আদিপর্ব – অধ্যায় ১৮৬

আদিপর্ব – অধ্যায় ১৮৬

॥ শ্রীঃ ॥

১.১৮৬. অধ্যায়ঃ ১৮৬

Mahabharata – Adi Parva – Chapter Topics

অর্ধরাত্রে পাণ্ডবানাং গঙ্গাতীরগমনম্॥ ১ ॥ তত্র স্ত্রীভিঃ সহ জলক্রীডাং কুর্বতা চিত্ররথেন গন্ধর্বেণ সহ অর্জুনস্য যুদ্ধম্॥ ২ ॥ আগ্নেয়াস্ত্রেণ দগ্ধাদধঃপতিতস্য তস্যার্জুনেন গ্রহণং॥ ৩ ॥ গন্ধর্বপত্ন্যা প্রার্থিতস্য যুধিষ্ঠিরস্যাজ্ঞয়া গন্ধর্বমোচনম্॥ ৪ ॥ গন্ধর্বপ্রার্থনয়া আগ্নেয়াস্ত্রপরিবর্তনেন তস্মাদ্গান্ধর্বাস্ত্রগ্রহণানুমোদনম্॥ ৫ ॥ গন্ধর্বেণ পাণ্ডবানাং পুরোহিতসংপাদনোপদেশঃ॥ ৬ ॥

Mahabharata – Adi Parva – Chapter Text

১-১৮৬-০ (৮৩০০)
বৈশম্পায়ন উবাচ। ১-১৮৬-০x (১০৫৯)
তে প্রতস্থুঃ পুরস্কৃত্য মাতরং পুরুষর্ষভাঃ।
সমৈরুদঙ্মুকৈর্মার্গৈর্যথোদ্দিষ্টং চ ভারত॥ ১-১৮৬-১ (৮৩০১)
অহোরাত্রেণাভ্যগচ্ছন্পাঞ্চালনগরং প্রতি।
অভ্যাজগ্মুর্লোকনদীং গঙ্গাং ভাগীরথীং প্রতি॥ ১-১৮৬-২ (৮৩০২)
চন্দ্রাস্তময়বেলায়ামর্ধরাত্রসমাগমে।
বারি চৈবানুমজ্জন্তস্তীর্থং সোমাশ্রয়ায়ণম্। ১-১৮৬-৩ (৮৩০৩)
আসেদুঃ পুরুষব্যাঘ্রা গঙ্গায়াং পাণ্ডুনন্দনাঃ॥
উল্মুকং তু সমুদ্যম্য তেষামগ্রে ধনঞ্জয়ঃ। ১-১৮৬-৪ (৮৩০৪)
প্রকাশার্থং যয়ৌ তত্র রক্ষার্থং চ মহারথঃ॥
তত্র গঙ্গাজলে রম্যে বিবিক্তে ক্রীডয়ন্ স্ত্রিয়ঃ। ১-১৮৬-৫ (৮৩০৫)
শব্দং তেষাং স শুশ্রাব নদীং সমুপসর্পতাম্।
তেন শব্দেন চাবিষ্টশ্চুক্রোধ বলবদ্বলী॥ ১-১৮৬-৬ (৮৩০৬)
স দৃষ্ট্বা পাণ্ডবাংস্তত্র সহ মাত্রা পরন্তপান্।
বিষ্ফারয়ন্ধনুর্ঘোরমিদং বচনমব্রবীৎ॥ ১-১৮৬-৭ (৮৩০৭)
সন্ধ্যা সংরজ্যতে ঘোরা পূর্বরাত্রাগমেষু যা।
অশীতিভির্লবৈর্হীনং তন্মুহূর্তং প্রচক্ষতে॥ ১-১৮৬-৮ (৮৩০৮)
বিহিতং কামচারাণাং যক্ষগন্ধর্বরক্ষসাম্।
শেষমন্যন্মনুষ্যাণাং কর্মচারেষু বৈ স্মৃতম্॥ ১-১৮৬-৯ (৮৩০৯)
লোভাৎপ্রচারং চরতস্তাসু বেলাসু বৈ নরান্।
উপক্রান্তা নিগৃহ্ণীমো রাক্ষসৈঃ সহ বালিশান্॥ ১-১৮৬-১০ (৮৩১০)
