অনুশাসনপর্ব – অধ্যায় ২৫২

অনুশাসনপর্ব – অধ্যায় 252
॥ শ্রীঃ ॥
13.252. অধ্যায়ঃ 252
অথ দানধর্মপর্ব ॥ 1 ॥
Mahabharata – Anushaasana Parva – Chapter Topics
ভীষ্মেণ হিমবদ্গিরৌ নারদোদিতকৃষ্ণমহিমানুবাদঃ॥ 1 ॥ তথা পার্থকৃষ্ণয়োর্নরনারায়ণাত্মকৎবকথনপূর্বকং কৃষ্ণমহিমপ্রশংসনম্॥ 2 ॥
Mahabharata – Anushaasana Parva – Chapter Text

নারদ উবাচ।

অথ ব্যোম্নি মহাঞ্শব্দঃ সবিদ্যুৎস্তনয়িত্নুমান্।
মেঘৈশ্চ গগনং নীলং সংরুদ্ধমভবদ্ধনৈঃ॥ 13-252-1(91425)
প্রাবৃষীব চ পর্জন্যো ববৃষে নির্মলং পয়ঃ।
তমশ্বৈবাভবদ্ধোরং দিশশ্চ ন চকাশিরে॥ 13-252-2(91426)
ততো দেবগিরৌ তস্মিন্রম্যে পুণ্যে সনাতনে।
ন শর্বং ভূতসঙ্ঘং বা দদৃশুর্মনয়স্তদা॥ 13-252-3(91427)
ব্যভ্রং চ গগনং সদ্যঃ ক্ষণেন সমপদ্যত।
তীর্থয়াত্রাং ততো বিপ্রা জগ্মুশ্চান্যে যথাগতম্॥ 13-252-4(91428)
তদদ্ভুতমচিন্ত্যং চ দৃষ্ট্বা তে বিস্মিতাঽভবন্।
শঙ্করস্যোময়া সার্ধং সংবাদং ৎবৎকথাশ্রয়ম্॥ 13-252-5(91429)
স ভবান্পুরুষব্যাঘ্র ব্রহ্মভূতঃ সনাতনঃ।
যদর্থমনুশিষ্টা স্মো গিরিপৃষ্ঠে মহাত্মনা॥ 13-252-6(91430)
দ্বিতীয়ং ৎবদ্ভুতমিদং ৎবত্তেজঃকৃতমদ্য বৈ।
দৃষ্ট্বা চ বিস্মিতাঃ কৃষ্ণ সা চ নঃ স্মৃতিরাগতা॥ 13-252-7(91431)
এতত্তে দেবদেবস্য মাহাত্ম্যং কথিতং প্রভো।
কপর্দিনো গিরীশস্য মহাবাহো জনার্দন॥ 13-252-8(91432)
ইত্যুক্তাঃ স তদা কৃষ্ণস্তপোবননিবাসিভিঃ।
মানয়ামাস তান্সর্বানৃষীন্দেবকিনন্দনঃ॥ 13-252-9(91433)
অথর্ষয়ঃ সম্প্রহৃষ্টাঃ পুনস্তে কৃষ্মমব্রুবন্।
পুনঃপুনর্দর্শয়াস্মান্সদৈব মধুসূদন॥ 13-252-10(91434)
ন হি নঃ সা রতি স্বর্গে যা চ ৎবদ্দর্শনে বিভো।
তদৃতং চ মহাবাহো যদাহ ভগবান্ভবঃ॥ 13-252-11(91435)
এতত্তে সর্বমাখ্যাতং রহস্যমরিকর্শন।
ৎবমেব হ্যর্ততত্ৎবজ্ঞঃ পৃষ্টোঽস্মান্পৃচ্ছসে যদা॥ 13-252-12(91436)
তদস্মাভিরিদং গুহ্যং ৎবৎপ্রিয়ার্থমুদাহৃতম্।
ন চ তেঽবিদিতং কিঞ্চিত্ত্রিষু লোকেষু বিদ্যতে॥ 13-252-13(91437)
জন্ম চৈব প্রসূতিশ্চ যচ্চান্যৎকারণং বিভো।
বয়ং তু বহুচাপল্যাদশক্তা গুহ্যধারণে॥ 13-252-14(91438)
ততঃ স্থিতে ৎবয়ি বিভো লঘুৎবাৎপ্রলপামহে।
