সভাপর্ব – অধ্যায় 083

সভাপর্ব – অধ্যায় 083
॥ শ্রীঃ ॥
2.83. অধ্যায়ঃ 083
Mahabharata – Sabha Parva – Chapter Topics
বিদুরস্য ইন্দ্রপ্রস্থগমনম্॥ 1॥ পাণ্ডবানাং দ্যূতসভাপ্রবেশঃ॥ 2॥
Mahabharata – Sabha Parva – Chapter Text


বৈশম্পায়ন উবাচ॥

ততঃ প্রায়াদ্বিদুরোঽশ্বৈরুদারৈ-
র্মহাজবৈর্বলিভিঃ সাধু দান্তৈঃ।
বলান্নিয়ুক্তো ধৃতরাষ্ট্রেণ রাজ্ঞা
মনীষিণাং পাণ্ডবানাং সকাশে॥ 2-83-1(14636)
সোঽভিপত্য তদধ্বানমাসাদ্য নৃপতেঃ পুরম্।
প্রবিবেশ মহাবুদ্ধিঃ পূজ্যমানো দ্বিজাতিভিঃ॥ 2-83-2(14637)
স রাজগৃহমাসাদ্য কুবেরভবনোপমম্।
অভ্যাগচ্ছত ধর্মাত্মা ধর্মপুত্রং যুধিষ্ঠিরম্॥ 2-83-3(14638)
তং বৈ রাজা সত্যধৃতির্মহাত্মা
অজাতশত্রুর্বিদুরং যথাবৎ।
পূজাপূর্বং প্রতিগৃহ্যাজমীঢ-
স্ততোঽপৃচ্ছদ্ধৃতরাষ্ট্রং সপুত্রম্॥ 2-83-4(14639)
যুধিষ্ঠির উবাচ॥ 2-83-5x(1543)
বিজ্ঞায়তে তে মনসোঽপ্রহর্ষঃ
কচ্চিৎক্ষত্তঃ কুশলেনাগতোঽসি।
কচ্চিৎপুত্রাঃ স্থবিরস্যানুলোমা
বশানুগাশ্চাপি বিশোঽথ কচ্চিৎ॥ 2-83-5(14640)
বিদুর উবাচ॥ 2-83-6x(1544)
রাজা মহাত্মা কুশলী সপুত্র
আস্তে বৃতো জ্ঞাতিভিরিন্দ্রকল্পঃ।
প্রীতো রাজন্পুত্রগুণৈর্বিনীতো
বিশোক এবাত্মরতির্মহাত্মা॥ 2-83-6(14641)
ইদং তু ৎবাং কুরুরাজোঽভ্যুবাচ
পূর্বং পৃষ্ট্বা কুশলং চাব্যযং চ।
ইয়ং সভা ৎবৎসভাতুল্যরূপা
ভ্রাতৄণাং তে দৃস্যতামেত্য পুত্র॥ 2-83-7(14642)
সমাগম্য ভ্রাতৃভিঃ পার্থ তস্যাং
সুহৃদ্দ্যূতং ক্রিয়তাং রম্যতাং চ।
প্রীয়ামহে ভবতাং সঙ্গমেন
সমাগতাঃ কুরবশ্চাপি সর্বে॥ 2-83-8(14643)
দুরোদরা বিহিতা যে তু তত্র
মহাত্মনা ধৃতরাষ্ট্রেণ রাজ্ঞা।
তান্দ্রক্ষ্যসে কিতবান্সন্নিবিষ্টা-
নিত্যাগতোঽহং নৃপতে তজ্জুষস্ব॥ 2-83-9(14644)
যুধিষ্ঠর উবাচ॥ 2-83-10x(1545)
দ্যূতে ক্ষত্তঃ কলহো বিদ্যতে নঃ
কো বৈ রোচতনে বুধ্যমানঃ।
কিং বা ভবান্মন্যতে যুক্তরূপং
