.. জযদেবকৃত গীতগোবিন্দং (অষ্টপদী) ..

          গীতগোবিন্দম্

          .. গীতগোবিন্দম্ ..

          .. শ্রী  গোপালক ধ্যানম্ ..

যদ্গোপীবদনেন্দুমণ্ডনমভূত্কস্তূরিকাপত্রকং
যল্লক্ষ্মীকুচশাতকুংভ কলশে ব্যাগোচমিন্দীবরম্ .
যন্নির্বাণবিধানসাধনবিধৌ সিদ্ধাঞ্জনং যোগিনাং
তন্নশ্যাম঳মাবিরস্তু হৃদযে কৃষ্ণাভিধানং মহঃ .. ১..

          .. শ্রী জযদেব ধ্যানম্ ..

রাধামনোরমরমাবররাসলীল-
গানামৃতৈকভণিতং কবিরাজরাজম্ .
শ্রীমাধবার্চ্চনবিধবনুরাগসদ্ম-
পদ্মাবতীপ্রিযতমং প্রণতোস্মি নিত্যম্ .. ২..

শ্রীগোপলবিলাসিনী বলযসদ্রত্নাদিমুগ্ধাকৃতি
শ্রীরাধাপতিপাদপদ্মভজনানন্দাব্ধিমগ্নোঽনিশম্ ..
লোকে সত্কবিরাজরাজ ইতি যঃ খ্যাতো দযাম্ভোনিধিঃ
তং বন্দে জযদেবসদ্গুরুমহং পদ্মাবতীবল্লভম্ .. ৩..

           .. প্রথমঃ সর্গঃ ..

          .. সামোদদামোদরঃ ..

মেঘৈর্মেদুরমম্বরং বনভুবঃ শ্যামাস্তমালদ্রুমৈ-
র্নক্তং ভীরুরযং ত্বমেব তদিমং রাধে গৃহং প্রাপয .
ইত্থং নন্দনিদেশিতশ্চলিতযোঃ প্রত্যধ্বকুঞ্জদ্রুমং
রাধামাধবযোর্জযন্তি যমুনাকূলে রহঃকেলযঃ .. ১..

বাগ্দেবতাচরিতচিত্রিতচিত্তসদ্মা
পদ্মাবতীচরণচারণচক্রবর্তী .
শ্রীবাসুদেবরতিকেলিকথাসমেতং
এতং করোতি জযদেবকবিঃ প্রবন্ধম্ .. ২..

বাচঃ পল্লবযত্যুমাপতিধরঃ সন্দর্ভশুদ্ধিং গিরাং
জানীতে জযদেব এব শরণঃ শ্লাঘ্যো দুরূহদ্রুতে .
শৃঙ্গারোত্তরসত্প্রমেযরচনৈরাচার্যগোবর্ধন-
স্পর্ধী কোঽপি ন বিশ্রুতঃ শ্রুতিধরো ধোযী কবিক্ষ্মাপতিঃ
.. ৩..

যদি হরিস্মরণে সরসং মনো
যদি বিলাসকলাসু কুতূহলম্ .
মধুরকোমলকান্তপদাবলীং
শৃণু তদা জযদেবসরস্বতীম্ .. ৪..

          .. গীতম্ ১ ..

প্রলযপযোধিজলে ধৃতবানসি বেদম্ .
বিহিতবহিত্রচরিত্রমখেদম্ ..
কেশব ধৃতমীনশরীর জয জগদীশ হরে .. ১..

ক্ষিতিরতিবিপুলতরে তব তিষ্ঠতি পৃষ্ঠে .
ধরণিধরণকিণচক্রগরিষ্ঠে ..
কেশব ধৃতকচ্ছপরূপ জয জগদীশ হরে .. ২..

বসতি দশনশিখরে ধরণী তব লগ্না .
শশিনি কলঙ্ককলেব নিমগ্না ..
কেশব ধৃতসূকররূপ জয জগদীশ হরে .. ৩..

তব করকমলবরে নখমদ্ভুতশৃঙ্গম্ .
দলিতহিরণ্যকশিপুতনুভৃঙ্গম্ ..
কেশব ধৃতনরহরিরূপ জয জগদীশ হরে .. ৪..

ছলযসি বিক্রমণে বলিমদ্ভুতবামন .
পদনখনীরজনিতজনপাবন ..
কেশব ধৃতবামনরূপ জয জগদীশ হরে .. ৫..

ক্ষত্রিযরুধিরমযে জগদপগতপাপম্ .
স্নপযসি পযসি শমিতভবতাপম্ ..
কেশব ধৃতভৃঘুপতিরূপ জয জগদীশ হরে .. ৬..

বিতরসি দিক্ষু রণে দিক্পতিকমনীযম্ .
দশমুখমৌলিবলিং রমণীযং ..
কেশব ধৃতরামশরীর জয জগদীশ হরে .. ৭..

বহসি বপুষি বিশদে বসনং জলদাভম্ .
হলহতিভীতিমিলিতযমুনাভম্ ..
কেশব ধৃতহলধররূপ জয জগদীশ হরে .. ৮..

নিন্দতি যজ্ঞবিধেরহহ শ্রুতিজাতম্ .
সদযহৃদযদর্শিতপশুঘাতম্ ..
কেশব ধৃতবুদ্ধশরীর জয জগদীশ হরে .. ৯..

ম্লেচ্ছনিবহনিধনে কলযসি করবালম্ .
ধূমকেতুমিব কিমপি করালম্ ..
কেশব ধৃতকল্কিশরীর জয জগদীশ হরে .. ১০..

শ্রীজযদেবকবেরিদমুদিতমুদারম্ .
শৃণু সুখদং শুভদং ভবসারম্ ..
কেশব ধৃতদশবিধরূপ জয জগদীশ হরে .. ১১..

বেদানুদ্ধরতে জগন্নিবহতে ভূগোলমুদ্বিভ্রতে
দৈত্যং দারযতে বলিং ছলযতে ক্ষত্রক্ষযং কুর্বতে .
পৌলস্ত্যং জযতে হলং কলযতে কারুণ্যমাতন্বতে
ম্লেচ্ছান্মূর্চ্ছযতে দশাকৃতিকৃতে কৃষ্ণায তুভ্যং নমঃ .. ৫..

          .. গীতম্ ২ ..

শ্রিতকমলাকুচমণ্ডল ধৃতকুণ্ডল এ .
কলিতললিতবনমাল জয জযদেব হরে .. ১..

দিনমণীমণ্দলমণ্ডন ভবখণ্ডন এ .
মুনিজনমানসহংস জয জযদেব হরে .. ২..

কালিযবিষধরগঞ্জন জনরঞ্জন এ .
যদুকুলনলিনদিনেশ জয জযদেব হরে .. ৩..

মধুমুরনরকবিনাশন গরুডাসন এ .
 সুরকুলকেলিনিদান জয জযদেব হরে .. ৪..

অমলকমলদললোচন ভবমোচন্ এ .
ত্রিভুবনভবননিধান জয জযদেব হরে .. ৫..

জনকসুতাকৃতভূষণ জিতদূষণ এ .
সমরশমিতদশখণ্ঠ জয জযদেব হরে .. ৬..

অভিনবজলধরসুন্দর ধৃতমন্দর এ .
শ্রীমুখচন্দ্রচকোর জয জযদেব হরে .. ৭..

শ্রীজযদেবকবেরিদং কুরুতে মুদম্ এ .
মঙ্গলমুজ্জ্বলগীতং জয জযদেব হরে .. ৮..

পদ্মাপযোধরতটীপরিরম্ভলগ্ন-
কাশ্মীরমুদ্রিতমুরো মধুসূদনস্য .
ব্যক্তানুরাগমিব খেলদনঙ্গখেদ-
স্বেদাম্বুপূরমনুপূরযতু প্রিযং বঃ .. ৬..

বসন্তে বাসন্তীকুসুমসুকুমারৈরবযবৈ-
র্ভ্রমন্তীং কান্তারে বহুবিহিতকৃষ্ণানুসরণাম্ .
অমন্দং কন্দর্পজ্বরজনিতচিন্তাকুলতযা
বলদ্বাধাং রাধাং সরসমিদমুচে সহচরী .. ৭..

          .. গীতম্ ৩..

ললিতলবঙ্গলতাপরিশীলনকোমলমলযসমীরে .
মধুকরনিকরকরম্বিতকোকিলকূজিতকুঞ্জকুটীরে ..
বিহরতি হরিরিহ সরসবসন্তে
নৃত্যতি যুবতিজনেন সমং সখি বিরহিজনস্য দুরন্তে .. ১..

উন্মদমদনমনোরথপথিকবধূজনজনিতবিলাপে  .
অলিকুলসংকুলকুসুমসমূহনিরাকুলবকুলকলাপে   .. ২..

মৃগমদসৌরভরভসবশংবদনবদলমালতমালে .
যুবজনহৃদযবিদারণমনসিজনখরুচিকিংশুকজালে .. ৩..

