অনুশাসনপর্ব – অধ্যায় 157
॥ শ্রীঃ ॥
13.157. অধ্যায়ঃ 157
অথ দানধর্মপর্ব ॥ 1 ॥
Mahabharata – Anushaasana Parva – Chapter Topics
নহুষেণাগস্ত্যস্য স্বয়ানে যোজনম্॥ 1 ॥ তথা তেন সহ শ্রুতিপ্রামাণ্যবিবাদে স্ববিরুদ্ধভাষিণোঽগস্ত্যস্য মস্তকে স্বপাদেন তাডনম্॥ 2 ॥ তদা তজ্জটান্তর্নিগূঢেন ভৃগুণা শাপদানেন তস্যাধঃপাতনম্॥ 3 ॥ ততো দেবৈরিন্দ্রস্য স্বপদেঽভিষেচনম্॥ 4 । নহুষস্য স্বকৃতপূর্ববলিদীপদানাদিজসুকৃতমহিম্না পুনঃ স্বর্গপ্রাপ্তিঃ॥ 5 ॥
Mahabharata – Anushaasana Parva – Chapter Text
যুধিষ্ঠির উবাচ।
কথং বৈ স বিপন্নশ্চ কথং বৈ পাতিতো ভুবি।
কথং দেবেন্দ্রতাং প্রাপ্তস্তদ্ভবান্বক্তুমর্হতি॥ 13-157-1(87440)
ভীষ্ম উবাচ। 13-157-2x(7318)
এবং তয়োঃ সংবদতোঃ ক্রিয়াস্তস্য মহাত্মনঃ।
সর্বা এব প্রবর্তন্তে যা দিব্যা যাশ্চ মানুষাঃ॥ 13-157-2(87441)
তথৈব দীপদানানি সর্বোপকরণানি বৈ।
বলিকর্ম চ যচ্চান্যদ্বৎসকাশ্চ পৃথগ্বিধাঃ॥ 13-157-3(87442)
সর্বাস্তস্য সমুৎপন্না দেবেন্দ্রস্য মহাত্মনঃ।
দেবলোকে নৃলোকে চ সদাচারপুরস্কৃতাঃ॥ 13-157-4(87443)
তাশ্চোদ্ভবন্তি রাজেন্দ্র সমৃদ্ধ্যৈ গৃহমেধিনঃ।
ধূপপ্রদানৈর্দীপৈশ্চ নমস্কারৈস্তথৈব চ॥ 13-157-5(87444)
যথা সিদ্ধস্য চান্নস্য গৃহ্য চাগ্রং প্রদীয়তে।
বলয়শ্চ গৃহোদ্দেশে ততঃ প্রীয়ন্তি দেবতাঃ॥ 13-157-6(87445)
যথা চ গৃহিণস্তোষো ভবেদ্বৈ বলিকর্মণি।
তথা শতগুণা প্রীতির্দেবতানাং প্রজায়তে॥ 13-157-7(87446)
এবং ধূপপ্রদানং চ দীপদানং চ সাধবঃ।
প্রয়চ্ছতি নমস্কারৈর্যুক্তমাত্মগুণাবহম্॥ 13-157-8(87447)
স্নানেনাদ্ভিশ্চ যৎকর্ম ক্রিয়তে বৈ বিপশ্চিতা।
নমস্কারপ্রয়ুক্তেন তেন প্রীণন্তি দেবতাঃ॥ 13-157-9(87448)
পিতরশ্চ মহাভাগা ঋষয়শ্চ তপোধনাঃ।
গৃহ্যাশ্চ দেবতাঃ সর্বাঃ প্রীয়ন্তে বিধিনাঽর্চিতাঃ॥ 13-157-10(87449)
ইত্যেতাং বুদ্ধিমাস্থায় নহুষঃ স নরেশ্বরঃ।
সুরেন্দ্রৎবং মহৎপ্রাপ্য কৃতবানেতদদ্ভুতম্॥ 13-157-11(87450)
কস্য চিত্ৎবথ কালস্য ভাগ্যক্ষয় উপস্থিতে।
সর্বমেতদবজ্ঞায় ন চকার যথাবিধি॥ 13-157-12(87451)