ভবদ্বাক্যে সর্ব এব স্থিতাঃ স্মঃ॥ 2-83-10(14645)
বিদুর উবাচ॥ 2-83-11x(1546)
জানাম্যহং দ্যূতমনর্থমূলং
কৃতশ্চ যত্নোঽস্য ময়া নিবারণে।
রাজা চ মাং প্রাহিমোত্ৎবৎসকাশং
শ্রুৎবা বিদ্বঞ্শ্রেয় ইহাচরস্ব॥ 2-83-11(14646)
যুধিষ্ঠির উবাচ॥ 2-83-12x(1547)
কে তত্রান্যে কিতবা দীব্যমানা
বিনা রাজ্ঞো ধৃতরাষ্ট্রস্য পুত্রৈঃ।
পৃচ্ছামি ৎবাং বিদুর ব্রূহি নস্তান্
যৈর্দীব্যামঃ শতশঃ সন্নিপত্য॥ 2-83-12(14647)
বিদুর উবাচ॥ 2-83-13x(1548)
গন্ধাররাজঃ শকুনির্বিশাম্পতে
রাজাঽতিদেবী কৃতহস্তো মতাক্ষঃ।
বিনিংশতিশ্চিত্রসেনশ্চ রাজা
সত্যব্রতঃ পুরুমিত্রো জয়শ্চ॥ 2-83-13(14648)
যুধিষ্ঠির উবাচ॥ 2-83-14x(1549)
মহাভয়াঃ কিতবাঃ সন্নিবিষ্টা
মায়োপধা দেবিতারোঽত্র সন্তি।
ধাত্রা তু দিষ্টস্য বশে কিলেদং
সর্বং জগত্তিষ্ঠতি ন স্বতন্ত্রম্॥ 2-83-14(14649)
নাহং রাজ্ঞো ধৃতরাষ্ট্রস্য শাসনা-
ন্ন গন্তুমিচ্ছামি কবে দুরোদরম্।
ইষ্টো হি পুত্রস্য পিতা সদৈব
তদস্মি কর্তা বিদুরাত্থ মাং যথা॥ 2-83-15(14650)
ন চাকামঃ শকুনিনা দেবিতাহং
ন চেন্মাং জিষ্ণুরাহ্বয়িতা সভায়াম্।
আহূতোঽহং ন নিবর্তে কদাচিৎ
তদাহিতং শাশ্বতং বৈ ব্রতং মে॥ 2-83-16(14651)
বৈশম্পায়ন উবাচ॥ 2-83-17x(1550)
এবমুক্ৎবা বিদুরং ধর্মরাজঃ
প্রায়াত্রিকং সর্বমাজ্ঞাপ্য তূর্ণম্।
প্রায়াচ্ছ্বোভূতে সগণঃ সানুয়াত্রঃ
সহ স্ত্রীভির্দৌপদামাদি কৃৎবা॥ 2-83-17(14652)
দৈবং হি প্রজ্ঞাং মুষ্ণাতি চক্ষুস্তেজ ইবাপতৎ।
ধাতুশ্চ বশমন্বেতি পাশৈরিব নরঃ সিতঃ॥ 2-83-18(14653)
ইত্যুক্ৎবা প্রয়যৌ রাজা সহ ক্ষত্র্রা যুধিষ্ঠিরঃ।
অমৃষ্যমাণস্তস্যাথ সমাহ্বানমরিন্দমঃ॥ 2-83-19(14654)
বাহ্লিকেন রথং যত্তমাস্থায় পরবীরহা।
পরিচ্ছন্নো যয়ৌ পার্থো ভ্রাতৃভিঃ সহ পাণ্ডবঃ।
রাজশ্রিয়া দীপ্যমানো যয়ৌ ব্রহ্মপুরঃ সরঃ॥ 2-83-20(14655)
`সন্দিদেশ ততঃ প্রেষ্যানাগতান্নগরং প্রতি।