মদনমহীপতিকনকদণ্ডরুচিকেশরকুসুমবিকাসে .
মিলিতশিলীমুখপাটলিপটলকৃতস্মরতূণবিলাসে .. ৪..

বিগলিতলজ্জিতজগদবলোকনতরুণকরুণকৃতহাসে  .
বিরহিনিকৃন্তনকুন্তমুখাকৃতিকেতকদন্তুরিতাশে .. ৫..

মাধবিকাপরিমলললিতে নবমালিকজাতিসুগন্ধৌ .
মুনিমনসামপি মোহনকারিণি তরুণাকারণবন্ধৌ .. ৬..

স্ফুরদতিমুক্তলতাপরিরম্ভণমুকুলিতপুলকিতচূতে .
বৃন্দাবনবিপিনে পরিসরপরিগতযমুনাজলপূতে .. ৭..

শ্রীজযদেবভণিতমিদমুদযতি হরিচরণস্মৃতিসারম্ .
সরসবসন্তসমযবনবর্ণনমনুগতমদনবিকারম্ .. ৮..

দরবিদলিতমল্লীবল্লিচঞ্চত্পরাগ-
প্রকটিতপটবাসৈর্বাসযন্ কাননানি .
ইহ হি দহতি চেতঃ কেতকীগন্ধবন্ধুঃ
প্রসরদসমবাণপ্রাণবদ্গন্ধবাহঃ .. ৮..

উন্মীলন্মধুগন্ধলুব্ধমধুপব্যাধূতচূতাঙ্কুর-
ক্রীডত্কোকিলকাকলীকলকলৈরুদ্গীর্ণকর্ণজ্বরাঃ .
নীযন্তে পথিকৈঃ কথংকথমপি ধ্যানাবধানক্ষণ-
প্রাপ্তপ্রাণসমাসমাগমরসোল্লাসৈরমী বাসরাঃ .. ৯..

অনেকনারীপরিরম্ভসম্ভ্রম-
স্ফুরন্মনোহারিবিলাসলালসম্ .
মুরারিমারাদুপদর্শযন্ত্যসৌ
সখী সমক্ষং পুনরাহ রাধিকাম্ .. ১০..

          .. গীতম্ ৪..

চন্দনচর্চিতনীলকলেবরপীতবসনবনমালী .
কেলিচলন্মণিকুণ্ডলমণ্ডিতগণ্ডযুগস্মিতশালী ..
হরিরিহমুগ্ধবধূনিকরে
বিলাসিনি বিলসতি কেলিপরে .. ১..

পীনপযোধরভারভরেণ হরিং পরিরম্য সরাগম্ .
গোপবধূরনুগাযতি কাচিদুদঞ্চিতপঞ্চমরাগম্ .. ২..

কাপি বিলাসবিলোলবিলোচনখেলনজনিতমনোজম্ .
ধ্যাযতি মুগ্ধবধূরধিকং মধুসূদনবদনসরোজম্ .. ৩..

কাপি কপোলতলে মিলিতা লপিতুং কিমপি শ্রুতিমূলে .
চারু চুচুম্ব নিতম্ববতী দযিতং পুলকৈরনুকূলে .. ৪..

কেলিকলাকুতুকেন চ কাচিদমুং যমুনাজলকূলে .
মঞ্জুলবঞ্জুলকুঞ্জগতং বিচকর্ষ করেণ দ্কূলে .. ৫..

করতলতালতরলবলযাবলিকলিতকলস্বনবংশে .
রাসরসে সহনৃত্যপরা হরিণা যুবতিঃ প্রশশংসে .. ৬..

শ্লিষ্যতি কামপি চুম্বতি কামপি কামপি রমযতি
রামাম্ .
পশ্যতি সস্মিতচারুপরামপরামনুগচ্ছতি বামাম্ .. ৭..

শ্রীজযদেবকবেরিদমদ্ভুতকেশবকেলিরহস্যম্ .
বৃন্দাবনবিপিনে ললিতং বিতনোতু শুভানি যশস্যম্ .. ৮..

বিশ্বেষামনুরঞ্জনে জনযন্নানন্দমিন্দীবর-
শ্রেণীশ্যামলকোমলৈরুপনযন্নঙ্গৈরনঙ্গোত্সবম্ .
স্বচ্ছন্দং ব্রজসুন্দরীভিরভিতঃ প্রত্যঙ্গমালিঙ্কিতঃ
শৃঙ্গারঃ সখি মূর্তিমানিব মদহু মুগ্ধো হরিঃ ক্রীডতি .. ১১..

অদ্যোত্সঙ্গবসদ্ভুজঙ্গকবলক্কেশাদিবেশাচলং
প্রালেযপ্লবনেচ্ছযানুসরতি শ্রীখণ্ডশৈলানিলঃ .
কিং চ স্নিগ্ধরসালমৌলিমুকুলান্যালোক্য হর্ষোদযা-
দুন্মীলন্তি কুহূঃ কুহূরিতি কলোত্তলাঃ পিকানাং গিরঃ .. ১২..

রাসোল্লাসভরেণবিভ্রমভৃতামাভীরবামভ্রুবা-
মভ্যর্ণং পরিরম্যনির্ভরমুরঃ প্রেমান্ধযা রাধযা .
সাধু ত্বদ্বদনং সুধামযমিতি ব্যাহৃত্য গীতস্তুত্-
ব্যাজাদুদ্ভটচুম্বিতস্মিতমনোহরী হরিঃ পাতু বঃ .. ১৩..

.. ইতি শ্রীগীতগোবিন্দে সামোদদামোদরো নাম প্রথমঃ সর্গঃ ..

            .. দ্বিতীযঃ সর্গঃ ..

           .. অক্লেশকেশবঃ ..

বিহরতি বনে রাধা সাধারণপ্রণযে হরৌ
বিগলিতনিজোত্কর্ষাদীর্ষ্যাবশেন গতান্যতঃ .
ক্বচিদপি লতাকুঞ্জে গুঞ্জন্মধুব্রতমণ্ডলী-
মুখরশিখরে লীনা দীনাপ্যুবাচ রহঃ সখীম্ .. ১৪..

           .. গীতম্ ৫..

সংচরদধরসুধামধুরধ্বনিমুখরিতমোহনবংশম্ .
চলিতদৃগঞ্চলচঞ্চলমৌলিকপোলবিলোলবতংসম্ ..
রাসে হরিমিহ বিহিতবিলাসং
স্মরতি মনো মম কৃতপরিহাসম্ .. ১..

চন্দ্রকচারুমযূরশিখণ্ডকমণ্ডলবলযিতকেশম্ .
প্রচুরপুরন্দরধনুরনুরঞ্জিতমেদুরমুদিরসুবেশম্ .. ২..

গোপকদম্বনিতম্ববতীমুখচুম্বনলম্ভিতলোভম্ .
বন্ধুজীবমধুরাধরপল্লবমুল্লসিতস্মিতশোভম্ .. ৩..

বিপুলপুলকভুজপল্লববলযিতবল্লবযুবতিসহস্রম্ .
করচরণোরসি মণিগণভূষণকিরণবিভিন্নতমিস্রম্ .. ৪..

জলদপটলবলদিন্দুবিনন্দকচন্দনতিলকললাটম্ .
পীনঘনস্ত্তনমণ্ডলমর্দননির্দযহৃদযকপাটম্ .. ৫..

মণিমযমকরমনোহরকুণ্ডলমণ্ডিতগণ্ডমুদারম্ .
পীতবসনমনুগতমুনিমনুজসুরাসুরবরপরিবারম্ .. ৬..

বিশদকদম্বতলে মিলিতং কলিকলুষভযং শমযন্তম্ .
মামপি কিমপি তরঙ্গদনঙ্গদৃশা মনসা রমযন্তম্ .. ৭..

শ্রীজযদেবভণিতমতিসুন্দরমোহনমধুরিপুরূপম্ .
হরিচরণস্মরণং প্রতি সংপ্রতি পুণ্যবতামনুরূপম্ .. ৮..

গণযতি গুণগ্রামং ভামং ভ্রমাদপি নেহতে
বহতি চ পরিতোষং দোষং বিমুঞ্চতি দূরতঃ .
যুবতিষু বলস্তৃষ্ণে কৃষ্ণে বিহারিণী মাং বিনা
পুনরপি মনো বামং কামং করোতি করোমি কিম্ .. ১৫..

           .. গীতম্ ৬..

নিভৃতনিকুঞ্জগৃহং গতযা নিশি রহসি নিলীয বসন্তম্ .
চকিতবিলোকিতসকলদিশা রতিরভসরসেন হসন্তম্ ..
সখি হে কেশিমথনমুদারম্
রময মযা সহ মদনমনোরথভাবিতযা সবিকারম্ .. ১..

প্রথমসমাগমলজ্জিতযা পটুচাটুশতৈরনুকূলম্ .
মৃদুমধুরস্মিতভাষিতযা শিথিলীকৃতজধনদুকূলম্ .. ২.