অতো রাত্রৌ প্রাপ্নুবতো জলং ব্রহ্মবিদো জনাঃ।
গর্হয়ন্তি নরান্সর্বান্বলস্থান্নৃপতীনপি॥ ১-১৮৬-১১ (৮৩১১)
আরাচ্চ তিষ্ঠতাস্মাকং সমীপং নোপসর্পত।
কস্মান্মাং নাভিজানীত প্রাপ্তং ভাগীরথীজলম্॥ ১-১৮৬-১২ (৮৩১২)
অঙ্গারপর্ণং গন্ধর্বং বিত্ত মাং স্ববলাশ্রয়ম্।
অহং হি মানী চের্ষ্যুশ্চ কুবেরস্য প্রিয়ঃ সখা॥ ১-১৮৬-১৩ (৮৩১৩)
অঙ্গারপর্ণমিত্যেবং খ্যাতং চেদং বনং মম।
অনুগঙ্গং চরন্কামাংশ্চিত্রং যত্র রমাম্যহম্॥ ১-১৮৬-১৪ (৮৩১৪)
ন কৌণপাঃ শৃঙ্গিণো বা ন দেবা ন চ মানুষাঃ।
কুবেরস্য যথোষ্ণীষং কিং মাং সমুপসর্পথ॥ ১-১৮৬-১৫ (৮৩১৫)
অর্জুন উবাচ। ১-১৮৬-১৬x (১০৬০)
সমুদ্রে হিমবৎপার্শ্বে নদ্যামস্যাং চ দুর্মতে।
রাত্রাবহনি সন্ধ্যায়াং কস্য ক্লৃপ্তঃ পরিগ্রহঃ॥ ১-১৮৬-১৬ (৮৩১৬)
ভুক্তো বাঽপ্যথ বাঽভুক্তো রাত্রাবহনি খেচর।
ন কালনিয়মো হ্যস্তি গঙ্গাং প্রাপ্য সরিদ্বরাং॥ ১-১৮৬-১৭ (৮৩১৭)
বয়ং চ শক্তিসম্পন্না অকালে ৎবামধৃষ্ণুম।
অশক্তা হি রণে ক্রূর যুষ্মানর্চন্তি মানবাঃ॥ ১-১৮৬-১৮ (৮৩১৮)
পুরা হিমবতশ্চৈষা হেমশৃঙ্গাদ্বিনিঃসৃতা।
গঙ্গা গৎবা সমুদ্রাম্ভঃ সপ্তধা সমপদ্যত॥ ১-১৮৬-১৯ (৮৩১৯)
গঙ্গাং চ যমুনাং চৈব প্লক্ষজাতাং সরস্বতীম্।
রথস্থাং সরয়ূং চৈব গোমতীং গণ্ডকীং তথা॥ ১-১৮৬-২০ (৮৩২০)
অপর্যুষিতপাপাস্তে নদীঃ সপ্ত পিবন্তি যে।
ইয়ং ভূৎবা চৈকবপ্রা শুচিরাকাশগা পুনঃ॥ ১-১৮৬-২১ (৮৩২১)
দেবেষু গঙ্গা গন্ধর্ব প্রাপ্নোত্যলকনন্দতাম্।
তথা পিতৄন্বৈতরণী দুস্তরা পাপকর্মভিঃ।
গঙ্গা ভবতি বৈ প্রাপ্য কৃষ্ণদ্বৈপায়নোঽব্রবীৎ॥ ১-১৮৬-২২ (৮৩২২)
অসম্বাধা দেবনদী স্বর্গসংপাদনী শুভা।
কথমিচ্ছসি তাং রোদ্ধুং নৈষ ধর্মঃ সনাতনঃ॥ ১-১৮৬-২৩ (৮৩২৩)
অনিবার্যমসম্বাধং তব বাচা কথং বয়ম্।
ন স্পৃশেম যথাকামং পুণ্যং ভাগীরথীজলম্॥ ১-১৮৬-২৪ (৮৩২৪)
বৈশম্পায়ন উবাচ। ১-১৮৬-২৫x (১০৬১)
অঙ্গারপর্ণস্তচ্ছ্রুৎবা ক্রুদ্ধ আনাম্য কার্মুকম্।
