পশুপত

.. পাশুপতব্রহ্মোপনিষত্ ..

পাশুপতব্রহ্মবিদ্যাসংবেদ্যং পরমাক্ষরম্ .
পরমানন্দসংপূর্ণং রামচন্দ্রপদং ভজে ..
ॐ ভদ্রং কর্ণেভিঃ শৃণুযাম দেবাঃ .. ভদ্রং পশ্যেমাক্ষভির্যজত্রাঃ ..
স্থিরৈরঙ্গৈস্তুষ্টুবাঁসস্তনূভিঃ .. ব্যশেম দেবহিতং যদাযুঃ ..
স্বস্তি ন ইন্দ্রো বৃদ্ধশ্রবাঃ .. স্বস্তি নঃ পূষা বিশ্ববেদাঃ ..
স্বস্তি নস্তার্ক্ষ্যো অরিষ্টনেমিঃ .. স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ ..
হরিঃ ॐ .. অথ হ বৈ স্বযংভূর্ব্রহ্মা প্রজাঃ সৃজানীতি কামকামো জাযতে
কামেশ্বরো বৈশ্রবণঃ . বৈশ্রবণো ব্রহ্মপুত্রো বালখিল্যঃ স্বযংভুবং
পরিপৃচ্ছতি জগতাং কা বিদ্যা কা দেবতা জাগ্রত্তুরীযযোরস্য কো দেবো যানি
তস্য বশানি কালাঃ কিযত্প্রমাণাঃ কস্যাজ্ঞযা রবিচন্দ্রগ্রহাদযো ভাসন্তে
কস্য মহিমা গগনস্বরূপ এতদহং শ্রোতুমিচ্ছামি নান্যো জানাতি
ত্বং ব্রূহি ব্রহ্মন্ . স্বযংভূরুবাচ কৃত্স্নজগতাং মাতৃকা বিদ্যা
দ্বিত্রিবর্ণসহিতা দ্বিবর্ণমাতা ত্রিবর্ণসহিতা . চতুর্মাত্রাত্মকোঙ্কারো মম
প্রাণাত্মিকা দেবতা . অহমেব জগত্ত্রযস্যৈকঃ পতিঃ . মম বশানি সর্বাণি
যুগান্যপি . অহোরাত্রাদযো মত্সংবর্ধিতাঃ কালাঃ . মম রূপা
রবেস্তেজশ্চন্দ্রনক্ষত্রগ্রহতেজাংসি চ . গগনো মম ত্রিশক্তিমাযাস্বরূপঃ
নান্যো মদস্তি . তমোমাযাত্মকো রুদ্রঃ সাত্বিকমাযাত্মকো বিষ্ণূ
রাজসমাযাত্মকো ব্রহ্মা .
ইন্দ্রাদযস্তামসরাজসাত্মিকা ন সাত্বিকঃ কোঽপি অঘোরঃ
সর্বসাধারণস্বরূপঃ . সমস্তযাগানাং রুদ্রঃ পশুপতিঃ কর্তা .
রুদ্রো যাগদেবো বিষ্ণুরধ্বর্যুর্হোতেন্দ্রো দেবতা যজ্ঞভুগ্
মানসং ব্রহ্ম মাহেশ্বরং ব্রহ্ম মানসং হংসঃ
সোঽহং হংস ইতি . তন্মযযজ্ঞো নাদানুসংধানম্ .
তন্মযবিকারো জীবঃ . পরমাত্মস্বরূপো হংসঃ . অন্তর্বহিশ্চরতি
হংসঃ . অন্তর্গতোঽনকাশান্তর্গতসুপর্ণস্বরূপো হংসঃ .
ষণ্ণবতিতত্ত্বতন্তুবদ্ব্যক্তং চিত্সূত্রত্রযচিন্মযলক্ষণং
নবতত্ত্বত্রিরাবৃতং ব্রহ্মবিষ্ণুমহেশ্বরাত্মকমগ্নিত্রযকলোপেতং
চিদ্গ্রন্থিবন্ধনম্ . অদ্বৈতগ্রন্থিঃ যজ্ঞসাধারণাঙ্গং
বহিরন্তর্জ্বলনং যজ্ঞাঙ্গলক্ষণব্রহ্মস্বরূপো হংসঃ .