কিসলযশযননিবেশিতযা চিরমুরসি মমৈব শযানম্ .
কৃতপরিরম্ভণচুম্বনযা পরিরভ্য কৃতাধরপানম্ .. ৩..

অলসনিমীলিতলোচনযা পুলকাবলিললিতকপোলম্ .
শ্রমজলসকলকলেবরযা বরমদনমদাদতিলোলম্ .. ৪..

কোকিলকলরবকূজিতযা জিতমনসিজতন্ত্রবিচারম্ .
শ্লথকুসুমাকুলকুন্তলযা নখলিখিতঘনস্তনভারম্ .. ৫..

চরণরণিতমনিনূপুরযা পরিপূরিতসুরতবিতানম্ .
মুখরবিশৃঙ্খলমেখলযা সকচগ্রহচুম্বনদানম্ .. ৬..

রতিসুখসমযরসালসযা দরমুকুলিতনযনসরোজম্ .
নিঃসহনিপতিততনুলতযা মধুসূদনমুদিতমনোজম্ .. ৭..

শ্রীজযদেবভণিতমিদমতিশযমধুরিপুনিধুবনশীলম্ .
সুখমুত্কণ্ঠিতগোপবধূকথিতং বিতনোতু সলীলম্ .. ৮..

হস্তস্রস্তবিলাসবংশমনৃজুভ্রূবল্লীমদ্বল্লবী-
বৃন্দোত্সারিদৃগন্তবীক্ষিতমতিস্বেদার্দ্রগণ্দস্থলম্ .
মামুদ্বীক্ষ্য বিলক্ষিতং স্মিতসুধামুগ্ধাননং কাননে
গোবিন্দং ব্রজসুন্দরীগণবৃতং পশ্যামি হৃষ্যামি চ .. ১৬..

দুরালোকস্তোকস্তবকনবকাশোকলতিকা-
বিকাসঃ কাসারোপবনপবনোঽপি ব্যথযতি .
অপি ভ্রাম্যদ্ভৃঙ্গীরণিতরমণীযা ন মুকুল-
প্রসূতিশ্চূতানাং সখি শিখরিণীযং সুখযতি .. ১৭..

          .. ইতি গীতগোবিন্দে অক্লেশকেশবো নাম দ্বিতীযঃ সর্গঃ
..

           .. তৃতীযঃ সর্গঃ ..

          .. মুগ্ধমধুসূদনঃ ..

কংসারিরপি সংসারবাসনাবন্ধশৃঙ্খলাম্ .
রাধামাধায হৃদযে তত্যাজ ব্রজসুন্দরীঃ .. ১৮..

ইতস্ততস্তামনুসৃত্য রাধিকা-
মনঙ্গবাণব্রণখিন্নমানসঃ .
কৃতানুতাপঃ স্ কলিন্দনন্দিনী-
তটান্তকুঞ্জে বিষসাদ মাধবঃ .. ১৯..

           .. গীতম্ ৭..

মামিযং চলিতা বিলোক্য বৃতং বধূনিচযেন .
সাপরাধতযা মযাপি বারিতাতিভযেন ..
হরিহরি হতাদরতযা গতা সা কুপিতেব .. ১..

কিং করিষ্যতি কিং বদিষ্যতি সা চিরং বিরহেণ .
কিং ধনেন জনেন কিং মম জীবনেন গৃহেণ .. ২..

চিন্তযামি তদাননং কুটিলভ্রু কোপভরেণ .
শোণপদ্মমিবোপরি ভ্রমতাকুলং ভ্রমরেণ .. ৩..

তামহং হৃদি সংগতামনিশং ভৃশং রমযামি .
কিং বনেঽনুসরামি তামিহ কিং বৃথা বিলপামি .. ৪..

তন্বি খিন্নমসূযযা হৃদযং তবাকলযামি .
তন্ন বেদ্মি কুতো গতাসি ন তেন তেঽনুনযামি .. ৫..

দৃশ্যতে পুরতো গতাগতমেব মে বিদধাসি .
কিং পুরেব সমংভ্রমং পরিরম্ভণং ন দদাসি .. ৬..

ক্ষম্যতামপরং কদাপি তবেদৃশং ন করোমি .
দেহি সুন্দরি দর্শনং মম মন্মথেন দুনোমি .. ৭..

বর্ণিতং জযদেবকেন হরেরিদং প্রবণেন .
কিন্দুবিল্বসমুদ্রসম্ভবরোহিণীরমণেন .. ৮..

হৃদি বিসলতাহারো নাযং ভুজঙ্গমনাযকঃ
কুবলযদলশ্রেণী কণ্ঠে ন সা গরলদ্যুতিঃ .
মলযজরজো নেদং ভস্ম প্রিযারহিতে মযি
প্রহর ন হরভ্রান্ত্যানঙ্গ ক্রুধা কিমু ধাবসি .. ২০..

পাণৌ মা কুরু চূতসাযকমমুং মা চাপমারোপয
ক্রীডানির্জিতবিশ্ব মূর্ছিতজনাঘাতেন কিং পৌরুষম্ .
তস্যা এব মৃগীদৃশো মনসিজপ্রেঙ্খত্কটাক্ষাশুগ-
শ্রেণীজর্জরিতং মনাগপি মনো নাদ্যাপি সংধুক্ষতে .. ২১..

ভ্রূচাপে নিহিতঃ কটাক্ষবিশিখো নির্মাতু মর্মব্যথাং
শ্যামাত্মা কুটিলঃ করোতু কবরীভারোঽপি মারোদ্যমম্ .
মোহং তাবদযং চ তন্বি তনুতাং বিম্বাদরো রাগবন্
সদ্বৃত্তস্তনমণ্দলস্তব কথং প্রাণৈর্মম ক্রীডতি .. ২২..

তানি স্পর্শসুখানি তে চ তরলাঃ স্নিগ্ধ দৃশোর্বিভ্রম-
স্তদ্বক্ত্রাম্বুজসৌরভং স চ সুধাস্যন্তী গিরাং বক্রিমা .
সা বিম্বাধরমাধুরীতি বিষযাসঙ্গেঽপি চেন্মানসং
তস্যা লগ্নসমাধি হন্ত বিরহব্যাধিঃ কথং বর্ধতে .. ২৩..

ভ্রূপল্লবং ধনুরপাঙ্গতরঙ্গিতনি
বাণাঃ গুণঃ শ্রবণপালিরিতি স্মরেণ .
তস্যামনঙ্গজযজঙ্গমদেবতাযাম্
অস্ত্রাণি নির্জিতজগন্তি কিমর্পিতানি .. ২৪..

          .. ইতি শ্রীগিতগোবিন্দে মুগ্ধমধুসূদনো নাম তৃতীযঃ
সর্গঃ ..

          . . চতুর্থঃ সর্গঃ ..
           .. স্নিগ্ধমধুসূদনঃ ..

যমুনাতীরবানীরনিকুঞ্জে মন্দমাস্থিতম্ .
প্রাহ প্রেমভরোদ্ভ্রান্তং মাধবং রাধিকাসখী .. ২৫..

          .. গীতম্ ৮..

নিন্দতি চন্দনমিন্দুকিরণমনু বিন্দতি খেদমধীরম্ .
ব্যালনিলযমিলনেন গরলমিব কলযতি মলযসমীরম্ ..
সা বিরহে তব দীনা
মাধব মনসিজবিশিখভযাদিব ভাবনযা ত্বযি লীনা .. ১..

অবিরলনিপতিতমদনশরাদিব ভবদবনায বিশালম্ .
স্বহৃদযর্মণী বর্ম করোতি সজলনলিনীদলজালম্ .. ২..

কুসুমবিশিখশরতল্পমনল্পবিলাসকলাকমনীযম্ .
ব্রতমিব তব পরিরম্ভসুখায করোতি কুসুমশযনীযম্ .. ৩..

বহতি চ গলিতবিলোচনজলভরমাননকমলমুদারম্ .
বিধুমিব বিকটবিধুন্তুদদন্তদলনগলিতামৃতধারম্ .. ৪..

বিলিখতি রহসি কুরঙ্গমদেন ভবন্তমসমশরভূতম্ .
প্রণমতি মকরমধো বিনিধায করে চ শরং নবচূতম্ .. ৫..

প্রতিপদমিদমপি নিগততি মাধব তব চরণে পতিতাহম্ .
ত্বযি বিমুখে মযি সপদি সুধানিধিরপি তনুতে তনুদাহম্
.. ৬..

ধ্যানলযেন পুরঃ পরিকল্প্য ভবন্তমতীব দুরাপম্ .
বিলপতি হসতি বিষীদতি রোদিতি চঞ্চতি মুঞ্চতি তাপম্
.. ৭..

শ্রীজযদেবভণিতমিদমধিকং যদি মনসা নটনীযম্ .
হরিবিরহাকুলবল্লবযুবতিসখীবচনং পঠনীযম্ .. ৮..

