অনুশাসনপর্ব – অধ্যায় 017
॥ শ্রীঃ ॥
13.17. অধ্যায়ঃ 017
অথ দানধর্মপর্ব ॥ 1 ॥
Mahabharata – Anushaasana Parva – Chapter Topics
ভীষ্মেণ যুধিষ্ঠিরংপ্রতি ভক্তিশ্রদ্ধাদীনাং ভুক্তিসাধনতাপ্রতিপাদকব্যাসবাক্যানুবাদঃ॥ 1 ॥
Mahabharata – Anushaasana Parva – Chapter Text
`দ্বৈপায়ন উবাচ।
শ্রদ্দাত্যাগং নির্বৃতিং চাপি পূজাং
সত্যং ধর্মং যঃ কৃতং চাভ্যুপৈতি।
কামদ্বেষৌ ত্যজ্য সর্বেষু তুল্যঃ
শ্রদ্ধাপূতঃ সর্বয়জ্ঞেষু যোগ্যঃ॥ 13-17-1(81765)
যস্মিন্যজ্ঞে সর্বভূতাঃ প্রহৃষ্টাঃ
সর্বে চারম্ভাঃ শাস্ত্রদৃষ্টাঃ প্রবৃত্তাঃ।
ধর্ম্যৈরর্থ্যৈর্যে যজন্তে ধ্রুবং তে
পূতাত্মানো ধর্মমেকং ভজন্তে॥ 13-17-2(81766)
একাক্ষরং দ্ব্যক্ষরমেকমেব
সদা যজন্তে নিয়তাঃ প্রতীতাঃ।
দৃষ্ট্বা মনাগর্চয়িৎবা স্ম বিপ্রাঃ
সতাং মার্গং তং ধ্রুবং সম্ভজন্তে॥ 13-17-3(81767)
পাপাত্মানঃ ক্রোধরগাভিভূতাঃ
কৃষ্ণে ভক্তা নাম সঙ্কীর্তয়ন্তঃ।
পূতাত্মানো যজ্ঞশীলাঃ সুমেধা
যজ্ঞস্যান্তে কীর্তিলোকান্ভজন্তে॥ 13-17-4(81768)
একো বেদো ব্রাহ্মণানাং বভূব
চতুষ্পাদস্ত্রিগুণো ব্রহ্মশীর্ষঃ।
পাদংপাদং ব্রাহ্মণা বেদমাহু-
স্ত্রেতাকালে তং চ তং বিদ্ধি শীর্ষম্॥’ ॥ 13-17-5(81769)
ইতি শ্রীমন্মহাভারতে অনুশাসনপর্বণি দানধর্মপর্বণি সপ্তদশোঽধ্যায়ঃ॥ 17 ॥