অনুশাসনপর্ব – অধ্যায় ২২১

অনুশাসনপর্ব – অধ্যায় 221
॥ শ্রীঃ ॥
13.221. অধ্যায়ঃ 221
অথ দানধর্মপর্ব ॥ 1 ॥
Mahabharata – Anushaasana Parva – Chapter Topics
ঈশ্বরেণ পার্বতীংপ্রতি প্রাণিনামঙ্গবিকৃত্যনপত্যতাদিদোষহেতুভূতদুষ্কর্মপ্রতিপাদনম্॥ 1 ॥
Mahabharata – Anushaasana Parva – Chapter Text

উমোবাচ।

ভগবন্দেবদেবেশ ভূতপাল নমোস্তু তে।
হ্রস্বাঙ্গাশ্চৈব বক্রাঙ্গাঃ কুব্জা বামনকাস্তথা॥ 13-221-1(90075)
অপরে মানুষা দেব দৃশ্যন্তে কুণিবাহবঃ।
কেন কর্মবিপাকেন তন্মে শংসিতুমর্হসি॥ 13-221-2(90076)
মহেশ্বর উবাচ। 13-221-3x(7543)
যে পুরা মনুজা দেবি লোভমোহসমন্বিতাঃ।
ধান্যমানান্বিকুর্বন্তি ক্রয়বিক্রয়কারণাৎ॥ 13-221-3(90077)
কুলদোষং তদা দেবি ধৃতমানেষু নিত্যশঃ।
অর্ধাপকর্ষণং চৈব সর্বেষাং ক্রয়বিক্রয়ে॥ 13-221-4(90078)
অঙ্গদোষকরা যে তু পরেষাং কোপকারণাৎ।
মাংসাদাশ্চৈব যে মূর্খা অয়থাবৎপ্রথাঃ সদা॥ 13-221-5(90079)
এবংয়ুক্তসমাচারাঃ পুনর্জন্মনি শোভনে।
হ্রস্বাঙ্গা বামনাশ্চৈব কুব্জাশ্চৈব ভবন্তি তে॥ 13-221-6(90080)
উমোবাচ। 13-221-7x(7544)
ভগবন্মানুষাঃ কেচিদ্দৃশ্যন্তে মানুষেষু বৈ।
উন্মত্তাশ্চ পিশাচাশ্চ পর্যটন্তো যতস্ততঃ।
কেন কর্মবিপাকেন তন্মে শংসিতুমর্হসি॥ 13-221-7(90081)
মহেশ্বর উবাচ। 13-221-8x(7545)
যে পুরা মনুজা দেবি দর্পাহংকারসংয়ুতাঃ।
বহুধা প্রলপন্ত্যেব হসন্তি চ পরান্ভৃশম্॥ 13-221-8(90082)
মোহয়ন্তি পরান্ভোগৈর্মদনৈর্লোভকারণাৎ।
বৃদ্ধান্গুরূংশ্চ যে মূর্খা বৃথৈবাপহসন্তি চ।
শৌণ্ডা বিদগ্ধাঃ শাস্ত্রেষু সদৈবানৃতবাদিনঃ॥ 13-221-9(90083)
এবংয়ুক্তসমাচারাঃ পুনর্জন্মনি শোভনে।
উন্মত্তাশ্চ পিশাচাশ্চ ভবন্ত্যেব ন সংশয়ঃ॥ 13-221-10(90084)
উমোবাচ। 13-221-11x(7546)
ভগবন্মানুষাঃ কেচিন্নিরপত্যাঃ সুদুঃখিতাঃ।
যতন্তো ন লভন্ত্যেব অপত্যানি যতস্ততঃ।
কেন কর্মবিপাকেন তন্মে শংসিতুমর্হসি॥ 13-221-11(90085)
মহেশ্বর উবাচ। 13-221-12x(7547)
যে পুরা মনুজা দেবি সর্বপ্রাণিষু নির্দয়াঃ।
ঘ্নন্তি বালাংশ্চ ভুঞ্জন্তে মৃগাণাং পক্ষিণামপি॥ 13-221-12(90086)
গুরুবিদ্বেষিণশ্চৈব পরপুত্রাভ্যসূয়কাঃ।
পিতৃপূজাং ন কুর্বন্তি যথোক্তাং চাষ্টকাদিভিঃ॥ 13-221-13(90087)
এবংয়ুক্তসমাচারাঃ পুনর্জন্মনি শোভনে।
মানুষ্যং বা চিরাৎপ্রাপ্য নিরপত্যা ভবন্তি তে।
পুত্রশোকয়ুতাশ্চাপি নাস্তি তত্র বিচারণা॥ 13-221-14(90088)
উমোবাচ। 13-221-15x(7548)
ভগবন্মানুষাঃ কেচিৎপ্রদৃশ্যন্তে সুদুঃখিতাঃ।
উদ্বেগবাসনিরতাঃ সোদ্বেগাশ্চ যতব্রতাঃ॥ 13-221-15(90089)
নিত্যং শোকসমাবিষ্টা দুর্গতাশ্চ তথৈব চ।
কেন কর্মবিপাকেন তন্মে শংসিতুমর্হসি॥ 13-221-16(90090)
মহেশ্বর উবাচ। 13-221-17x(7549)
যে পুরা মনুজা নিত্যমুৎক্রোশনপরায়ণাঃ।
ভীষয়ন্তি পরানিত্যং বিকুর্বন্তি তথৈব চ॥ 13-221-17(90091)