মুমোচ বাণান্নিশিতানহীনাশীবিষানিব॥ ১-১৮৬-২৫ (৮৩২৫)
উল্মুকং ভ্রাময়ংস্তূর্ণং পাণ্ডবশ্চর্ম চোত্তরম্।
ব্যপোহত শরাংস্তস্য সর্বানেব ধনঞ্জয়ঃ॥ ১-১৮৬-২৬ (৮৩২৬)
অর্জুন উবাচ। ১-১৮৬-২৭x (১০৬২)
বিভীষিকা বৈ গন্ধর্ব নাস্ত্রজ্ঞেষু প্রয়ুজ্যতে।
অস্ত্রজ্ঞেষু প্রয়ুক্তেয়ং ফেনবৎপ্রবিলীয়তে॥ ১-১৮৬-২৭ (৮৩২৭)
মানুষানতি গন্ধর্বান্সর্বান্ গন্ধর্ব লক্ষয়ে।
তস্মাদস্ত্রেণ দিব্যেন যোৎস্যেঽহং ন তু মায়যা॥ ১-১৮৬-২৮ (৮৩২৮)
পুরাঽস্ত্রমিমাগ্নেয়ং প্রাদাৎকিল বৃহস্পতিঃ।
ভরদ্বাজায় গন্ধর্ব গুরুর্মান্যঃ শতক্রতোঃ॥ ১-১৮৬-২৯ (৮৩২৯)
ভরদ্বজাদগ্নিবেশ্য অগ্নিবেশ্যাদ্গুরুর্মম।
সাধ্বিদং মহ্যমদদদ্দ্রোণো ব্রাহ্মণসত্তমঃ॥ ১-১৮৬-৩০ (৮৩৩০)
বৈশম্পায়ন উবাচ। ১-১৮৬-৩১x (১০৬৩)
ইত্যুক্ৎবা পাণ্ডবঃ ক্রুদ্ধো গন্ধর্বায় মুমোচ হ।
প্রদীপ্তমস্ত্রমাগ্নেয়ং দদাহাস্য রথং তু তৎ॥ ১-১৮৬-৩১ (৮৩৩১)
বিরথং বিপ্লুতং তং তু স গন্ধর়্বং মহাবলঃ।
অস্ত্রতেজঃপ্রমূঢং চ প্রপতন্তমবাঙ্মুখম্॥ ১-১৮৬-৩২ (৮৩৩২)
শিরোরুহেষু জগ্রাহ মাল্যবৎসু ধনঞ্জয়ঃ।
ভ্রাতৄন্প্রতি চকর্ষাথ সোঽস্ত্রপাতাদচেতসম্॥ ১-১৮৬-৩৩ (৮৩৩৩)
যুধিষ্ঠিরং তস্য ভার্যা প্রপেদে শরণার্থিনী।
নাম্না কুম্ভীনসী নাম পতিত্রাণমভীপ্সতী॥ ১-১৮৬-৩৪ (৮৩৩৪)
গন্ধর্ব্যুবাচ। ১-১৮৬-৩৫x (১০৬৪)
ত্রায়স্ব মাং মহাভাগ পতিং চেমং বিমুঞ্চ মে।
গন্ধর্বী শরণং প্রাপ্তা নাম্না কুম্ভীনসী প্রভো॥ ১-১৮৬-৩৫ (৮৩৩৫)
যুধিষ্ঠির উবাচ। ১-১৮৬-৩৬x (১০৬৫)
যুদ্ধে জিতং যশোহীনং স্ত্রীনাথমপরাক্রমম্।
কো নিহন্যাদ্রিপুং তাত মুঞ্চেমং রিপুসূদন॥ ১-১৮৬-৩৬ (৮৩৩৬)
অর্জুন উবাচ। ১-১৮৬-৩৭x (১০৬৬)
জীবিতং প্রতিপদ্যস্ব গচ্ছ গন্ধর্ব মা শুচঃ।
প্রদিশত্যভয়ং তেঽদ্য কুরুরাজো যুধিষ্ঠিরঃ॥ ১-১৮৬-৩৭ (৮৩৩৭)
গন্ধর্ব উবাচ। ১-১৮৬-৩৮x (১০৬৭)
জিতোঽহং পূর্বকং নাম মুঞ্চাম্যঙ্গারপর্ণতাম্।
যশোহীনং ন চ শ্লাঘ্যং স্বং নাম জনসংসদি॥ ১-১৮৬-৩৮ (৮৩৩৮)