আবাসো বিপিনাযতে প্রিযসখীমালাপি জালাযতে
তাপোঽপি শ্বসিতেন দাবদহনজ্বালাকলাপাযতে .
সাপি ত্বদ্বিরহেণ হন্ত হরিণীরূপাযতে হা কথং
কন্দর্পোঽপি যমাযতে বিরচযঞ্শার্দূলবিক্রীডিতম্ .. ২৬..

          .. গীতম্ ৯..

স্তনবিনিহিতমপি হারমুদারম্ .
সা মনুতে কৃশতনুরতিভারম্ ..
রাধিকা বিরহে তব কেশব .. ১..

সরসমসৃণমপি মলযজপঙ্কম্ .
পশ্যতি বিষমিব বপুষি সশঙ্কম্ .. ২..

শ্বসিতপবনমনুপমপরিণাহম্ .
মদনদহনমিব বহতি সদাহম্ .. ৩..

দিশি দিশি কিরতি সজলকণজালম্ .
নযননলিনমিব বিগলিতনালম্ .. ৪..

নযনবিষযমপি কিসলযতল্পম্ .
কলযতি বিহিতহুতাশবিকল্পম্ .. ৫..

ত্যজতি ন পাণিতলেন কপোলম্ .
বালশশিনমিব সাযমলোলম্ .. ৬..

হরিরিতি হরিরিতি জপতি সকামম্ .
বিরহবিহিতমরণেন নিকামম্ .. ৭..

শ্রীজযদেবভণিতমিতি গীতম্ .
সুখযতু কেশবপদমুপুনীতম্ .. ৮..

সা রোমাঞ্চতি সীত্করোতি বিলপত্যুত্ক্ম্পতে তাম্যতি
ধ্যাযত্যুদ্ভ্রমতি প্রমীলতি পতত্যুদ্যাতি মূর্চ্ছত্যপি .
এতাবত্যতনুজ্বরে বরতনুর্জীবেন্ন কিং তে রসাত্
স্বর্বৈদ্যপ্রতিম প্রসীদসি যদি ত্যক্তোঽন্যথা নান্তকঃ .. ২৭..

স্মরাতুরাং দৈবতবৈদ্যহৃদ্য
ত্বদঙ্গসঙ্গামৃতমাত্রসাধ্যাম্ .
বিমুক্তবাধাং কুরুষে ন রাধা-
মুপেন্দ্র বজ্রাদপি দারুণোঽসি .. ২৮..

কন্দর্পজ্বরসংজ্বরস্তুরতনোরাশ্চর্যমস্যাশ্চিরং
চেতশ্চন্দনচন্দ্রমঃকমলিনীচিন্তাসু সংতাম্যতি .
কিংতু ক্লান্তিবশেন শীতলতনুং ত্বামেকমেব প্রিযং
ধ্যাযন্তী রহসি স্থিতা কথমপি ক্ষীণা ক্ষণং প্রাণিতি
.. ২৯..

ক্ষণমপি বিরহঃ পুরা ন সেহে
নযননিমীলনখিন্নযা যযা তে .
শ্বসিতি কথমসৌ রসালশাখাং
চিরবিরহেণ বিলোক্য পুষ্পিতাগ্রাম্ .. ৩০..

          .. ইতি গীতগোবিন্দে স্নিগ্ধমাধবো নাম
           চতুর্থঃ সর্গঃ ..

           .. পঞ্চমঃ সর্গঃ ..

           .. সাকাংক্ষপুণ্ডরীকাক্ষঃ ..

অহমিহ নিবসামি যাহি রাধাং
অনুনয মদ্বচনেন চানযেথাঃ .
ইতি মধুরিপুণা সখী নিযুক্তা
স্বযমিদমেত্য পুনর্জগাদ রাধাম্ .. ৩১..

           .. গীতম্ ১০..

বহতি মলযসমীরে মদনমুপনিধায .
স্ফুটতি কুসুমনিকরে বিরহিহৃদযদলনায ..
তব বিরহে বনমালী সখি সীদতি .. ১..

দহতো শিশিরমযূখে মরণমনুকরোতি .
পততি মদনবিশিখে বিলপতি বিকলতরোঽতি .. ২..

ধ্বনতি মধুপসমূহে শ্রবণমপিদদাতি .
মনসি বলিতবিরহে  নিশি নিশি রুজমুপযতি .. ৩..

বসতি বিপিনবিতানে ত্যজতি ললিতধাম .
লুঠতি ধরণিশযনে বহু বিলপতি তব নাম .. ৪..

ভণতি কবিজযদেবে বিরহিবিলসিতেন .
মনসি রভসবিভবে হরিরুদযতু সুকৃতেন .. ৫..

পূর্বং যত্র সমং ত্বযা রতিপতেরাসাদিতঃ সিদ্ধয-
স্তস্মিন্নেব নিকুঞ্জমন্মথমহাতীর্থে পুনর্মাধবঃ .
ধ্যাযংস্ত্বামনিশং জপন্নপি তবৈবালাপমাত্রাবলীং
ভূযস্ত্বত্কুচকুম্ভনির্ভরপরীরম্ভামৃতং বাঞ্ছতি .. ৩২..

          .. গীতম্ ১১ ..

রতিসুখসারে গতমভিসারে মদনমনোহরবেশম্ .
ন কুরু নিতম্বিনি গমনবিলম্বনমনুসর তং হৃদযেশম্ ..
ধীরসমীরে যমুনাতীরে বসতি বনে বনমালী .. ১..

নাম সমেতং কৃতসংকেতং বাদযতে মৃদুবেণুম্ .
বহু মনুতে ননু তে তনুসংগতপবনচলিতমপি রেণুম্ .. ২..

পততি পতত্রে বিচলতি পত্রে শঙ্কিতভবদুপযানম্ .
 রচযতি শযনং সচকিতনযনং পশ্যতি তব পন্থানম্ .. ৩..

মুখরমধীরং ত্যজ মঞ্জীরং রিপুমিব কেলিসুলোলম্ .
চল সখি কুঞ্জং সতিমিরপুঞ্জং শীলয নীলনিচোলম্ .. ৪..

উরসি মুরারেরুপহিতহারে ঘন ইব তরলবলাকে .
তডিদিব পীতে রতিবিপরীতে রাজসি সুকৃতবিপাকে .. ৫..

বিগলিতবসনং পরিহৃতরসনং ঘটয জঘনমপিধানম্ .
কিসলযশযনে পঙ্কজনযনে নিধিমিব হর্ষনিদানম্ .. ৬..

হরিরভিমানী রজনিরিদানীমিযমপি যাতি বিরামম্ .
কুরু মম বচনং সত্বররচনং পূরয মধুরিপুকামম্ .. ৭..

শ্রীজযদেবে কৃতহরিসেবে ভণতি পরমরমণীযম্ .
প্রমুদিতহৃদযং হরিমতিসদযং নমত সুকৃতকমনীযম্ .. ৮..

বিকিরতি মুহুঃ শ্বাসানাশাঃ পুরো মুহুরীক্ষতে
প্রবিশতি মুহুঃ কুঞ্জং গুঞ্জন্মুহুর্বহু তাম্যতি .
রচযতি মুহুঃ শয্যাং পর্যাকুলং মুহুরীক্ষতে
মদনকদনক্লান্তঃ কান্তে প্রিযস্তব বর্ততে .. ৩৩..

ত্বদ্বাম্যেন সমং সমগ্রমধুনা তিগ্মাংশুরস্তং গতো
গোবিন্দস্য মনোরথেন চ সমং প্রাপ্তং তমঃ সান্দ্রতাম্ .
কোকানাং করুণস্বনেন সদৃশী দীর্ঘা মদভ্যর্থনা
তন্মুগ্ধে বিফলং বিলম্বনমসৌ রম্যোঽভিসারক্ষণঃ .. ৩৪..

আশ্লেষাদনু চুম্বনাদনু নখোল্লেখাদনু স্বান্তজ-
প্রোদ্বোধাদনু সংভ্রমাদনু রতারম্ভাদনু প্রীতযোঃ .
অন্যার্থং গতযোর্ভ্রমান্মিলিতযোঃ সম্ভাষণৈর্জানতো-
র্দম্পত্যোরিহ কো ন কো ন তমসি ব্রীডাবিমিশ্রো রসঃ .. ৩৫..

সভযচকিতং বিন্যস্যন্তীং দৃশং তিমিরে পথি
প্রতিতরু মুহুঃ স্থিত্বা মন্দং পদানি বিতন্বতীম্ .
কথমপি রহঃ প্রাপ্তামঙ্গৈরনঙ্গতরঙ্গিভিঃ
সুমুখি সুভগঃ পশ্যন্স ত্বামুপৈতু ঋতার্থতাম্ .. ৩৬..

          .. ইতি শ্রীগীতগোবিন্দেঽভিসারিকবর্ণনে
           সাকাঙ্ক্ষপুণ্ডরীকাক্ষো নাম
           পঞ্চমঃ সর্গঃ ..

          .. ষষ্ঠঃ সর্গঃ ..

          .. কুণ্ঠবৈকুণ্ঠঃ ..