ততস্তে নৃপশার্দূল চক্রুর্বৈ নৃপশাসনম্॥ 2-83-21(14656)
ততো রাজা মহাতেজাঃ সংয়ম্য সপরিচ্ছদম্।
ব্রাহ্মণৈঃ স্বস্তি বাচ্যাথ প্রয়যৌ মন্দিরাদ্বহিঃ 2-83-22(14657)
ব্রাহ্মণেভ্যো ধনং দত্ৎবা গত্যর্থং স যথাবিধি।
অন্যেভ্যঃ স তু দত্ৎবা চ গন্তুমেবোপচক্রমে॥ 2-83-23(14658)
সর্বলক্ষণসম্পন্নং রাজহংসপরিচ্ছদম্।
তমারুহ্য মহারাজো গজেন্দ্রং ষষ্টিহায়নম্॥ 2-83-24(14659)
হারী কিরীটী হেমাভঃ সর্বাভরণভূষিতঃ।
ররাজ রাজন্পার্থো বৈ পরয়া নৃপশোভয়া॥ 2-83-25(14660)
রুক্মবেদিগতঃ প্রাজ্যো জ্বলন্নিব হুতাশনঃ।
ততো জগাম রাজা স প্রহৃষ্টনরবাহনঃ॥ 2-83-26(14661)
রথঘোষেণ মহতা পূরয়ন্বৈ নভঃ স্থলম্।
সংস্তূয়মানঃ স্তুতিভিঃ সূতমাগধবন্দিভিঃ॥ 2-83-27(14662)
মহাসৈন্যেন সহিতো যথাদিত্যঃ স্বরশ্মিভিঃ।
পাণ্ডুরেণাতপত্রেণ ধ্রিয়মাণেন মূর্ধনি॥ 2-83-28(14663)
বভৌ যুধিষ্ঠিরো রাজা পৌর্ণমাস্যামিবোডুরাট্।
চামরৈর্হেমদণ্ডৈশ্চ ধূয়মানঃ সমন্ততঃ॥ 2-83-29(14664)
জয়াশিষঃ প্রহৃষ্টানাং নরাণাং পথি পাণ্ডবঃ।
প্রত্যগৃহ্ণাদ্যথান্যায়ং যথআবদ্ভরতর্ষভঃ॥ 2-83-30(14665)
তথৈব সৈনিকা রাজন্রাজানমনুয়ান্তি যে।
তেষাং হলহলাশব্দো দিবং স্তব্ধঃ প্রতিষ্ঠিতঃ॥ 2-83-31(14666)
নৃপস্যাগ্নে যয়ৌ রাজন্ভীমসেনো রথী বলী।
উভৌ পার্শ্বগতৌ রাজ্ঞঃ সতল্পৌ বৈ সুকল্পিতৌ॥ 2-83-32(14667)
অধিরূঢৌ যমৌ চাপি জগ্মতুর্ভরতর্ষভ।
শোভয়ন্তৌ মহাসৈন্যং তাবুভৌ রূপশালিনৌ॥ 2-83-33(14668)
পৃষ্ঠতোঽনুয়যৌ জিষ্ণুর্বীরঃ শস্ত্রভৃতাং বরঃ।
শ্বেতাশ্বো গাণ্ডিবং গৃহ্য অগ্নিদত্তং রথং গতঃ॥ 2-83-34(14669)
সৈন্যমধ্যে যয়ৌ রাজন্কুরুরাজো যুধিষ্ঠিরঃ।
দ্রৌপদীপ্রমুখা নার্যঃ সানুগাঃ সপরিচ্ছদাঃ॥ 2-83-35(14670)
আরুহ্য তা বিচিত্রাঙ্গ্যো যানানি বিবিধানি চ।
মহত্যা সেনয়া রাজন্নগ্রে যানানি বিবিধানি চ। 2-83-36(14671)
সমৃদ্ধনরনাগাশ্বং সপতাকরথধ্বজম্।