উপবীতলক্ষণসূত্রব্রহ্মগা যজ্ঞাঃ . ব্রহ্মাঙ্গলক্ষণযুক্তো
যজ্ঞসূত্রম্ . তদ্ব্রহ্মসূত্রম্ . যজ্ঞসূত্রসংবংধী ব্রহ্মযজ্ঞঃ .
তত্স্বরূপোঽঙ্গানি মাত্রাণি মনো যজ্ঞস্য হংসো যজ্ঞসূত্রম্ .
প্রণবং ব্রহ্মসূত্রং ব্রহ্মযজ্ঞমযম্ . প্রণবান্তর্বর্তী হংসো
ব্রহ্মসূত্রম্ . তদেব ব্রহ্মযজ্ঞমযং মোক্ষক্রমম্ .
ব্রহ্মসন্ধ্যাক্রিযা মনোযাগঃ . সন্ধ্যাক্রিযা মনোযাগস্য লক্ষণম্ .
যজ্ঞসূত্রপ্রণবব্রহ্মযজ্ঞক্রিযাযুক্তো ব্রাহ্মণঃ . ব্রহ্মচর্যেণ
হরন্তি দেবাঃ . হংসসূত্রচর্যা যজ্ঞাঃ . হংসপ্রণবযোরভেদঃ .
হংসস্য প্রার্থনাস্ত্রিকালাঃ . ত্রিকালস্ত্রিবর্ণাঃ . ত্রেতাগ্ন্যনুসন্ধানো যাগঃ .
ত্রেতাগ্ন্যাত্মাকৃতিবর্ণোঙ্কারহংসানুসন্ধানোঽন্তর্যাগঃ .
চিত্স্বরূপবত্তন্মযং তুরীযস্বরূপম্ . অন্তরাদিত্যে জ্যোতিঃস্বরূপো হংসঃ .
যজ্ঞাঙ্গং ব্রহ্মসংপত্তিঃ . ব্রহ্মপ্রবৃত্তৌ তত্প্রণবহংসসূত্রেণৈব
ধ্যানমাচরন্তি . প্রোবাচ পুনঃ স্বযংভুবং প্রতিজানীতে ব্রহ্মপুত্রো
ঋষির্বালখিল্যঃ . হংসসূত্রাণি কতিসংখ্যানি কিযদ্বা প্রমাণম্ .
হৃদ্যাদিত্যমরীচীনাং পদং ষণ্ণবতিঃ . চিত্সূত্রঘ্রাণযোঃ স্বর্নির্গতা
প্রণবধারা ষডঙ্গুলদশাশীতিঃ . বামবাহুর্দক্ষিণকঠ্যোরন্তশ্চরতি
হংসঃ পরমাত্মা ব্রহ্মগুহ্যপ্রকারো নান্যত্র বিদিতঃ . জানন্তি তেঽমৃতফলকাঃ .
সর্বকালং হংসং প্রকাশকম্ . প্রণবহংসান্তর্ধ্যানপ্রকৃতিং বিনা ন মুক্তিঃ .
নবসূত্রান্পরিচর্চিতান্ . তেঽপি যদ্ব্রহ্ম চরন্তি . অন্তরাদিত্যে ন জ্ঞাতং
মনুষ্যাণাম্ . জগদাদিত্যো রোচত ইতি জ্ঞাত্বা তে মর্ত্যা বিবুধাস্তপন
প্রার্থনাযুক্তা আচরন্তি .
বাজপেযঃ পশুহর্তা অধ্বর্যুরিন্দ্রো দেবতা অহিংসা
ধর্মযাগঃ পরমহংসোঽধ্বর্যুঃ পরমাত্মা দেবতা
পশুপতিঃ ব্রহ্মোপনিষদো ব্রহ্ম . স্বাধ্যাযযুক্তা
ব্রাহ্মণাশ্চরন্তি . অশ্বমেধো মহাযজ্ঞকথা .