ন হি কিঞ্চিত্তদাশ্চর্যং যন্ন বেত্তি ভবানিহ॥ 13-252-15(91439)
দিবি বা ভুবি বা দেব সর্বং হি বিদিতং তব।
সাধয়াম বয়ং কৃষ্ণ বুদ্ধিং পুষ্টিমবাপ্নুহি॥ 13-252-16(91440)
পুত্রস্তে সদৃশস্তাত বিশিষ্টো বা ভবিষ্যতি।
মহাপ্রভাবসংয়ুক্তো দীপ্তিকীর্তিকরঃ প্রভুঃ॥ 13-252-17(91441)
ভীষ্ম উবাচ। 13-252-18x(7681)
ততঃ প্রণম্য দেবেশং যাদবং পুরুষোত্তমম্।
প্রদক্ষিণমুপাবৃত্য প্রজগ্মুস্তে মহর্ষয়ঃ॥ 13-252-18(91442)
সোয়ং নারায়ণঃ শ্রীমন্দীপ্ত্যা পরময়া যুতঃ।
ব্রতং যথাবত্তচ্চীর্ৎবা দ্বারকাং পুনরাগমৎ॥ 13-252-19(91443)
পূর্ণে চ দশমে মাসি পুত্রোঽস্য পরমাদ্ভুতঃ।
রুক্মিণ্যাং সম্মতো জজ্ঞে শূরো বংশধরঃ প্রভো॥ 13-252-20(91444)
স কামঃ সর্বভূতানাং সর্বভাবগতো নৃপ।
অসুরাণাং সুরাণাং চ চরত্যন্তর্গতঃ সদা॥ 13-252-21(91445)
সোয়ং পুরুষশার্দূলো মেঘবর্ণশ্চতুর্ভুজঃ।
সংশ্রিতঃ পাণ্ডবান্প্রেম্ণা ভবন্তশ্চৈনমাশ্রিতাঃ॥ 13-252-22(91446)
কীর্তির্লক্ষ্মীর্ধৃতিশ্চৈবক স্বর্গমার্গস্তথৈব চ।
যত্রৈষ সংস্থিতস্তত্র দেবো বিষ্ণুস্ত্রিবিক্রমঃ॥ 13-252-23(91447)
সেন্দ্রা দেবাস্ত্রয়স্ত্রিংশদেষ নাত্র বিচারণা।
আদিদেবো মহাদেবঃ সর্বভূতপ্রতিশ্রয়ঃ॥ 13-252-24(91448)
অনাদিনিধনোঽব্যক্তো মহাত্মা মধুসূদনঃ।
অয়ং জাতো মহাতেজাঃ সুরাণামর্থসিদ্ধয়ে॥ 13-252-25(91449)
সুদুস্তরার্থতত্ৎবস্য বক্তা কর্তা চ মাধবঃ।
তব পার্থ জয়ঃ কৃৎস্নস্তব কীর্তিস্তথাঽতুলা॥ 13-252-26(91450)
তবেয়ং পৃথিবী দেবী কৃৎস্না নারায়ণাশ্রয়াৎ।
অয়ং নাথস্তবাচিন্ত্যো যস্য নারায়ণো গতিঃ॥ 13-252-27(91451)
স ভবাংস্ৎবমুপাধ্বর্যূ রণাগ্নৌ হুতবান্নৃপান্।
কৃষ্ণস্রুবেণ মহতা যুগান্তাগ্নিসমেন বৈ॥ 13-252-28(91452)
দুর্যোধনশ্চ শোচ্যোসৌ সপুত্রভ্রাতৃবান্ধবঃ।
কৃতবান্যোঽবুধঃ ক্রোধাদ্ধরিগাণ্ডীবিবিগ্রহম্॥ 13-252-29(91453)
দৈতেয়া দানবেন্দ্রাশ্চ মহাকায়া মহাবলাঃ।
চক্রাগ্নৌ ক্ষয়মাপন্না দাবাগ্নৌ শলভা ইব॥ 13-252-30(91454)
প্রতিয়োদ্ধুং ন শক্যো হি মানুষৈরেব সংয়ুগে।
বিহীনৈঃ পুরুষব্যাঘ্র সত্ৎবশক্তিবলাদিভিঃ॥ 13-252-31(91455)
জয়ো যোগী যুগান্তাভঃ সব্যসাচী রণাগ্রগঃ।
তেজসা হতবান্সর্বং সুয়োধনবলং নৃপ॥ 13-252-32(91456)