সংনদ্ধবরনিস্ত্রিংশং পথি নির্ঘোষনিঃ স্বনম্॥ 2-83-37(14672)
শঙ্খদুন্দুভিতালানাং বেণুবীণানুবনাদিতম্।
শুশুভে পাণ্ডবং সৈন্যং প্রয়াস্যত্তত্তদা নৃপ॥ 2-83-38(14673)
যথা কুবেরো লঙ্কায়াং পুরা চাত্যন্তশোভয়া।
মহত্যা সেনয়া সার্ধং গুরুমিন্দ্রং স গচ্ছতি॥ 2-83-39(14674)
তথা যয়ৌ স পার্থোঽপি অসঙ্খ্যেয়বিভূতিনা।
সুসমৃদ্ধেন সৈন্যেন যথা বৈশ্রবণস্তথা॥ 2-83-40(14675)
স সরাংসি নদীশ্চৈব বনান্যুপবনানি চ।
অত্যক্রামন্মহারাজ পুরীং চাভ্যবপদ্যত॥ 2-83-41(14676)
স হাস্তিনসমীপে তু কুরুরাজো যুধিষ্ঠিরঃ।
চক্রে নিবেশনং তত্র ততঃ স সহসৈনিকাঃ॥ 2-83-42(14677)
শিবে দেশে সমে চৈব ন্যবসৎপাণ্ডবস্তদা।
ততোরাজন্সমাহূয় শোকবিহ্বলয়া গিরা॥ 2-83-43(14678)
এতদ্বাক্যং চ সর্বস্বং ধৃতরাষ্ট্রচিকীর্ষিতম্।
আচচক্ষে যথাবৃত্তং বিদুরোঽথ নৃপস্য হ॥ 2-83-44(14679)
তচ্ছ্রুৎবা ভাষিতং তেন ধর্মরাজোঽব্রবীদিদম্।
ন মর্ষয়াম্যহং ক্ষত্তঃ সমাহ্বানং ব্রতং হি মে।
স্বস্ত্যস্তু লোকে বিপ্রাণাং প্রজানাং চৈব সর্বদা॥ 2-83-45(14680)
বৈশম্পায়ন উবাচ॥ 2-83-46x(1551)
প্রবিবেশ ততো রাজা নগরং নাগসাহ্বয়ম্।
ধৃতরাষ্ট্রেণ চাহূতঃ কালস্য সময়েন চ’॥ 2-83-46(14681)
স হাস্তিনপুরং গৎবা ধৃতরাষ্ট্রগৃহং যয়ৌ।
সমিয়ায় চ ধর্মাত্মা ধৃতরাষ্ট্রেণ পাণ্ডবঃ॥ 2-83-47(14682)
তথা ভীষ্মেণ দ্রোণেন কর্ণেন চ কৃপেণ চ।
সমিয়ায় যথান্যায়ং দ্রৌণিনা চ বিভুঃ সহ 2-83-48(14683)
সমেত্য চ মহাবাহুঃ সোমদত্তেন চৈব হ।
দূর্যোধনেন সভ্রাত্রা সৌবলেন চ বীর্যবান্॥ 2-83-49(14684)
যে চান্যে তত্র রাজানঃ পূর্বমেব সমাগতাঃ।
দুঃশাসনেন বীরেণ সর্বৈর্ভ্রাতৃভিরেব চ॥ 2-83-50(14685)
জয়দ্রথেন চ তথা কুরুভিশ্চাপি সর্বশঃ।
ততঃ সর্বৈর্মহাবাহুর্ভ্রাতৃভিঃ পিরবারিতঃ॥ 2-83-51(14686)
প্রবিবেশ গৃহং রাজ্ঞো ধৃতরাষ্ট্রস্য ধীমতঃ।
দদর্শ তত্র গান্ধারীং দেবীং পতিমনুব্রতাম্॥ 2-83-52(14687)