অথ তাং গন্তুমশক্তাং চিরমনুরক্তাং লতাগৃহে দৃষ্ট্বা .
তচ্চরিতং গোবিন্দে মনসিজমন্দে সখী প্রাহ .. ৩৭..

পশ্যতি দিশি দিশি রহসি ভবন্তম্ .
তদধরমধুরমধূনি পিবন্তম্ ..
নাথ হরে সীদতি রাধা বাসগৃহে .. ১..

ত্বদভিসরণরভসেন বলন্তী .
পততি পদানি কিযন্তি চলন্তী .. ২..

বিহিতবিশদবিসকিসলযবলযা .
জীবতি পরমিহ তব রতিকলযা .. ৩..

মুহুরবলোকিতমণ্ডনলীলা .
মধুরিপুরহমিতি ভাবনশীলা .. ৪..

ত্বরিতমুপৈতি ন কথমভিসারম্ .
হরিরিতি বদতি সখীমনুবারম্ .. ৫..

শ্লিষ্যতি চুম্বতি জলধরকল্পম্ .
হরিরুপগত ইতি তিমিরমনল্পম্ .. ৬..

ভবতি বিলম্বিনি বিগলিতলজ্জা .
বিলপতি রোদিতি বাসকসজ্জা .. ৭..

শ্রীজযদেবকবেরিদমুদিতম্ .
রসিকজনং তনুতামতিমুদিতম্ .. ৮..

বিপুলপুলকপালিঃ স্ফীতসীত্কারমন্ত-
র্জনিতজডিমকাকুব্যাকুলং ব্যাহরন্তী .
তব কিতব বিধাযামন্দকন্দর্পচিন্তাং
রসজলধিনিমগ্না ধ্যানলগ্না মৃগাক্ষী .. ৩৮..

অঙ্গেষ্বাভরণং করোতি বহুশঃ পতেঽপি সংচারিণি
প্রাপ্তং ত্বাং পরিশঙ্কতে বিতনুতে শয্যাং চিরং ধ্যাযতি .
ইত্যাকল্পবিকল্পতল্পরচনাসংকল্পলীলাশত-
ব্যাসক্তাপি বিনা ত্বযা বরতনুর্নৈষা নিশাং নেষ্যতি .. ৩৯..

          .. ইতি গীতগোবিন্দে বাসকসজ্জাবর্ণনে
           কুণ্ঠবৈকুণ্ঠো নাম
          ষষ্টঃ সর্গঃ ..

           ..  সপ্তমঃ সর্গঃ ..
          .. নাগরনারাযণঃ ..

অত্রান্তরে চ কুলটাকুলবর্ত্মপাত-
সংজাতপাতক ইব স্ফুটলাঞ্ছনশ্রীঃ .
বৃন্দাবনান্তরমদীপযদংশুজালৈ-
র্দিক্সুন্দরীবদনচন্দনবিন্দুরিন্দুঃ .. ৪০..

প্রসরতি শশধরবিম্বে বিহিতবিলম্বে চ মাধবে বিধুরা .
বিরচিতবিবিধবিলাপং সা পরিতাপং চকারোচ্চৈঃ .. ৪১..

          .. গীতং ১৩..

কথিতসমযেঽপি হরিরহহ ন যযৌ বনম্ .
মম বিফলমিদমমলরূপমপি যৌবনম্ ..
যামি হে কমিহ শরণং সখীজনবচনবঞ্চিতা .. ১..

যদনুগমনায নিশি গহনমপি শীলিতম্ .
তেন মম হৃদযমিদমসমশরকীলিতম্ .. ২..

মম মরণমেব বরমতিবিতথকেতনা .
কিমিহ বিষহামি বিরহানলচেতনা .. ৩..

মামহহ বিধুরযতি মধুরমধুযামিনী .
কাপি হরিমনুভবতি কৃতসুকৃতকামিনী .. ৪..

অহহ কলযামি বলযাদিমণীভূষণম্ .
হরিবিরহদহনবহনেন বহুদূষণম্ .. ৫..

কুসুমসুকুমারতনুমতনুশরলীলযা .
স্রগপি হৃদি হন্তি মামতিবিষমশীলযা .. ৬..

অহমিহ নিবসামি নগণিতবনবেতসা .
স্মরতি মধুসূদনো মামপি ন চেতসা .. ৭..

হরিচরণশরণজযদেবকবিভারতী .
বসতু হৃদি যুবতিরিব কোমলকলাবতী .. ৮..

তত্কিং কামপি কামিনীমভিসৃতঃ কিং বা কলাকেলিভি-
র্বদ্ধো বন্ধুভিরন্ধকারিণি বনোপান্তে কিমু ভ্রাম্যতি .
কান্তঃ ক্লান্তমনা মনাগপি পথি প্রস্থাতুমেবাক্ষমঃ
সংকেতীকৃতমঞ্জুবঞ্জুললতাকুঞ্জেঽপি যন্নাগতঃ .. ৪২..

অথাগতং মাধবমন্তরেণ
সখীমিযং বীক্ষ্য বিষাদমূকাম্ .
বিশঙ্ক্মানা রমিতং কযাপি
জনার্দনং দৃষ্টবদেতদাহ .. ৪৩..

          .. গীতম্ ১৪..

স্মরসমরোচিতবিরচিতবেশা .
গলিতকুসুমদরবিলুলিতকেশা ..
কাপি মধুরিপুণা বিলসতি যুবতিরধিকগুণা .. ১..

হরিপরিরম্ভণবলিতবিকারা .
কুচকলশোপরি তরলিতহারা .. ২..

বিচলদলকললিতাননচন্দ্রা .
তদধরপানরভসকৃততন্ত্রা .. ৩..

চঞ্চলকুণ্ডলদলিতকপোলা .
মুখরিতরসনজঘনগলিতলোলা .. ৪..

দযিতবিলোকিতলজ্জিতহসিতা .
বহুবিধকূজিতরতিরসরসিতা .. ৫..

বিপুলপুলকপৃথুবেপথুভঙ্গা .
শ্বসিতনিমীলিতবিকসদনঙ্গা .. ৬..

শ্রমজলকণভরসুভগশরীরা .
পরিপতিতোরসি রতিরণধীরা .. ৭..

শ্রীজযদেবভণিতহরিরমিতম্ .
কলিকলুষং জনযতু পরিশমিতম্ .. ৮..

বিরহপাণ্ডুমুরারিমুখাম্বুজ-
দ্যুতিরিযং তিরযন্নপি চেতনাম্ .
বিধুরতীব তনোতি মনোভুবঃ
সহৃদযে হৃদযে মদনব্যথাম্ .. ৪৪..

          .. গীতম্ ১৫..

সমুদিতমদনে রমণীবদনে চুম্বনবলিতাধরে .
মৃগমদতিলকং লিখতি সপুলকং মৃগমিব রজনীকরে ..
রমতে যমুনাপুলিনবনে বিজযী মুরারিরধুনা .. ১..

ঘনচযরুচিরে রচযতি চিকুরে তরলিততরুণাননে .
কুরবককুসুমং চপলাসুষমং রতিপতিমৃগকাননে .. ২..

ঘটযতি সুঘনে কুচযুগগগনে মৃগমদরুচিরূষিতে .
মণিসরমমলং তারকপটলং নখপদশশিভূষিতে .. ৩..

জিতবিসশকলে মৃদুভুজযুগলে করতলনলিনীদলে .
মরকতবলযং মধুকরনিচযং বিতরতি হিমশীতলে .. ৪..

রতিগৃহজঘনে বিপুলাপঘনে মনসিজকনকাসনে .
মণিমযরসনং তোরণহসনং বিকরতি কৃতবাসনে .. ৫..

চরণকিসলযে কমলনিলযে নখমণিগণপূজিতে .
বহিরপবরণং যাবকভরণং জনযতি হৃদি যোজিতে .. ৬..

রমযতি সদৃশং কামপি সুভৃশং খলহলধরসোদরে .
কিমফলমবসং চিরমিহ বিরসং বদ সখি বিটপোদরে .. ৭..

ইহ রসভণনে কৃতহরিগুণনে মধুরিপুপদসেবকে .
কলিযুগচরিতং ন বসতু দুরিতং কবিনৃপজযদেবকে .. ৮..

নাযাতঃ সখি নির্দযো যদি শঠস্ত্বং দূতি কিং দূযসে
স্বচ্ছন্দং বহুবল্লভঃ স রমতে কিং তত্র তে দূষণম্ .
পশ্যাদ্য প্রিযসম্গমায দযিতস্যাকৃষ্যমাণং গণৈ-
রুত্কণ্ঠার্তিভরাদিব স্ফুটদিদং চেতঃ স্বযং যাস্যতি .. ৪৫..

          .. গীতম্ ১৬..

অনিলতরলকুবলযনযনেন .
তপতি ন সা কিসলযশযনেন ..
সখি যা রমিতা বনমালিনা .. ১..

বিকসিতসরসিজললিতমুখেন .
স্ফুটতি ন সা মনসিজবিশিখেন .. ২..