ঋণবৃদ্ধিকরাশ্চৈব দরিদ্রেভ্যো যথেষ্টতঃ।
ঋণার্থমভিগচ্ছন্তি সততং বৃদ্ধিরূপকাঃ॥ 13-221-18(90092)
উদ্বিজন্তে হি তান্দৃষ্ট্বা ধারকাঃ স্বার্থকারণাৎ।
অতিবৃদ্ধির্ন কর্তব্যা দরিদ্রেভ্যো যথেষ্টতঃ॥ 13-221-19(90093)
যে শ্বভিঃ ক্রীডমানাশ্চ ত্রাসয়ন্তি বনে মৃগান্।
প্রাণিহিংসাং তথা দেবি কুর্বন্তি চ যতস্ততঃ॥ 13-221-20(90094)
যেষাং গৃহেষু বৈ শ্বানস্ত্রাসয়ন্তি বৃথা নরান্।
এবংয়ুক্তসমাচারাঃ কালধর্মগতাঃ পুনঃ॥ 13-221-21(90095)
পীডিতা যমদণ্ডেন নিরয়স্থাশ্চিরং প্রিয়ে।
কথঞ্চিৎপ্রাপ্য মানুষ্যং তত্র তে দুঃখসংয়ুতাঃ॥ 13-221-22(90096)
কুদেশে দুঃখভূয়িষ্ঠে ব্যাঘাতশতসঙ্কুলে।
জায়ন্তে তত্র শোচন্তঃ সোদ্বেগাশ্চ যতস্ততঃ॥ 13-221-23(90097)
উমোবাচ। 13-221-24x(7550)
ভগবন্মানুষাঃ কেচিদৈশ্বর্যজ্ঞানসংয়ুতাঃ।
ম্লেচ্ছভূমিষু দৃশ্যন্তে ম্লেচ্ছৈশ্বর্যসমন্বিতাঃ।
কেন কর্মবিপাকেন তন্মে শংসিতুমর্হসি॥ 13-221-24(90098)
মহেশ্বর উবাচ। 13-221-25x(7551)
যে পুরা মনুজা দেবি ধনধান্যসমন্বিতাঃ।
অয়থাবৎপ্রয়চ্ছন্তি শ্রদ্ধাবর্জিতমেব বা॥ 13-221-25(90099)
অপাত্রেভ্যশ্চ যে দানং শৌচমঙ্গলবর্জিতাঃ।
দদত্যেব চ যে মূর্খাঃ শ্লাঘয়াঽবজ্ঞয়াঽপি বা॥ 13-221-26(90100)
এবংয়ুক্তসমাচারাঃ পুনর্জন্মনি শোভনে।
কুদেশে ম্লেচ্ছভূয়িষ্ঠে দুর্গমে বনসংকটে।
ম্লেচ্ছাধিপত্যং সম্প্রাপ্য জায়ন্তে তত্রতত্র বৈ॥ 13-221-27(90101)
উমোবাচ। 13-221-28x(7552)
ভগবন্ভগনেত্রঘ্ন মানুষেষু চ কেচন।
ক্লীবা নপুংসকাশ্চৈব দৃশ্যন্তে ষণ্ডকাস্তথা॥ 13-221-28(90102)
নীচকর্মরতা নীচা নীচসক্যাস্তথা ভুবি।
কেন কর্মবিপাকেন তন্মে শংসিতুমর্হসি॥ 13-221-29(90103)
মহেশ্বর উবাচ। 13-221-30x(7553)
তদহং তে প্রবক্ষ্যামি শৃণু কল্যাণি কারণম্॥ 13-221-30(90104)
যে পুরা মনুজা ভূৎবা ঘোরকর্মরতাস্তথা।
পশুপংস্ৎবোপগাতেন জীবন্তি চ রমন্তি চ॥ 13-221-31(90105)
পুংস্ৎবোপঘাতিনশ্চৈব নরাণাং কোপকারণাৎ।
যে ধূর্তাঃ স্ত্রীষু গচ্ছন্তি অয়থাবদ্যথেষ্টতঃ॥ 13-221-32(90106)
কামবিঘ্নকরা যে তু দ্বেষপৈশুন্যকারণাৎ।
এবংয়ুক্তসমাচারাঃ কালধর্মং গতাস্তু তে।
দণ্ডিতা যমদণ্ডেন নিরয়স্থাশ্চিরং প্রিয়ে॥ 13-221-33(90107)
যদি চেন্মানুষং জন্ম লভেরংস্তে তথাবিধাঃ।
ক্লীবা বর্ষবরাশ্চৈব ষণ্ডকাশ্চ ভবন্তি তে॥ 13-221-34(90108)
নীচকর্মপরা লোকে নির্লজ্জা বীতসম্ভ্রমাঃ।
পরান্দীনান্বহিষ্কৃত্য তে ভবন্তি স্বকর্মণা॥ 13-221-35(90109)
যদি চেৎসম্প্রপশ্যেরংস্তে মুচ্যন্তে হি কল্মষাৎ।
অত্রাপি তে প্রমাদ্যেয়ুঃ পতন্তি নরকালয়ে॥ 13-221-36(90110)
স্ত্রীণামপি তথা দেবি যথা পুংসাং তু কর্মজম্।
ইতি তে কথিতং দেবি ভূয়ঃ শ্রোতুং কিমিচ্ছসি॥ ॥ 13-221-37(90111)

ইতি শ্রীমন্মহাভারতে অনুশাসনপর্বণি দানধর্মপর্বণি একবিংশত্যধিকদ্বিশততমোঽধ্যায়ঃ॥ 221 ॥