তদ্রাজ্ঞা ব্রহ্মচর্যমাচরন্তি . সর্বেষাং
পূর্বোক্তব্রহ্মযজ্ঞক্রমং মুক্তিক্রমমিতি ব্রহ্মপুত্রঃ
প্রোবাচ . উদিতো হংস ঋষিঃ . স্বযংভূস্তিরোদধে . রুদ্রো
ব্রহ্মোপনিষদো হংসজ্যোতিঃ পশুপতিঃ প্রণবস্তারকঃ স এবং বেদ .
হংসাত্মমালিকাবর্ণব্রহ্মকালপ্রচোদিতা .
পরমাত্মা পুমানিতি ব্রহ্মসংপত্তিকারিণী .. ১..
অধ্যাত্মব্রহ্মকল্পস্যাকৃতিঃ কীদৃশী কথা .
ব্রহ্মজ্ঞানপ্রভাসন্ধ্যাকালো গচ্ছতি ধীমতাম্ .
হংসাখ্যো দেবমাত্মাখ্যমাত্মতত্ত্বপ্রজা কথম্ .. ২..
অন্তঃপ্রণবনাদাখ্যো হংসঃ প্রত্যযবোধকঃ .
অন্তর্গতপ্রমাগূঢং জ্ঞাননালং বিরাজিতম্ .. ৩..
শিবশক্ত্যাত্মকং রূপং চিন্মযানন্দবেদিতম্ .
নাদবিন্দুকলা ত্রীণি নেত্রং বিশ্ববিচেষ্টিতম্ .. ৪..
ত্রিযঙ্গানি শিখা ত্রীণি দ্বিত্রাণাং সংখ্যমাকৃতিঃ .
অন্তর্গূঢপ্রমা হংসঃ প্রমাণান্নির্গতং বহিঃ .. ৫..
ব্রহ্মসূত্রপদং জ্ঞেযং ব্রাহ্মং বিধ্যুক্তলক্ষণম্ .
হংসার্কপ্রণবধ্যানমিত্যুক্তো জ্ঞানসাগরে .. ৬..
এতদ্বিজ্ঞানমত্রেণ জ্ঞানসাগরপারগঃ .
স্বতঃ শিবঃ পশুপতিঃ সাক্ষী সর্বস্য সর্বদা .. ৭..
সর্বেষাং তু মনস্তেন প্রেরিতং নিযমেন তু .
বিষযে গচ্ছতি প্রাণশ্চেষ্টতে বাগ্বদত্যপি .. ৮..
চক্ষুঃ পশ্যতি রূপাণি শ্রোত্রং সর্বং শৃণোত্যপি .
অন্যানি কানি সর্বাণি তেনৈব প্রেরিতানি তু .. ৯..
স্বং স্বং বিষযমুদ্দিশ্য প্রবর্তন্তে নিরন্তরম্ .
প্রবর্তকত্বং চাপ্যস্য মাযযা ন স্বভাবতঃ .. ১০..
শ্রোত্রমাত্মনি চাধ্যস্তং স্বযং পশুপতিঃ পুমান্ .
অনুপ্রবিশ্য শ্রোত্রস্য দদাতি শ্রোত্রতাং শিবঃ .. ১১..
মনঃ স্বাত্মনি চাধ্যস্তং প্রবিশ্য পরমেশ্বরঃ .
মনস্ত্বং তস্য সত্ত্বস্থো দদাতি নিযমেন তু .. ১২..
স এব বিদিতাদন্যস্তথৈবাবিদিতাদপি .
অন্যেষামিন্দ্রিযাণাং তু কল্পিতানামপীশ্বরঃ .. ১৩..
তত্তদ্রূপমনু প্রাপ্য দদাতি নিযমেন তু .
ততশ্চক্ষুশ্চ বাক্চৈব মনশ্চান্যানি খানি চ .. ১৪..
ন গচ্ছন্তি স্বযংজ্যোতিঃস্বভাবে পরমাত্মনি .
অকর্তৃবিষযপ্রত্যক্প্রকাশং স্বাত্মনৈব তু .. ১৫..