যত্তু গোবৃষভাঙ্কেন মুনিভ্যঃ সমুদাহৃতম্।
পুরাণং হিমবৎপৃষ্ঠে তন্মে নিগদতঃ শৃণু॥ 13-252-33(91457)
যাবত্তস্য ভবেৎপুষ্টিস্তেজো জীপ্তিঃ পরাক্রমঃ।
প্রভাবঃ সন্নতির্জন্ম কৃষ্ণে তত্ত্রিগুণং বিভো॥ 13-252-34(91458)
কঃ শক্নোত্যন্যথা কর্তুং তদ্যদি স্যাত্তথা শৃণু।
যত্রঃ কৃষ্ণো হি ভগবাংস্তত্র পুষ্টিরনুত্তমা॥ 13-252-35(91459)
বয়ং ৎবিহাল্পমতয়ঃ পরতন্ত্রাঃ সুবিক্লবাঃ।
জ্ঞানপূর্বং প্রপন্নাঃ স্মো মৃত্যোঃ পন্থানমব্যযম্॥ 13-252-36(91460)
ভবাংশ্চাপ্যার্জবপরঃ পূর্বং কৃৎবা প্রতিশ্রয়ম্।
রাজবৃত্তং ন লভতে প্রতিজ্ঞাপালনে রতঃ॥ 13-252-37(91461)
অত্যেবাত্মবধং লোকে রাজংস্ৎবং বহু মন্যসে।
ন হি প্রতিজ্ঞা যা দত্তা তাং প্রহাতুমরিংদম॥ 13-252-38(91462)
কালেনায়ং জনঃ সর্বো নিহতো রণমূর্ধনি।
বয়ং চ কালেন হতাঃ কালো হি পরমেশ্বরঃ॥ 13-252-39(91463)
ন হি কালেন কালজ্ঞঃ স্পৃষ্টঃ শোচিতুমর্হসি।
কালো লোহিতরক্তাক্ষঃ কৃষ্ণো দণ্ডী সনাতনঃ॥ 13-252-40(91464)
তস্মাৎকুন্তীসুত জ্ঞাতীন্নেহ শোচিতুমর্হসি।
ব্যপেতমন্যুর্নিত্যং ৎবং ভব কৌরবনন্দন॥ 13-252-41(91465)
মাধবস্যাস্য মহাত্ম্যং শ্রুতং যৎকথিতং ময়া।
তদেব তাবৎপর্যাপ্তং সজ্জনস্য নিদর্শনম্॥ 13-252-42(91466)
ব্যাসস্য বচনং শ্রুৎবা নারদস্য চ ধীমতঃ।
স্বয়ং চৈব মহারাজ কৃষ্ণস্যার্হতমস্য বৈ॥ 13-252-43(91467)
প্রভাবশ্চর্ষিপূগস্য কথিতঃ সুমহান্ময়া।
মহেশ্বরস্য সংবাদং শৈলপুত্র্যাশ্চ ভারত॥ 13-252-44(91468)
ধারয়িষ্যতি যশ্চৈনং মহাপুরুষসম্ভবম্।
শৃণুয়াৎকথয়েদ্বা যঃ স শ্রেয়ো লভতে পরম্॥ 13-252-45(91469)
ভবিতারশ্চ তস্যাথ সর্বে কামা যথেপ্সিতাঃ।
প্রেত্য স্বর্গং চ লভতে নরো নাস্ত্যত্র সংশয়ঃ॥ 13-252-46(91470)
ন্যায়্যং শ্রেয়োভিকামেন প্রতিপত্তুং জনার্দনঃ।
এষ এবাক্ষয়ো বিপ্রৈঃ স্তুতো রাজঞ্জনার্দনঃ॥ 13-252-47(91471)
মহেশ্বরমুখোৎসৃষ্টা যে চ ধর্মগুণাঃ স্মৃতাঃ।
তে ৎবয়া মনসা ধার্যাঃ কুরুরাজ দিবানিশম্॥ 13-252-48(91472)
এবং তে বর্তমানস্য সম্যগ্দণ্ডধরস্য চ।
প্রজাপালনদক্ষস্য স্বর্গলোকো ভবিষ্যতি॥ 13-252-49(91473)
ধর্মোণাপি সদা রাজন্প্রজা রক্ষিতুমর্হসি।