সাধ্বিমং লব্ধবাঁল্লাভং যোঽহং দিব্যাস্ত্রধারিণম্।
গান্ধর্ব্যা মায়যেচ্ছামি সংয়োজয়িতুমর্জুনম্॥ ১-১৮৬-৩৯ (৮৩৩৯)
অস্ত্রাগ্নিনা বিচিত্রোঽয়ং দগ্ধো মে রথ উত্তমঃ।
সোঽহং চিত্ররথো ভূৎবা নাম্না দগ্ধরথোঽভবং॥ ১-১৮৬-৪০ (৮৩৪০)
সংভৃতা চৈব বিদ্যেয়ং তপসেহ ময়া পুরা।
নিবেদয়িষ্যে তামদ্য প্রাণদায় মহাত্মনে॥ ১-১৮৬-৪১ (৮৩৪১)
সংস্তম্ভয়িৎবা তরসা জিতং শরণমাগতম্।
যো রিপুং যোজয়েৎপ্রাণৈঃ কল্যাণং কিং ন সোঽর্হতি॥ ১-১৮৬-৪২ (৮৩৪২)
চাক্ষুষী নাম বিদ্যেয়ং যাং সোমায় দদৌ মনুঃ।
দদৌ স বিশ্বাবসবে মম বিশ্বাবসুর্দদৌ॥ ১-১৮৬-৪৩ (৮৩৪৩)
সেয়ং কাপুরুষং প্রাপ্তা গুরুদত্তা প্রণশ্যতি।
আগমোঽস্যা ময়া প্রোক্তো বীর্যং প্রতিনিবোধ মে॥ ১-১৮৬-৪৪ (৮৩৪৪)
যচ্চক্ষুষা দ্রষ্টুমিচ্ছেত্রিষু লোকেষু কিংচন।
তৎপশ্যেদ্যাদৃশং চেচ্ছেত্তাদৃশং দ্রষ্টুমর্হতি॥ ১-১৮৬-৪৫ (৮৩৪৫)
একপাদেন ষণ্মাসান্স্থিতো বিদ্যাং লভেদিমাম্।
অনুনেষ্যাম্যহং বিদ্যাং স্বয়ং তুভ্যং ব্রতে কৃতে॥ ১-১৮৬-৪৬ (৮৩৪৬)
বিদ্যযা হ্যনয়া রাজন্বয়ং নৃভ্যো বিশেষিতাঃ।
অবিশিষ্টাশ্চ দেবানামনুভাবপ্রদর্শিনঃ॥ ১-১৮৬-৪৭ (৮৩৪৭)
গন্ধর্বজানামশ্বানামহং পুরুষসত্তম।
ভ্রাতৃভ্যস্তব তুভ্যং চ পৃথগ্দাতা শতং শতং॥ ১-১৮৬-৪৮ (৮৩৪৮)
দেবগন্ধর্ববাহাস্তে দিব্যবর্ণা মনোজবাঃ।
ক্ষীণাক্ষীণা ভবন্ত্যেতে ন হীয়ন্তে চ রংহসঃ॥ ১-১৮৬-৪৯ (৮৩৪৯)
পুরা কৃতং মহেন্দ্রস্য বজ্রং বৃত্রনিবর্হণম্।
দশধা শতধা চৈব তচ্ছীর্ণং বৃত্রমূর্ধনি॥ ১-১৮৬-৫০ (৮৩৫০)
ততো ভাগীকৃতো দেবৈর্বজ্রভাগ উপাস্যতে।
লোকে যশোধনং কিংচিৎসৈব বজ্রতনুঃ স্মৃতা॥ ১-১৮৬-৫১ (৮৩৫১)
বজ্রপাণির্ব্রাহ্মণঃ স্যাৎক্ষত্রং বজ্ররথং স্মৃতম্।
বৈশ্যা বৈ দানবজ্রাশ্চ কর্মবজ্রা যবীয়সঃ॥ ১-১৮৬-৫২ (৮৩৫২)
ক্ষত্রবজ্রস্য ভাগেন অবধ্যা বাজিনঃ স্মৃতাঃ।
রথাঙ্গং বডবা সূতে শূরাশ্চাশ্বেষু যে মতাঃ॥ ১-১৮৬-৫৩ (৮৩৫৩)
কামবর্ণাঃ কামজবাঃ কামতঃ সমুপস্থিতাঃ।