বিনা তর্কপ্রমাণাভ্যাং ব্রহ্ম যো বেদ বেদ সঃ .
প্রত্যগাত্মা পরংজ্যোতির্মাযা সা তু মহত্তমঃ .. ১৬..
তথা সতি কথং মাযাসংভবঃ প্রত্যগাত্মনি .
তস্মাত্তর্কপ্রমাণাভ্যাং স্বানুভূত্যা চ চিদ্ঘনে .. ১৭..
স্বপ্রকাশৈকসংসিদ্ধে নাস্তি মাযা পরাত্মনি .
ব্যাবহারিকদৃষ্ট্যেযং বিদ্যাবিদ্যা ন চান্যথা .. ১৮..
তত্ত্বদৃষ্ট্যা তু নাস্ত্যেব তত্ত্বমেবাস্তি কেবলম্ .
ব্যাবহারিক দৃষ্টিস্তু প্রকাশাব্যভিচারিতঃ .. ১৯..
প্রকাশ এব সততং তস্মাদদ্বৈত এব হি .
অদ্বৈতমিতি চোক্তিশ্চ প্রকাশাব্যভিচারতঃ .. ২০..
প্রকাশ এব সততং তস্মান্মৌনং হি যুজ্যতে .
অযমর্থো মহান্যস্য স্বযমেব প্রকাশিতঃ .. ২১..
ন স জীবো ন চ ব্রহ্মা ন চান্যদপি কিংচন .
ন তস্য বর্ণা বিদ্যন্তে নাশ্রমাশ্চ তথৈব চ .. ২২..
ন তস্য ধর্মোঽধর্মশ্চ ন নিষেধো বিধির্ন চ .
যদা ব্রহ্মাত্মকং সর্বং বিভাতি তত এব তু .. ২৩..
তদা দুঃখাদিভেদোঽযমাভাসোঽপি ন ভাসতে .
জগজ্জীবাদিরূপেণ পশ্যন্নপি পরাত্মবিত্ .. ২৪..
ন তত্পশ্যতি চিদ্রূপং ব্রহ্মবস্ত্বেব পশ্যতি .
ধর্মধর্মিত্ববার্তা চ ভেদে সতি হি ভিদ্যতে .. ২৫..
ভেদাভেদস্তথা ভেদাভেদঃ সাক্ষাত্পরাত্মনঃ .
নাস্তি স্বাত্মাতিরেকেণ স্বযমেবাস্তি সর্বদা .. ২৬..
ব্রহ্মৈব বিদ্যতে সাক্ষাদ্বস্তুতোঽবস্তুতোঽপি চ .
তথৈব ব্রহ্মবিজ্জ্ঞানী কিং গৃহ্ণাতি জহাতি কিম্ .. ২৭..
অধিষ্ঠানমনৌপম্যমবাঙ্মনসগোচরম্ .
যত্তদদ্রেশ্যমগ্রাহ্যমগোত্রং রূপবর্জিতম্ .. ২৮..
অচক্ষুঃশ্রোত্রমত্যর্থং তদপাণিপদং তথা .
নিত্যং বিভুং সর্বগতং সুসূখ্মং চ তদব্যযম্ .. ২৯..
ব্রহ্মৈবেদমমৃতং তত্পুরস্তাদ্-
     ব্রহ্মানন্দং পরমং চৈব পশ্চাত্ .
ব্রহ্মানন্দং পরমং দক্ষিণে চ
     ব্রহ্মানন্দং পরমং চোত্তরে চ  .. ৩০..
স্বাত্মন্যেব স্বযং সর্বং সদা পশ্যতি নির্ভযঃ .
তদা মুক্তো ন মুক্তশ্চ বদ্ধস্যৈব বিমুক্ততা .. ৩১..
এবংরূপা পরা বিদ্যা সত্যেন তপসাপি চ .
ব্রহ্মচর্যাদিভির্ধর্মৈর্লভ্যা বেদান্তবর্ত্মনা .. ৩২..
স্বশরীরে স্বযংজ্যোতিঃস্বরূপং পারমার্থিকম্ .
ক্ষীণদোষঃ প্রপশ্যন্তি নেতরে মাযযাবৃতাঃ .. ৩৩..