ততঃ স পরিহীণোঽভূৎসুরেন্দ্রো বলদর্পতঃ।
ধূপদীপাদিকবিধিং ন যথাবচ্চকার হ।
ততোঽস্য যজ্ঞবিষয়ো রক্ষোভিঃ পরিবাধ্যতে॥ 13-157-13(87452)
অথাগস্ত্যমৃষিশ্রেষ্ঠং বাহনায়াজুহাব হ।
দ্রুতং সরস্বতীকূলাৎস্ময়ন্নিব মহাবলঃ॥ 13-157-14(87453)
ততো ভৃগুর্মহাতেজা মৈত্রাবরুণিমব্রবীৎ।
নিমীলয়স্ব নয়নে জটাং যাবদ্বিশামি তে।
‘সুরেন্দ্রপতনায়েতি স চ নেত্র ন্যমীলয়ৎ॥’ 13-157-15(87454)
ততোঽগস্ত্যস্যাথ জটাং দৃষ্ট্বা প্রাবিশদচ্যুতঃ।
ভৃগুঃ স সুমহাতেজাঃ পাতনায় নৃপস্য চ॥ 13-157-16(87455)
ততঃ স দেবরাট্ প্রাপ্তস্তমৃষিং বাহনায় বৈ।
ততোঽগস্ত্যঃ সুরপতিং বাক্যমাহ বিশাম্পতে।
যোজয়স্বেতি মাং ক্ষিপ্রং কং চ দেশং বহামি তে॥ 13-157-17(87456)
যত্র বক্ষ্যসি তত্র ৎবাং নয়িষ্যামি সুরাধিপ।
ইত্যুক্তো নরহুষস্তেন যোজয়ামাস তং মুনিম্॥ 13-157-18(87457)
ভৃগুস্তস্য জটান্তস্থো বভূব হৃষিতো ভৃশম্।
ন চাপি দর্শনং তস্য চকার স ভৃগুস্তদা।
বরদানপ্রভাবজ্ঞো নহুষস্য মহাত্মনঃ॥ 13-157-19(87458)
ন চুকোপ তদাঽগস্ত্যো যুক্তোঽপি নহুষেণ বৈ।
তং তু রাজা পদৈকেন চোদয়ামাস ভারত।
‘শ্রুতিঃ স্মৃতিঃ প্রমাণং বা নেতিবাদেন দেবরাট্॥’ 13-157-20(87459)
ন চুকোপ স ধর্মাত্মা ততঃ পাদেন দেবরাট্।
অগস্ত্যস্য তদা ক্রুদ্ধো বামেনাভ্যহনচ্ছিরঃ॥ 13-157-21(87460)
তস্মিঞ্শিরস্যভিহতে স জটান্তর্গতো ভৃগুঃ।
শশাপ বলবৎক্রুদ্ধো নহুষং পাপচেতসম্॥ 13-157-22(87461)
যস্মাৎপদাঽবধীঃ ক্রোধাচ্ছিরসীমং মহামুনিম্।
তস্মাদাশু মহীং গচ্ছ সর্পো ভূৎবা সুদুর্মতে॥ 13-157-23(87462)
শপ্তোঽথ স তদা তেন সর্পো ভূৎবা পপাত হ।
অদৃষ্টেনাথ ভৃগুণা ভূতলে ভরতর্ষভ॥ 13-157-24(87463)
ভৃগুং হি যদি সোঽদ্রাক্ষীন্নহুষঃ পৃথিবীপতে।
স শক্তোনাঽভবিষ্যদ্বৈ পাতনে তস্য তেজসা॥ 13-157-25(87464)
স তু তৈস্তৈঃ প্রদানৈশ্চ তপোভির্নিয়মৈস্তথা।
পতিতোঽপি মহারাজ ভূতলে স্মৃতিমানভূৎ॥ 13-157-26(87465)
প্রসাদয়ামাস ভৃগুং শাপান্তো মে ভবেদিতি।
ততোঽগস্ত্যঃ কৃপাবিষ্টঃ প্রাসাদয়ত তং ভৃগুম্।