ইতি গন্ধর্বজাঃ কামং পূরয়িষ্যন্তি মে হয়াঃ॥ ১-১৮৬-৫৪ (৮৩৫৪)
অর্জুন উবাচ। ১-১৮৬-৫৫x (১০৬৮)
যদি প্রীতেন মে দত্তং সংশয়ে জীবিতস্য বা।
বিদ্যাধং শ্রুতং বাঽপি ন তদ্গন্ধর্ব রোচয়ে॥ ১-১৮৬-৫৫ (৮৩৫৫)
গন্ধর্ব উবাচ। ১-১৮৬-৫৬x (১০৬৯)
সংয়োগো বৈ প্রীতিকরো মহৎসু প্রতিদৃশ্যতে।
জীবিতস্য প্রদানেন প্রীতো বিদ্যাং দদামি তে॥ ১-১৮৬-৫৬ (৮৩৫৬)
ৎবত্তোঽপ্যহং গ্রহীষ্যামি অস্ত্রমাগ্নেয়মুত্তমম্।
তথৈব যোগ্যং বীভৎসো চিরায় মরতর্ষভ॥ ১-১৮৬-৫৭ (৮৩৫৭)
অর্জুন উবাচ। ১-১৮৬-৫৮x (১০৭০)
ৎবত্তোঽস্ত্রেণ বৃণোম্যশ্বান্সংয়োগঃ শাস্বতোঽস্তুনৌ।
সখে তদ্ব্রূহি গন্ধর্ব যুষ্মভ্যো যদ্ভয়ং ভবেৎ॥ ১-১৮৬-৫৮ (৮৩৫৮)
কারণং ব্রূহি গন্ধর্ব কিং তদ্যেন স্ম ধর্ষিতাঃ।
যান্তো বেদবিদঃ সর্বে সন্তো রাত্রাবরিন্দমাঃ॥ ১-১৮৬-৫৯ (৮৩৫৯)
গন্ধর্ব উবাচ। ১-১৮৬-৬০x (১০৭১)
অনগ্নয়োঽনাহুতয়ো ন চ বিপ্রপুরস্কৃতাঃ।
যূয়ং ততো ধর্ষিতাঃ স্থ ময়া বৈ পাণ্ডুনন্দনাঃ॥ ১-১৮৬-৬০ (৮৩৬০)
`যক্ষরাক্ষসগন্ধর্বপিশাচপতগোরগাঃ।
ধর্ষন্তি নরব্যাঘ্র ন ব্রাহ্মণপুরস্কৃতান্॥ ১-১৮৬-৬১ (৮৩৬১)
জানতাপি ময়া তস্মাত্তেজশ্চাভিজনং চ বঃ।
ইয়মগ্নিমতাং শ্রেষ্ঠ ধর্ষিতা বৈ পুরাগতিঃ॥ ১-১৮৬-৬২ (৮৩৬২)
কো হি বস্ত্রিষু লোকেষু ন বেদ ভরতর্ষভ।
স্বৈর্গুণৈর্বিস্তৃতং শ্রীমদ্যশোঽগ্র্যং ভূরিবর্চসাম্’॥ ১-১৮৬-৬৩ (৮৩৬৩)
যক্ষরাক্ষসগন্ধর্বাঃ পিশাচোরগদানবাঃ।
বিস্তরং কুরুবংশস্য ধীমন্তঃ কথয়ন্তি তে॥ ১-১৮৬-৬৪ (৮৩৬৪)
নারদপ্রভৃতীনাং তু দেবর্ষীণাং ময়া শ্রুতম্।
গুণান্কথয়তাং বীর পূর্বেষাং তব ধীমতাম্॥ ১-১৮৬-৬৫ (৮৩৬৫)
স্বয়ং চাপি ময়া দৃষ্টশ্চরতা সাগরাম্বরাম্।
ইমাং বসুমতীং কৃৎস্নাং প্রভাবঃ সুকুলস্য তে॥ ১-১৮৬-৬৬ (৮৩৬৬)
বেদে ধনুষি চাচার্যমভিজানামি তেঽর্জুন।
বিশ্রুতং ত্রিষু লোকেষু ভারদ্বাজং যশস্বিনম্॥ ১-১৮৬-৬৭ (৮৩৬৭)
`সর্ববেদবিদাং শ্রেষ্ঠং সর্বশস্ত্রভৃতাং বরম্।
