ও বুবাইজি আমার দুঃখ কার ঠাঁই গো কইতাম
তোমরা কি দোয়া কর অউলাখান দিন কাটাইতাম ॥
মা-বাপে বিয়া দিলা মান ইজ্জতর দায়
তাইন করইন আবুল-তাবুল মনে যেতা চায়
আমারে ঠেকাইছে আল্লায়
আমি কও কিতা করতাম ॥
আমারে হুনাইন না কুনতা মনে মনে ঘুরইন
বুঝর কথা কইলে আরো রাগ-গোসা করইন
পুয়া পুড়িরে মারইন-ধরইন
মনর ভাব কিতা বুঝতাম ॥
কাম না করি ভাত খাওয়া ওই যে মনোভাব
ইতা তো সংসারখান নষ্ট করবার স্বভাব
হেষে যদি পড়ে অভাব
মান ইজ্জত কি হারাইতাম ॥
বাউল আবদুল করিম বলে সবারে জানাই
কাম করো হালাল করে খাও দশ নউকর কামাই
থাকতে আমার তনু-তনাই
পরর হগ্দা কেনে খাইতাম ॥
Leave a Reply