শাপান্তার্থং মহারাজ স চ প্রাদাৎকৃপান্বিতঃ॥ 13-157-27(87466)
ভৃগুরুবাচ। 13-157-28x(7319)
রাজা যুধিষ্ঠিরো নাম ভবিষ্যতি কুরূদ্বহঃ।
স ৎবাং মোক্ষয়িতা শাপাদিত্যুক্ৎবাঽন্তরধীয়ত॥ 13-157-28(87467)
অগস্ত্যোঽপি মহাতেজাঃ কৃৎবা কার্যং শতক্রতোঃ।
স্বমাশ্রমপদং প্রায়াৎপূজ্যমানো দ্বিজাতিভিঃ॥ 13-157-29(87468)
নহুষোঽপি ৎবয়া রাজংস্তস্মাচ্ছাপাৎসমুদ্ধৃতঃ।
জগাম ব্রহ্মভবনং পশ্যতস্তে জনাধিপ॥ 13-157-30(87469)
তদা স পাতয়িৎবা তং নহুষং ভূতলে ভৃগুঃ।
জগাম ব্রহ্মভবনং ব্রহ্মণে চ ন্যবেদয়ৎ॥ 13-157-31(87470)
ততঃ শক্রং সমানায়্য দেবানাহ পিতামহঃ।
বরদানান্মম সুরা নহুষো রাজ্যমাপ্তবান্।
স চাগস্ত্যেন ক্রুদ্ধেন ভ্রংশিতো ভূতলং গতঃ॥ 13-157-32(87471)
ন চ শক্যং বিনা রাজ্ঞা সুখং বর্তয়িতুং ক্বচিৎ।
তস্মাদয়ং পুনঃ শক্রো দেবরাজ্যেঽভিষিচ্যতাম্॥ 13-157-33(87472)
এবং সম্ভাষমাণং তু দেবাঃ পার্থ পিতামহম্।
এবমস্ৎবিতি সংহৃষ্টাঃ প্রত্যূচুস্তং নরাধিপ॥ 13-157-34(87473)
সোঽভিষিক্তো ভগবতা দেবরাজ্যে চ বাসবঃ।
ব্রহ্মণা রাজশার্দূল যথাপূর্বং ব্যরোচত॥ 13-157-35(87474)
এবমেতৎপুরাবৃত্তং নহুষস্য ব্যতিক্রমাৎ।
স চ তৈরেব সংসিদ্ধো নহুষঃ কর্মভিঃ পুনঃ॥ 13-157-36(87475)
তস্মাদ্দীপাঃ প্রদাতব্যাঃ সায়ং বৈ গৃহমেধিভিঃ।
দিব্যং চক্ষুরবাপ্নোতি প্রেত্য দীপস্য দায়কঃ।
পূর্ণচন্দ্রপ্রতীকাশা দীপদাশ্চ ভবন্ত্যুত॥ 13-157-37(87476)
যাবদক্ষিনিমেষাণি জ্বলন্তে তাবতীঃ সমাঃ।
রূপবান্বলবাংশ্চাপি নরো ভবতি দীপদঃ॥ 13-157-38(87477)
য ইদং শৃণুয়াদ্বাপি পঠতে যো দ্বিজোত্তমঃ।
ব্রহ্মলোকমবাপ্নোতি স চ বৈ নাত্র সংশয়ঃ॥ ॥ 13-157-39(87478)
ইতি শ্রীমন্মহাভারতে অনুশাসনপর্বণি দানধর্মপর্বণি সপ্তপঞ্চাশদধিকশততমোঽধ্যায়ঃ॥ 157 ॥
Mahabharata – Anushaasana Parva – Chapter Footnotes
7-157-3 বৎসকাঃ পুত্রাদের্বার্ষিকোৎসবাঃ। যচ্চান্যদুৎসেকাশ্চেতি থ.ধ.পাঠঃ॥ 7-157-20 তং তু রাজা প্রতোদেনেতি ঝ.পাঠঃ॥ 7-157-30 ভবনং তেন পুণ্যেন কর্মণেতি থ.ধ.পাঠঃ॥ 7-157-38 রূপবান্ধর্মবাংশ্চাপীতি ধ.পাঠঃ॥