দ্রোণমিষ্বস্ত্রকুশলং ধনুষ্যহ্গিরসাং বরম্॥’ ১-১৮৬-৬৮ (৮৩৬৮)
ধর্মং বায়ুং চ শক্রং চ বিজানাম্যশ্বিনৌ তথা।
পাণ্ডুং চ কুরুশার্দূল ষডেতান্কুরুবর্ধনান্।
পিতৄনেতানহং পার্থ দেবমানুষসত্তমান্॥ ১-১৮৬-৬৯ (৮৩৬৯)
দিব্যাত্মানো মহাত্মানঃ সর্বশস্ত্রভৃতাং বরাঃ।
ভবন্তো ভ্রাতরঃ শূরাঃ সর্বে সুচরিতব্রতাঃ॥ ১-১৮৬-৭০ (৮৩৭০)
উত্তমাং চ মনোবুদ্ধিং ভবতাং ভাবিতাত্মনাম্।
জানন্নপি চ বঃ পার্থ কৃতবানিহ ধর্ষণাম্॥ ১-১৮৬-৭১ (৮৩৭১)
স্ত্রীসকাশে চ কৌরব্য ন পুমান্ক্ষন্তুমর্হতি।
ধর্ষণামাত্মনঃ পশ্যন্ব্রাহুদ্রবিণমাশ্রিতঃ॥ ১-১৮৬-৭২ (৮৩৭২)
নক্তং চ বলমস্মাকং ভূয় এবাভিবর্ধতে।
যতস্ততো মাং কৌন্তেয় সদারং মন্যুরাবিশৎ॥ ১-১৮৬-৭৩ (৮৩৭৩)
সোঽহং ৎবয়েহ বিজিতঃ সঙ্খ্যে তাপত্যবর্ধন।
যেন তেনেহ বিধিনা কীর্ত্যমানং নিবোধ মে॥ ১-১৮৬-৭৪ (৮৩৭৪)
ব্রহ্মচর্যং পরো ধর্মঃ স চাপি নিয়তস্ৎবয়ি।
যস্মাত্তস্মাদহং পার্থ রণে।ঞস্মি বিজিতস্ৎবয়া॥ ১-১৮৬-৭৫ (৮৩৭৫)
যস্তু স্যাৎক্ষত্রিয়ঃ কশ্চিৎকামবৃত্তঃ পরন্তপ।
নক্তং চ যুধি যুধ্যেত ন স জীবেৎকথংচন॥ ১-১৮৬-৭৬ (৮৩৭৬)
যস্তু স্যাৎকামবৃত্তোঽপি পার্থ ব্রহ্মপুরস্কৃতঃ।
জয়েন্নক্তঞ্চরান্সর্বান্স পুরোহিতধূর্গতঃ॥ ১-১৮৬-৭৭ (৮৩৭৭)
তস্মাত্তাপত্য যৎকিংচিন্নৃণাং শ্রেয় ইহেপ্সিতম্।
তস্মিন্কর্মণি যোক্তব্যা দান্তাত্মানঃ পুরোহিতাঃ॥ ১-১৮৬-৭৮ (৮৩৭৮)
বেদে ষডঙ্গে নিরতাঃ শুচয়ঃ সত্যবাদিনঃ।
ধর্মাত্যাগঃ কৃতাত্মানঃ স্যুর্নৃপাণাং পুরোহিতাঃ॥ ১-১৮৬-৭৯ (৮৩৭৯)
জয়শ্চ নিয়তো রাজ্ঞঃ স্বর্গশ্চ তদনন্তরম্।
যস্য স্যাদ্ধর্মবিদ্বাগ্মী পুরোধাঃ শীলবাঞ্শুচিঃ॥ ১-১৮৬-৮০ (৮৩৮০)
লাভং লব্ধুমলব্ধং বা লব্ধং বা পরিরক্ষিতুম্।
পুরোহিতং প্রকুর্বীত রাজা গুণসমন্বিতম্॥ ১-১৮৬-৮১ (৮৩৮১)
পুরোহিতমতে তিষ্ঠেদ্য ইচ্ছেদ্ভূতিমাত্মনঃ।
প্রাপ্তুং বসুমতীং সর্বাং সর্বশঃ সাগরাম্বরাম্॥ ১-১৮৬-৮২ (৮৩৮২)
ন হি কেবলশৌর্যেণ তাপত্যাভিজনেন চ।