অমৃতমধুরমৃদুতরবচনেন .
জ্বলতি ন সা মলযজপবনেন .. ৩..

স্থলজলরুহরুচিকরচরণেন .
লুঠতি ন সা হিমকরকিরণেন .. ৪..

সজলজলদসমুদযরুচিরেণ .
দলতি ন সা হৃদি চিরবিরহেণ .. ৫..

কনকনিকষরুচিশুচিবসনেন .
শ্বসতি ন সা পরিজনহসনেন .. ৬..

সকলভুবনজনবরতরুণেন .
বহতি ন সা রুজমতিকরুণেন .. ৭..

শ্রীজযদেবভণিতবচনেন .
প্রবিশতু হরিরপি হৃদযমনেন .. ৮..

মনোভবানন্দন চন্দনানিল
প্রসীদ রে দক্ষিণ মুঞ্চ বামতাম্ .
ক্ষণং জগত্প্রাণ বিধায মাধবং
পুরো মম প্রাণহরো ভবিষ্যসি .. ৪৬..

রিপুরিব সখীসংবাসোঽযং শিখীব হিমানিলো
বিষমিব সুধারশ্মির্যস্মিন্দুনোতি মনোগতে .
হৃদযমদযে তস্মিন্নেবং পুনর্বলতে বলাত্
কুবলযদৃশাং বামঃ কামো নিকামনিরঙ্কুশঃ .. ৪৭..

বাধাং বিধেহি মলযানিল পঞ্চবাণ
প্রাণান্গৃহাণ ন গৃহং পুনরাশ্রযিষ্যে .
কিং তে কৃতান্তভগিনি ক্ষমযা তরঙ্গৈ-
রঙ্গানি সিঞ্চ মম শাম্যতু দেহদাহঃ .. ৪৮..

          .. ইতি গীতগোবিন্দে বিপ্রলব্ধাবর্ণনে
           নাগনারাযণো নাম
           সপ্তমঃ সর্গঃ ..

           .. অষ্টমঃ সর্গঃ ..

          .. বিলক্ষ্যলক্ষ্মীপতিঃ ..

অথ কথমপি যামিনীং বিনীয
স্মরশরজর্জরিতাপি সা প্রভাতে .
অনুনযবচনং বদন্তমগ্রে
প্রণতমপি প্রিযমাহ সাভ্যসূযম্ .. ৪৯..

          .. গীতম্ ১৭..

রজনিজনিতগুরুজাগররাগকষাযিতমলসনিবেশম্ .
বহতি নযনমনুরাগমিব স্ফুটমুদিতরসাভিনিবেশম্ ..
হরিহরি যাহি মাধব যাহি কেশব মা বদ কৈতববাদং
তামনুসর সরসীরুহলোচন যা তব হরতি বিষাদম্ .. ৫০..

কজ্জলমলিনবিলোচনচুম্বনবিরচিতনীলিমরূপম্ .
দশনবসনমরুণং তব কৃষ্ণ তনোতি তনোরনুরূপম্ .. ২..

বপুরনুহরতি তব স্মরসঙ্গরখরনখরক্ষতরেখম্ .
মরকতশকলকলিতকলধৌতলিপিরেব রতিজযলেখম্ .. ৩..

চরণকমলগলদলক্তকসিক্তমিদং তব হৃদযমুদারম্ .
দর্শযতীব বহির্মদনদ্রুমনবকিসলযপরিবারম্ .. ৪..

দশনপদং ভবদধরগতং মম জনযতি চেতসি খেদম্ .
কথযতি কথমধুনাপি মযা সহ তব বপুরেতদভেদম্ .. ৫..

বহিরিব মলিনতরং তব কৃষ্ণ মনোঽপি ভবিষ্যতি নূনম্ .
কথমথ বঞ্চযসে জনমনুগতমসমশরজ্বরদূনম্ .. ৬..

ভ্রমতি ভবানবলাকবলায বনেষু কিমত্র বিচিত্রম্ .
প্রথযতি পূতনিকৈব বধূবধনির্দযবালচরিত্রম্ .. ৭..

শ্রীজযদেবভণিতরতিবঞ্চিতখণ্ডিতযুবতিবিলাপম্ .
শৃণুত সুধামধুরং বিবুধা বিবুধালযতোঽপি দুরাপম্ .. ৮..

তদেবং পশ্যন্ত্যাঃ প্রসরদনুরাগং বহিরিব
প্রিযাপাদালক্তচ্ছুরিতমরুণচ্ছাযহৃদযম্ .
মমাদ্য প্রখ্যাতপ্রণযভরভঙ্গেন কিতব
ত্বদালোকঃ শোকাদপি কিমপি লজ্জাং জনযতি .. ৫০..

           ইতি গীতগোবিন্দে খণ্ডিতাবর্ণনে
           বিলক্ষ্যলক্ষ্মীপতির্নাম
            অষ্ঠমঃ সর্গঃ ..

           .. নবমঃ সর্গঃ ..
          .. মন্দমুকুন্দঃ ..

তামথ মন্মথখিন্নাং
রতিরসভিন্নাং বিষাদসম্পন্নাম্ .
অনুচিন্তিতহরিচরিতাং
কলহান্তরিতমুবাচ সখী .. ৫১..

          .. গীতম্ ১৮..

হরিরভিসরতি বহতি মধুপবনে .
কিমপরমধিকসুখং সখি ভুবনে ..
মাধবে মা কুরু মানিনি মানমযে  .. ১..

তালফলাদপি গুরুমতিসরসম্ .
কিং বিফলীকুরুষে কুচকলশম্ .. ২..

কতি ন কথিতমিদমনুপদমচিরম্ .
মা পরিহর হরিমতিশযরুচিরম্ .. ৩..

কিমিতি বিষীদসি রোদিষি বিকলা .
বিহসতি যুবতিসভা তব সকলা .. ৪..

সজলনলিনীদলশীতলশযনে .
হরিমবলোক্য সফলয্ নযনে .. ৫..

জনযসি মনসি কিমিতি গুরুখেদম্ .
শৃণু মম বচনমনীহিতভেদম্ .. ৬..

হরিরুপযাতু বদতু বহুমধুরম্ .
কিমিতি করোষি হৃদযমতিবিধুরম্ .. ৭..

শ্রীজযদেবভণিতমতিললিতম্ .
সুখযতু রসিকজনং হরিচরিতম্ .. ৮..

স্নিগ্ধে যত্পরুষাসি যত্প্রণমতি স্তব্ধাসি যদ্রাগিণি
দ্বেষস্থাসি যদুন্মুখে বিমুখতাং যাতাসি তস্মিন্প্রিযে .
যুক্তং তদ্বিপরীতকারিণি তব শ্রীখণ্ডচর্চা বিষং
শীতাংশুস্তপনো হিমং হুতবহঃ ক্রীডামুদো যাতনাঃ .. ৫২..

          .. ইতি গীতগোবিন্দে কলহান্তরিতাবর্ণনে
           মন্দমুকুন্দো নাম
           নবমঃ সর্গঃ ..

           .. দশমঃ সর্গঃ ..
           .. চতুরচতুর্ভুজঃ ..

অত্রান্তরে মসৃণরোষবশামসীম্-
নিঃশ্বাসনিঃসহমুখীং সুমুখীমুপেত্য .
সব্রীডমীক্ষিতসখীবদনাং দিনান্তে
সানন্দগদ্গদপদং হরিরিত্যুবাচ .. ৫৩..

          .. গীতম্ ১৯..

বদসি যদি কিংচিদপি দন্তরুচিকৌমুদী
হরতি দরতিমিরমতিঘোরম্ .
স্ফুরদধরসীধবে তব বদনচন্দ্রমা
রোচযতু লোচনচকোরম্ ..
প্রিযে চারুশীলে মুঞ্চ মযি মানমনিদানং
সপদি মদনানলো দহতি মম মানসং
দেহি মুখকমলমধুপানম্ .. ১..

সত্যমেবাসি যদি সুদতি মযি কোপিনী
দেহি খরনখশরঘাতম্ .
ঘটয ভুজবন্ধনং জনয রদখণ্ডনং
যেন বা ভবতি সুখজাতম্ .. ২..

ত্বমসি মম ভূষণং ত্বমসি মম জীবনং
ত্বমসি ভবজলধিরত্নম্ .
ভবতু ভবতীহ মযি সততমনোরোধিনি
তত্র মম হৃদযমতিরত্নম্ .. ৩..

নীলনলিনাভমপি তন্বি তব লোচনং
ধারযতি কোকনদরূপম্ .
কুসুমশরবাণভাবেন যদি রঞ্জযসি
কৃষ্ণমিদমেতদনুরূপম্ .. ৪..

স্ফুরতু কুচকুম্ভযোরুপরি মণিমঞ্জরী
রঞ্জযতু তব হৃদযদেশম্ .
রসতু রশনাপি তব ঘনজঘনমণ্ডলে
ঘোষযতু মন্মথনিদেশম্ .. ৫..