এবং স্বরূপবিজ্ঞানং যস্য কস্যাস্তি যোগিনঃ .
কুত্রচিদ্গমনং নাস্তি তস্য সংপূর্ণরূপিণঃ .. ৩৪..
আকাশমেকং সংপূর্ণং কুত্রচিন্ন হি গচ্ছতি .
তদ্বদ্ব্রহ্মাত্মবিচ্ছ্রেষ্ঠঃ কুত্রচিন্নৈব গচ্ছতি .. ৩৫..
অভক্ষ্যস্য নিবৃত্ত্যা তু বিশুদ্ধং হৃদযং ভবেত্ .
আহারশুদ্ধৌ চিত্তস্য বিশুদ্ধির্ভবতি স্বতঃ .. ৩৬..
চিত্তশুদ্ধৌ ক্রমাজ্জ্ঞানং ত্রুট্যন্তি গ্রন্থযঃ স্ফুটম্ .
অভক্ষ্যং ব্রহ্মবিজ্ঞানবিহীনস্যৈব দেহিনঃ .. ৩৭..
ন সম্যগ্জ্ঞানিনস্তদ্বত্স্বরূপং সকলং খলু .
অহমন্নং সদান্নাদ ইতি হি ব্রহ্মবেদনম্ .. ৩৮..
ব্রহ্মবিদ্গ্রসতি জ্ঞানাত্সর্বং ব্রহ্মাত্মনৈব তু .
ব্রহ্মক্ষত্রাদিকং সর্বং যস্য স্যাদোদনং সদা .. ৩৯..
যস্যোপসেচনং মৃত্যুস্তং জ্ঞানী তাদৃশঃ খলু .
ব্রহ্মস্বরূপবিজ্ঞানাজ্জগদ্ভোজ্যং ভবেত্খলু .. ৪০..
জগদাত্মতযা ভাতি যদা ভোজ্যং ভবেত্তদা .
ব্রহ্মস্বাত্মতযা নিত্যং ভক্ষিতং সকলং তদা .. ৪১..
যদাভাসেন রূপেণ জগদ্ভোজ্যং ভবেত তত্ .
মানতঃ স্বাত্মনা ভাতং ভক্ষিতং ভবতি ধ্রুবম্ .. ৪২..
স্বস্বরূপং স্বযং ভুঙ্ক্তে নাস্তি ভোজ্যং পৃথক্ স্বতঃ .
অস্তি চেদস্তিতারূপং ব্রহ্মৈবাস্তিত্বলক্ষণম্ .. ৪৩..
অস্তিতালক্ষণা সত্তা সত্তা ব্রহ্ম ন চাপরা .
নাস্তি সত্তাতিরেকেণ নাস্তি মাযা চ বস্তুতঃ .. ৪৪..
যোগিনামাত্মনিষ্ঠানাং মাযা স্বাত্মনি কল্পিতা .
সাক্ষিরূপতযা ভাতি ব্রহ্মজ্ঞানেন বাধিতা .. ৪৫..
ব্রহ্মবিজ্ঞানসংপন্নঃ প্রতীতমখিলং জগত্ .
পশ্যন্নপি সদা নৈব পশ্যতি স্বাত্মনঃ পৃথক্ .. ৪৬.. ইত্যুপনিষত্ ..
ॐ ভদ্রং কর্ণেভিঃ শৃণুযাম দেবাঃ .. ভদ্রং পশ্যেমাক্ষভির্যজত্রাঃ ..
স্থিরৈরঙ্গৈস্তুষ্টুবাঁসস্তনূভিঃ .. ব্যশেম দেবহিতং যদাযুঃ ..
স্বস্তি ন ইন্দ্রো বৃদ্ধশ্রবাঃ .. স্বস্তি নঃ পূষা বিশ্ববেদাঃ ..
স্বস্তি নস্তার্ক্ষ্যো অরিষ্টনেমিঃ .. স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ .. হরিঃ ॐ তত্সত্ ..
ইতি পাশুপতব্রহ্মোপনিষত্সমাপ্তা ..