জয়েদব্রাহ্মণঃ কশ্চিদ্ভূমিং ভূমিপতিঃ ক্বচিৎ॥ ১-১৮৬-৮৩ (৮৩৮৩)
তস্মাদেবং বিজানীহি কুরূণাং বংশবর্ধন।
ব্রাহ্মণপ্রমুখং রাজ্যং শক্যং পালয়িতুং চিরম্॥ ॥ ১-১৮৬-৮৪ (৮৩৮৪)

ইতি শ্রীমন্মহাভারতে আদিপর্বণি চৈত্ররথপর্বণি ষডশীত্যধিকশততমোঽধ্যায়ঃ॥ ১৮৬ ॥

Mahabharata – Adi Parva – Chapter Footnotes

১-১৮৬-৩ সোমাশ্রয়শ্চন্দ্রধরো রুদ্রস্তস্য স্থানং সোমাশ্রয়ায়ণম্॥ ১-১৮৬-৮ পূর্বরাত্রাগমেষু পশ্চিমায়াং দিশি অর্ধাস্তমিতার্কমণ্ডলরূপা যা সংধ্যা সংরজ্যতে রক্তা ভবতি তস্যাং মুহূর্তং প্রস্থানকালমশীতিভির্লবৈর্নিমেষার্ধৈর্হীনং প্রচক্ষতে॥ ১-১৮৬-৯ তদেব মুহূর্তং যক্ষাদীনাং কর্মচারেষু বিহিতমন্যন্মনুষ্যাণাং কর্মচারেষু স্মৃতমিত্যন্বয়ঃ। সংধ্যায়ামশীতিলবোপরি রাত্রৌ যক্ষাদীনামেব সংচারকালঃ অন্যদহর্মনুষ্যাণামিত্যর্থঃ॥ ১-১৮৬-১৫ শৃঙ্গিণঃ অভিচারিকাঃ॥ ১-১৮৬-২১ একবপ্রা একমাকাশরূপং বপ্রং যস্যাঃ সা॥ ১-১৮৬-৩৬ স্ত্রী নাথো রক্ষিতা যস্য তম্॥ ১-১৮৬-৩৮ অঙ্গারবদ্ভাস্বরং দুঃস্পর্শং চ পর্ণং বাহনং রথো যস্য সোঽঙ্গারপর্ণস্তস্য ভাবস্তত্তাম্॥ ১-১৮৬-৪১ ক্ষীণাশ্চাঽক্ষীণাশ্চ ক্ষীণাক্ষীণাঃ বৃদ্ধাস্তরুণা বা এতে ন ভবন্তি রংহসো বেগাচ্চ ন হীয়ন্তে ইতি নকারানুষঙ্গেণ যোজ্যম্। ক্ষীণে ক্ষীণে ইতি ঘ. পাঠঃ॥ ১-১৮৬-৫১ তস্য ভাগঃ পৃথগ্ভূতঃ সর্বৈর্ভূতৈদপাস্যতে ইতি ঙ. পাঠঃ॥ ১-১৮৬-৫২ বজ্রপাণিঃ পাণিঃ বজ্রং যস্য স। এবমেব বজ্ররথমিত্যপি॥ ১-১৮৬-৫৩ রথাঙ্গং চ তথা সূতো ধনুশ্চ ভরতর্ষভ ইতি ঙ. পাঠঃ॥ ১-১৮৬-৫৭ তথৈব সখ্যং বীভৎসো ইতি ঙ. পাঠঃ॥ ১-১৮৬-৫৮ অস্ত্রেণাস্ত্রং বৃণে ৎবত্তঃ যদ্ভয়ং ত্যজেৎ ইতি ঙ. পাঠঃ॥ ১-১৮৬-৬০ অনগ্নয়ো দারহীনৎবাৎ। অনাহুতয়ঃ সমাবৃতৎবাৎ। আশ্রমবিংশেষহীনো ব্রাহ্মণো ধর্ষণীয় ইত্যর্থঃ॥ ১-১৮৬-৭৬ কায়বৃদ্যঃ কৃতদারঃ॥ ১-১৮৬-৮১ লাভং লব্ধব্যং ধনং। অলব্ধস্য চ লাভায় লব্ধস্য পরিরক্ষণে ইতি ঙ. পাঠঃ॥ ষডশীত্যধিকশততমোঽধ্যায়ঃ॥ ১৮৬ ॥