স্থলকমলগঞ্জনং মম হৃদযরঞ্জনং
জনিতরতিরঙ্গপরভাগম্ .
ভণ মসৃণবাণি করবাণি পদপঙ্কজং
সরসলসদলক্তকরাগম্ .. ৬..

স্মরগরলখণ্ডনং মম শিরসি মণ্ডনং
দেহি পদপল্লবমুদারম্ .
জ্বলতি মযি দারুণো মদনকদনারুণো
হরতু তদুপাহিতবিকারম্ .. ৭..

ইতি চটুলচাটুপটুচারু মুরবৈরিণো
রাধিকামধি বচনজাতম্ .
জযতি পদ্মাবতীরমণজযদেবকবি-
ভারতীভণিতমতিশাতম্ .. ৮..

পরিহর কৃতাতঙ্কে শঙ্কাং ত্বযা সততং ঘন-
স্তনজঘনযাক্রান্তে স্বান্তে পরানবকাশিনি .
বিশতি বিতনোরন্যো ধন্যো ন কোঽপি মমান্তরং
স্তনভরপরীরম্ভারম্ভে বিধেহি বিধেযতাম্ .. ৫৪..
মুগ্ধে বিধেহি মযি নির্দযদন্তদংশ-
দোর্বল্লিবন্ধনিবিডস্তনপীডনানি .
চণ্ডি ত্বমেব মুদমঞ্চ ন পঞ্চবাণ-
চণ্ডালকাণ্ডদলনাদসবঃ প্রযান্তু .. ৫৫..
ব্যথযতি বৃথা মৌনং তন্বি প্রপঞ্চয পঞ্চমং
তরুণী মধুরালাপৈস্তাপং বিনোদয দৃষ্টিভিঃ .
সুমুখি বিমুখীভাবং তাবদ্বিমুঞ্চ ন মুঞ্চ মাং
স্বযমতিশযস্নিগ্ধো মুগ্ধে প্রিযিঽহমুপস্থিতঃ .. ৫৬..
বন্ধূকদ্যুতিবান্ধবোঽযমধরঃ স্নিগ্ধো মধূকচ্চবি-
র্গণ্ডশ্চণ্ডি চকাস্তি নীলনলিনশ্রীমোচনং লোচনম্ .
নাসাভ্যেতি তিলপ্রসূনপদবীং কুন্দাভদান্তি প্রিযে
প্রাযস্ত্বন্মুখসেবযা বিজযতে বিশ্বং স পুষ্পাযুধঃ .. ৫৭..
দৃশৌ তব মদালসে বদনমিন্দুসংদীপকং
গতির্জনমনোরমা বিধুতরম্ভমূরুদ্বযম্ .
রতিস্তব কলাবতী রুচিরচিত্রলেখে ভ্রুবা-
বহো বিবুধযৌবনং বহসি তন্বী পৃথ্বীগতা .. ৫৮..

          .. ইতি শ্রীগীতগোবিন্দে মানিনীবর্ণনে
           চতুরচতুর্ভুজো নাম
          দশমঃ সর্গঃ ..

           .. একাদশঃ সর্গঃ ..

          .. সানন্দদামোদরঃ ..

সুচিরমনুনযনে প্রীণযিত্বা মৃগাক্ষীং
গতবতি কৃতবেশে কেশবে কুঞ্জশয্যাম্ .
রচিতরুচিরভূষাং দৃষ্টিমোষে প্রদোষে
স্ফুরতি নিরবসাদাং কাপি রাধাং জগাদ .. ৫৯..

          .. গীতম্ ২০..

বিরচিতচাটুবচনরচনং চরণে রচিতপ্রণিপাতম্ .
সংপ্রতি মঞ্জুলবঞ্জুলসীমনি কেলিশযনমনুযাতম্ ..
মুগ্ধে মধুমথনমনুগতমনুসর রাধিকে .. ১..

ঘনজঘনস্তনভারভরে দরমন্থরচরণবিহারম্ .
মুখরিতমণীমঞ্জীরমুপৈহি বিধেহি মরালবিকারম্ .. ২..

শৃণু রমণীযতরং তরুণীজনমোহনমধুপবিরাবম্ .
কুসুমশরাসনশাসনবন্দিনি পিকনিকরে ভজ ভাবম্ .. ৩..

অনিলতরলকিসলযনিকরেণ করেণ লতানিকুরম্বম্ .
প্রেরণমিব করভোরু করোতি গতিং প্রতিমুঞ্চ বিলম্বম্ .. ৪..

স্ফুরিতমনঙ্গতরঙ্গবশাদিব সূচিতহরিপরিরম্ভম্ .
পৃচ্ছ মনোহরহারবিমলজলধারমমুং কুচকুম্ভম্ .. ৫..

অধিগতমখিলসখীভিরিদং তব বপুরপি রতিরণসজ্জম্ .
চণ্ডি রসিতরশনারবডিণ্ডিমমভিসর সরসমলজ্জম্ .. ৬..

স্মরশরসুভগনখেন করেণ সখীমবলম্ব্য সলীলম্ .
চল বলযক্বণীতৈরববোধয হরমপি নিজগতিশীলম্ .. ৭..

শ্রীজযদেবভণিতমধরীকৃতহারমুদাসিতবামম্ .
হরিবিনিহিতমনসামধিতিষ্ঠতু কণ্ঠতটীমবিরামম্ .. ৮..

সা মাং দ্রক্ষ্যতি বক্ষ্যতি স্মরকথাং প্রত্যঙ্গমালিঙ্গনৈঃ
প্রীতিং যাস্যতি রম্যতে সখি সমাগত্যেতি চিন্তাকুলঃ .
স ত্বাং পশ্যতি বেপতে পুলকযত্যানন্দতি স্বিদ্যতি
প্রত্যুদ্গচ্ছতি মূর্চ্ছতি স্থিরতমঃপুঞ্জে নিকুঞ্জে প্রিযঃ .. ৬০..
অক্ষ্ণোর্নিক্ষিপদঞ্জনং শ্রবণযোস্তাপিচ্ছগুচ্ছাবলীং
মূর্ধ্নি শ্যামসরোজদাম কুচযোঃ কস্তূরিকাপাত্রকম্ .
ধূর্তানামভিসারসত্বরহৃদাং বিষ্বঙ্নিকুঞ্জে সখি
ধ্বান্তং নীলনিচোলচারু সদৃশাং প্রত্যঙ্গমালিঙ্গতি .. ৬১..
কাশ্মীরগৌরবপুষামভিসারিকাণাম্
আবদ্ধরেখমভিতো রুচিমঞ্জরীভিঃ .
এতত্তমালদলনীলতমং তমিশ্রং
তত্প্রেমহেমনিকষোপলতাং তনোতি .. ৬২..
হারাবলীতরলকাঞ্চনকাঞ্চিদাম-
কেযূরকঙ্কণমণিদ্যুতিদীপিতস্য .
দ্বারে নিকুঞ্জনিলযস্যহরিং নিরীক্ষ্য
ব্রীডাবতীমথ সখী নিজগাহ রাধাম্ .. ৬৩..

          .. গীতম্ ২১..

মঞ্জুতরকুঞ্জতলকেলিসদনে .
বিলস রতিরভসহসিতবদনে ..
প্রবিশ রাধে মাধবসমীপমিহ .. ১..

নবভবদশোকদলশযনসারে .
বিলস কুচকলশতরলহারে .. ২..

কুসুমচযরচিতশুচিবাসগেহে .
বিলস কুসুমসুকুমারদেহে .. ৩..

চলমলযবনপবনসুরভিশীতে .
বিলস রসবলিতললিতগীতে .. ৪..

মধুমুদিতমধুপকুলকলিতরাবে .
বিলস মদনরসসরসভাবে .. ৫..

মধুতরলপিকনিকরনিনদমুখরে .
বিলস দশনরুচিরুচিরশিখরে .. ৬..

বিতত বহুবল্লিনবপল্লবঘনে .
বিলস চিরমলসপীনজঘনে .. ৭..

বিহিতপদ্মাবতীসুখসমাজে .
ভণতি জযদেবকবিরাজে .. ৮..

ত্বাং চিত্তেন চিরং বহন্নযমতিশ্রান্তো ভৃশং তাপিতঃ
কন্দর্পেণ তু পাতুমিচ্ছতি সুধাসংবাধবিম্বাধরম্ .
অস্যাঙ্গং তদলংকুরু ক্ষণমিহ ভ্রূক্ষেপলক্ষ্মীলব-
ক্রীতে দাস ইবোপসেবিতপদাম্ভোজে কুতঃ সম্ভ্রমঃ .. ৬৪..

সা সসাধ্বসসানন্দং গোবিন্দে লোললোচনা .
সিঞ্জানমঞ্জুমঞ্জীরং প্রবিবেশ নিবেশনম্ .. ৬৫..

          .. গীতম্ ২২..