স্নুষাভিঃ সংবৃতাং শশ্বত্তারাভিরিব রোহিণীম্।
অভিবাদ্য স গান্ধারীং তয়া চ প্রতিনন্দিতঃ॥ 2-83-53(14688)
দদর্শ পিতরং বৃদ্ধং প্রজ্ঞাচক্ষুষমীশ্বরম্॥ 2-83-54(14689)
রাজ্ঞা মূর্ধন্যুপাঘ্রাতাস্তে চ কৌরবনন্দনাঃ।
চৎবারঃ পাণ্ডবা রাজন্ভীমসেনপুরোগমাঃ॥ 2-83-55(14690)
ততো হর্ষঃ সমভবৎকৌরবাণাং বিশাম্পতে।
তান্দৃষ্ট্বা পুরুষব্যাঘ্রান্পাণ্ডবান্প্রিয়দর্শনান্॥ 2-83-56(14691)
বিবিশুস্তেঽভ্যনুজ্ঞাতা রত্নবন্তি গৃহাণি চ।
দদৃশুশ্চোপয়াতারো দ্রোপদীপ্রমুখাঃ স্ত্রিয়ঃ॥ 2-83-57(14692)
যাজ্ঞসেন্যাঃ পরামৃদ্ধিং দৃষ্ট্বা প্রজ্বলিতামিব।
স্নুষাস্তা ধৃতরাষ্ট্রস্য নাতিপ্রমনসোঽভবন্॥ 2-83-58(14693)
ততস্তে পুরুষব্যাঘ্রা গ্তবা স্ত্রীভিস্তু সংবিদম্।
কৃৎবা ব্যায়ামপূর্বাণি কৃত্যানি প্রতিকর্ম চ॥ 2-83-59(14694)
ততঃ কৃতাহ্নিকাঃ সর্বে দিব্যচন্দনভূষিতাঃ।
কল্যাণমনসশ্চৈব ব্রাহ্মণান্স্বস্তি বাচ্য চ॥ 2-83-60(14695)
মনোজ্ঞমশনং ভুক্ৎবা বিবিশুঃ শরণান্যথ।
উপগীয়মানা নারীভিরস্বপন্কুরুপুঙ্গবাঃ॥ 2-83-61(14696)
জগাম তেষাং সা রাত্রিঃ পুণ্যা রতিবিহারিণাম্।
স্তূয়মানাশ্চ বিশ্রান্তাঃ কালে নিদ্রামথাত্যজন্॥ 2-83-62(14697)
মুখোষিতাস্তে রজনীং প্রাতঃ সর্বে কৃতাহ্নিকাঃ।
সভাং রম্যাং প্রবিবিশুঃ কিতবৈরভিনন্দিতাঃ॥ ॥ 2-83-63(14698)

ইতি শ্রীমন্মহাভারতে সভাপর্বণি দ্যূতপর্বণি ব্যশীতিতমোঽধ্যায়ঃ॥83 ॥

Mahabharata – Sabha Parva – Chapter Footnotes
2-83-2 দ্বিজাতিভিস্ত্রৈবর্ণিকৈঃ॥ 2-83-6 আত্মরতিঃ আত্মনঃ স্বস্যোৎকর্ষ এব রতির্যস্য নতু ধর্মমন্বীক্ষতে ইতি ভাবঃ॥ 2-83-7 অব্যযং ধনাদেরবিনাশম্॥ 2-83-9 দুরোদরা দ্যূতকরাঃ॥ 2-83-17 আদি অবিভক্তিকনির্দেশঃ॥ 2-83-57 যাতারঃ যাতরঃ॥ 2-83-59 সংবিদং মিথঃ কথাম্। ব্যায়ামঃ শ্রমানোদনব্যাপারঃ পূর্বো যেষাং তানি। প্রতিকর ্ম কেশপ্রসাধনাদিপরিষ্কারম্॥