮৭৮৫)
তথা পুলস্ত্যঃ পুলহঃ ক্রতুশ্চৈব মহাক্রতুঃ।
তত্রাজগ্মুরমিত্রঘ্ন রক্ষসাং জীবিতেপ্সয়া॥ ১-১৯৭-৯ (৮৭৮৬)
পুলস্ত্যস্তু বধাত্তেষাং রক্ষসাং ভরতর্ষভ।
উবাচেদং বচঃ পার্থ পরাশরমরিন্দমম্॥ ১-১৯৭-১০ (৮৭৮৭)
কচ্চিত্তাতাপবিঘ্নং তে কচ্চিন্নন্দসি পুত্রক।
অজানতামদোষাণাং সর্বেষাং রক্ষসাং বধাৎ॥ ১-১৯৭-১১ (৮৭৮৮)
প্রজোচ্ছেদমিমং মহ্যং ন হি কর্তু ৎবমর্হসি।
নৈষ তাত দ্বিজাতীনাং ধর্মো দৃষ্টস্তপস্বিনাম্॥ ১-১৯৭-১২ (৮৭৮৯)
শম এব পরো ধর্মস্তমাচর পরাশর।
অধর্মিষ্ঠং বরিষ্ঠঃ সন্কুরুষে ৎবং পরাশর॥ ১-১৯৭-১৩ (৮৭৯০)
শক্তিং চাপি হি ধর্মজ্ঞং নাতিক্রান্তুমিহার্হসি।
প্রজায়াশ্চ মমোচ্ছেদং ন চৈবং কর্তুমর্হসি॥ ১-১৯৭-১৪ (৮৭৯১)
শাপাদ্ধি শক্তের্বাসিষ্ঠ তদা তদুপপাদিতম্।
আত্মজেন স দোষেণ শক্তির্নীত ইতো দিবম্॥ ১-১৯৭-১৫ (৮৭৯২)
ন হি তং রাক্ষসঃ কশ্চিচ্ছক্তো ভক্ষয়িতুং মুনে।
`বাসিষ্ঠো ভক্ষিতশ্চাসীৎকৌশিকোৎসৃষ্টরক্ষসা।
শাপং ন কুর্বন্তি তদা ন চ ত্রাণপরায়ণাঃ॥ ১-১৯৭-১৬ (৮৭৯৩)
ক্ষমাবন্তোঽদহন্দেহং দেহমন্যদ্ভবৎবিতি।’
আত্মনৈবাত্মনস্তেন দৃষ্টো মৃত্যুস্তদাঽভবৎ॥ ১-১৯৭-১৭ (৮৭৯৪)
নিমিত্তভূতস্তত্রাসীদ্বিশ্বামিত্রঃ পরাশর।
রাজা কল্মাষপাদশ্চ দিবমারুহ্য মোদতে॥ ১-১৯৭-১৮ (৮৭৯৫)
যে চ শক্ত্যবরাঃ পুত্রা বসিষ্ঠস্য মহামুনে।
তে চ সর্বে মুদা যুক্তা মোদন্তে সহিতাঃ সুরৈঃ॥ ১-১৯৭-১৯ (৮৭৯৬)
সর্বমেতদ্বসিষ্ঠস্য বিদিতং বৈ মহামুনে।
রক্ষসাং চ সমুচ্ছেদ এষ তাত তপস্বিনাম্॥ ১-১৯৭-২০ (৮৭৯৭)
নিমিত্তভূতস্ৎবং চাত্র ক্রতৌ বাসিষ্ঠনন্দন।
তৎসত্রং মুঞ্চ ভদ্রং তে সমাপ্তমিদমস্তু তে॥ ১-১৯৭-২১ (৮৭৯৮)
গন্ধর্ব উবাচ। ১-১৯৭-২২x (১১২২)
এবমুক্তঃ পুলস্ত্যেন বসিষ্ঠেন চ ধীমতা।
তদা সমাপয়ামাস সত্রং শাক্তো মহামুনিঃ॥ ১-১৯৭-২২ (৮৭৯৯)
সর্বরাক্ষসসত্রায় সংভৃতং পাবকং তদা।
উত্তরে হিমবৎপার্শ্বে উৎসসর্জ মহাবনে॥ ১-১৯৭-২৩ (৮৮০০)
স তত্রাদ্যাপি রক্ষাংসি বৃক্ষানশ্মন এব চ।
ভক্ষয়ন্দৃশ্যতে বহ্নিঃ সদা পর্বণি পর্বণি॥ ॥ ১-১৯৭-২৪ (৮৮০১)
ইতি শ্রীমন্মহাভারতে আদিপর্বণি চৈত্ররথপর্বণি সপ্তনবত্যধিকশততমোঽধ্যায়ঃ॥ ১৯৭ ॥
Mahabharata – Adi Parva – Chapter Footnotes
১-১৯৭-৪ মাভাঙ্ক্ষে ন নাশয়েয়ম্॥ ১-১৯৭-১২ মদ্যং মম॥ সপ্তনবত্যধিকশততমোঽধ্যায়ঃ॥ ১৯৭ ॥