রাধাবদনবিলোকনবিকসিতবিবিধবিকারবিভঙ্গম্ .
জলনিধিমিব বিধুমণ্ডলদর্শনতরলিততুঙ্গতরঙ্গম্ ..
হরিমেকরসং চিরমভিলষিতবিলাসং
সা দদার্শ গুরুহর্ষবশংবদবদনমনঙ্গনিবাসম্ .. ১..

হারমমলতরতারমুরসি দধতং পরিরভ্য বিদূরম্ .
স্ফুটতরফেনকদম্বকরম্বিতমিব যমুনাজলপূরম্ .. ২..

শ্যামলমৃদুলকলেবরমণ্ডলমধিগতগৌরদুকূলম্ .
নীলনলিনমিব পীতপরাগপতলভরবলযিতমূলম্ .. ৩..

তরলদৃগঞ্চলচলনমনোহরবদনজনিতরতিরাগম্ .
স্ফুটকমলোদরখেলিতখঞ্জনযুগমিব শরদি তডাগম্ .. ৪..

বদনকমলপরিশীলনমিলিতমিহিরসমকুণ্ডলশোভম্ .
স্মিতরুচিরুচিরসমুল্লসিতাধরপল্লবকৃতরতিলোভম্ .. ৫..

শশিকিরণচ্ছুরিতোদরজলধরসুন্দরসকুসুমকেশম্ .
তিমিরোদিতবিধুমণ্দলনির্মলমলযজতিলকনিবেশম্ .. ৬..

বিপুলপুলকভরদন্তুরিতং রতিকেলিকলাভিরধীরম্ .
মণিগণকিরণসমূহসমুজ্জ্বলভূষণসুভগশরীরম্ .. ৭..

শ্রীজযদেবভণিতবিভবদ্বিগুণীকৃতভূষণভারম্ .
প্রণমত হৃদি সুচিরং বিনিধায হরিং সুকৃতোদযসারম্ .. ৮..

অতিক্রম্যাপাঙ্গং শ্রবণপথপর্যন্তগমন-
প্রযাসেনেবাক্ষ্ণোস্তরলতরতারং পতিতযোঃ .
ইদানীং রাধাযাঃ প্রিযতমসমালোকসমযে
পপাত স্বেদাম্বুপ্রসর ইব হর্ষাশ্রুনিকরঃ .. ৬৬..

ভবন্ত্যাস্তল্পান্তং কৃতকপটকণ্ডূতিপিহিত-
স্মিতং যাতে গেহাদ্বহিরবহিতালীপরিজনে .
প্রিযাস্যং পশ্যন্ত্যাঃ স্মরশরসমাকূলসুভগং
সলজ্জা লজ্জাপি ব্যগমদিব দূরং মৃগদৃশঃ .. ৬৭..

          .. ইতি শ্রীগীতগোবিন্দে রাধিকামিলনে
           সানন্দদামোদরো নামৈকাদশঃ সর্গঃ ..

           .. দ্বাদশঃ সর্গঃ ..

          .. সুপ্রীতপীতাম্বরঃ ..

গতবতি সখীবৃন্দেঽমন্দত্রপাভরনির্ভর-
স্মরপরবশাকূতস্ফীতস্মিতস্নপিতাধরম্ .
সরসমনসং দৃষ্ট্বা রাধাং মুহুর্নবপল্লব-
প্রসবশযনে নিক্ষিপ্তাক্ষীমুবাচ হরঃ .. ৬৮..
          .. গীতম্ ২৩..

কিসলযশযনতলে কুরু কামিনি চরণনলিনবিনিবেশম্ .
তব পদপল্লববৈরিপরাভবমিদমনুভবতু সুবেশম্ ..
ক্ষণমধুনা নারাযণমনুগতমনুসর রাধিকে .. ১..

করকমলেন করোমি চরণমহমাগমিতাসি বিদূরম্ .
ক্ষণমুপকুরু শযনোপরি মামিব নূপুরমনুগতিশূরম্ .. ২..

বদনসুধানিধিগলিতমমৃতমিব রচয বচনমনুকূলম্ .
বিরহমিবাপনযামি পযোধররোধকমুরসি দুকূলম্ .. ৩..

প্রিযপরিরম্ভণরভসবলিতমিব পুলকিতমতিদুরবাপম্ .
মদুরসি কুচকলশং বিনিবেশয শোষয মনসিজতাপম্ .. ৪..

অধরসুধারসমুপনয ভাবিনি জীবয মৃতমিব দাসম্ .
ত্বযি বিনিহিতমনসং বিরহানলদগ্ধবপুষমবিলাসম্ .. ৫..

শশিমুখি মুখরয মণিরশনাগুণমনুগুণকণ্ঠনিদানম্ .
শ্রুতিযুগলে পিকরুতবিকলে মম শময চিরাদবসাদম্ .. ৬..

মামতিবিফলরুষা বিকলীকৃতমবলোকিতমধুনেদম্ .
মীলিতলজ্জিতমিব নযনং তব বিরম বিসৃজ রতিখেদম্
.. ৭..

শ্রীজযদেবভণিতমিদমনুপদনিগদিতমধুরিপুমোদম্ .
জনযতু রসিকজনেষু মনোরমতিরসভাববিনোদম্ .. ৮..

মারঙ্কে রতিকেলিসংকুলরণারম্ভে তযা সাহস-
প্রাযং কান্তজযায কিঞ্চিদুপরি প্রারম্ভি যত্সম্ভ্রমাত্ .
নিষ্পন্দা জঘনস্থলী শিথিলতা দোর্বল্লিরুত্কম্পিতং
বক্ষো মীলিতমক্ষি পৌরুষরসঃ স্ত্রীণাং কুতঃ সিধ্যতি .. ৬৯..

অথ কান্তং রতিক্লান্তমপি মণ্ডনবাঞ্ছযা .
নিজগাদ নিরাবাধা রাধা স্বাধীনভর্তৃকা .. ৭০..

          .. গীতম্ ২৪..

কুরু যদুনন্দন চন্দনশিশিরতরেণ করেণ পযোধরে .
মৃগমদপত্রকমত্র মনোভবমঙ্গলকলশসহোদরে .
নিজগাদ সা যদুনন্দনে ক্রীডতি হৃদযানন্দনে .. ১..

অলিকুলগঞ্জনমঞ্জনকং রতিনাযকসাযকমোচনে .
ত্বদধরচুম্বনলম্বিতকজ্জলমুজ্জ্বলয প্রিয লোচনে .. ২..

নযনকুরঙ্গতরঙ্গবিকাসনিরাসকরে শ্রুতিমণ্ডলে .
মনসিজপাশবিলাসধরে শুভবেশ নিবেশয কুণ্ডলে .. ৩..

ভ্রমরচযং রচহযন্তমুপরি রুচিরং সুচিরং মম সংমুখে .
জিতকমলে বিমলে পরিকর্ময নর্মজনকমলকং মুখে .. ৪..

মৃগমদরসবলিতং ললিতং কুরু তিলকমলিকরজনীকরে .
বিহিতকলঙ্ককলং কমলানন বিশ্রমিতশ্রমশীকরে .. ৫..

মম রুচিরে চিকুরে কুরু মানদ মানসজধ্বজচামরে .
রতিগলিতে ললিতে কুসুমানি শিখণ্ডিশিখণ্ডকডামরে .. ৬..

সরসঘনে জঘনে মম শম্বরদারণবারণকন্দরে .
মণিরশনাবসনাভরণানি শুভাশয বাসয সুন্দরে .. ৭..

শ্রীজযদেববচসি রুচিরে হৃদযং সদযং কুরু মণ্ডনে .
হরিচরণস্মরণামৃতকৃতকলিকলুষভবজ্বরখণ্ডনে .. ৮..

রচয কুচযোঃ পত্রং চিত্রং কুরুষ্ব কপোলযো-
র্ঘটয জঘনে কাঞ্চীমঞ্চ স্রজা কবরীভরম্ .
কলয বলযশ্রেণীং পাণৌ পদে কুরু নূপুরা-
বিতি নিগতিতঃ প্রীতঃ পীতাম্বরোঽপি তথাকরোত্ .. ৭১..

যদ্গান্ধ্গর্বকলাসু কৌশলমনুধ্যানং চ যদ্বৈষ্ণবং
যচ্ছৃঙ্গারবিবেকতত্বমপি যত্কাব্যেষু লীলাযিতম্ .
তত্সর্বং জযদেবপণ্ডিতকবেঃ কৃষ্ণৈকতানাত্মনঃ
সানন্দাঃ পরিশোধযন্তু সুধিযঃ শ্রীগীতগোবিন্দতঃ .. ৭২..

শ্রীভোজদেবপ্রভবস্য রামাদেবীসুতশ্রীজযদেবকস্য .
পরাশরাদিপ্রিযবর্গকণ্ঠে শ্রীগীতগোবিন্দকবিত্বমস্তু .. ৭৩..

          .. ইতি শ্রীজযদেবকৃতৌ গীতগোবিন্দে
          সুপ্রীতপীতাম্বরো নাম
          দ্বাদশঃ সর্গঃ ..

          .. ইতি গীতগোবিন্দং সমাপ্তম্ ..