যস্তস্য বিপুলো দণ্ডঃ সম্যগ্ধর্মঃ স কীর্ত্যতে॥ 13-252-50(91474)
য এষ কথিতো রাজন্ময়া সজ্জনসন্নিধৌ।
শঙ্করস্যোময়া সার্ধং সংবাদো ধর্মসংহিতঃ॥ 13-252-51(91475)
শ্রুৎবা বা শ্রোতুকামো বাঽপ্যর্চয়েদ্বৃষভধ্বজম্।
বিশুদ্ধেনেহ ভাবেন য ইচ্ছেদ্ভূতিমাত্মনঃ॥ 13-252-52(91476)
এষ তস্যানবদ্যস্য নারদস্য মহাত্মনঃ।
সংদেশো দেবপূজার্থং তং তথা কুরু পাণ্ডব॥ 13-252-53(91477)
এতদত্যদ্ভুতং বৃত্তং পুণ্যে হি ভবতি প্রভো।
বাসুদেবস্য কৌন্তেয় স্থাণোশ্চৈব স্বভাবজম্॥ 13-252-54(91478)
দশবর্শসহস্রাণি বদর্যামেষ শাশ্বতঃ।
তপশ্চচার বিপুলং সহ গাণ্ডীবধন্বনা॥ 13-252-55(91479)
ত্রিয়ুগৌ পুণ্ডরীকাক্ষৌ বাসুদেবধনংজয়ৌ।
বিদিতৌ নারদাদেতৌ মম ব্যাসাচ্চ পার্থিব॥ 13-252-56(91480)
বাল এব মহাবাহুশ্চকার কদনং মহৎ।
কংসস্য পুণ্ডরীকাক্ষো জ্ঞাতিত্রামার্থকারণাৎ॥ 13-252-57(91481)
কর্মণামস্য কৌন্তেয় নান্তং সঙ্খ্যাতুমুৎসহে।
শাশ্বতস্য পুরাণস্য পুরুষস্য যুধিষ্ঠির॥ 13-252-58(91482)
ধ্রুবং শ্রেয়ঃ পরং তাত ভবিষ্যতি তবোত্তমম্।
যস্য তে পুরুষব্যাঘ্রঃ সখা চায়ং জনার্দনঃ॥ 13-252-59(91483)
দুর্যোধনং তু শোচামি প্রেত্য লোকেঽপি দুর্মতিম্।
যৎকৃতে পৃথিবী সর্বা বিনষ্টা সহয়দ্বিপা॥ 13-252-60(91484)
দুর্যোধনাপরাধেন কর্ণস্য শকুনেস্তথা।
দুঃশাসনবতুর্থানাং কুরবো নিধনং গতাঃ॥ 13-252-61(91485)
বৈশম্পায়ন উবাচ। 13-252-62x(7682)
এবং সম্ভাষমাণে তু গাঙ্গেয়ে পুরুষর্ষভে।
তূষ্ণীং বভূব কৌরব্যো মধ্যে তেষাং মহাত্মনাম্॥ 13-252-62(91486)
তচ্ছ্রুৎবা বিস্ময়ং জগ্মুর্ধৃতরাষ্ট্রাদয়ো নৃপাঃ।
সম্পূজ্য মনসা কৃষ্ণং সর্বে প্রাঞ্জলয়ঽভবন্॥ 13-252-63(91487)
ঋষয়শ্চাপি তে সর্বে নারদপ্রমুখাস্তদা।
প্রতিগৃহ্যাভ্যনন্দন্ত তদ্বাক্যং প্রতিপূজ্য চ॥ 13-252-64(91488)
ইত্যেতদখিলং সর্বৈঃ পাণ্ডবো ভ্রাতৃভিঃ সহ।
শ্রুতবান্সুমহাশ্চর্যং পুণ্যং ভীষ্মানুশাসনম্॥ 13-252-65(91489)
বৈশম্পায়ন উবাচ। 13-252-66x(7683)
যুধিষ্ঠিরস্তু গাঙ্গেয়ং বিশ্রান্তং ভূরিদক্ষিণম্।
পুনরেব মহাবুদ্ধিঃ পর্যপৃচ্ছন্মহীপতিঃ॥ ॥ 13-252-66(91490)

ইতি শ্রীমন্মহাভারতে অনুশাসনপর্বণি দানধর্মপর্বণি দ্বিপঞ্চাশদধিকদ্বিশততমোঽধ্যায়ঃ॥ 252 ॥